Nganong Likayan ang Paghinobra?

SI Jehova mao ang kinamaayohang panig-ingnan sa pagkatimbang. “Hingpit ang iyang kalihokan,” ug ang iyang hustisya dili gayod mapig-oton tungod kay kini kanunayng giduyogan sa kaluoy. (Deuteronomio 32:4) De-prinsipyo gayod ang iyang gugma, tungod kay molihok siya subay sa iyang hingpit nga mga balaod. (Salmo 89:14; 103:13, 14) Ang atong unang mga ginikanan gilalang nga timbang sa tanang paagi. Sila walay kiling nga maghinobra. Apan, ang pagsulod sa sala nakahatag ug depekto—pagkadili-hingpit—nga tungod niana ang maong pagkatimbang nawala.—Deuteronomio 32:5.

Sa pag-ilustrar: Nakasakay ka na ba ug kotse o bisikleta nga dunay dakong bugdo ang ligid? Tungod sa maong depekto ang biyahe seguradong uyog kaayo ug delikado. Ang ligid kinahanglang ipaayo sa dili pa mosamot ang depekto o kaha maplat. Sa susama, ang atong dili-hingpit nga personalidad may kiling nga mopatunghag dili-maayong mga kinaiya. Kon atong pasagdang mograbe ang atong dili-maayong mga kinaiya, ang atong pagsubay sa dalan sa kinabuhi mahimong malisod kaayo ug peligroso pa gani.

Usahay, ang atong maayong mga kinaiya, ang atong mga hiyas, mahimong maghinobra. Pananglitan, ang Balaod ni Moises nagbaod sa mga Israelinhon nga butangan ug mga borlas ang mga sidsid sa ilang mga besti, apan ang mga Pariseo sa panahon ni Jesus ‘nagpadako pag-ayo sa mga borlas sa ilang mga besti’ aron malahi sila sa ubang tawo. Ang ilang motibo maoy aron mas balaan silang tan-awon kay sa ilang mga isigkatawo.—Mateo 23:5; Numeros 15:38-40.

May mga tawo karon nga maningkamot sa pagkuhag atensiyon sa bisan unsang paagi, bisan sa paagi nga makurat ang uban. Tingali kini maoy desperado gayod nga paagi sa pag-ingong: “Hatagi intawon ko ninyog atensiyon! Tawo usab ako!” Apan ang hinobra nga pagpamesti, tinamdan, ug linihokan dili makatagbaw sa tinuod nga mga panginahanglan sa usa ka Kristohanon.

Timbang nga Tinamdan sa Trabaho

Bisag kinsa pa kita ug bisag asa pa kita nagpuyo, ang usa ka maayong trabaho makatabang aron mahimong makahuloganon ang atong kinabuhi. Kita gilalang sa paagi nga kita mobatig kalipay sa pagtrabaho. (Genesis 2:15) Busa, gisaway sa Bibliya ang pagkatapolan. Si apostol Pablo prangkang miingon: “Kon adunay dili buot magtrabaho, ayaw usab siya pakan-a.” (2 Tesalonica 3:10) Sa pagkatinuod, ang pagkatapolan dili lang motultol ngadto sa kakabos ug pagkadili-kontento kondili hinungdan usab kini nga ang usa mawad-an ug pabor sa Diyos.

Sa laing bahin, daghan ang naghinobra sa pagtrabaho, nga tinuyong nagpaulipon niini. Kay sayo man sa buntag mohawa sa balay ug gabii nang mopauli, tingali mangatarongan sila nga ang ilang pagtrabaho maoy para sa kaayohan sa ilang pamilya. Apan, ang ilang mga pamilya sa pagkatinuod mahimong nag-antos tungod sa ilang sobrang pagtrabaho. Usa ka asawa kansang bana kanunayng mag-obertaym sa iyang trabahoan miingon: “Mosugot kong ibaylo ang tanang butang niining maluhong balay basta makauban lang nako ug sa among mga anak ang akong bana.” Kadtong mas gustong mogugol ug sobra ka daghang panahon sa pagtrabaho angayng mamalandong bahin sa personal nga kasinatian ni Haring Solomon: “Ako mismo mitan-aw sa tanan ko nga mga buhat nga nahimo sa akong mga kamot ug sa kahago nga akong gibudlayan sa pagbuhat, ug, tan-awa! ang tanan kakawangan  ug usa ka paggukod sa hangin.”—Ecclesiastes 2:11.

Oo, kinahanglang atong likayan ang pagkatapolan ug sobrang pagtrabaho. Kita mahimong magkugi sa pagtrabaho, apan atong hinumdoman nga dili lang ang atong kalipay ang mawala kon kita magpaulipon sa trabaho kondili tingali labaw pa niana.—Ecclesiastes 4:5, 6.

