Pagkakat-on sa mga Dalan ni Jehova

“Pahibaloa ako . . . sa imong mga dalan, aron ako makaila kanimo.”—EXODO 33:13.

1, 2. (a) Nganong ingon niadto ang reaksiyon ni Moises sa dihang nakita niya ang usa ka Ehiptohanon nga nagdagmal sa usa ka Hebreohanon? (b) Aron mahimong angayan nga moalagad kang Jehova, unsay kinahanglang makat-onan ni Moises?

 SI Moises namatuto diha sa panimalay ni Paraon ug naedukar sa kaalam nga gitamod sa mga hamili sa Ehipto. Bisan pa niana, naamgohan ni Moises nga siya dili Ehiptohanon. Hebreohanon ang iyang mga ginikanan. Sa dihang nag-edad siya ug 40 anyos, iyang gisusi ang iyang mga igsoon, ang mga anak sa Israel. Sa dihang nakita niya ang usa ka Ehiptohanon nga nagdagmal sa usa sa mga Hebreohanon, naluoy si Moises. Iyang gipatay ang Ehiptohanon. Si Moises mipili sa pagdapig sa katawhan ni Jehova ug naghunahuna nga gigamit siya sa Diyos sa paghatag ug kagawasan sa iyang mga igsoon. (Buhat 7:21-25; Hebreohanon 11:24, 25) Sa dihang nabutyag kining hitaboa, ang harianong panimalay sa Ehipto nag-isip kang Moises ingong rebelde, ug kinahanglang mokalagiw si Moises aron maluwas ang iyang kinabuhi. (Exodo 2:11-15) Aron si Moises mahimong galamiton sa Diyos, kinahanglang mas masinati siya sa mga dalan ni Jehova. Magpatudlo kaha si Moises?—Salmo 25:9.

² Sa misunod nga 40 ka tuig, si Moises nadestiyero ug nahimong magbalantay sa karnero. Imbes masuko pag-ayo tungod kay ang iyang Hebreohanong mga igsoon dayag nga wala magtamod kaniya, si Moises nagpailalom sa maong kahimtang nga gitugot sa Diyos nga mahitabo. Bisan tuod daghang tuig ang milabay nga wala siya ilha, nagpaumol si Moises kang Jehova. Sa ulahi misulat siya, dili ingong pagtamod sa kaugalingon, kondili ilalom sa impluwensiya sa balaang espiritu sa Diyos: “Ang tawo nga si Moises mao ang labing maaghop sa tanang tawo sa ibabaw sa nawong sa yuta.” (Numeros 12:3) Gigamit ni Jehova si Moises sa talagsaong mga paagi. Kon kita usab mangita sa kaaghop, kita panalanginan ni Jehova.—Sofonias 2:3.

Gisugo

3, 4. (a) Unsay gisugo ni Jehova kang Moises? (b) Unsang tabang ang gihatag kang Moises?

³ Usa ka adlaw niana ang manulonda nga naghawas kang Jehova misulti kang Moises duol sa Bukid sa Horeb diha sa Sinai Peninsula. Miingon siya kang Moises: “Sa walay duhaduha nakita ko ang kasakitan sa akong katawhan nga atua sa Ehipto, ug nadungog ko ang ilang pagtuaw tungod sa mga nagpugos kanila sa pagtrabaho; tungod kay ako nahibalo pag-ayo sa mga kasakit nga ilang giantos. Ug manaog ako sa pagluwas kanila gikan sa kamot sa mga Ehiptohanon ug sa pagpagawas kanila gikan sa maong yuta ngadto sa usa ka yuta nga maayo ug haluag, ngadto sa usa ka yuta nga nagaagay sa gatas ug dugos.” (Exodo 3:2, 7, 8) Maylabot niini, dihay gipabuhat ang Diyos kang Moises, apan kinahanglang buhaton kana sumala sa kon unsay gilatid ni Jehova.

⁴ Ang manulonda ni Jehova nagpadayon sa pag-ingon: “Karon umari ka ug ipadala ko ikaw kang Paraon, ug pagawason mo ang akong katawhan nga mga anak sa Israel gikan sa Ehipto.” Si Moises nagpanuko. Gibati niya nga dili siya takos, ug kon magsalig lamang siya sa iyang kaugalingon, dili gayod siya takos. Apan, gipasaligan ni Jehova si Moises: “Ako magauban kanimo.” (Exodo 3:10-12) Gihatagan ni Jehova si Moises ug gahom sa paghimog milagrosong mga ilhanan nga magsilbing pamatuod nga siya gipadala gayod sa Diyos. Ang igsoon ni Moises nga si Aaron gipauban kaniya ingong tigpamaba. Tudloan sila ni Jehova kon unsay angayng isulti ug buhaton. (Exodo 4:1-17) Tumanon kaha ni Moises ang maong asaynment?

