Sugilanon sa Kinabuhi

Paglahutay Ingong Sundalo ni Kristo

SUMALA SA GIASOY NI YURII KAPTOLA

“Karon kombinsido na ko nga hugot gayod ang imong pagtuo!” Wala nako damha nga isulti kana sa usa ka opisyal sa Sobyet nga kasundalohan ug kana nagdasig kanako sa panahon nga gikinahanglan ko gayod ang pagdasig. Ako nag-atubang ug dugay nga sentensiya sa prisohan ug nag-ampo kang Jehova nga unta tabangan niya ako. Ako nag-atubang ug dugay nga pagpakigbisog nga magkinahanglag paglahutay ug determinasyon.

AKO natawo sa Oktubre 19, 1962, ug nagdako sa kasadpang bahin sa Ukraine. Niana gihapong tuiga, ang akong amahan, nga ginganlan usab ug Yurii, nakaestorya sa mga Saksi ni Jehova. Sa wala madugay siya nahimong unang magsisimba ni Jehova sa among balangay. Ang iyang kalihokan namatikdan sa mga opisyales nga supak sa mga Saksi ni Jehova.

Apan, kadaghanan sa among mga silingan nagtahod sa akong mga ginikanan tungod sa ilang Kristohanong mga hiyas ug kahingawa sa uban. Gipahimuslan sa akong mga ginikanan ang tanang kahigayonan sa pagsilsil diha sa akong tulo ka igsoong babaye ug kanako sa gugma alang sa Diyos sukad pa sa linghod nga panuigon, ug kini nakatabang kanako sa pagsagubang sa daghang problema nga akong naatubang sa eskuylahan. Ang usa nianang maong problema mitungha sa dihang giingnan ang matag estudyante sa pagtaod ug badge nga magpaila kaniya ingong usa sa October Children ni Lenin. Tungod sa akong Kristohanong neyutralidad, wala nako itaod ang badge ug busa nalahi ako sa ubang mga bata.—Juan 6:15; 17:16.

Sa ulahi, sa dihang ako tersero anyo na, gikinahanglan nga ang tanang estudyante moapil sa  Komunistang organisasyon sa mga batan-on nga gitawag ug Young Pioneers. Usa ka adlaw niana ang among klase gipaadto sa nataran sa eskuylahan alang sa seremonya sa pagpalista. Nahadlok ko niadto kay segurado gayod nga ila kong bugalbugalan ug kasab-an. Ang tanan gawas nako nagdala sa iyang bag-ong pula nga bandana nga nagpaila nga siya Young Pioneer, ug ang mga estudyante nagbarog sa usa ka taas nga linya atubangan sa prinsipal sa tunghaan, mga magtutudlo, ug sa mga estudyante sa mas taas nga ang-ang. Sa dihang giingnan ang mga estudyante sa mas taas nga ang-ang nga ihigot ang mga bandana sa among liog, ako miduko, nga nanghinaot nga wala untay manumbaling nako.

Gidala Ngadto sa Lagyo nga mga Prisohan

Sa dihang ako 18 anyos, ako gisentensiyahan ug tulo ka tuig nga pagkapriso tungod sa paghupot nako sa Kristohanong neyutralidad. (Isaias 2:4) Akong gisilbihan ang unang tuig diha sa lungsod sa Trudovoye, sa Vinnitskaya nga Distrito sa Ukraine. Samtang didto, akong nahimamat ang mga 30 pa ka Saksi ni Jehova. Giasayn kami nga tinagurha sa lainlaing grupo sa mga trabahante, tungod kay dili gusto sa mga awtoridad nga mag-ubanay ming mga Saksi.

Sa Agosto 1982, si Eduard—laing Saksi—ug ako gipasakay sa bagon sa tren alang sa mga piniriso aron dad-on sa Ural Mountains kauban sa usa ka grupo sa ubang mga piniriso. Sulod sa walo ka adlaw among giantos ang hilabihang kaalimuot ug kasiot sulod sa bagon hangtod nga nakaabot kami sa Prisohan sa Solikamsk, sa Distrito sa Permskaya. Si Eduard ug ako gibutang sa lainlain nga selda. Duha ka semana sa ulahi, ako gidala ngadto sa amihanan sa Vels, sa rehiyon sa Krasnovishersky.

