Ayawg Bulaga ang Gihiusa Pagyugo sa Diyos
Ayawg Bulaga ang Gihiusa Pagyugo sa Diyos
“Dili na sila duha, kondili usa ka unod. Busa, kon unsay gihiusa pagyugo sa Diyos ayaw ipabulag ni bisan kinsang tawo.”—MATEO 19:6.
1, 2. Nganong Kasulatanhon ug makataronganon ang pagdahom nga ang mga magtiayon makaatubang usahay ug mga problema?
HANDURAWA nga andam ka nang mobiyaheg layo sakay sa awto. May maatubang ka kahang mga suliran samtang nagbiyahe? Binuang ang paghunahuna nga walay mahitabong mga suliran! Pananglitan, magdaot tingali ang panahon, nga tungod niana kinahanglang mopahinay kag dagan ug mag-amping. Basin maaberya ang awto ug dili ka makamaong moayo niana, mao nga kinahanglang mopadaplin ka aron mangitag moayo. Nianang mga situwasyona mohinapos ka ba nga maayo pag wala na lang ka mobiyahe ug imo na lang biyaan ang awto? Dili. Sa dihang mobiyaheg layo, ikaw magdahom nga aduna gayoy mga problema nga motungha ug maalamon nga mangita kag mga paagi sa pagsulbad niana.
2 Mao man usab sa kaminyoon. Dili kalikayan ang mga problema, ug kabuangan alang sa managtrato nga nagplanong magminyo nga magdahom ug kinabuhi nga lunlon kalipay. Sa 1 Corinto 7:28, ang Bibliya prangkang nag-ingon nga ang mga bana ug asawa makaagom ug “kasakitan sa ilang unod.” Nganong ingon man niana? Sa yanong pagkasulti, tungod kana kay ang mga bana ug asawa dili hingpit, ug kita nagkinabuhi sa “makuyaw nga mga panahong lisod sagubangon.” (2 Timoteo 3:1; Roma 3:23) Busa, bisan ang bagay kaayo, mahunahunaon-sa-espirituwal nga magtiayon mag-atubang usahay ug mga problema.
3. (a) Unsay panglantaw sa daghang tawo sa kalibotan bahin sa kaminyoon? (b) Nganong maningkamot ang mga Kristohanon nga motunhay ang ilang kaminyoon?
3 Sa kalibotan karon, kon makasugamak ang pipila ka magtiayon ug mga problema, maghunahuna dayon sila nga magbulag. Diha sa daghang kayutaan, nagkadaghan ang nagdiborsiyo. Apan, ang matuod nga mga Kristohanon maningkamot sa pagsulbad sa mga problema inay talikdan kana. Ngano? Tungod kay ilang giisip ang kaminyoon ingong sagradong gasa gikan kang Jehova. Si Jesus miingon bahin sa mga magtiayon: “Kon unsay gihiusa pagyugo sa Diyos ayaw ipabulag ni bisan kinsang tawo.” (Mateo 19:6) Tinuod, ang pagkinabuhi sumala sa maong sukdanan dili kanunayng sayon. Pananglitan, ang mga paryente ug ang uban—lakip na ang pipila ka magtatambag labot sa kaminyoon—nga wala moila sa mga prinsipyo sa Bibliya subsob mag-awhag sa mga magtiayon sa pagbulag o pagdiborsiyo bisan walay Kasulatanhong hinungdan. a Apan nahibalo ang mga Kristohanon nga mas maayong sulbaron ang mga suliran ug patunhayon ang kaminyoon inay taposon dayon kana. Sa pagkatinuod, hinungdanon nga sa sinugdan pa lang sa kaminyoon magmadeterminado na kita sa pagbuhat sa mga butang sumala sa paagi ni Jehova—dili sumala sa tambag sa uban.—Proverbio 14:12.
Pagbuntog sa mga Kalisdanan
4, 5. (a) Unsang mga suliran ang kinahanglang atubangon diha sa kaminyoon? (b) Nganong ang mga prinsipyo nga makaplagan diha sa Pulong sa Diyos mosaler gayod, bisan pag motungha ang mga problema diha sa kaminyoon?