5. Nganong naproblema si Moises sa tinamdan sa Israel?

⁵ Sa sinugdan, ang tigulang nga mga lalaki sa Israel mituo kang Moises ug Aaron. (Exodo 4:29-31) Apan, sa wala madugay, ang “mga dakodako sa mga anak sa Israel” nagbasol kang Moises ug sa iyang igsoon sa paghimo kanilang “baho”  atubangan kang Paraon ug atubangan sa iyang mga alagad. (Exodo 5:19-21; 6:9) Sa dihang ang mga Israelinhon mibiya sa Ehipto, sila nahadlok sa pagkakita sa naggukod nga mga karo sa mga Ehiptohanon. Kay ang Pulang Dagat anaa sa ilang atubangan ug ang mga karo nga iggugubat anaa sa ilang luyo, gibati sa mga Israelinhon nga natanggong sila, ug ilang gibasol si Moises. Kon atua ka pa didto, unsa kahay imong reaksiyon? Bisan tuod ang mga Israelinhon walay mga sakayan, sa sugo ni Jehova giawhag ni Moises ang mga tawo sa pagpanghipos ug pagpangandam. Dayon gipaatras sa Diyos ang katubigan sa Pulang Dagat, ug ang salog sa dagat mimala mao nga ang Israel nakaagi niana.—Exodo 14:1-22.

Usa ka Isyu nga Mas Hinungdanon kay sa Kaluwasan

6. Unsay gipasiugda ni Jehova sa dihang nagsugo kang Moises?

⁶ Sa pagsugo kang Moises, gipasiugda ni Jehova ang pagkaimportante sa balaang ngalan. Hinungdanon ang pagtahod sa maong ngalan ug sa Usa nga gihawasan niana. Sa dihang gipangutana bahin sa iyang ngalan, giingnan ni Jehova si Moises: “Ako mamao kon unsay mamao ako.” Dugang pa, gisugo si Moises nga sultihan ang mga anak sa Israel: “Si Jehova nga Diyos sa inyong mga katigulangan, ang Diyos ni Abraham, ang Diyos ni Isaac ug ang Diyos ni Jacob, nagpadala kanako nganhi kaninyo.” Midugang si Jehova: “Kini ang akong ngalan hangtod sa panahong walay tino, ug kini ang handomanan kanako hangtod sa sunodsunod nga mga kaliwatan.” (Exodo 3:13-15) Ang Diyos nailhan gihapon sa iyang mga alagad sa tibuok yuta sa ngalang Jehova.—Isaias 12:4, 5; 43:10-12.

7. Unsay giawhag sa Diyos kang Moises nga buhaton bisan pa sa pagkamapahitas-on ni Paraon?

⁷ Sa pag-atubang kang Paraon, si Moises ug Aaron nagpahayag sa ilang mensahe sa ngalan ni Jehova. Apan si Paraon mapahitas-ong miingon: “Kinsa ba si Jehova, aron ako mamati sa iyang tingog sa pagpalakaw sa Israel? Wala gayod ako makaila kang Jehova ug, dugang pa, dili ko palakton ang Israel.” (Exodo 5:1, 2) Gipakita ni Paraon nga siya tig-ag kasingkasing ug malimbongon, bisan pa niana giawhag ni Jehova si Moises nga sublisubling magpahayag ug mga mensahe ngadto kang Paraon. (Exodo 7:14-16, 20-23; 8:1, 2, 20) Nakita ni Moises nga napikal na si Paraon. Magpulos pa ba ang pag-atubang kaniya pag-usab? Ang Israel naghinamhinam nga maluwas. Si Paraon hugot nga mibalibad. Kon ikaw pa si Moises, unsa kahay imong buhaton?

8. Unsang benepisyo ang nadawat gikan sa paagi sa pagpakiglabot ni Jehova kang Paraon, ug unsay angay nga epekto kanato sa maong mga panghitabo?