Ang among gisakyan miabot sa tungang gabii, ug ngitngit kaayo kadto. Bisag ngitngit kaayo, gimandoan sa usa ka opisyal ang among grupo nga motabok sa suba pinaagig sakayan. Dili namo makita ang suba ni ang sakayan! Bisan pa niana, nagpangapkap mi hangtod nga nahikapan namo ang sakayan ug, bisan tuod nangahadlok, nakatabok ra mi sa suba. Pag-abot namo sa pikas tampi, girumbo namo ang suga nga among nakita sa usa ka bungtod sa duol, diin nakaplagan namo ang pipila ka tolda. Mao kadtoy among bag-ong pinuy-anan. Nagpuyo ako sa dakodako nga tolda kauban sa mga 30 pa ka piniriso. Sa tingtugnaw, among giantos ang temperatura nga usahay mous-os ngadto sa -40 grado Celsius, ug tugnaw gihapon kaayo bisag anaa mi sa sulod sa tolda. Ang pangunang trabaho sa mga binilanggo mao ang pagpamutol ug mga kahoy, apan ako giasayn sa pagpanukod ug mga payag para sa mga piniriso.

Ang Espirituwal nga Pagkaon Nakaabot sa Among Hilit nga Balangay

Ako lang ang Saksi sa maong balangay; apan wala ako pasagdi ni Jehova. Usa ka adlaw niana dihay miabot nga gamayng pakete gikan sa akong inahan, nga nagpuyo gihapon sa kasadpang Ukraine. Sa dihang giablihan sa guwardiya ang pakete, ang una niyang nakita mao ang usa ka gamayng Bibliya. Gikuha niya kini ug gipakli-pakli ang mga panid. Naghunahuna ko kon unsay akong isulti aron dili niya embargohon kining espirituwal nga bahandi. “Unsa man ni?” kalit nga nangutana ang guwardiya. Sa wala pa ko makahunahuna ug tubag, usa ka inspektor nga nagbarog diha sa duol miingon: “Ah! Diksiyonaryo na.” Naghilom lang ko. (Ecclesiastes 3:7) Gisusi sa inspektor ang ubang sulod sa pakete ug dayon gitunol kana kanako apil ang bililhong Bibliya. Tungod sa akong hilabihang kalipay, ako siyang gihatagan ug mga nut nga gikan sa akong putos. Sa dihang nadawat nako ang maong putos, naamgohan nako nga wala ako kalimti ni Jehova. Siya madagayaong mitabang kanako ug nag-atiman sa akong espirituwal nga mga panginahanglan.—Hebreohanon 13:5.

Pagsangyaw nga Walay Hunong

Pipila ka bulan sa ulahi, natingala ko nga nakadawat ug sulat gikan sa usa ka Kristohanong igsoong lalaki nga napriso mga 400 kilometros ang gilay-on. Gihangyo ko niya nga pangitaon ang usa ka tawong interesado nga lagmit anaa na sa akong kampo. Ang pagpadala ug sulat nga sama niana dili maalamon, tungod kay ang among mga sulat ginasusi. Siyempre, gipatawag ako sa usa sa mga opisyal ngadto sa iyang opisina  ug hugot akong gibaoran nga dili na mosangyaw. Dayon gimandoan ko niya nga mopirma ug dokumento nga nagpahayag nga mohunong na ko sa pagpaambit sa akong pagtuo ngadto sa uban. Ako mitubag nga wala nako masabti kon nganong mopirma pa ko nianang dokumentoha, tungod kay ang tanan nahibalo na man nga ako usa sa mga Saksi ni Jehova. Miingon ko nga ang ubang mga piniriso gustong masayod kon nganong napriso ko. Unsa may akong isulti kanila? (Buhat 4:20) Nakaamgo ang opisyal nga dili ko niya puwedeng hadlokon, busa nakahukom siya nga ibalhin ko ngadto sa laing kampo.

