Hinungdanon ba Kon Unsay Panglantaw sa Uban Kanato?

HALOS tanan gustong dayegon. Malipay kita kon dayegon, nga mobating aduna kitay nalampos. Ang pag-uyon makapadasig pa gani kanato sa pagpauswag sa atong binuhatan. Apan lahi ang atong bation kon atong mamatikdan nga dunay pipila ka tawo nga wala makauyon kanato. Ang dili-mahigalaon nga sanong o hinawayong sulti mahimong makapaluya kanato. Ang panglantaw sa uban kanato mahimong adunay dakong epekto sa kon unsay panglantaw nato sa atong kaugalingon.

Sayop usab ang dili pagtagad kon unsay panglantaw sa uban kanato. Sa pagkatinuod, kita makabenepisyo gayod kon sawayon sa uban ang atong panggawi. Kon ipasukad sa hataas nga moral nga mga prinsipyo, ang mga opinyon sa uban mahimong mag-impluwensiya ug magtukmod kanato nga mahimong matarong. (1 Corinto 10:31-33) Apan, ang opinyon sa publiko kasagarang dili gayod makiangayon. Hunahunaa lang ang tinuis nga panglantaw sa pangulong mga saserdote ug sa uban pa bahin kang Jesu-Kristo sa dihang “sila misinggit, nga nag-ingon: ‘Ilansang! Ilansang siya!’” (Lucas 23:13, 21-25) Labing maayo nga dili na lang panumbalingon ang mga panghunahuna nga gipasukad sa sayop nga impormasyon o naimpluwensiyahan sa kasina o pagpihigpihig. Busa, kinahanglan kitang mohimog maalamong desisyon ug mosanong sa masinabotong paagi bahin sa mga opinyon sa ubang tawo.

Kansang Opinyon ang Mahinungdanon?

Gusto kitang mauyonan niadtong suod nato sa matuod nga pagsimba. Kining mga tawhana naglakip sa mga membro sa pamilya nga anaa sa pagtuo ug sa atong Kristohanong mga igsoon. (Roma 15:2; Colosas 3:18-21) Ang gugma ug pagtahod sa mga isigkamagtutuo ug ang “pagdinasigay” sa ilang taliwala hinungdanon gayod kanato. (Roma 1:11, 12) Sa ‘pagkamapainubsanon sa hunahuna, isipon nato ang uban nga labaw kay kanato.’ (Filipos 2:2-4) Dugang pa, atong tinguhaon ug pabilhan ang pag-uyon “sa mga nagapanguna” kanato—ang mga ansiyano sa kongregasyon.—Hebreohanon 13:17.

Tilinguhaon usab ang “maayong pamatuod gikan sa mga tawo sa gawas.” (1 Timoteo 3:7) Makapadasig gayod kon tahoron kita sa dili-magtutuong mga paryente, isigkatrabahante, ug mga silingan! Ug dili ba gusto natong magbilin ug maayong impresyon sa mga tawong atong gisangyawan aron sila makiling sa pagsanong sa mensahe sa Gingharian? Kon kita nailhan diha sa komunidad ingong hinlo sa moral, matarong, ug matinud-anong mga tawo, atong mahimaya ang Diyos. (1 Pedro 2:12) Apan, dili gayod nato ikompromiso ang mga prinsipyo sa Bibliya aron lang maangkon ang pag-uyon sa uban; ni magpakaaron-ingnon aron ilang dayegon. Angay natong ilhon nga dili gayod nato mapahimut-an ang tanan. Si Jesus miingon: “Kon kamo bahin pa sa kalibotan, higugmaon sa kalibotan ang mga iyaha. Karon tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagdumot kaninyo.” (Juan 15:19) Aduna ba kitay mahimo aron tahoron kita niadtong mga misupak kanato?