⁸ Si Moises nagpahayag ug lain pang mensahe, nga nag-ingon: “Kini ang giingon ni Jehova, ang Diyos sa mga Hebreohanon: ‘Palakta ang akong katawhan aron sila mag-alagad kanako.’” Miingon usab ang Diyos: “Sa pagkakaron gibakyaw ko na unta ang akong kamot sa paghampak kanimo ug sa imong katawhan pinaagig kamatay ug aron mapanas ka gikan sa yuta. Apan, sa pagkatinuod, tungod niini nga hinungdan nga gipapadayon ko ikaw sa paglungtad, aron ipakita kanimo ang akong gahom ug aron ang akong ngalan ikapahayag sa tibuok yuta.” (Exodo 9:13-16) Tungod sa himoon unya niya sa tig-ag kasingkasing nga si Paraon, katuyoan ni Jehova nga ipasundayag ang iyang gahom nga magsilbing pasidaan sa tanan nga mosupak kaniya. Lakip na niini si Satanas nga Yawa, ang usa nga gitawag ni Jesu-Kristo sa ulahi nga “magmamando niining kalibotana.” (Juan 14:30; Roma 9:17-24) Sumala sa gitagna, ang ngalan ni Jehova namantala sa tibuok yuta. Ang iyang hataas-nga-pailob misangpot sa kaluwasan sa mga Israelinhon ug sa nagkasagol nga dakong panon  sa katawhan nga miduyog kanila sa pagsimba kaniya. (Exodo 9:20, 21; 12:37, 38) Sukad niadto, ang pagmantala sa ngalan ni Jehova nakabenepisyo sa milyonmilyon pa nga misagop sa matuod nga pagsimba.

Pagpakiglabot sa mga Tawong Badlongon

9. Sa unsang paagi ang katawhan ni Moises wala magtahod kang Jehova?

⁹ Ang mga Hebreohanon nahibalo sa ngalan sa Diyos. Gigamit ni Moises kanang ngalana sa dihang nakigsulti siya kanila, apan sila wala magpakita kanunay ug angayang pagtahod sa Tag-iya sa maong ngalan. Wala madugay human nga milagrosong gipagawas ni Jehova ang mga Israelinhon gikan sa Ehipto, unsay nahitabo sa dihang wala dayon sila makakita ug tubig nga mainom? Nagbagulbol sila kang Moises. Dayon nagreklamo sila bahin sa pagkaon. Gipasidan-an sila ni Moises nga sila nagbagulbol dili lamang kaniya ug kang Aaron kondili kang Jehova usab. (Exodo 15:22-24; 16:2-12) Sa Bukid sa Sinai, gihatag ni Jehova sa mga Israelinhon ang Balaod, ug inubanan kini sa labaw-kinaiyanhong mga pasundayag. Apan ang mga tawo sa pagkamasinupakon naghimog bulawan nga nating baka aron simbahon ug nag-ingon nga sila naghimog “pista alang kang Jehova.”—Exodo 32:1-9.

10. Nganong ang hangyo ni Moises nga nasulat diha sa Exodo 33:13 ilabinang makapainteres sa Kristohanong mga magtatan-aw karon?

¹⁰ Sa unsang paagi pakiglabotan ni Moises ang mga tawo nga gihubit ni Jehova ingong mga tikig ug liog? Si Moises mihangyo kang Jehova: “Palihog, kon ako nakakaplag ug pabor sa imong mga mata, pahibaloa ako, palihog, sa imong mga dalan, aron ako makaila kanimo, aron ako makakaplag ug pabor sa imong mga mata.” (Exodo 33:13) Sa pag-atiman sa modernong-adlaw nga mga Saksi ni Jehova, ang Kristohanong mga magtatan-aw nagbantay sa usa ka panon nga mas mapainubsanon kay sa mga Israelinhon. Bisan pa niana, sila nag-ampo usab: “Ipaila kanako ang imong mga dalan, Oh Jehova; tudloi ako sa imong mga alagianan.” (Salmo 25:4) Tungod sa ilang kahibalo bahin sa mga dalan ni Jehova, ang mga magtatan-aw nakadumala sa mga situwasyon sa paagi nga kaharmonya sa Pulong sa Diyos ug nahiuyon sa iyang personalidad.