Gibalhin ako ngadto sa balangay sa Vaya, 200 kilometros ang gilay-on. Didto ang mga superbisor nagtahod sa akong Kristohanong baroganan ug nag-asayn kanako sa buluhaton nga dili konektado sa militar—una ingong karpintero, dayon ingong elektrisyan. Apan aduna usay mitungha nga mga problema maylabot niining trabahoa. Sa usa ka higayon, gisugo ko sa pagkuha sa akong mga hiramenta ug pag-adto sa klab sa balangay. Pag-abot nako, ang mga sundalo didto sa klab nalipay kaayong nakakita kanako. Naglisod sila sa pagpasiga sa mga suga nga giadorno sa lainlaing mga simbolo sa militar. Gusto nilang tabangan nako sila sa pag-ayo sa mga suga tungod kay nangandam sila alang sa tinuig nga selebrasyon sa Red Army Day. Human sa mainampoong paghunahuna kon unsay angayng buhaton, ako silang giingnan nga dili nako mahimo ang maong trabaho. Gihatag nako nila ang akong mga hiramenta ug milakaw ako. Gireport ko nila sa luyoluyong direktor, ug natingala ko kay sa pagkabati niya sa mga reklamo batok kanako, siya mitubag: “Gitahod ko siya tungod niana. Siya usa ka tawong may prinsipyo.”

Pagdasig Gikan sa Wala-Damhang Tinubdan

Sa Hunyo 8, 1984, human gayod sa tulo ka tuig nga pagkabilanggo, ako gibuhian. Sa pagbalik nako sa Ukraine, kinahanglang magparehistro ko sa mga sundalo ingong kanhing piniriso. Giingnan ko sa mga opisyal nga ako husayon pag-usab unom ka bulan gikan niana ug mas maayo pag mobiya na lang ako sa maong distrito. Busa mibiya ako sa Ukraine ug sa ngadtongadto nakatrabaho sa Latvia. Taudtaod akong nakasangyaw ug nakapakig-uban sa gamayng grupo sa mga Saksi nga nagpuyo sulod ug palibot sa Riga, ang kaulohan. Apan, paglabay sa usa lamang ka tuig, gipatawag na usab ako aron magsundalo. Didto sa opisina sa tigrekluta, ang opisyal akong giingnan nga sa una ako midumili na sa pagsundalo. Agig tubag, misinggit siya: “Nahibalo ka ba gayod kon unsay imong ginabuhat? Tan-awon nato kon unsay isulti nimo sa tenyente koronel!”

Gidala ko niya sa usa ka lawak sa ikaduhang andana diin ang tenyente koronel naglingkod luyo sa taas nga lamesa. Namati siya pag-ayo nako samtang akong gipatin-aw ang akong baroganan ug dayon giingnan ko niya nga may panahon pa ko sa paghunahuna pag-usab sa akong desisyon sa dili pa moatubang sa komite nga tigrekluta. Pagbiya namo sa opisina sa tenyente koronel, ang opisyal nga sa sinugdan nangasaba nako miingon: “Karon kombinsido na ko nga hugot gayod ang imong pagtuo!” Sa dihang miatubang ako sa komite sa militar, akong gisulti pag-usab ang akong neyutral nga baroganan, ug ako gihatagan ug temporaryong kagawasan.

Nianang panahona, nagpuyo ko sa usa ka sak-anan. Usa ka gabii niana, may mituktok ug hinay  sa pultahan. Pag-abli nako, akong nakita ang usa ka tawo nga nag-amerkana ug nagdalag bag. Gipaila niya ang iyang kaugalingon, nga nag-ingon: “Ako sakop sa State Security. Nahibalo ko nga nagkalisodlisod ka ug hapit ka nang husayon sa korte.” “Tinuod na,” ako mitubag. Ang tawo mipadayon: “Makatabang mi nimo kon makigkooperar ka namo.” “Dili, dili kana mahimo,” miingon ko. “Magpabilin akong maunongon sa akong Kristohanong pagtuo.” Siya mibiya nga wala na mosulay sa paghaylo pa kanako.