Pag-angkon sa Pagtahod sa mga Magsusupak

“Kamo pagadumtan sa tanang katawhan tungod sa akong ngalan,” mipasidaan si Jesus, “apan siya nga nakalahutay hangtod sa kataposan mao ang maluwas.” (Mateo 10:22) Kini nga pagdumot usahay mopatunghag daotang mga akusasyon. Mahimong  akusahan kita sa mapihigong mga opisyal sa gobyerno ingong mga “rebelde” o “subersibo.” Moakusar tingali ang prangkang mga magsusupak nga kita maoy samokang sekta nga kinahanglang sumpoon. (Buhat 28:22) Kining maong sayop nga mga akusasyon masanta usahay. Sa unsang paagi? Pinaagi sa pagsunod sa tambag ni apostol Pedro: “[Magmaandam] kanunay sa pagdepensa atubangan sa tanan nga mangayo kaninyog katarongan sa paglaom nga anaa kaninyo, apan magabuhat niini uban ang kalumo sa buot ug halawom nga pagtahod.” (1 Pedro 3:15) Gawas pa, angay kitang mogamit sa “maayong sinultihan nga dili-masaway; aron ang tawo nga nagasupak maulaw, kay walay mangil-ad nga ikasulti bahin kanato.”—Tito 2:8.

Bisan tuod paningkamotan natong mahinloan ang atong ngalan gikan sa pasipala, dili kita angayng maluya o masubo sa dihang kita pakaulawan. Si Jesus, ang hingpit nga Anak sa Diyos, giakusahan ingong mapasipalahon, mialsa batok sa nasod, ug may daotang espiritu pa gani. (Mateo 9:3; Marcos 3:22; Juan 19:12) Gidaot usab ang dungog ni apostol Pablo. (1 Corinto 4:13) Wala panumbalinga ni Jesus ug Pablo ang maong pagpanaway ug padayon silang nagmapuliki sa ilang buluhaton. (Mateo 15:14) Nahibalo sila nga ang ilang mga kaaway dili gayod mouyon kanila, sanglit “ang tibuok kalibotan nailalom sa gahom sa usa nga daotan.” (1 Juan 5:19) Karon, kita nag-atubang ug susamang mga suliran. Dili kita angayng mahadlok sa dihang ang madumtanong mga magsusupak magpakaylap ug mga bakak bahin kanato.—Mateo 5:11.

Mga Opinyon nga Mahinungdanon Gayod

Nagkalainlain gayod ang panghunahuna sa mga tawo bahin kanato, depende sa ilang mga motibo ug sa kon unsay ilang nadunggan bahin kanato. Kita ginadayeg ug gipasidunggan sa pipila, ginadaot ug ginadumtan usab sa uban. Apan kon kita gigiyahan sa mga prinsipyo sa Bibliya, kita aduna gayoy katarongan nga magmalipayon ug magmalinawon.

Si apostol Pablo misulat: “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang, sa pagdisiplina diha sa pagkamatarong, aron ang tawo sa Diyos mahimong takos gayod, bug-os nga masinangkapan alang sa tanang maayong buhat.” (2 Timoteo 3:16, 17) Atong maangkon ang pag-uyon ni Jehova nga Diyos ug sa iyang Anak, si Jesu-Kristo, pinaagi sa mapasalamatong pagdawat sa Pulong sa Diyos ingong atong giya sa tanang butang. Kon buot hunahunaon, ang mga opinyon nga labing mahinungdanon mao kadtong iya ni Jehova ug sa iyang Anak. Ang ilang panglantaw kanato magbanaag sa atong tinuod nga bili. Sa kataposan, ang atong kinabuhi nagdepende sa ilang pag-uyon.—Juan 5:27; Santiago 1:12.

[Blurb sa panid 30]

“Mobati akog kaulaw kon dayegon, kay sa tinuoray lang gipangandoy ko kini.”—INDIAN NGA MAGBABALAK NGA SI RABINDRANATH TAGORE

[Mga hulagway sa panid 31]

Hinungdanon ang mga opinyon sa atong mga isigkamagtutuo

[Picture Credit Line sa panid 30]

Culver Pictures