Kon Unsay Gidahom ni Jehova sa Iyang Katawhan

11. Unsang mga lagdaa ang gihatag ni Jehova kang Moises, ug nganong interesado kita niana?

¹¹ Didto sa Bukid sa Sinai, gisulti ni Jehova kon unsay iyang gidahom sa iyang katawhan. Sa ulahi si Moises nakadawat ug duha ka papan nga bato nga gisulatan sa Napulo ka Sugo. Sa pagkanaog ni Moises sa bukid, iyang nakita ang mga Israelinhon nga nagsimba sa tinunaw nga nating baka ug sa kasuko gilabay niya ang mga papan nga bato ug kana nadugmok. Gisulat pag-usab ni Jehova ang Napulo ka Sugo nga gisulat diha sa mga papan nga bato nga sinapsap ni Moises. (Exodo 32:19; 34:1) Kining mga sugoa wala mausab sukad sa unang paghatag niini. Kinahanglang molihok si Moises nga kaharmonya niana. Gipatin-aw usab sa Diyos ngadto kang Moises kon unsa Siyang matanga sa persona, sa ingon gipakita kang Moises kon unsaon paggawi ingong hawas ni Jehova. Ang mga Kristohanon dili ilalom sa Moisesnong Balaod, apan ang gisulti ni Jehova kang Moises adunay daghang sukaranang mga prinsipyo nga wala mausab ug mapadapat gihapon sa tanan nga nagsimba kang Jehova. (Roma 6:14; 13:8-10) Hisgotan nato ang pipila niini.

12. Sa unsang paagi angayng mag-apektar sa Israel ang pagpangayo ni Jehova ug bug-os nga pagkamahinalaron?

¹² Ihatag kang Jehova ang bug-os nga pagkamahinalaron. Diha ang nasod sa Israel sa dihang gipahayag ni Jehova nga nagkinahanglan siya ug bug-os nga pagkamahinalaron. (Exodo 20:2-5) Ang mga Israelinhon nakakita ug daghang pamatuod nga si Jehova mao ang matuod nga Diyos. (Deuteronomio 4:33-35) Giklaro ni Jehova nga bisan unsa pay ginabuhat sa ubang mga nasod, dili niya tugotan ang bisan unsang dagway sa idolatriya o espiritismo taliwala sa iyang katawhan. Ang ilang pagkamahinalaron kaniya kinahanglang dili usa lamang ka pormalidad. Silang tanan kinahanglang mahigugma kang Jehova uban sa tibuok nilang kasingkasing, tibuok nilang kalag, ug bug-os nilang kusog. (Deuteronomio 6:5, 6) Kini maglakip sa ilang sinultihan, ilang panggawi—sa pagkatinuod, sa tanang bahin sa ilang kinabuhi. (Levitico 20:27; 24:15, 16; 26:1) Giklaro usab ni Jesu-Kristo nga gikinahanglan ni Jehova ang bug-os nga pagkamahinalaron.—Marcos 12:28-30; Lucas 4:8.

13. Nganong ang Israel kinahanglang hugot nga motuman sa Diyos, ug unsay angayng magtukmod kanato sa pagtuman kaniya? (Ecclesiastes 12:13)

 ¹³ Hugot nga tumana ang mga sugo ni Jehova. Ang katawhan sa Israel kinahanglang pahinumdoman nga sa dihang misulod sila sa usa ka pakigsaad kang Jehova, sila nanumpa nga hugot nga tumanon siya. Dako silag personal nga kagawasan, apan sa mga butang diin si Jehova naghatag kanilag mga sugo, kinahanglang hugot silang motuman niana. Ang pagbuhat niana maghatag ug pamatuod sa ilang gugma alang sa Diyos ug makabenepisyo kanila ug sa ilang mga anak tungod kay ang tanang kinahanglanon ni Jehova maoy alang sa ilang kaayohan.—Exodo 19:5-8; Deuteronomio 5:27-33; 11:22, 23.

14. Sa unsang paagi gipasiugda sa Diyos ngadto sa Israel ang kahinungdanon sa pag-una sa espirituwal nga mga pangagpas?

¹⁴ Unaha ang espirituwal nga mga butang. Ang nasod sa Israel kinahanglang dili mogugol ug daghan kaayong panahon sa pag-atiman sa pisikal nga mga panginahanglan nga wala na hinuon silay panahon sa espirituwal nga mga kalihokan. Ang kinabuhi sa mga Israelinhon kinahanglang dili ideboto sa yutan-ong mga pangagpas lamang. Si Jehova naggahin ug panahon kada semana nga iyang gipaila ingong balaan, panahon nga gamiton lamang sa kalihokan nga adunay kalabotan sa pagsimba sa matuod nga Diyos. (Exodo 35:1-3; Numeros 15:32-36) Kada tuig, dugang panahon ang gigahin alang sa gitakda nga balaang mga kombensiyon. (Levitico 23:4-44) Maghatag kinig mga kahigayonan sa paghisgot bahin sa gamhanang mga buhat ni Jehova, nga mapahinumdoman sa iyang mga dalan, ug sa pagpasalamat kaniya tungod sa tanan niyang kaayo. Samtang ang mga tawo magpahayag sa ilang pagkamahinalaron ngadto kang Jehova, mosamot ang ilang kahadlok ug gugma sa Diyos ug matabangan sila sa paglakaw diha sa iyang mga dalan. (Deuteronomio 10:12, 13) Ang maayong mga prinsipyo nga anaa nianang maong mga instruksiyon makabenepisyo sa mga alagad ni Jehova karon.—Hebreohanon 10:24, 25.

