Ang Arte sa Pagpaminaw nga May Gugma

“SALAMAT sa imong pagpaminaw kanako.” Aduna bay tawo nga nakasulti kanimo niana di pa dugay? Pagkanindot nga pagdayeg kana! Ang usa ka maayong tigpaminaw ginadayeg halos sa tanan. Pinaagi sa pagpaminawg maayo, atong madasig ang mga tawo nga nagmagul-anon o nabug-atan sa ilang mga problema. Ug dili ba ang pagkahimong maayong tigpaminaw motabang kanato sa pagmahal sa mga tawo? Diha sa Kristohanong kongregasyon, ang pagpaminaw nga may gugma maoy usa ka hinungdanong bahin sa ‘paghunahuna sa usag usa aron sa pagdasig ngadto sa paghigugma ug sa maayong mga buhat.’—Hebreohanon 10:24.

Apan, daghang tawo ang dili maayong tigpaminaw. Gusto nilang motambag, moasoy sa ilang mga kasinatian, o mopahayag sa ilang punto debista imbes maminaw sa isulti sa uban. Ang pagpaminaw usa gayod ka arte. Sa unsang paagi kita makapaminaw nga may gugma?

Usa ka Hinungdanong Butang nga Makatabang

Si Jehova mao ang atong “Dakong Instruktor.” (Isaias 30:20) Siya makatudlo kanatog daghang butang bahin sa pagpaminaw. Tagda kon sa unsang paagi gitabangan ni Jehova ang manalagnang si Elias. Kay nahadlok sa mga hulga ni Raynang Jezebel, si Elias mikalagiw ngadto sa kamingawan ug miingon nga gusto na niyang mamatay. Ang manulonda sa Diyos nakig-estorya kaniya didto. Samtang gipahayag sa manalagna ang iyang mga gikahadlokan, si Jehova naminaw ug dayon gipakita ang Iyang dakong gahom. Unsay resulta? Kay wala na mahadlok, si Elias mibalik sa iyang asaynment. (1 Hari 19:2-15) Nganong maminaw man si Jehova sa mga gikabalak-an sa iyang mga alagad? Tungod kay siya may kahingawa kanila. (1 Pedro 5:7) Kini ang hinungdanong butang nga makatabang sa pagkahimong maayong tigpaminaw: Mahingawa sa uban, ug ipakita ang tinuod nga kabalaka alang kanila.

Sa dihang ang usa ka lalaki nga taga-Bolivia nakahimog grabeng sala, napabilhan niya ang tinuod nga kahingawa gikan sa usa ka isigkamagtutuo. Ang maong lalaki miingon: “Hilabihan gyod nakong guola niadtong tungora. Mohunong na unta ko sa pag-alagad kang Jehova kon wala pa mogahig panahon ang usa ka brader sa pagpaminaw kanako. Wala siyay daghang gisulti, apan ang pagkasayod nga naminaw siya pag-ayo nakapalig-on gayod kanako. Wala ko magkinahanglag sulbad; nahibalo ko kon unsay angay kong buhaton. Ang ako lang gikinahanglan mao nga dunay usa nga may kahingawa kon unsay akong gibati. Nahuwasan ako sa tumang kaguol tungod sa iyang pagpaminaw kanako.”

Ang dakong Panig-ingnan bahin sa arte sa pagpaminaw nga may gugma mao si Jesu-Kristo. Wala madugay human sa kamatayon ni Jesus, mipanaw ang duha sa iyang mga tinun-an gikan sa Jerusalem paingon sa usa ka balangay nga mga 11 kilometros ang gilay-on. Walay duhaduha nga sila nawad-an gayod ug kadasig. Busa ang nabanhawng Jesu-Kristo misugod sa paglakaw uban kanila. Misukna siya ug maayong pagkahan-ayng mga pangutana aron iyang mahibaloan kon unsay ilang gikabalak-an, ug mitubag ang mga tinun-an. Ilang gipahayag ang paglaom nga ilang gihambin ug ang kahigawad ug kalibog nga ilang gibati niadtong tungora. Si Jesus nahingawa kanila, ug ang iyang pagpaminaw nga may gugma nag-agak sa maong duha ka tinun-an sa pagpaminaw. Dayon ‘gibadbad ni Jesus kanila ang mga butang maylabot sa iyang kaugalingon diha sa tibuok Kasulatan.’—Lucas 24:13-27.

