Tinuod ba ang Yawa?

UNSAY imong opinyon bahin sa Yawa? Nagtuo ka ba nga siya maoy tinuod nga persona nga motental sa mga tawo sa paghimog daotang mga butang, o siya naghawas lamang sa daotang kinaiya? Angay bang kahadlokan ang Yawa, o dili ra tagdon ingong usa lamang ka patuotuo o bunga lamang sa handurawan? Ang pulong “yawa” nagtumong ba lamang sa usa ka dili-masabtan nga daotang puwersa sa uniberso? Posible kaha nga ang maong termino maoy usa ka simbolo lamang sa daotang mga kinaiya nga anaa sa mga tawo, sama sa gipatuo sa daghang modernong mga teologo?

Dili ikatingala nga ang katawhan nabahin maylabot sa isyu kon kinsa ang Yawa. Aw, hunahunaa lang kon unsa ka lisod mahibaloan ang tinuod nga pagkatawo sa usa ka batid sa panglimbong! Tinuod kana ilabina kon siya determinadong magtago sa iyang tinuod nga pagkatawo. Ang Bibliya nagbatbat sa Yawa ingong susama nianang tawhana. Nagtumong kaniya ingong Satanas, kini nag-ingon: “Si Satanas kanunayng naghimo sa iyang kaugalingon nga usa ka manulonda sa kahayag.” (2 Corinto 11:14) Bisag siya daotan, ang Yawa nagpakaaron-ingnong maayo aron malimbongan ang uban. Ug kon iyang mapatuo ang mga tawo nga siya wala gayod maglungtad, kana mas mohaom pa sa iyang katuyoan.

Nan, kinsa ba gayod ang Yawa? Kanus-a ug sa unsang paagi siya milungtad? Sa unsang paagi iyang giimpluwensiyahan ang katawhan karon? Aduna ba kitay mahimo aron masuklan ang maong impluwensiya? Ang Bibliya naundan sa tukmang kasaysayan bahin sa Yawa sukad sa iya mismong pagsugod ug naghatag ug matinud-anong mga tubag niining mga pangutanaha.

[Hulagway sa panid 3]

Lisod gayong mailhan ang usa ka tawo nga determinadong magtago sa iyang tinuod nga pagkatawo!