Pagkapriso ug Pagsangyaw na Usab

Sa Agosto 26, 1986, gisentensiyahan ako sa Nasodnong Korte sa Riga ug upat ka tuig nga pinugos nga pagtrabaho, ug gidala ako ngadto sa Sentral nga Prisohan sa Riga. Gibutang nila ako sa usa ka dakong selda kauban sa 40 pa ka mga piniriso, ug naningkamot ako nga masangyawan ang matag binilanggo sa maong selda. Ang uban nag-angkon nga nagtuo sa Diyos; ang uban nangatawa lang. Namatikdan nako nga ang mga lalaki nagpundokpundok, ug human sa duha ka semana giingnan ko sa mga lider niining mga pundoka nga dili ko puwedeng mosangyaw, tungod kay wala ako mosunod sa ilang binaba nga mga lagda. Ako miingon nga ako napriso tungod gayod niana—lahi ang akong gisunod nga mga balaod.

Nagpadayon ko sa pagsangyaw nga mainampingon, ug sa dihang may pipila ka piniriso nga interesado sa espirituwal nga mga butang, gitun-an nako ug Bibliya ang upat kanila. Sa among mga panaghisgot, ilang gisulat ang sukaranang mga pagtulon-an sa Bibliya diha sa usa ka notbok. Pipila ka bulan sa ulahi, gipadala ako ngadto sa usa ka guwardiyado-kaayo nga kampo sa Valmiera, diin ako nagtrabaho ingong elektrisyan. Didto gitun-an nako ug Bibliya ang laing elektrisyan kinsa nahimong Saksi ni Jehova upat ka tuig sa ulahi.

Sa Marso 24, 1988, gibalhin ako gikan nianang guwardiyado-kaayo nga kampo ngadto sa usa ka sikbit nga kampo. Panalangin gayod kini, tungod kay mas dako ang akong kagawasan didto. Gipatrabaho ko diha sa lainlaing proyekto sa konstruksiyon, ug kanunay kong nangita ug mga kahigayonan sa pagsangyaw. Pirme kong wala sa kampo, nga magsangyaw hangtod sa lawom nang gabii, apan wala gayod akoy nasugamakan nga problema sa dihang mopauli ko sa kampo.

Gipanalanginan ni Jehova ang akong mga paningkamot. Dihay pipila ka Saksi nga nagpuyo sa maong dapit, apan diha sa lungsod mismo, usa ray Saksi, si Vilma Krūmin̗a—usa ka tigulang nga sister. Si Sister Krūmin̗a ug ako nagsugod sa pagdumala ug daghang panagtuon sa Bibliya uban sa mga batan-on. Usahay, ang mga igsoon mobiyahe gikan sa Riga aron mouban ug sangyaw, ug ang ubang mga regular payunir naggikan pa gani sa Leningrad (karon St. Petersburg). Sa tabang ni Jehova, nakasugod kami ug ubay-ubayng panagtuon sa Bibliya, ug sa wala madugay ako nagpayunir, nga migugol ug 90 ka oras kada bulan diha sa buluhatong pagsangyaw.

Sa Abril 7, 1990, ang akong kaso gieskedyul nga husayon pag-usab diha sa Korte sa Katawhan sa Valmiera. Sa dihang nagsugod ang husay, nahimawngan nako ang piskal. Siya usa ka batan-ong lalaki nga akong nakaestorya bahin sa Bibliya kaniadto! Nakahimawong siya nako ug mipahiyom pero wala siyay gisulti. Mahinumdoman pa nako ang giingon sa huwes panahon sa husay niadtong adlawa: “Yurii, dili subay sa balaod ang desisyon sa pagpapriso kanimo upat ka tuig kanhi. Dili ka unta angayng makombikto.” Sa wala damha, ako gawasnon na!

Usa ka Sundalo ni Kristo

Sa Hunyo 1990, kinahanglan na usab akong magparehistro sa opisina sa tigrekluta aron makakuha kog permiso nga mopuyo sa Riga. Misulod ako sa mao gihapong opisina nga may taas nga lamesa diin upat ka tuig kanhi akong giingnan ang tenyente koronel nga dili ko magsundalo. Niining panahona, siya mitindog aron sa pagtimbaya ug paglamano kanako, ug miingon: “Gikasubo ko nga naagoman nimo kining tanan. Pasensiya na nga mao kanay nahitabo.”

