Usa ka Mapuslanong Tabang sa Paghubad

BUOT sa awtor sa Bibliya, si Jehova nga Diyos, nga imantala ang maayong balita sa iyang Gingharian “ngadto sa matag nasod ug tribo ug pinulongan ug katawhan.” (Pinadayag 14:6) Buot niyang ang iyang sinulat nga Pulong daling mabatonan sa tanang tawo. Sa maong tumong, ang Bibliya gihubad sa daghang pinulongan kay sa bisan unsang basahon sa kalibotan. Libolibong maghuhubad migugol ug dakong panahon ug paningkamot aron ipahayag ang panghunahuna sa Diyos diha sa laing pinulongan.

Apan ang Bibliya dili lamang usa ka basahon nga kinahanglang hubaron. Kini sagad kaayo nga gigamit ingong tabang sa paghubad sa ubang mga sinulat. Gitandi sa daghang maghuhubad ang hubad sa mga termino sa Bibliya diha sa nagkalainlaing pinulongan aron ilang makuha ang tukmang hubad sa pipila ka pulong. Ang mga hiyas sa Bibliya ingong usa ka tabang sa paghubad gigamit na karon sa paghubad nga kompiyuter na mismo ang mohimo.

Malisdan gayod ang kompiyuter sa pagpatunghag maayong hubad. Gibati sa ubang mga eksperto nga ang kompiyuter dili gayod makahubad. Ngano? Kay ang usa ka pinulongan dili lamang han-ay sa mga pulong. Ang matag pinulongan adunay kaugalingong mga kombinasyon sa mga pulong, lagda, eksepsiyon sa maong mga lagda, panultihon, ug mga pasumbingay. Wala kaayo molampos ang mga paningkamot sa pagprograma sa kompiyuter niining bahina. Ang kadaghanang resulta sa mga hubad nga kompiyuter na mismo ang mohimo lisod kaayong sabton.

Apan karon, ang mga siyentipiko sa kompiyuter nangitag bag-ong mga paagi sa paghubad, sumala pa ni Franz Josef Och, usa ka pangunang espesyalista bahin sa paghubad nga kompiyuter na mismo ang mohimo. Pananglit buot nimong hubaron ang Hindi nga pinulongan ngadto sa Iningles. Una, pagkuhag pipila ka basahon nga nahubad na sa maong duha ka pinulongan. Dayon ipasulod kana sa kompiyuter. Ang kompiyuter magtandi nianang duha ka sinulat. Pananglitan, sa dihang ang kompiyuter makakaplag ug parehong Hindi nga pulong diha sa daghang bahin sa sinulat, ug makakaplag usab kini ug Iningles nga pulong “house” diha sa katugbang nga prase, nan sabton sa kompiyuter nga ang maong Hindi nga pulong mao ang hubad sa pulong “house.” Ug lagmit nga ang mga pulong sa duol niini maoy gigamit sa paghubit, sama sa “dako,” “gamay,” “daan,” o “bag-o.” Busa, ang kompiyuter  mohimog listahan sa katumbas nga mga termino ug mga kombinasyon sa pulong. Human mabatoni ang maong listahan, nga tingali dangtag pipila lang ka adlaw o semana, ikapadapat na sa kompiyuter ang “nakat-onan” niini sa paghubad sa bag-ong basahon. Bisan tuod ang mahimong hubad tingali dili maayo kon bahin sa gramarya ug estilo, sagad nga masabtan na ang kahulogan niini ug ang hinungdanong mga detalye.

Ang kalidad sa paghubad magdepende ug dako diha sa kadaghan ug sa kalidad sa sinulat nga unang gipasulod sa kompiyuter. Ug ang Bibliya napamatud-ang mapuslanon niining bahina. Kini maampingong gihubad sa daghang pinulongan, daling mabatonan, ug daghan kaayog impormasyon. Busa ang Bibliya maoy unang pilion sa tigdukiduki sa dihang iyang iprograma ang kompiyuter alang sa usa ka bag-ong pinulongan.