Kinsay Imong Sugton—Ang Diyos o ang mga Tawo?

“Kinahanglang among sugton ang Diyos ingong magmamando inay ang mga tawo.”—Buhat 5:29.

1. (a) Unsa ang temang teksto alang niini nga pagtuon? (b) Nganong gidakop man ang mga apostoles?

 ANG mga maghuhukom sa Hudiyohanong korte suprema nangasuko gayod. Nawala ang mga binilanggo. Sila ang mga apostoles ni Jesu-Kristo, ang tawo nga gihukmang mamatay sa hataas nga hukmanan pipila lang ka semana ang miagi. Karon hapit nang hukman ang iyang labing suod nga mga sumusunod. Apan sa dihang miadto ang mga guwardiya aron sa pagkuha kanila, ilang nadiskobrehan nga way sulod ang ilang mga selda, bisan pag gitrangkahan ang mga pultahan niini. Sa wala madugay nahibaloan sa mga guwardiya nga ang mga apostoles atua sa templo sa Jerusalem, nga way-kokahadlok nga nanudlo sa mga tawo bahin kang Jesu-Kristo—ang mao ra gihapong kalihokan nga sila gidakop! Nagdalidali pag-adto ang mga guwardiya sa templo, gidakop pag-usab ang mga apostoles, ug gitaral sa hukmanan.—Buhat 5:17-27.

2. Unsay gisugo sa manulonda nga buhaton sa mga apostoles?

² Usa ka manulonda ang nagpagawas sa mga apostoles gikan sa bilanggoan. Aron ba sila makalingkawas sa dugang paglutos? Dili. Kadto maoy aron ang mga molupyo sa Jerusalem makadungog sa maayong balita bahin kang Jesu-Kristo. Ang sugo sa manulonda ngadto sa mga apostoles mao nga sila ‘magpadayon sa pagsulti sa katawhan sa tanang pulong bahin niining kinabuhia.’ (Buhat 5:19, 20) Busa sa dihang nangabot ang mga guwardiya didto  sa templo, ilang nakita ang mga apostoles nga matinumanong nagtuman nianang sugoa.

3, 4. (a) Sa dihang gimandoan nga mohunong sa pagsangyaw, unsay sanong ni Pedro ug Juan? (b) Unsay sanong sa ubang mga apostoles?

³ Duha sa maong maisogong mga magwawali, sila si apostol Pedro ug Juan, ang gitaral na sa hukmanan sa miagi, sa dihang sila hugot nga gipahimangnoan sa pangulong huwes nga si Jose Caifas. Siya miingon: “Hugot kaming nagmando kaninyo nga dili na magpadayon sa pagpanudlo pinasukad [sa ngalan ni Jesus], apan, tan-awa! inyong gipuno ang Jerusalem sa inyong pagtulon-an.” (Buhat 5:28) Dili unta angayng makurat si Caifas nga makakita pag-usab kang Pedro ug Juan sa hukmanan. Sa dihang mimando siya sa pagpahunong sa pagsangyaw sa unang higayon, ang duha ka apostoles mitubag: “Kon matarong man sa panan-aw sa Diyos sa pagpamati kaninyo inay kay sa Diyos, kamo na ang mohukom. Apan alang kanamo, dili kami makahunong sa pagsulti sa mga butang nga among nakita ug nadungog.” Sama sa karaang manalagna nga si Jeremias, si Pedro ug Juan dili makahunong sa pagtuman sa gisugo kanila nga magsangyaw.—Buhat 4:18-20; Jeremias 20:9.

⁴ Niadtong tungora, dili lang si Pedro ug Juan kondili ang tanang apostoles—nga naglakip kang Matias nga bag-ong napili—ang may kahigayonan sa pagpahayag sa ilang baroganan ngadto sa hukmanan. (Buhat 1:21-26) Sa dihang gimandoan sila nga mohunong sa pagsangyaw, sila usab maisogong mitubag: “Kinahanglang among sugton ang Diyos ingong magmamando inay ang mga tawo.”—Buhat 5:29.

Kinsay Sugton, ang Diyos o ang Tawo?

5, 6. Nganong ang mga apostoles wala motuman sa gimando sa hukmanan?

