Pahimusli ang Kinamaayohang Edukasyon!

ANG Bibliya nagpaila kang Jehova nga Diyos ingong Maglalalang sa tanang butang, lakip na sa mga tawo. (Genesis 1:27; Pinadayag 4:11) Ingong Dakong Instruktor, iyang giedukar ang unang tawhanong magtiayon, si Adan ug Eva, ug giandam sila sa pagkinabuhi diha sa matahom nga tanaman sa Eden. Iyang katuyoan nga padayon silang edukahon ug atimanon hangtod sa hangtod. (Genesis 1:28, 29; 2:15-17; Isaias 30:20, 21) Hunahunaa lang kanang maong kaugmaon!

Apan, ikasubo nga ang unang magtiayon nagsalikway sa ilang kaugmaon. Ang ilang masinupakong dalan maoy sinugdanan sa moral ug pisikal nga kadunotan sa tawhanong rasa. (Genesis 3:17-19; Roma 5:12) Naghisgot niadtong nagkinabuhi pipila lamang ka kaliwatan human sa paglalang sa tawo, ang Bibliya nag-ingon: “Nakita ni Jehova nga ang pagkadaotan sa tawo dagaya diha sa yuta ug ang matag kiling sa mga hunahuna sa iyang kasingkasing daotan lamang sa tanang panahon.”—Genesis 6:5.

Duolan sa 4,500 ka tuig ang milabay sukad nga si Jehova mihinapos nga ang tawo kanunayng nakiling sa pagkadaotan, ug ang kahimtang sa katawhan karon misamot ka daotan kay sukad masukad. Daghan ang walay kokaulaw nga mamakak, mangawat, o managmal sa uban. Ang mga problema nagkadaghan adlaw-adlaw, samtang ang kahingawa alang sa isigkatawo nagkamenos. Dili ba nameligro pag-ayo ang kadaghanang personal nga mga relasyon, lakip na ang mga relasyon sulod sa pamilya? Bisan pa niana, ang Diyos dili maoy responsable sa presenteng mga kahimtang, ni siya mihunong sa pagpakitag kahingawa sa mga problema karon. Si Jehova interesado gayod sa kaayohan sa tawo, ug siya andam nga moedukar niadtong magpagiya kaniya aron makakab-ot ug malipayong kinabuhi. Mga 2,000 ka tuig kanhi, iyang gipadala ang iyang Anak, si Jesu-Kristo, dinhi sa yuta ug gipasundayag ang Iyang kaikag sa pag-edukar sa mga tawo nga gustong magmalamposon sa ilang kinabuhi. Si Jesus nagbilin ug sulondan alang sa hingpit nga edukasyon tungod kay siya gitudloan sa Dakong Instruktor sulod sa dili-maihap nga katuigan.

Matuod nga Kristiyanidad—Usa ka Edukasyon

Gitukod ni Jesu-Kristo ang matuod nga Kristiyanidad, usa ka paagi sa pagkinabuhi nga gipasukad sa gugma. Niana, ang tanang hunahuna ug mga lihok kinahanglang kaharmonya sa kabubut-on sa Diyos, sa tuyo nga magpasidungog ug maghimaya sa iyang ngalan. (Mateo 22:37-39; Hebreohanon 10:7) Ang nagpaluyo sa mga pagtulon-an ni Jesus niining maong dalan sa kinabuhi mao ang iyang Amahan, si Jehova. Atong mabasa sa Juan 8:29 ang mahitungod sa pagpaluyo nga nadawat ni Jesus gikan sa Diyos: “Siya nga nagpadala kanako nagauban kanako; wala niya ako biyai nga ako ra, tungod kay ginabuhat ko kanunay ang mga butang nga makapahimuot kaniya.” Oo, si Jesus gipaluyohan ug gigiyahan sa iyang Amahan sa tibuok niyang ministeryo. Ang unang mga sumusunod ni Jesus dili kinahanglang moatubang sa mga suliran sa kinabuhi nga walay giya. Giedukar sila ni Jehova pinaagi sa iyang Anak. Ang ilang pagsunod sa mga pagtulon-an ug panig-ingnan ni Jesus naghimo kanilang mas maayong mga tawo. Mao usab kiniy kahimtang sa iyang mga tinun-an karon.—Tan-awa ang kahon nga “Ang Impluwensiya ni Jesus ug sa Iyang mga Pagtulon-an,” sa panid 6.