4 Ang tinuod mao nga ang matag kaminyoon nagkinahanglag linaing pagtagad matag karon ug unya. Sa kadaghanang kahimtang, maglakip kana sa paghusay sa ginagmayng mga dili-pagsinabtanay. Apan diha sa pipila ka kaminyoon, aduna tingaliy mas grabeng mga suliran nga magpameligro sa pundasyon sa panagtiayon. Usahay, kinahanglan tingaling mangayo kag tabang gikan sa usa ka eksperyensiyadong minyo nga Kristohanong ansiyano. Apan, kining mga situwasyona wala magpasabot nga pakyas na ang inyong kaminyoon. Nagpasiugda lamang kini sa kahinungdanon sa pagsunod gayod sa mga prinsipyo sa Bibliya diha sa pagpangitag mga solusyon.
5 Ingong Maglalalang sa tawo ug Tagmugna sa kahikayan sa kaminyoon, si Jehova labaw nga nahibalo kay ni bisan kinsa kon unsay atong gikinahanglan aron magmalamposon ang kaminyoon. Ang pangutana mao, Mamati ba kita sa tambag nga makaplagan diha sa iyang Pulong ug sundon kana? Tinong makabenepisyo kita kon buhaton nato kana. Giingnan ni Jehova ang iyang katawhan kaniadto: “Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.” (Isaias 48:18) Ang pagsunod sa mga lagda nga gilatid diha sa Bibliya makatabang sa pagpalampos sa kaminyoon. Hisgotan una nato ang tambag nga gihatag sa Bibliya ngadto sa mga bana.
“Magpadayon sa Paghigugma sa Inyong mga Asawa”
6. Unsay tambag sa Kasulatan alang sa mga bana?
6 Ang sulat ni apostol Pablo ngadto sa mga taga-Efeso adunay klarong mga lagda alang sa mga bana. Misulat si Pablo: “Mga bana, magpadayon sa paghigugma sa inyong mga asawa, ingon nga si Kristo nahigugma usab sa kongregasyon ug nagtugyan sa iyang kaugalingon alang niini. Sa ingon niini ang mga bana angay nga maghigugma sa ilang mga asawa sama sa ilang kaugalingong mga lawas. Siya nga nahigugma sa iyang asawa nahigugma sa iyang kaugalingon, kay wala gayoy tawo nga nagdumot sa iyang kaugalingong unod; kondili nagapakaon ug nagapangga niini, ingon sa ginahimo usab ni Kristo sa kongregasyon. Bisan pa niana, usab, kinahanglang higugmaon gayod sa matag usa ang iyang asawa sama sa iyang kaugalingon.”—Efeso 5:25, 28, 29, 33.
7. (a) Unsay angay nga mahimong pangunang bahin sa pundasyon sa Kristohanong kaminyoon? (b) Sa unsang paagi ang mga bana magpadayon sa paghigugma sa ilang mga asawa?
7 Si Pablo wala maghisgot sa tanang problema nga posibleng motungha tali sa bana ug asawa. Hinunoa, gihisgotan niya ang sukaranang solusyon sa problema sa kaminyoon pinaagi sa pagpunting kon unsay angay nga mahimong pangunang bahin sa pundasyon sa matag Kristohanong kaminyoon—ang gugma. Sa pagkatinuod, ang gugma kaunom hisgoti sa maong mga bersikulo. Matikdi usab nga giingnan ni Pablo ang mga bana: “Magpadayon sa paghigugma sa inyong mga asawa.” Sa walay duhaduha, naila ni Pablo nga sayon rang mahigugma apan lisod patunhayon ang maong gugma. Ilabinang tinuod kini niining “kataposang mga adlaw,” diin daghan ang “mahigugmaon sa ilang kaugalingon” ug “dili-ikasabot.” (2 Timoteo 3:1-3) Ang maong negatibong mga hiyas nakadaot sa daghang kaminyoon karon, apan dili tugotan sa usa ka mahigugmaong bana ang kahakog sa kalibotan nga moimpluwensiya sa iyang hunahuna ug mga lihok.—Roma 12:2.
Sa Unsang Paagi Ikatagana Nimo ang mga Panginahanglan sa Imong Asawa?
8, 9. Sa unsang mga paagi ikatagana sa usa ka Kristohanong bana ang mga panginahanglan sa iyang asawa?
