Ilang Gipaambit ang Maayong Balita Ngadto sa mga Bungol

“SILA makatabang kaninyo sa espirituwal nga paagi!” Mao kanay gisulti di pa dugay sa direktor sa usa ka puy-anan sa mga tigulang sa Navalcarnero, Madrid, Spain, bahin sa mga pagduaw sa mga Saksi ni Jehova sa iyang sentro. Unsay nakaaghat kaniya sa pagsulti niana?

Ubay-ubay sa mga namuyo didto sa Rosas del Camino mga bungol. Apan, tungod kay ang mga Saksi ni Jehova naningkamot sa pagtuon ug Spanish Sign Language, sila makahimo sa pagpakigkomunikar niining mga tawhana. Gidayeg sa direktor ang mga Saksi tungod sa ilang paggugol ug panahon sa pagtudlog mga pagtulon-an sa Bibliya nga walay bayad ngadto sa nanginahanglan niini. Iyang nakita ang maayong epekto sa maayong balita sa Gingharian nga ilang gitudlo sa mga namuyo didto. Ug gipabilhan usab pag-ayo sa mga namuyo didto, ilabina niadtong mga bungol o buta, ang mga pagduaw sa mga Saksi.

Si Eulogio, usa sa mga buta ug bungol nga nagpuyo didto, nagtuon karon sa Bibliya uban sa mga Saksi ni Jehova. Usa ka adlaw niana samtang nagpadayon ang pagtuon, miduol ang usa ka tigulang nga lalaki ug gihatag ngadto sa Saksi ang usa ka balak nga gitagik sa mga namuyo didto agig pasalamat. Ang balak nag-ulohag “Pagkahimong Usa ka Saksi.” Sa bahin, kini nag-ingon: “Sila adunay makapatagbaw, disiplinado nga kinabuhi, ug gikan kang Jehova ilang nadawat ang makapalipay nga kaalam. Sila tigduawan sa kabalayan tungod kay sila misalig kang Jehova.”

Kini nga pagsalig kang Jehova mao gayod ang nagtukmod sa daghang Saksi sa tibuok kalibotan sa pagtuon ug senyas nga pinulongan sa mga bungol sa ilang nasod. Niining paagiha ilang gipaambit sa maong mga tawo ang makapadasig nga mensahe sa paglaom nga makaplagan diha sa Bibliya.