Ang usa ka linaing kinaiyahan sa matuod nga Kristiyanidad mao nga kini naglakip ug edukasyon nga nag-apektar sa hunahuna ug kasingkasing aron mabag-o ang pangsulod nga pagkatawo. (Efeso 4:23, 24) Sa paghisgot ug usa lang ka pananglitan, tagda ang gitudlo ni Jesus maylabot sa pagkamaunongon  ngadto sa kapikas: “Nadungog ninyo nga kini giingon, ‘Dili ka manapaw.’ Apan ako magaingon kaninyo nga ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mateo 5:27, 28) Pinaagi niining mga pulonga, gitudloan ni Jesus ang iyang mga tinun-an nga ang kasingkasing kinahanglang huptan nga hinlo ug ang dili-hustong mga hunahuna ug mga tinguha, bisag wala pa himoa, mahimong adunay daotang mga sangpotanan. Dili ba tinuod nga ang daotang mga hunahuna mahimong motultol sa mga buhat nga makapasuko sa Diyos ug makapasakit sa uban?

Busa, ang Bibliya naghatag niining tambaga: “Hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) ‘Posible ba gayod nga mabag-o ang hunahuna pinaagi sa edukasyon?’ mangutana ka tingali. Ang pagbag-o sa hunahuna naglangkit ug pagpalihok niana sa pagsubay sa lahi nga direksiyon pinaagi sa pagpuno niana sa mga prinsipyo ug instruksiyon nga gihatag sa Pulong sa Diyos. Mahimo kini pinaagi sa pagdawat sa edukasyon nga gitagana sa Diyos pinaagi sa iyang Pulong.

Napalihok sa Pag-usab

“Ang pulong sa Diyos buhi ug gamhanan.” (Hebreohanon 4:12) Kini aduna gihapoy dakong impluwensiya sa mga indibiduwal, sa ingon nagpamatuod nga kini dili mahimong isipong kinaraan. Kini makapalihok sa usa ka tawo sa pag-usab sa iyang dalan, pagsagop sa matuod nga Kristiyanidad, ug mahimong mas maayong tawo. Ang mosunod nga mga panig-ingnan nag-ilustrar sa bili sa edukasyon sa Bibliya.

Si Emilia, nga gihisgotan sa nag-unang artikulo, nag-ingon: “Ang kaugalingong paningkamot dili pa igo sa pagpaarang-arang sa kahimtang sa akong panimalay. Sa dihang ako nagsugod na sa pagtuon sa Bibliya uban sa mga Saksi ni Jehova, akong naamgohan nga aduna pa diay paglaom ug busa gisugdan nako ang pag-usab sa akong tinamdan. Ako nakakat-on sa pagkahimong mas mapailobon ug sa dili pagsilaob sa kasuko. Sa ngadtongadto, ang akong bana miduyog kanako sa pagtuon. Dili sayon para kaniya nga mohunong sa pag-inom, apan nakaundang ra siya. Kini naghatag kanamog kahigayonan nga mabag-o ang among kaminyoon. Karon kami maoy malipayong mga Kristohanon ug nagpatisok diha sa among mga anak sa maayong mga prinsipyo sa Bibliya.”—Deuteronomio 6:7.

