Nganong Angayng Mailhan ang Antikristo?

“Inyong nadungog nga ang antikristo moabot,” misulat ang inspiradong apostol kanhi. (1 Juan 2:18) Pagkamakaiikag nianang mga pulonga! Sulod sa daghang siglo, nahibulong ang mga tawo sa kahulogan niana. Kinsa ang antikristo? Kanus-a siya moabot? Unsay iyang himoon sa dihang moabot na gayod siya?

TAAS ang listahan sa mga giakusar nga antikristo. Sa nangagi, ang mga ginganlang “antikristo” naglakip sa mga Hudiyo, sa Katolikong papado, ug sa Romanong mga emperador. Pananglitan, sa dihang midesisyon si Emperador Frederick II (1194-1250) nga dili mouban sa usa ka Krusada alang sa simbahan, siya ginganlan ug antikristo ni Papa Gregorio IX ug siya giekskomunikar. Ang misunod ni Gregorio, si Inocentes IV, nag-ekskomunikar pag-usab kaniya. Isip balos, si Frederick mipahayag nga si Inocentes mao ang antikristo.

Si apostol Juan mao lamang ang magsusulat sa Bibliya nga migamit sa pulong “antikristo.” Sa duha sa iyang mga sulat nga nagdala sa iyang ngalan, ang pulong makitag lima ka beses. Ang mga bersikulo diin makita kanang pulonga nalista diha sa kahon sa sunod panid. Sumala sa maong mga bersikulo, masabtan nato nga ang antikristo maoy bakakon ug maglilimbong, nga matinguhaon gayod sa pagdaot sa relasyon sa usa ka tawo uban kang Kristo ug sa Diyos. Busa, ang apostol miawhag sa iyang mga isigka-Kristohanon: “Mga hinigugma, ayaw ninyo tuohi ang matag inspiradong pahayag, hinunoa sulayi ang inspiradong mga pahayag aron masuta kon kini nagagikan ba gayod sa Diyos, tungod kay daghang mini nga mga manalagna ang nanungha sa kalibotan.”—1 Juan 4:1.

Si Jesus nagpasidaan usab batok sa mga maglilimbong o mini nga mga manalagna, nga nag-ingon: “[Sila] manganha kaninyo nga nagsapot sa pagkakarnero, apan sa sulod sila maoy mga lobo nga manunukob. Pinaagi sa ilang mga bunga [o mga binuhatan] kamo makaila kanila.” (Mateo 7:15, 16) Si Jesus nagpasidaan ba usab sa iyang mga sumusunod batok sa simbolikong antikristo? Atong tan-awon kon sa unsang paagi makaila kita niining mabangis nga maglilimbong.