8 Kon ikaw usa ka Kristohanong bana, sa unsang paagi masuklan nimo ang hakog nga mga kiling ug sa baylo magpakitag tiunay nga gugma alang sa imong asawa? Sa iyang gipamulong sa mga taga-Efeso nga gikutlo ganina, gipaila ni Pablo ang duha ka butang nga kinahanglan nimong buhaton—itagana ang mga panginahanglan sa imong asawa, ug higugmaon siya sama sa paghigugma nimo sa imong kaugalingon. Sa unsang paagi ikatagana nimo ang panginahanglan sa imong kapikas? Ang usa maoy sa materyal nga paagi—pag-atiman sa pisikal nga mga panginahanglan sa imong asawa. Misulat si Pablo kang Timoteo: “Tino nga kon adunay si bisan kinsa nga wala magtagana alang sa mga iya, ug ilabina alang sa mga sakop sa iyang panimalay, siya naglimod sa pagtuo ug mas daotan pa kay sa tawong walay pagtuo.”—1 Timoteo 5:8.
9 Apan, labaw pa ang nalangkit kay sa pagtaganag pagkaon, besti, ug puloy-anan. Ngano? Tungod kay ang bana mahimong dagaya nga makatagana sa materyal nga mga panginahanglan sa iyang asawa apan wala magtagbaw sa emosyonal ug espirituwal nga mga panginahanglan niini. Ang pagtagana sa emosyonal ug espirituwal nga panginahanglan sa asawa hinungdanon kaayo. Tinuod, daghang Kristohanong lalaki ang puliki kaayo sa mga butang may kalabotan sa kongregasyon. Apan ang paghupot ug bug-at nga mga responsibilidad sa kongregasyon wala magpasabot nga pabay-an na lang sa bana ang iyang hinatag-sa-Diyos nga mga obligasyon ingong ulo sa pamilya. (1 Timoteo 3:5, 12) Sa paghisgot niining butanga, kining magasina miingon pipila ka tuig kanhi: “Sumala sa mga kinahanglanon sa Bibliya, ikaingon nga ‘ang pagkamagbalantay magsugod diha sa balay.’ Kon mapasagdan sa ansiyano ang iyang pamilya, iyang ginapameligro ang iyang pagkatinudlo.” b Tataw nga kinahanglan gayong itagana nimo ang panginahanglan sa imong asawa—sa pisikal, emosyonal ug, labawng hinungdanon sa tanan, sa espirituwal.
Unsay Kahulogan sa Paghigugma sa Imong Asawa?
10. Sa unsang paagi higugmaon sa bana ang iyang asawa?
10 Kon gihigugma nimo ang imong asawa, atimanon nimo siya pag-ayo. Adunay ubay-ubayng mga paagi diin mahimo nimo kini. Una, paggugol ug igong panahon uban sa imong kapikas. Kon magpasagad ka niining bahina, ang gugma sa imong asawa kanimo mahimong mobugnaw. Angayng tagdon usab nga ang gidak-on sa panahon o pagtagad nga imong gituohan nga gikinahanglan sa imong asawa dili tingali mao ang iyang gibati nga iyang gikinahanglan. Dili igo ang pag-ingon nga gihigugma nimo ang imong kapikas. Kinahanglang bation sa imong asawa nga siya gihigugma. Si Pablo misulat: “Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo.” (1 Corinto 10:24) Ingong mahigugmaong bana, buot nimong tinoon nga imong nasabtan ang aktuwal nga mga panginahanglan sa imong asawa.—Filipos 2:4.
11. Sa unsang paagi ang relasyon sa usa ka bana ngadto sa Diyos ug sa kongregasyon maapektohan sa pagtratar niya sa iyang asawa?
11 Ang laing paagi nga imong ikapakita nga imong gihigugma ang imong asawa maoy sa pagtratar kaniya sa malumo nga paagi, sa sulti ug sa buhat. (Proverbio 12:18) Misulat si Pablo sa mga taga-Colosas: “Kamong mga bana, magpadayon sa paghigugma sa inyong mga asawa ug ayaw pagkasuko nga hilabihan kanila.” (Colosas 3:19) Sumala sa usa ka basahon, ang ulahing bahin sa gipamulong ni Pablo mahimong hubaron sa natural nga paagi ingong “ayaw siyag tratara nga samag sulugoon” o “ayaw siya himoang ulipon.” Ang bana nga diktador—sa pribado man o sa publiko—wala gayod magpakita nga iyang gihigugma ang iyang asawa. Pinaagi sa pagtratar sa iyang asawa sa mapintas nga paagi, mahimong maapektohan ang iyang relasyon sa Diyos. Si apostol Pedro misulat ngadto sa mga bana: “Magpadayon sa pagpuyo sa samang paagi uban [sa inyong mga asawa] sumala sa kahibalo, nga maghatag kanila ug kadungganan samag ngadto sa usa ka sudlanan nga mas mahuyang, ang babaye, sanglit kamo mga manununod man usab uban kanila sa dili-takos nga pabor sa kinabuhi, aron nga dili mababagan ang inyong mga pag-ampo.” c—1 Pedro 3:7.