Ang edukasyon nga gitagana sa matuod nga Kristiyanidad makapalingkawas sa usa ka tawo gikan sa mga bisyo ug sa imoral nga estilo sa kinabuhi. Nakaplagan ni Manuel a nga tinuod kini. Sa edad nga 13 anyos, siya milayas sa ilang balay ug misugod pagyupyop ug marijuana. Sa ngadtongadto, siya migamit ug heroina. Siya nakigsekso sa mga lalaki ug babaye bugti sa puy-anan ug salapi. Usahay, suportahan usab ni Manuel ang iyang kaugalingon pinaagi sa pagpanghold-ap. Halos kanunay siyang mailalom sa impluwensiya sa droga. Tungod sa iyang mabangis nga panggawi siya kanunayng  mapriso. Kas-a, siya migugol ug upat ka tuig sa prisohan ug didto siya nalangkit sa pagpamaligya ug armas. Human siya maminyo, padayong giani ni Manuel ang mga sangpotanan sa iyang paagi sa pagkinabuhi. Siya miingon: “Kami nagpuyo na lang sa kanhing manokan. Ako pang mahinumdoman ang akong asawa nga nagluto ug pagkaon ibabaw sa pipila ka bloke sa tisa. Ang among kahimtang wala gayoy kasegurohan nga bisan gani ang akong kaugalingong pamilya nag-awhag sa akong asawa sa pagbiya kanako.”

Unsay nakapausab sa iyang kinabuhi? Si Manuel mitubag: “Usa ka kaila ang miduaw kanamo nga naghisgot bahin sa Bibliya. Misugot ko nga duawon aron lamang ipakita kaniya nga ang usa ka Diyos nga interesado sa mga tawo wala maglungtad. Akong giisip ang akong kaugalingon ingong buhing pamatuod niana. Ako natingala nga ang Saksi mapailobon ug matinahoron, busa misugot ko nga motambong sa mga tigom sa Kingdom Hall. Bisan tuod ang uban didto nahibalo sa akong kaagi, ila kong gitimbaya sa mahigalaong paagi. Gipabati nila kanako nga ako apil sa ilang pundok. Makapahupay kaayo kadto. Ako natandog hangtod sa punto nga ako nakahukom sa paghunong sa paggamit ug droga aron makakita ug dungganon nga trabaho. Upat ka bulan gikan sa akong pagsugod ug pagtuon, ako kuwalipikado na nga moduyog sa buluhatong pagsangyaw, ug upat ka bulan human niana, ako nabawtismohan ingong usa sa mga Saksi ni Jehova.”

Unsay kahulogan sa matuod nga Kristiyanidad alang kang Manuel ug sa iyang pamilya? “Kon wala ang edukasyon sa Bibliya seguradong dugay na kong namatay. Tungod sa paagi sa pagkinabuhi nga gitudlo ni Jesus, nahibalik kanako ang akong pamilya. Ang akong duha ka anak dili na kinahanglang makasinati sa akong naagian sa batan-on pa ako. Ako mapasigarbohon ug mapasalamaton kaayo kang Jehova tungod sa maayong relasyon nga akong nabatonan karon uban sa akong asawa. Ang ubang mga kaila nako kanhi nagpahalipay kanako ug miingon nga sa ilang hunahuna ang dalan nga akong gisubay karon mao ang kinamaayohan.”

Sa Kristohanong paagi sa pagkinabuhi, ang moral nga kahinlo dinuyogan sa pisikal nga kahinlo. Si John, nga nagpuyo sa usa ka dapit sa Habagatang Aprika nga nag-ilaid sa kakabos, nakasabot  ra niana. Siya misaysay: “Usahay ang among anak nga babaye dili maligo sulod sa usa ka semana, ug walay usa kanamo ang nagpakabana.” Miangkon ang iyang asawa nga ang ilang balay hugaw kaayo. Apan pinaagi sa Kristohanong edukasyon, nausab ang ilang kahimtang. Si John mihunong na sa pagpakig-uban sa usa ka grupo sa mga kawatan ug awto ug nagsugod sa paghatag ug dugang pagtagad sa iyang pamilya. “Among nakat-onan nga ingong mga Kristohanon, kinahanglang huptan natong hinlo ang atong lawas ug besti. Akong nagustohan ang giingon sa 1 Pedro 1:16, nga nagtambag kanato nga magmabalaan tungod kay si Jehova nga Diyos balaan. Karon naningkamot usab kami sa paghimo sa among yanong panimalay nga nindot tan-awon.”