⁵ Ang mga apostoles maoy masinugtanon sa balaod nga kasagarang mosugot sa imando sa hukmanan. Hinunoa, walay tawo, bisag unsa pa kini ka gamhanan, ang giawtorisahan sa pagmando sa uban nga supakon ang usa sa mga sugo sa Diyos. Si Jehova “ang Labing Hataas ibabaw sa tibuok nga yuta.” (Salmo 83:18) Siya “ang Maghuhukom sa tibuok yuta,” ang Supremong Maghahatag-lagda, ug ang Hari nga walay kataposan. Ang bisan unsang mando sa hukmanan nga mosulay sa pagkanselar sa usa sa mga sugo sa Diyos maoy dili makataronganon sa panglantaw sa Diyos.—Genesis 18:25; Isaias 33:22.

⁶ Kining kamatuorana giila sa pipila ka ekspertong mga magbabalaod. Pananglitan, ang iladong Ingles nga huwes sa ika-18ng siglo nga si William Blackstone misulat nga walay tawhanong balaod ang gitugotan sa pagsupak sa “gipadayag nga balaod” nga makaplagan diha sa Bibliya. Busa, ang Sanhedrin naghinobra sa dihang gimandoan niini ang mga apostoles nga mohunong sa pagsangyaw. Ang mga apostoles dili gayod makatuman sa maong mando.

7. Nganong ang buluhatong pagsangyaw nakapasuko man sa pangulong mga saserdote?

⁷ Ang determinasyon sa mga apostoles nga mopadayon sa pagsangyaw nakapasuko sa pangulong mga saserdote. Ang pipila ka membro sa mga saserdote, nga naglakip kang Caifas mismo, maoy mga Saduseo, nga wala motuo sa pagkabanhaw. (Buhat 4:1, 2; 5:17) Bisan pa niana, ang mga apostoles padayong miinsistir nga si Jesus nabanhaw gikan sa mga patay. Dugang pa, ang pipila sa pangulong mga saserdote naningkamot pag-ayo aron maangkon ang pabor sa Romanong mga awtoridad. Panahon sa paghusay kang Jesus, sa dihang gitanyagan sila ni Pilato nga dawaton si Jesus ingong ilang hari, ang pangulong mga saserdote misinggit pa gani: “Kami walay hari gawas kang Cesar.” (Juan 19:15) a Gipamatud-an sa mga apostoles nga si Jesus nabanhaw gikan sa mga patay ug ilang gitudlo usab nga gawas sa ngalan ni Jesus, “walay laing ngalan ilalom sa langit nga gikahatag taliwala sa mga tawo nga pinaagi niini kita gayod maluwas.” (Buhat 2:36; 4:12) Kon ang gibanhawng si Jesus mao nay isipon sa mga tawo nga ilang Lider, nahadlok ang mga saserdote nga moabot ang mga Romano ug ang Hudiyohanong mga lider mawad-an sa ‘ilang dapit ug sa ilang nasod.’—Juan 11:48.

8. Unsang maalamong tambag ang gihatag ni Gamaliel sa Sanhedrin?

⁸ Morag dulom ang kaugmaon sa mga apostoles ni Jesu-Kristo. Ang mga maghuhukom sa Sanhedrin  determinadong magpapatay kanila. (Buhat 5:33) Apan, kalit lang nausab ang mga panghitabo. Si Gamaliel, usa ka eksperto sa Balaod, mibarog ug mipasidaan sa iyang mga isigkamaghuhukom nga dili magdalidali sa paghimog aksiyon. Siya maalamong miingon: “Kon kining larawa o kining buhata gikan man sa mga tawo, kini mapukan; apan kon kini gikan sa Diyos, kamo dili makahimo sa pagpukan kanila.” Dayon gidugang ni Gamaliel ang usa ka hinungdanong punto: “Kay kon dili, basin baya hinuon nga makaplagan kamo nga mga kaaway diay sa Diyos.”—Buhat 5:34, 38, 39.

9. Unsay nagpamatuod nga ang buluhaton sa mga apostoles gikan sa Diyos?

⁹ Wala damha, gidawat sa hukmanan ang tambag ni Gamaliel. “Gipatawag [sa Sanhedrin] ang mga apostoles, gibunalan sila, ug gimandoan sila nga mohunong na sa pagsulti pinasukad sa ngalan ni Jesus, ug gibuhian sila.” Apan inay mahadlok, ang mga apostoles determinado sa pagtuman sa sugo sa manulonda sa pagsangyaw. Busa, human sila buhii, “matag adlaw diha sa templo ug sa balay ug balay [ang mga apostoles] wala mohunong sa pagpanudlo ug sa pagpahayag sa maayong balita bahin kang Kristo, si Jesus.” (Buhat 5:40, 42) Gipanalanginan ni Jehova ang ilang mga paningkamot. Sa unsang sukod? “Ang pulong sa Diyos padayong mikaylap, ug ang mga tinun-an sa Jerusalem padayong nagkadaghan sa hilabihan gayod.” Gani, “usa ka dakong panon sa mga saserdote ang nagpasakop sa pagtuo.” (Buhat 6:7) Nakapaguol gayod kana sa pangulong mga saserdote! Nagkadaghan ang mga ebidensiya: Ang buluhaton sa mga apostoles gikan gayod sa Diyos!

