Interes sa Bibliya Gidayeg

SI Marianna, usa ka Saksi ni Jehova sa habagatang Italya, maoy 18 anyos ang edad ug anaa na sa kataposang tuig sa hayskul. Siya nagtungha sa mao ra gihapong tunghaan sama sa ubang mga batan-ong Saksi.

“Sulod na sa pipila ka tuig karon,” misulat si Marianna, “ang pipila kanamo nagabasa sa teksto sa Bibliya para nianang adlawa gikan sa Pagsusi sa Kasulatan sa Adlaw-Adlaw panahon sa among reses. Ang bugtong dapit nga among mahimo kana maoy diha sa usa sa mga pasilyo duol sa lawak sa mga magtutudlo. Langas didto. Makita kami sa kadaghanang magtutudlo sa dihang moagi sila, ug ang pipila kanila mohunong ug mangutana kon unsay among ginabuhat. Kini sagad naghatag kanamo ug kahigayonan sa pagtubag sa ilang mga pangutana. Sa aberids, kada adlaw usa ka magtutudlo ang mohunong aron sa pagpangutana. Ang pipila nagpabilin aron sa pagpaminaw sa among panaghisgot sa teksto sa Bibliya ug nagpahayag ug pagdayeg sa interes nga gipakita namong mga Saksi sa espirituwal nga mga butang. Kas-a, gidapit kami sa luyoluyong prinsipal nga himoon ang among panaghisgot didto sa lawak sa mga magtutudlo.

“Human makita kon diin kami naghisgot sa teksto, gihangyo sa akong magtutudlo ang prinsipal kon mahimo ba namong hisgotan kini sa usa sa mga klasrom, diin dili kaayo langas didto. Mitugot ang prinsipal, ug gidayeg mi sa akong magtutudlo atubangan sa tibuok klase tungod sa maayong panig-ingnan nga among gipakita. Kaming tanan nalipay kaayo tungod sa dakong pribilehiyo nga gihatag kanamo ni Jehova.”