“Ang Akong Tabang Nagagikan Kang Jehova”

Tagsaanon ug Kontento sa Pag-alagad Kang Jehova

“MALIPAYON kaayo ang daghan kanamo bisan tuod dili kami minyo,” matod sa usa ka Kristohanong babaye sa Espanya. Unsay hinungdan sa iyang pagkakontento? “Gusto namong makalingkawas sa daghang kabalaka sa kinabuhing minyo aron kami makaalagad sa bug-os sa atong Diyos, si Jehova.”

Ang maong pagbati nahiuyon sa giingon sa Pulong sa Diyos bahin sa pagkatagsaanon. Sa dihang gihisgotan ni apostol Pablo ang bahin sa kaminyoon, iyang gihatag kining inspiradong kaalam: “Ako magaingon ngadto sa mga dili-minyo ug sa mga balo, nga maayo alang kanila nga sila magpabilin nga ingon gayod kanako.” Si Pablo mismo dili minyo. Apan unsay gihatag niyang rason sa pagrekomendar sa pagkatagsaanon? Gihisgotan niya nga ang mga minyo nabahin, samtang ang mga dili-minyo “mabalak-on sa mga butang sa Ginoo.” (1 Corinto 7:8, 32-34) Ang pag-alagad kang Jehova maoy pangunang hinungdan nga makapalipay ug makapakontento sa usa ka tagsaanon.

Pagkatagsaanon nga May Dalayegong Katuyoan

Makapalibog tingali ang mga komento ni Pablo diha sa mga kultura nga nagpasiugda sa kaminyoon ug pagpatunghag pamilya. Ugaling lang, si Jesu-Kristo—nga dili minyo apan malipayon ug kontento—naghisgot sa usa ka dalayegong katuyoan alang sa tagsaanong mga Kristohanon. Siya miingon: “Adunay mga eunuko nga naghimo sa ilang kaugalingon nga mga eunuko tungod sa gingharian sa mga langit. Siya nga makahatag ug luna alang niini magahatag ug luna niini.”—Mateo 19:12.

Uyon niining mga pulonga, nasabtan sa daghan nga ang pagkatagsaanon nagtugot kanila sa pag-alagad sa Diyos nga walay kabaldahan nga komon diha sa kinabuhing minyo. (1 Corinto 7:35) Libolibong Kristohanon ang malipayong nagsimba kang Jehova nga walay kapikas sa kaminyoon, ug sila nagmalipayon sa aktibong pagtabang sa uban. a

Naamgohan sa tanang minyo ug dili-minyo nga mga Kristohanon nga ang kalipay ug pagkadili-malipayon masinati sa tanan. Niining duha ka grupo, ang pipila usahay malipayon o magul-anon. Sa pagkatinuod, matinud-anong gisulti sa Bibliya nga ang kaminyoon mismo magdalag ‘kasakitan sa unod.’—1 Corinto 7:28.

Tagsaanon Tungod sa Kahimtang

Daghan ang tagsaanon dili kay ila kanang gipili kondili tungod sa mga kahimtang. Basin nangandoy sila sa pagkamainiton, panag-ubanay, ug pagbinatiay nga anaa sa panagtiayon. Apan, alang sa uban, ang pinansiyal o ubang mga kahimtang tingali maoy nakapugong sa pagminyo sa pagkakaron. Ang pipila ka Kristohanon—daghan kanila mao ang minahal nga espirituwal nga mga sister—nagpabiling tagsaanon tungod kay hugot ang ilang pagsunod sa tambag sa Bibliya sa pagminyo “lamang diha sa Ginoo.” (1 Corinto  7:39) Maunongon silang nangitag kapikas taliwala lamang sa dedikado, bawtismadong mga magsisimba ni Jehova.

Masulob-on usahay ang maong mga tagsaanon. Human moadmitir nga siya mibati niini, usa ka tagsaanong Kristohanon miingon: “Kami nahibalo sa balaod ni Jehova ug dili namo gustong pasuk-on si Jehova sa bisan unsang paagi. Mahimong gusto namo ang panag-ubanay sa usa ka kapikas, apan bisan pag kapila pa kami itupotupo sa mga tawo sa kalibotan, kami nagmalig-on. Dili gani kami buot makig-uban sa mga dili-magtutuo.” Angayng dayegon ang maong mga Kristohanon tungod sa pagpadapat sa tambag sa Bibliya ug pagmentinar sa taas nga mga sukdanan sa moral aron pahimut-an si Jehova bisan pa sa bisan unsang kagul-anan nga ilang maagoman.

Dagayang Tabang sa Diyos

Maunongon si Jehova niadtong magmaunongon kaniya sama sa dili-pagpakigminyo sa mga tawo nga wala mag-alagad kaniya. Gikan sa personal nga kasinatian, si Haring David makapamatuod: “Sa maunongon ikaw [Jehova] magmaunongon.” (Salmo 18:25) Ug niadtong magmatinumanon sa pagsunod kaniya, ang Diyos nagsaad: “Dili ko gayod ikaw pagabiyaan ni sa bisan unsang paagi pagatalikdan.” (Hebreohanon 13:5) Sa pagsundog kang Jehova, kita makadayeg pag-ayo sa tagsaanong mga Kristohanon sa tanang pangedaron nga matinumanong nangupot sa Pulong sa Diyos. Makaampo usab kita nga si Jehova magpalig-on kanila sa pagsagubang sa ilang mga suliran.—Maghuhukom 11:30-40.

Nakaplagan sa daghang tagsaanong Kristohanon nga ang bug-os nga pagpakigbahin sa pagpanudlo bahin sa Bibliya nakapatugob gayod sa ilang kinabuhi. Pananglitan, matikdi si Patricia, usa ka 25 anyos nga dalagang payunir, o bug-os-panahong ebanghelisador. Siya miingon: “Bisan tuod daghag pagsulay sa mga tagsaanon, kini naghatag kanakog higayon sa pagkahimong regular payunir. Sanglit ako dili minyo, mas mapailin-ilinon ang akong eskedyul, nga mas daghag panahon sa pagtuon. Nakakat-on usab ako sa pagsalig kang Jehova sa bug-os, ilabina sa masulayong mga panahon.”

Kanang mga pulonga gipasukad sa makapadasig nga saad sa Bibliya: “Itugyan kang Jehova ang imong dalan, ug salig kaniya, ug siya molihok.” (Salmo 37:5) Sa pagkatinuod, ang tanang matinumanong magsisimba ni Jehova, minyo o dili-minyo, mahupayan ug mapalig-on sa inspiradong mga pulong: “Ang akong tabang nagagikan kang Jehova.”—Salmo 121:2.

[Footnote]

[Blurb sa panid 9]

“Ang lalaking dili-minyo mabalak-on sa mga butang sa Ginoo, kon sa unsang paagi mabatonan niya ang pag-uyon sa Ginoo.”—1 CORINTO 7:32

[Kahon sa panid 8]

PAGHIMO SA PAGKATAGSAANON NGA MAGANTIHON

Si Jesus, nga wala gayod magminyo, miingon: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.”—Juan 4:34.

Ang upat ka anak nga dalaga ni Felipe puliki kanunay sa ‘pagpanagna.’—Buhat 21:8, 9.

Ang tagsaanon nga Kristohanong mga sister nga nagmantala sa mensahe sa Gingharian maoy bahin sa ‘dakong panon sa kababayen-an nga nagapahayag sa maayong balita.’—Salmo 68:11.