Ang mga Nakig-away sa Diyos Dili Molampos

10. Gikan sa tawhanong panghunahuna, nganong si Caifas daw mibatig kasegurohan sa iyang katungdanan, apan nganong sayop ang iyang pagsalig?

¹⁰ Sa unang siglo, ang Romanong mga awtoridad maoy nagpahiluna sa Hudiyohanong hataas nga mga saserdote sa ilang katungdanan. Si Valerius Gratus maoy nagpahiluna sa adunahan nga si Jose Caifas sa iyang katungdanan, ug mas dugay siyang naghupot sa maong katungdanan kay sa daghang hataas nga mga saserdote nga iyang gisundan. Lagmit nagtuo si Caifas nga naangkon niya kining maong kalamposan tungod sa iyang abilidad ingong diplomata ug tungod kay iyang higala  si Pilato ug dili tungod sa pagpangilabot sa Diyos. Bisan unsa pay kahimtang, ang iyang pagsalig sa mga tawo maoy sayop. Mga tulo lang ka tuig human ang mga apostoles miatubang sa Sanhedrin, si Caifas wala na mauyoni sa Romanong mga awtoridad ug gitangtang ingong hataas nga saserdote.

11. Unsay gidangatan ni Poncio Pilato ug sa Hudiyohanong sistema sa mga butang, ug unsay imong ikahinapos bahin niini?

¹¹ Ang mando nga tangtangon si Caifas sa iyang katungdanan maoy gikan sa labaw mismo ni Pilato, si Lucius Vitellius, ang gobernador sa Sirya, ug ang suod nga higala ni Caifas nga si Pilato wala makapugong niana. Gani, mga usa lang ka tuig human matangtang si Caifas sa iyang katungdanan, si Pilato mismo gitangtang sa iyang katungdanan ug gipapauli sa Roma aron sa pagtubag sa seryosong mga sumbong. Mahitungod sa Hudiyohanong mga lider nga misalig kang Cesar, gikuha gayod sa mga Romano ang ‘ilang dapit ug ang ilang nasod.’ Kini nahitabo sa tuig 70 K.P. sa dihang gilaglag sa Romanong kasundalohan ang siyudad sa Jerusalem, lakip na ang templo ug ang tigomanan sa Sanhedrin. Tinuod gayod ang mga pulong sa salmista sa maong kahimtang: “Ayaw ibutang ang inyong pagsalig sa mga hamili, ni sa anak sa yutan-ong tawo, nga kaniya walay kaluwasan”!—Juan 11:48; Salmo 146:3.

12. Sa unsang paagi gipamatud-an sa kaso ni Jesus nga maalamon ang pagsugot sa Diyos?

¹² Sa kasukwahi, gitudlo sa Diyos ang binanhaw nga si Jesu-Kristo ingong Hataas nga Saserdote sa dakong espirituwal nga templo. Walay tawo ang makahimo sa pagkanselar sa maong pagtudlo. Sa pagkatinuod, si Jesus “naghupot sa iyang pagkasaserdote nga walay mga manununod.” (Hebreohanon 2:9; 7:17, 24; 9:11) Gitudlo usab sa Diyos si Jesus ingong Maghuhukom sa mga buhi ug sa mga patay. (1 Pedro 4:5) Tungod kay kana ang katungdanan ni Jesus, siya na lay mag-igo kon si Jose Caifas ug Poncio Pilato aduna bay kahigayonan nga mabuhi sa umaabot.—Mateo 23:33; Buhat 24:15.

Maisogong mga Magwawali sa Gingharian Karon

13. Karong panahona, unsang buluhatona ang napamatud-ang gikan sa mga tawo, ug unsang buluhatona ang napamatud-ang gikan sa Diyos? Giunsa nimo pagkahibalo?