12. Unsay makat-onan sa usa ka Kristohanong bana sa pagtratar ni Jesus sa Kristohanong kongregasyon?
12 Ayaw gayod pasagding mawala ang gugma sa imong asawa kanimo. Pasaligi siya sa imong padayong paghigugma kaniya. Si Jesus naghatag ug panig-ingnan alang sa Kristohanong mga bana sa paagi sa pagtratar niya sa Kristohanong kongregasyon. Siya malumo, maluloton, ug mapinasayloon—bisan sa dihang ang iyang mga sumusunod subli-subling nagpakitag dili-maayong mga hiyas. Busa nakaingon si Jesus ngadto sa uban: ‘Umari kamo kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag.’ (Mateo 11:28, 29) Agig pagsundog kang Jesus, ang usa ka Kristohanong bana magtratar sa iyang asawa sa samang paagi nga gitratar ni Jesus ang kongregasyon. Ang lalaki nga tinuod nga nahigugma sa iyang asawa, nga nagpakita niini sa pulong ug sa buhat, mahimong tuboran sa tinuod nga kahayahay sa iyang asawa.
Mga Asawa nga Nagkinabuhi Sumala sa mga Prinsipyo sa Bibliya
13. Unsang mga prinsipyo sa Bibliya ang makatabang sa mga asawa?
13 Ang Bibliya naundan usab ug mga prinsipyo nga makatabang sa mga asawa. Ang Efeso 5:22-24, 33 nag-ingon: “Ang mga asawa kinahanglang magpasakop sa ilang mga bana ingon nga sa Ginoo, tungod kay ang bana maoy ulo sa iyang asawa ingon nga si Kristo usab maoy ulo sa kongregasyon, sanglit siya mao ang manluluwas niining maong lawas. Sa pagkatinuod, ingon nga ang kongregasyon nagapasakop kang Kristo, mao man usab ang mga asawa angay nga magpasakop sa ilang mga bana sa tanang butang. . . . Ang asawa angay nga adunay halawom nga pagtahod sa iyang bana.”
14. Nganong ang Kasulatanhong prinsipyo sa pagpasakop wala magpakamenos sa mga babaye?
14 Matikdi ang pagpasiugda ni Pablo sa pagkamapinasakopon ug pagtahod. Ang usa ka asawa gipahinumdoman sa pagpasakop sa iyang bana. Nahiuyon kini sa kahikayan sa Diyos. Ang matag buhing linalang sa langit ug sa yuta dunay gipasakopan. Bisan si Jesus nagpasakop kang Jehova nga Diyos. (1 Corinto 11:3) Siyempre, mas daling magpasakop ang asawa kon ang bana nagpasundayag sa iyang pagkaulo sa hustong paagi.
15. Unsa ang pipila ka tambag alang sa mga asawa nga makaplagan diha sa Bibliya?
15 Nag-ingon usab si Pablo nga ang usa ka asawa “angay nga adunay halawom nga pagtahod sa iyang bana.” Ang usa ka Kristohanong asawa kinahanglang magpakitag “malinawon ug malumong espiritu,” nga dili mapahitas-ong maghagit sa iyang bana o mag-independente. (1 Pedro 3:4) Ang usa ka diyosnon nga asawa maghago alang sa kaayohan sa panimalay ug maghatag ug pasidungog sa iyang ulo. (Tito 2:4, 5) Maningkamot siya sa pagsultig maayo bahin sa iyang bana ug busa dili mohimog bisan unsa nga makapawala sa pagtahod sa uban sa iyang bana. Maningkamot usab siya nga molampos ang mga desisyon sa iyang bana.—Proverbio 14:1.
16. Unsay makat-onan sa Kristohanong mga asawa gikan sa mga panig-ingnan ni Sara ug Rebeca?
16 Ang paghupot ug malinawon ug malumong espiritu wala magpasabot nga ang usa ka Kristohanong babaye dili na makapahayag sa iyang mga opinyon o dili hinungdanon ang iyang hunahuna. Ang diyosnong mga asawa sa kakaraanan, sama ni Sara ug Rebeca, mihimog unang lakang sa pagpahayag sa ilang kabalaka bahin sa pipila ka butang, ug gipakita sa talaan sa Bibliya nga giuyonan ni Jehova ang ilang gibuhat. (Genesis 21:8-12; 27:46–28:4) Ang Kristohanong mga asawa makapahayag usab sa ilang gibati. Apan, buhaton nila kana nga mataktikanhon, dili sa paagi nga nagpakamenos sa ilang bana. Lagmit makaplagan nila nga ang maong paagi sa pagpakig-estorya mas makapahimuot ug maayog resulta.