Likayi ang Hinobrang Tinamdan Bahin sa Kalipayan

Ang Bibliya nagtagna bahin sa atong panahon: “Ang mga tawo . . . mahigugmaon sa kalipayan inay nga mga mahigugmaon sa Diyos.” (2 Timoteo 3:2, 4) Ang pagpangagpas sa kalipayan nahimong usa sa labing epektibong mga instrumento ni Satanas aron ipahilayo ang mga tawo sa Diyos. Nagdagsang ang pagpatuyang sa lulinghayaw ug paglingawlingaw, sama sa peligroso o “makapaukyab” nga mga esports. Nagkadaghan ang maong mga esports ug mga kalingawan ug ang mga tawong moapil niini. Nganong popular man kaayo kini? Kay gilaayan na sa ilang adlaw-adlawng pagkinabuhi, daghang tawo ang mangita kanunay ug mas makapaukyab nga mga esports o kalingawan. Apan aron kanunayng mabatyagan ang maong kaukyab, kini kinahanglang mas magkakuyaw. Ang maampingong mga Kristohanon maglikay sa peligrosong mga esports agig pagtahod sa kinabuhi ug sa Tuboran niini.—Salmo 36:9.

Sa dihang gilalang sa Diyos ang unang magtiayon, diin niya sila gibutang? Sa tanaman sa Eden, nga sa orihinal nga pinulongan nagkahulogan ug “Kalipay.” (Genesis 2:8) Dayag nga ang usa ka malipayong kinabuhi maoy bahin sa katuyoan ni Jehova alang sa mga tawo.

Gipasundayag kanato ni Jesus ang usa ka hingpit nga panig-ingnan sa usa ka timbang nga panglantaw sa kalipayan. Siya debotado gayod sa pagtuman sa kabubut-on ni Jehova, ug wala gayod siya mohunong sa pagkinabuhi subay sa mga balaod ug mga prinsipyo sa Diyos. Migahin siya ug panahon alang sa mga nanginahanglan, bisan pag gikapoy siya. (Mateo 14:13, 14) Midawat pa gani si Jesus ug mga imbitasyon alang sa pagpangaon ug migahin usab siyag panahon sa pagpahulay ug pagpahayahay. Siyempre, nasayod siya nga gisaway siya sa pipila niya ka kaaway tungod niini. Sila miingon bahin kaniya: “Tan-awa! Usa ka tawong ulitan ug palainom ug bino.” (Lucas 7:34; 10:38; 11:37) Apan si Jesus nagtuo nga ang tinuod nga debosyon wala magpasabot nga ang usa dili na gayod maglipaylipay.

Dayag nga kita maalamon kon atong likayan ang bisan unsang paghinobra sa lulinghayaw. Ang paghimo sa kalipayan ug paglingawlingaw nga pangunang butang sa kinabuhi dili gayod makahatag ug tinuod nga kalipay. Tungod niini atong mapasagdan ang mas hinungdanong mga butang, lakip na ang atong relasyon sa Diyos. Bisan pa niana, dili nato angayng hikawan ang atong kaugalingon sa tanang kalipayan ni manaway kita sa uban nga naglingawlingaw sa timbang nga paagi.—Ecclesiastes 2:24; 3:1-4.

Tagamtama ang Kalipay Pinaagi sa Timbang nga Pagkinabuhi

Ang tinun-an nga si Santiago misulat: “Kitang tanan mangapandol sa makadaghan.” (Santiago 3:2) Tingali mahitabo kini kanato samtang maningkamot kita sa paglikay nga maghinobra. Unsay makatabang kanato sa pagpabiling timbang? Buweno, kinahanglang mahibalo kita sa atong mga hiyas ug kahuyangan. Ang maong makataronganon nga pagtimbangtimbang dili sayon. Mahimong dili nato mamatikdan nga naghinobra na diay kita. Busa, maalamon nga magpabilin kitang suod sa ubang hamtong nga mga Kristohanon ug mamati sa timbang nga mga tambag. (Galacia 6:1) Tingali magpatambag kita sa usa ka kasaligang higala o eksperyensiyadong ansiyano sa kongregasyon. Ang Kasulatan mismo ug ang binase sa Bibliya nga tambag magsilbing “salamin” aron atong masusi kon unsa gayod kita ka timbang sa panglantaw ni Jehova.—Santiago 1:22-25.

Makapalipay ang pagkahibalo nga makahimo kita sa pagkinabuhi nga dili maghinobra. Pinaagi sa determinadong paningkamot ug sa tabang ni Jehova, kita posible nga mahimong timbang ug sa ingon kita magmalipayon. Busa ang atong relasyon sa atong Kristohanong mga igsoon mouswag, ug kita mahimo pa ganing maayong mga panig-ingnan sa mga tawong atong sangyawan. Labaw sa tanan, atong masundog pag-ayo ang atong timbang ug mahigugmaon nga Diyos, si Jehova.—Efeso 5:1.

[Picture Credit Line sa panid 28]

©Greg Epperson/age fotostock