¹³ Karong adlawa, sama sa unang siglo, daghan ang ‘nakig-away sa Diyos.’ (Buhat 5:39) Pananglitan, sa dihang ang mga Saksi ni Jehova sa Alemanya midumili sa pag-ila kang Adolf Hitler ingong ilang Führer o Lider, si Hitler nanganti sa pagpuo kanila. (Mateo 23:10) Ang iyang organisasyon daw seguradong makapuo sa mga Saksi ni Jehova. Milampos ang mga Nazi sa pagdakop sa libolibo ka Saksi ni Jehova ug sa pagbalhog kanila sa mga kampo konsentrasyon. Ila pa ganing napatay ang pipila ka Saksi. Apan ang mga Nazi napakyas sa pagbungkag sa determinasyon sa mga Saksi sa pagsimba lamang sa Diyos, ug sila napakyas sa pagpuo sa mga alagad sa Diyos ingong grupo. Ang buluhaton ning maong mga Kristohanon gikan sa Diyos, dili sa tawo, ug ang buluhaton sa Diyos dili mapukan. Kan-uman ka tuig sa ulahi, ang mga matinumanon nga nakalabang-buhi sa mga kampo konsentrasyon ni Hitler nag-alagad gihapon kang Jehova ‘sa tibuok nilang kasingkasing ug kalag ug kaisipan,’ samtang si Hitler patay na ug ang iyang partidong Nazi mahinumdoman lamang tungod sa ilang daotang binuhatan.—Mateo 22:37.

14. (a) Unsang mga paningkamot ang gihimo sa mga magsusupak aron daoton ang mga alagad sa Diyos, ug unsay mga resulta? (b) Ang mao bang mga paningkamot makadaot sa katawhan sa Diyos hangtod sa hangtod? (Hebreohanon 13:5, 6)

¹⁴ Sa daghang katuigan sukad sa mga paningkamot sa mga Nazi, ang uban wala usab molampos sa pagpakig-away batok kang Jehova ug sa iyang katawhan. Diha sa daghang kanasoran sa Uropa, ang malipatlipatong mga organisasyong relihiyoso ug  politikanhon naningkamot sa pagtawag sa mga Saksi ni Jehova ingong ‘peligrosong sekta,’ nga sama sa sumbong nga gipasaka batok sa unang-siglong mga Kristohanon. (Buhat 28:22) Ang tinuod mao nga ang European Court of Human Rights nag-ila sa mga Saksi ni Jehova ingong usa ka relihiyon, dili usa ka sekta. Nahibalo gayod niana ang mga magsusupak. Bisan pa niana, sila nagpadayon sa pagdaot sa mga Saksi. Ingong direktang resulta sa ilang pagpangdaot, ang pipila niining mga Kristohanon gipotbol sa ilang mga trabaho. Ang mga anak sa mga Saksi gihasi diha sa mga eskuylahan. Ang nangahadlok nga mga tag-iyag tinukod nagkanselar sa mga kontrata alang sa mga bilding nga dugay nang gigamit sa mga Saksi ingong tigomanan. Sa pipila ka kahimtang, wala gani aprobahi sa mga ahensiya sa kagamhanan ang ilang aplikasyon nga mahimong lungsoranon tungod kay sila mga Saksi ni Jehova! Bisan pa niana, ang mga Saksi wala matarog.

15, 16. Unsay reaksiyon sa mga Saksi ni Jehova sa Pransiya sa pagsupak sa ilang Kristohanong buluhaton, ug nganong sila nagpadayon sa pagsangyaw?

¹⁵ Pananglitan, sa Pransiya, ang mga tawo kasagarang makataronganon ug dili mapihigon. Ugaling lang, dunay pipila ka magsusupak nga nagpasaka ug mga balaod aron mapugngan ang buluhaton sa Gingharian. Unsay reaksiyon sa mga Saksi ni Jehova didto? Ilang gipangusgan ang ilang kalihokan sa pagsangyaw sa kanataran kay sukad masukad ug kini adunay makapalipay nga mga resulta. (Santiago 4:7) Aw, sulod lang sa unom ka bulan, ang gidaghanon sa mga pagtuon sa Bibliya misaka ngadto sa 33 porsiyento nianang nasora! Hilabihang sukoa tingali sa Yawa nga makita ang matinud-anog-kasingkasing nga mga tawo sa Pransiya nga misanong sa maayong balita. (Pinadayag 12:17) Masaligon ang atong mga isigka-Kristohanon sa Pransiya nga ang mga pulong sa manalagnang si Isaias matuman sa ilang kahimtang: “Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman.”—Isaias 54:17.

¹⁶ Ang mga Saksi ni Jehova dili malipay nga lutoson. Apan, agig pagsugot sa sugo sa Diyos ngadto sa tanang Kristohanon, sila dili ug dili gayod mohunong sa pagsulti bahin sa mga butang nga ilang nadungog. Sila naningkamot nga mahimong maayong mga lungsoranon. Apan kon magkasumpaki ang balaod sa Diyos ug ang balaod sa tawo, kinahanglan nilang sugton ang Diyos ingong magmamando.