Ako mitubag: “Ako sundalo ni Kristo, ug  kinahanglang tumanon nako ang gisugo kanako. Sa tabang sa Bibliya, makatagamtam ka usab sa gisaad ni Kristo sa iyang mga sumusunod—usa ka malipayong kinabuhi ug walay-kataposang kaugmaon.” (2 Timoteo 2:3, 4) Mitubag ang koronel: “Di pa dugay mipalit ko ug Bibliya, ug ginabasa ko kana karon.” Diha koy dalang libro nga Ikaw Mabuhing Walay Kataposan sa Paraiso sa Yuta. a Gipakli nako kini sa kapitulo nga naghisgot sa ilhanan sa kataposang mga adlaw ug gipakita nako kaniya kon sa unsang paagi ang tagna sa Bibliya nalangkit sa atong panahon. Uban ang halalom nga apresasyon gilamano na usab ako sa koronel ug nanghinaot siya nga magmalamposon ko sa akong buluhaton.

Nianang panahona ang uma sa Latvia andam na gayong anihon. (Juan 4:35) Sa 1991, nagsugod ko sa pag-alagad ingong ansiyano sa kongregasyon. Dihay duha lamang ka tinudlong ansiyano sa tibuok nasod! Usa ka tuig sa ulahi, ang bugtong kongregasyon sa Latvia nabahin sa duha—ang usa nagsultig-Latviano ug ang usa nagsultig-Ruso. Nakapribilehiyo ko sa pag-alagad uban sa Ruso nga kongregasyon. Paspas kaayo ang pag-uswag nga pagkasunod tuig ang among kongregasyon nabahin sa tulo! Kon akong hinumdoman ang nangagi, klaro nga si Jehova mismo ang nagtultol sa iyang mga karnero ngadto sa iyang organisasyon.

Sa 1998, ako gitudlo ingong espesyal payunir sa Jelgava, usa ka lungsod nga 40 kilometros habagatan-kasadpan sa Riga. Nianang tuiga usab, ako nahimong usa sa unang mga igsoon sa Latvia nga gidapit sa pagtambong sa Tunghaan sa Pagbansay sa Ministeryo nga gidumala sa Ruso nga pinulongan didto sa Solnechnoye, duol sa St. Petersburg, Rusya. Samtang didto sa tunghaan, akong nasabtan kon unsa ka hinungdanon ang pagpakitag gugma sa mga tawo aron magmalamposon sa ministeryo. Gawas pa sa mga butang nga akong nakat-onan sa tunghaan, nakadayeg gayod ako sa gugma ug pagtagad nga gipakita kanamo sa pamilyang Bethel ug sa mga instruktor sa tunghaan.

Ang 2001 maoy laing hinungdanong yugto sa akong kinabuhi sa dihang naminyo ako kang Karina, usa ka maanyag nga Kristohanong babaye. Si Karina miduyog kanako sa espesyal nga bug-os-panahong pag-alagad, ug kada adlaw madasig ako sa dihang makita nako ang akong asawa nga mopauli gikan sa pagsangyaw sa kanataran nga malipayon kaayo. Sa pagkatinuod, usa ka dakong kalipay ang pag-alagad kang Jehova. Ang mapait nga mga kasinatian ilalom sa Komunistang rehimen nagtudlo kanako sa pagsalig kaniya sa bug-os. Takos ang bisan unsang sakripisyo kon ang usa gustong mahimong higala ni Jehova ug magpaluyo sa iyang pagkasoberano. Ang pagtabang sa uban nga makakat-on bahin kang Jehova naghatag ug katuyoan sa akong kinabuhi. Usa ka talagsaon kaayong kadungganan alang kanako nga mag-alagad kang Jehova “ingon nga maayong sundalo ni Kristo.”—2 Timoteo 2:3.

[Footnote]

[Hulagway sa panid 11]

Ako gisentensiyahan ug pinugos nga pagtrabaho sulod sa upat ka tuig ug gipriso didto sa Sentral nga Prisohan sa Riga

[Hulagway sa panid 12]

Uban kang Karina diha sa ministeryo