Mailhan ba Gayod Nato ang Diyos?

“kini nagkahulogan ug kinabuhing walay kataposan, ang ilang pagkuha ug kahibalo . . . [sa] bugtong matuod nga Diyos.”—JUAN 17:3.

“OH PAGKALAWOM sa bahandi ug sa kaalam ug sa kahibalo sa Diyos!” mipatugbaw si apostol Pablo. Siya midugang: “Pagkadili-matukib sa iyang mga paghukom ug pagkadili-masubay sa iyang mga dalan!” (Roma 11:33) Mohinapos ba kita pinasukad niining mga pulonga nga dili matugkad sa tawo ang kaalam ug kahibalo sa Diyos, nga dili gayod kita makaila kaniya ug mahibalo sa iyang mga katuyoan?

Sumala niadtong nagtuo sa relihiyosong pilosopiya nga nailhang via negativa o negatibong paagi, ang tubag maoy oo. Ang The Encyclopedia of Religion nag-ingon bahin niining pilosopiyaha: “Ang Diyos mas labaw kay sa tanang mahibaloan bahin kaniya. . . . Dili manganlan o mahubit ang Diyos. Bisan unsang ngalan o kahubitan adunay limitasyon, ug ang Diyos . . . walay limitasyon. . . . Siya bug-os nga dili mailhan.” a

Sumala sa magasing Newsweek, daghang tawo sa mga lugar nga dili relihiyoso mas gusto sa “usa ka matang sa bag-ong tinuohan” nga nagtuong “aduna lamay usa ka kamatuoran, ug ang maong kamatuoran mao nga wala gayoy kamatuoran.”

Sa gihapon, wala matubag ang mga pangutana sa daghang tawo bahin sa katuyoan sa kinabuhi. Ilang makita ang makapaguol nga mga suliran sa kakabos, sakit, ug kapintasan. Alang kanila, ang pagkawalay-kasegurohan sa kinabuhi hilabihan ka makapahigawad. Buot tingali nilang makaplagan ang mga tubag, apan kon dili nila kini makaplagan, sila lagmit moingon nga kini wala gayoy tubag. Tungod niini, daghan sa maong mga tawo mibiya sa organisadong relihiyon ug nagkinaugalingon na lang sa pagpangita sa Diyos—kana kon nagtuo pa sila nga ang Diyos naglungtad.

Ang Hunahuna sa Bibliya

Kadtong nagsalig sa Bibliya ug nagtuo kang Jesu-Kristo ingong Tigpamaba sa Diyos angayng maikag nga mahibalo sa hunahuna sa Bibliya. Lagmit imong mahinumdoman nga kas-a si Jesus naghisgot bahin sa duha ka dalan, ang ‘halapad ug haluag nga dalan padulong sa kalaglagan’ ug ang ‘hagip-ot nga dalan padulong sa kinabuhi.’ Iyang gisaysay kon unsaon pag-ila niadtong nagaagi sa matag dalan, nga nag-ingon: “Pinaagi sa  ilang mga bunga kamo makaila niadtong mga tawhana.” Unsang matanga sa mga bunga? Dili sa kon unsay ilang ginasulti, kondili sa kon unsay ilang ginabuhat, ingon sa gipatin-aw ni Jesus: “Dili ang matag usa nga magaingon kanako, ‘Ginoo, Ginoo,’ makasulod sa gingharian sa mga langit, kondili ang usa nga nagabuhat sa kabubut-on sa akong Amahan nga anaa sa mga langit.” Ang pag-angkon nga nagatuo sa Diyos dili igo. Kinahanglang buhaton nato ang kabubut-on sa Diyos. Busa makataronganon nga kinahanglang aduna una kitay tukmang kahibalo kon unsay kabubut-on sa Diyos.—Mateo 7:13-23.

Tin-aw nga gipakita ni Jesus nga posible gayod nga ang mga tawo makabaton ug kahibalo bahin sa Diyos. Siya miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Dayag nga kita makabaton lamang sa kaalam ug kahibalo nga gibutyag sa Diyos—kon kita maningkamot lamang sa pagpangita niana. Apan, ang igasa sa Diyos alang niadtong mobuhat niana maoy kinabuhing walay kataposan, busa mapuslanon gayod ang pagpangita niana.

[Footnote]

[Hulagway sa panid 4]

Si Jesus miingon nga ang hagip-ot nga dalan mopadulong sa kinabuhi