Ang Papel sa Pag-inunongay
17, 18. Unsa ang pipila ka paagi diin ang mga bana ug asawa makasukol sa pagsulay ni Satanas nga bungkagon ang kaminyoon?
17 Ang kaminyoon maoy tibuok-kinabuhi nga pag-inunongay. Busa, ang bana ug asawa kinahanglang adunay tiunay nga tinguha nga molampos ang kaminyoon. Kon kulang ang prangkang panag-estoryahay, mosamot ang problema. Subsob kaayo nga ang mga magtiayon magbungolay sa dihang motungha ang mga problema, maoy hinungdan nga mayugot sila sa usag usa. Ang ubang mga kapikas mangita pa ganig paagi nga mabungkag ang ilang kaminyoon, tingali pinaagi sa pagpangitag lain. Si Jesus nagpasidaan: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.”—Mateo 5:28.
18 Gitambagan ni apostol Pablo ang tanang Kristohanon, lakip na ang Kristohanong mga magtiayon: “Pagkapungot, apan ayaw pagpakasala; ayaw pasalopi sa adlaw ang inyong kasuko, ni maghatag ug luna sa Yawa.” (Efeso 4:26, 27) Ang atong pangunang kaaway, si Satanas, naningkamot nga pahimuslan ang dili-pagsinabtanay nga mahimong mahitabo tali sa mga Kristohanon. Ayaw tugoti nga molampos siya! Sa dihang motungha ang mga problema, panukiduki kon unsay giingon sa Bibliya bahin sa panghunahuna ni Jehova sa maong mga butang, ginamit ang binase-sa-Bibliya nga mga publikasyon. Hisgoti ang mga dili-pagsinabtanay sa kalmado ug matinud-anon nga paagi. Lihok uyon sa imong nakat-onan bahin sa mga sukdanan ni Jehova. (Santiago 1:22-25) Mahitungod sa imong kaminyoon, magmadeterminado nga magpadayon sa paglakaw uban sa Diyos ingong magtiayon, ug ayaw tugoti si bisan kinsa o ang bisan unsa nga magbulag sa iyang gihiusa pagyugo!—Miqueas 6:8.
[Mga footnote]
a Tan-awa ang kahong “Diborsiyo ug Panagbulag” sa Pagmata! Pebrero 8, 2002, panid 10, nga gipatik sa mga Saksi ni Jehova.
b Tan-awa Ang Bantayanang Torre, Mayo 15, 1989, panid 12.
c Aron mahimong takos sa mga pribilehiyo diha sa Kristohanong kongregasyon, ang usa ka lalaki kinahanglang dili “tigpanukmag”—nga nagtumong sa usa nga literal nga manumbag sa lain o mobatibati kanila pinaagig masakit nga mga pulong. Busa ang Septiyembre 1, 1990, nga gula sa Ang Bantayanang Torre nag-ingon sa panid 25: “Ang usa ka lalaki dili mahimong may katakos kon siya molihok sa diyosnong paagi sa ubang dapit apan diktador sa panimalay.”—1 Timoteo 3:2-5, 12.
Nahinumdom Ka Ba?
• Nganong bisan ang kaminyoon sa mga Kristohanon adunay mga problema?
• Sa unsang paagi ikatagana sa bana ang mga panginahanglan sa iyang asawa ug ikapakita nga gihigugma niya kini?
• Unsay mahimo sa asawa aron ipakita nga siya halalom nga nagtahod sa iyang bana?
• Sa unsang paagi ang bana ug asawa makapadayon sa pag-inunongay?
[Mga Pangutana sa Pagtuon]
[Hulagway sa panid 20]
Ang bana kinahanglang mahimong maayong magtatagana, dili lamang sa materyal kondili sa espirituwal usab
[Hulagway sa panid 21]
Ang lalaki nga nahigugma sa iyang asawa maoy tuboran sa kahayahay alang sa iyang asawa
[Hulagway sa panid 23]
Ang Kristohanong mga asawa magpahayag sa ilang pagbati sa matinahorong paagi