 Ang pagpaminaw pag-una maoy usa ka mahigugmaong paagi aron ang uban maminaw kanato. “Ang akong mga ginikanan ug ang akong mga ugangan misugod sa pagsupak sa akong paagi sa pagmatuto sa akong mga anak,” matod pa sa usa ka babaye nga taga-Bolivia. “Naglagot ko sa ilang gipanulti, apan kulang akog pagsalig sa akong kaugalingon ingong usa ka ginikanan. Niadtong tungora, usa sa mga Saksi ni Jehova ang miduaw kanako. Naghisgot siya bahin sa mga saad sa Diyos. Apan, ang iyang paagi sa pagpangayo sa akong opinyon ang nakapaamgo kanako nga siya andam sa pagpaminaw. Gipadayon nako siya, ug sa wala madugay akong gitug-an ang akong problema kaniya. Siya mapailobong naminaw. Nangutana siya kon unsay akong gusto para sa akong mga anak ug kon unsay pagbati sa akong bana bahin niana. Makapahupay gayod ang pagpakig-uban sa usa ka tawo nga andam sa pagsabot kanako. Sa dihang gipakita niya kanako kon unsay gisulti sa Bibliya bahin sa pamilyahanong kinabuhi, nasayod ko nga nakigsulti ako sa usa ka tawo nga may kahingawa sa akong kahimtang.”

“Ang gugma . . . dili mangita sa kaugalingong kaayohan niini,” nag-ingon ang Bibliya. (1 Corinto 13:4, 5) Nan, ang pagpaminaw nga may gugma nagpasabot nga atong ihiklin ang atong kaugalingong mga interes. Tingali kinahanglang patyon una ang telebisyon, ibutang ang mantalaan, o patyon ang cell phone kon ang uban makig-estorya kanato bahin sa usa ka seryosong butang. Ang pagpaminaw nga may gugma nagkahulogang interesado gayod kita sa hunahuna sa laing tawo. Kinahanglang dili nato sugdan ang pagsulti bahin sa atong kaugalingon pinaagi sa pagsultig sama sa, “Nahinumdom ako nga kana ang nahitabo kanako di pa dugay.” Bisan tuod maayo ra man ang pagsulti niana sa dihang makig-estorya sa usa ka higala, kinahanglan natong ihiklin ang personal nga mga interes kon dunay maghisgot ug seryosong problema. Ang tiunayng interes sa uban mahimong ipasundayag sa lain pang paagi.

Paminaw Aron Masabtan Kon Unsay Pagbati sa Uban

Ang mga kauban ni Job nakapaminaw ug labing menos napulo niya ka diskurso. Bisan pa niana, si Job mipatugbaw: “Oh nga unta may usa nga mamati kanako!” (Job 31:35) Ngano man? Tungod kay ang ilang pagpaminaw wala makahatag ug kahupayan. Wala silay kahingawa kang Job ni gusto nilang sabton ang iyang mga pagbati. Sila wala gayoy simpatiya. Apan si apostol Pedro nagtambag: “Kamong tanan magbaton ug samang panghunahuna, nga magpakitag pagbati alang sa isigkaingon, nga magbaton ug inigsoong pagbati, magmabination uban ang kalumo, magmapainubsanon sa hunahuna.” (1 Pedro 3:8) Unsaon nato pagpakitag pagbati alang sa isigkaingon? Ang usa ka paagi mao ang pagpakitag kahingawa alang sa pagbati sa laing tawo ug ang pagsabot niana. Ang pagpahayag ug may-simpatiyang mga komento sama sa “makalagot gyod tuod na” o “gibati gyod nimong wala ka tingali hisabti” maoy usa ka paagi sa pagpakita nga kita nahingawa. Ang laing paagi mao nga ipahayag ang gisulti sa laing tawo sa atong kaugalingong mga pulong, sa ingon magpakita nga atong nasabtan ang iyang giingon. Ang pagpaminaw nga may gugma nagpasabot sa pagtagad sa gisulti ug sa nagpahipi nga mga pagbati.