Ayawg Kahadlok Kanila

17. (a) Nganong dili kita angayng mahadlok sa atong mga kaaway? (b) Unsay angay natong tinamdan ngadto sa mga maglulutos?

¹⁷ Ang atong mga kaaway anaa sa peligroso kaayong kahimtang. Sila nakig-away sa Diyos. Busa, uyon sa sugo ni Jesus, imbes mahadlok kanila, atong iampo kadtong nagalutos kanato. (Mateo 5:44) Kita magaampo nga kon dunay mosupak sa Diyos tungod sa kawalay-alamag, sama kang Saulo sa Tarso kaniadto, maluloton untang ablihan ni Jehova ang ilang mga mata aron makakita sa kamatuoran. (2 Corinto 4:4) Si Saulo nahimong Kristohanon nga si apostol Pablo ug nag-antos pag-ayo sa mga kamot sa mga awtoridad sa iyang adlaw. Bisan pa niana, siya nagpadayon sa pagpahinumdom sa iyang mga isigkamagtutuo nga “magpasakop ug magmasinugtanon sa mga kagamhanan ug sa mga awtoridad ingon nga mga magmamando, nga andam alang sa tanang maayong buhat, nga dili magsultig daotan mahitungod kang bisan kinsa [bisan ngadto sa labing mainitong mga maglulutos], dili palaaway, makataronganon, magpasundayag ug bug-os nga kalumo sa tanang tawo.” (Tito 3:1, 2) Ang mga Saksi ni Jehova sa Pransiya ug bisan asa naningkamot gayod sa pagpadapat niining tambaga.

18. (a) Sa unsang mga paagi mahimong luwason ni Jehova ang iyang katawhan? (b) Unsa unyay sangpotanan?

¹⁸ Ang Diyos miingon kang manalagnang  Jeremias: “Ako nagauban kanimo sa pagluwas kanimo.” (Jeremias 1:8) Sa unsang paagi kita mahimong luwason ni Jehova gikan sa paglutos karon? Mahimong patunghaon niya ang usa ka dili-mapihigong maghuhukom sama kang Gamaliel. O mahimong paneguroon niya nga ang daotan o mabatokon nga opisyal dili damhon nga mapulihan ug mas makataronganon nga opisyal. Hinuon, usahay mahimong tugotan ni Jehova nga padayong lutoson ang iyang katawhan. (2 Timoteo 3:12) Kon tugotan sa Diyos nga kita lutoson, siya kanunayng maghatag kanato ug kusog aron makalahutay sa paglutos. (1 Corinto 10:13) Ug bisag unsa pay tugotan sa Diyos, kita makaseguro sa sangpotanan: Kadtong mga nakig-away sa katawhan sa Diyos, nakig-away sa Diyos, ug silang nakig-away sa Diyos dili modaog.

19. Unsa ang tinuig nga teksto alang sa 2006, ug nganong haom kini?

¹⁹ Giingnan ni Jesus ang iyang mga tinun-an nga dahomon ang kasakitan. (Juan 16:33) Tungod niini, ang mga pulong nga narekord sa Buhat 5:29 tukma gayod: “Kinahanglang among sugton ang Diyos ingong magmamando inay ang mga tawo.” Tungod sa maong katarongan, kining makapalipayng mga pulong mao ang gipili nga tinuig nga teksto sa mga Saksi ni Jehova alang sa 2006. Hinaot kita determinado sa umaabot nga tuig ug sa walay kataposan sa pagsugot sa Diyos ingong Magmamando bisag unsa pay dangatan!

[Footnote]

Makatubag Ka Ba?

• Unsang makapadasig nga panig-ingnan ang gihatag sa mga apostoles kanato bahin sa pag-atubang sa pagsupak?

• Nganong angay natong sugton kanunay ang Diyos ingong magmamando inay ang mga tawo?

• Sa pagkatinuod, kang kinsa nakig-away ang atong mga magsusupak?

• Unsay atong gilaomang sangpotanan alang niadtong makalahutay sa paglutos?

[Mga Pangutana sa Pagtuon]

[Blurb sa panid 23]

Ang tinuig nga teksto sa 2006 mao: “Kinahanglang among sugton ang Diyos ingong magmamando inay ang mga tawo.”—Buhat 5:29

[Hulagway sa panid 19]

“Kinahanglang among sugton ang Diyos ingong magmamando inay ang mga tawo”

[Hulagway sa panid 21]

Si Caifas misalig sa mga tawo inay sa Diyos