Pagsabot sa mga Hiyas ni Jehova

15. (a) Nganong mapuslanon nga masabtan ni Moises ang mga hiyas ni Jehova? (b) Unsang mga pangutana ang makatabang kanato sa pagpamalandong sa matag usa sa mga hiyas ni Jehova?

¹⁵ Ang pagsabot sa mga hiyas ni Jehova makatabang usab kang Moises sa pagdumala sa mga tawo. Ang Exodo 34:5-7 nag-ingon nga ang Diyos miagi sa atubangan ni Moises ug miingon: “Si Jehova, si Jehova, usa ka Diyos nga maluluy-on ug mapuangoron, mahinay sa kasuko ug dagaya sa mahigugmaong-kalulot ug kamatuoran, nagatipig ug mahigugmaong-kalulot alang sa linibo, nagapasaylo ug kasaypanan ug kalapasan ug sala, apan dili gayod magpahigawas gikan sa silot, nga nagapahamtang ug silot nganha sa mga anak ug nganha sa mga apo tungod sa kasaypanan sa mga amahan, nganha sa ikatulo nga kaliwatan ug nganha sa ikaupat nga kaliwatan.” Paggahin ug panahon sa pagpamalandong nianang mga pulonga. Pangutan-a ang imong kaugalingon: ‘Unsay gipasabot sa matag hiyas? Sa unsang paagi gipasundayag kana ni Jehova? Sa unsang paagi ang Kristohanong mga magtatan-aw makapasundayag niining hiyasa? Sa unsang paagi ang maong hiyas mag-impluwensiya sa ginabuhat sa matag usa kanato?’ Tagda ang pipila ka pananglitan.

16. Sa unsang paagi mapalalom nato ang atong pagsabot sa kaluoy sa Diyos, ug nganong hinungdanon kini?

 ¹⁶ Si Jehova “usa ka Diyos nga maluluy-on ug mapuangoron.” Kon aduna kay reperensiyang basahon nga Insight on the Scriptures, nganong dili basahon ang giingon niana bahin sa “Mercy” (Kaluoy)? O panukiduki bahin sa maong ulohan ginamit ang Watch Tower Publications Index o ang programa sa kompiyuter nga Watchtower Library (CD-ROM). a Gamit ug konkordansiya aron makita ang mga teksto nga naghisgot bahin sa kaluoy. Imong masayran nga gawas pa sa pagtugot usahay nga menosan ang silot, ang kaluoy ni Jehova naglakip ug malumong pagbati. Kini nagtukmod sa Diyos sa paglihok aron hatagag kahupayan ang iyang katawhan. Ingong pamatuod niini, ang Diyos nagtagana sa mga Israelinhon sa ilang pisikal ug espirituwal nga mga panginahanglan panahon sa ilang panaw paingon sa Yutang Saad. (Deuteronomio 1:30-33; 8:4) Si Jehova maluluy-ong nagpasaylo sa dihang sila nasayop. Siya nagpakitag kaluoy ngadto sa iyang karaang katawhan. Ang iyang modernong-adlaw nga mga alagad labi pa gayong gikinahanglan nga magpakitag kaluoy sa usag usa!—Mateo 9:13; 18:21-35.

17. Sa unsang paagi ang atong pagsabot sa pagkamapuangoron ni Jehova nagpalambo sa matuod nga pagsimba?

¹⁷ Ang kaluoy ni Jehova dinuyogan sa pagkamapuangoron. Kon duna kay diksiyonaryo, basaha ang giingon niini ilalom sa pulong “gracious” (mapuangoron). Itandi kini sa mga teksto nga naghisgot kang Jehova ingong mapuangoron. Gipakita sa Bibliya nga ang pagkamapuangoron ni Jehova naglakip ug mahigugmaong kabalaka alang sa mga kabos taliwala sa iyang katawhan. (Exodo 22:26, 27) Sa bisan unsang nasod, ang mga langyaw maingon man ang uban nag-ilaid tingali sa kalisod. Sa dihang nagtudlo sa iyang katawhan nga sila dili magmapihigon ug angayng magpakitag kalulot ngadto nianang mga tawhana, gipahinumdoman sila ni Jehova nga sila usab mga langyaw—didto sa Ehipto. (Deuteronomio 24:17-22) Komosta kita ingong katawhan sa Diyos karon? Ang atong pagkamapuangoron makatabang sa paghiusa kanato ug pagdani sa uban sa pagsimba kang Jehova.—Buhat 10:34, 35; Pinadayag 7:9, 10.