Imong Makaplagan ang Kinamaayohang Edukasyon

Ang mga kasinatian nga gihisgotan sa ibabaw dili talagsaon. Tungod sa edukasyon nga gipasukad sa Bibliya, libolibo ka tawo ang nakakat-on sa pagpaarang-arang sa ilang pagkinabuhi. Pinaagi sa ilang pagkamatinud-anon ug pagkakugihan, sila gipabilhan sa ilang mga amo. Sila nahimong maayong mga silingan ug mga higala, nga nagpakita ug interes sa kaayohan sa ilang isigkatawo. Determinado sila nga likayan ang mga bisyo ug unodnong mga kiling, busa mas giatiman nila ang ilang pisikal, mental, ug emosyonal nga kahimsog. Imbes usikan ang ilang mga kahinguhaan diha sa bisyo, ilang gigamit kana alang sa ilang kaayohan ug sa kaayohan sa ilang pamilya. (1 Corinto 6:9-11; Colosas 3:18-23) Sa walay duhaduha, ang mga resulta sa pagpadapat sa gilatid ni Jehova diha sa Bibliya nagpasundayag nga ang pagkinabuhi sumala sa matuod nga Kristiyanidad mao ang labing maayong paagi sa pagkinabuhi, nga nagtagana sa kinamaayohang edukasyon. Mahitungod sa usa ka tawo nga nagkinabuhing kaharmonya sa mga balaod sa Diyos, ang Bibliya nag-ingon: “Ang tanan nga ginabuhat niya magmalamposon.”—Salmo 1:3.

Makapadasig ang pagkahibalo nga ang Labing Gamhanan nga Diyos, si Jehova, gustong moedukar kanato. Siya miingon bahin sa iyang kaugalingon: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isaias 48:17) Oo, gipakita ni Jehova ang dalan pinaagi sa panig-ingnan ug mga pagtulon-an sa iyang Anak, si Jesu-Kristo. Ang iyang mga pagtulon-an nakapausab sa kinabuhi sa daghan nga nakaila kaniya sa dinhi pa siya sa yuta, ug maingon man usab sa daghang uban pa nga nagkinabuhi sumala sa iyang mga pagtulon-an karon. Nganong dili mogahin ug panahon sa pagkat-on ug dugang bahin niining maong mga pagtulon-an? Ang mga Saksi ni Jehova sa imong silinganan malipay nga motabang kanimo aron imong madawat ang maong bililhong edukasyon.

[Footnote]

[Kahon/Hulagway sa panid 6]

Ang Impluwensiya ni Jesus ug sa Iyang mga Pagtulon-an

Ginamit ang iyang posisyon ingong pangulong maniningil ug buhis, si Zaqueo nadato tungod sa pagpangilkil ug pagpangawat gikan sa komon nga mga tawo. Apan giusab niya ang iyang paagi sa pagkinabuhi pinaagi sa pagpadapat sa mga pagtulon-an ni Jesus.—Lucas 19:1-10.

Si Saulo sa Tarso mihunong sa paglutos sa mga Kristohanon ug nakabig sa Kristiyanidad, nga nahimong apostol Pablo.—Buhat 22:6-21; Filipos 3:4-9.

Kaniadto ang ubang mga Kristohanon sa Corinto mga ‘makihilawason, tigsimbag idolo, mananapaw, homoseksuwal, kawatan, dalo, palahubog, tigsultig pasipala, ug mga mangingilkil.’ Apan, sa pagkakat-on nila sa matuod nga Kristiyanidad, sila ‘nahugasan na, nabalaan, ug napahayag na nga matarong sa ngalan sa ilang Ginoong Jesu-Kristo.’—1 Corinto 6:9-11.

[Hulagway sa panid 7]

Ikapakita sa Bibliya kanimo kon sa unsang paagi magmalamposon