Si Robert a maoy usa ka eksperyensiyadong bug-os-panahon nga ministro sa mga Saksi ni Jehova. Matod niya: “Dihay panahon nga mibati kog kaluya sa akong pag-alagad. Busa mihangyo ko nga makigsulti sa nagapanawng magtatan-aw. Siya naminaw gyod pag-ayo ug naningkamot sa pagsabot sa akong mga pagbati. Morag nasabtan pa gani niya ang akong kahadlok nga basig sawayon niya ang  akong tinamdan. Gipasaligan ko sa magtatan-aw nga siya nakasabot sa akong gibati, tungod kay siya mismo nakasinati usab ug susamang mga pagbati. Kadto nakatabang gyod kanako sa pagpadayon.”

Makapaminaw ba kita bisag dili kita mouyon sa iyang gisulti? Makapasalamat ba kita nga gitug-anan kon unsay iyang gibati? Siyempre. Komosta kon ang imong batang lalaki nakigsinumbagay sa eskuylahan o ang imong tin-edyer nga anak babaye miuli sa inyoha ug miingon nga siya nahigugma na? Dili ba mas maayong maminaw usa ang ginikanan ug mosulay sa pagsabot kon unsay anaa sa hunahuna sa iyang anak sa dili pa magpatin-aw sa kon unsay husto ug dili-hustong panggawi?

“Ang laraw diha sa kasingkasing sa tawo ingon sa halawom nga katubigan,” nag-ingon ang Proverbio 20:5, “apan ang tawo nga may katakos sa pag-ila maoy magatimba niini.” Kon ang usa ka maalamon ug eksperyensiyadong tawo dili ganahang motambag kon dili hangyoon, nan mahimong atong pangayoon ang iyang tambag. Ingon usab niana ang kahimtang kon kita maminaw nga may gugma. Kinahanglan ang mailahong pagsabot (discernment) aron ipahayag sa usa ka tawo kon unsay iyang hunahuna. Makatabang ang pagsuknag mga pangutana, apan kinahanglang mag-amping kita nga ang atong mga pangutana dili maghisgot sa pribadong mga butang. Makatabang tingali ang pagsugyot nga iyang isulti una ang mga butang nga sayonan siya sa paghisgot. Pananglitan, ang asawa nga gustong mosulti bahin sa mga problema sa iyang kaminyoon tingali mas sayonan sa pagsugod sa estorya pinaagi sa pagsaysay kon sa unsang paagi sila nagkaila ug naminyo. Ang usa ka tawo nga nahimong dili aktibo sa Kristohanong ministeryo tingali dili malisdan sa pag-estorya pinaagi sa pagsaysay kon sa unsang paagi siya nakakat-on sa kamatuoran.

Dili Sayon ang Pagpaminaw nga May Gugma

Mahimong lisod ang pagpaminaw sa usa ka tawo nga nasuko kanato, tungod kay ang atong kinaiyanhong tinamdan mao ang pagdepensa sa atong kaugalingon. Sa unsang paagi dumalahon nato kining malisod nga kahimtang? “Ang tubag, kon malumo, makapahilayo sa kaaligutgot,” nag-ingon ang Proverbio 15:1. Ang usa ka paagi sa malumong pagtubag mao nga pasultihon ang maong tawo ug dayon mapailobong maminaw sa iyang reklamo.

Ang mainit nga mga panaglalis sagad mahitabo kon dunay duha ka tawo nga magbalikbalik pagsulti sa ila nang nasulti. Silang duha parehong mobati nga wala siya paminawa sa lain. Pagkamaayo unta kon usa kanila ang mohunong sa pagsulti ug maminaw! Siyempre, hinungdanon ang pagpakitag pagpugong-sa-kaugalingon ug ang pagpahayag sa imong hunahuna sa maalamon ug mahigugmaong paagi. Ang Bibliya nag-ingon kanato: “Siya nga nagapugong sa iyang mga ngabil nagalihok nga maalamon.”—Proverbio 10:19.

Ang katakos sa pagpaminaw nga may gugma dili kinaiyanhon. Hinunoa, kini maoy usa ka arte nga makat-onan pinaagig pagpaningkamot ug disiplina. Takos gayod kining makat-onan. Ang pagpaminawg maayo sa dihang mosulti ang uban maoy pagpahayag sa atong gugma. Makapalipay usab kini kanato. Nan, pagkamaalamon gayod kon atong ugmaron ang arte sa pagpaminaw nga may gugma!

[Footnote]

[Hulagway sa panid 11]

Sa dihang maminaw, kinahanglan natong ihiklin una ang atong kaugalingong mga interes

[Hulagway sa panid 12]

Dili sayon ang pagpaminaw sa usa ka tawo nga nasuko