18. Unsay atong makat-onan gikan sa gitudlo ni Jehova sa Israel nga angayng likayan maylabot sa mga gawi sa mga tawo sa ubang mga nasod?

¹⁸ Apan, ang malulotong konsiderasyon alang sa mga tawo sa laing mga nasod kinahanglang dili molabaw sa gugma sa Israel alang kang Jehova ug sa iyang moral nga mga sukdanan. Busa, ang mga Israelinhon gitudloan nga dili sagopon ang mga dalan sa mga nasod sa ilang palibot, nga dili sundon ang ilang relihiyosong mga kostumbre ug imoral nga mga estilo sa kinabuhi. (Exodo 34:11-16; Deuteronomio 7:1-4) Mapadapat usab kana kanato karon. Kita kinahanglang mahimong balaan nga katawhan, maingon nga ang atong Diyos, si Jehova, balaan.—1 Pedro 1:15, 16.

19. Sa unsang paagi ang pagsabot sa panglantaw ni Jehova sa sala manalipod sa iyang katawhan?

¹⁹ Aron makasabot si Moises sa Iyang mga dalan,  giklaro ni Jehova nga bisan tuod dili siya mouyon sa sala, siya mahinay sa kasuko. Hatagan niyag higayon ang mga tawo nga makakat-on sa iyang mga kinahanglanon ug motuman niana. Kon ang usa maghinulsol, si Jehova magpasaylo sa iyang sala, apan silotan gayod niya kadtong grabeng nagpakasala. Iyang gipasidan-an si Moises nga ang umaabot nga mga kaliwatan mahimong maapektohan, sa maayo o daotan nga paagi, sa gihimo sa mga Israelinhon. Kon masabtan sa katawhan sa Diyos ang mga dalan ni Jehova, dili nila basolon ang Diyos sa mga situwasyon nga ilang gipahinabo sa ilang kaugalingon o dili sila mohinapos nga siya hinayan.

20. Unsay makatabang kanato sa pagpakiglabot sa mga isigkamagtutuo sa nahiangayng paagi ug niadtong atong mahimamat diha sa atong ministeryo? (Salmo 86:11)

²⁰ Kon buot nimong molalom pa ang imong kahibalo bahin kang Jehova ug sa iyang mga dalan, padayon sa pagpanukiduki ug sa pagpamalandong sa dihang magabasa ka sa Bibliya. Susiha pag-ayo ang lainlaing makaiikag nga mga bahin sa personalidad ni Jehova. Mainampoong konsideraha kon sa unsang paagi masundog nimo ang Diyos ug mas mapahiuyon pa ang imong kinabuhi sa iyang katuyoan. Motabang kini kanimo sa paglikay sa mga lit-ag, sa pagpakiglabot sa mga isigkamagtutuo sa nahiangayng paagi, ug sa pagtabang sa uban nga makaila ug mahigugma sa atong halangdong Diyos.

[Footnote]

Unsay Imong Nakat-onan?

• Nganong hinungdanon nga magpakitag kaaghop si Moises, ug nganong hinungdanon kini kanato?

• Unsang kaayohan ang misangpot sa sublisubling pagpahayag ngadto kang Paraon sa pulong ni Jehova?

• Unsa ang pipila ka talagsaong mga prinsipyo nga gitudlo ngadto kang Moises nga mapadapat usab kanato?

• Sa unsang paagi mapalalom nato ang atong pagsabot sa mga hiyas ni Jehova?

[Mga Pangutana sa Pagtuon]

[Hulagway sa panid 21]

Si Moises matinumanong nagpahayag sa pulong ni Jehova ngadto kang Paraon

[Hulagway sa panid 23]

Gipahibalo ni Jehova ang iyang mga kinahanglanon ngadto kang Moises

[Hulagway sa panid 24, 25]

Palandonga ang mga hiyas ni Jehova