Lawom-ug-Dulot nga Kaguol

NING bag-o pa, gustong masayran sa usa ka tigpanukiduki kon moarang-arang ba ang pagbati niadtong nagbangotan sa pagkamatay sa ilang mga minahal paglabay sa panahon. Siya nagpadalag sinulat nga mga pangutana ngadto sa pipila ka ginikanan kansang mga anak namatay mga pipila ka tuig ang milabay. Dili tanan ang misanong. Ang usa ka amahan nga ginganlag Vladimir, kinsa namatyan ug anak nga lalaki lima ka tuig na ang milabay, miingon nga lisod pa gihapon alang kaniya ang paghisgot bahin sa iyang anak. a

Ang maong lawom-ug-dulot nga kaguol sagad nga bation sa mga ginikanan nga namatyag anak. Napulo ka tuig kanhi, nalumos ang 18-anyos nga anak nga lalaki ni William. Siya misulat, “Wala pa gihapon mawala ang akong kaguol tungod sa nahitabo, ug magpabilin gayod kini samtang ako buhi.” Lima ka tuig human mamatay ang anak nga lalaki ni Lucy tungod sa wala-damhang sakit, siya misulat: “Sa unang pipila ka adlaw, nagsige kog hunahuna, ‘Dili kini tinuod.’ Para nako, mora kog nagdamgo ug ngil-ad nga damgo ug dayon makamata ra. Paglabay sa pipila ka panahon akong naamgohan nga patay na gyod diay siya, nga di na gayod nako siya makita pag-usab. Lima ka tuig nang patay ang akong anak, apan usahay, kon mag-inusara ko, mohilak pa gihapon ko tungod niya.”

Nganong ang mga ginikanan nga namatyan ug anak, sama ni Vladimir, William, ug Lucy, mobati man ug lawom-ug-dulot nga kaguol? Hisgotan nato ang pipila ka rason.

Nganong Sakit Kaayo?

Inigkatawo sa usa ka bata diha sa usa ka pamilya, ang mga ginikanan makasinatig talagsaong pagbati nga dili nila bation sa ubang paagi. Malipay ug matagbaw kaayo ang mga ginikanan bisan sa pagkugos lang niini, pagtan-aw niini samtang natulog, o sa pagkakita sa dakong pahiyom niini. Ang mahigugmaong mga ginikanan nagmahal pag-ayo sa ilang mga anak. Sila nagbansay kanila nga magbinuotan ug magmatinahoron. (1 Tesalonica 2:7, 11) Samtang managko ang mga bata tungod sa ilang pag-atiman, ang mga ginikanan mapasigarbohon ug daghag pangandoy sa ilang mga anak.

Ang mahingawaon nga mga ginikanan naghago aron ilang ikatagana ang mga panginahanglan sa ilang mga anak. Lagmit nga regular silang naggahin ug kuwarta o kaha nagpundar ug mga kabtangan aron itabang sa ilang mga anak pag-abot sa panahon nga duna na kiniy kaugalingong pamilya. (2 Corinto 12:14) Kining dako kaayong paningkamot nga naglangkit ug emosyon, panahon, paghago, ug salapi nagpaila sa usa ka butang—ang mga ginikanan nagpadako sa ilang mga anak aron mabuhi, dili aron mamatay. Sa dihang ang usa ka anak mamatay, ang buluhaton sa pagpadako kaniya dili bug-os, ug ang mga pangandoy sa iyang mga ginikanan alang kaniya mahugno. Dili na  ikapakita sa mga ginikanan ang ilang mainitong gugma ug pagmahal ngadto sa ilang anak, kay nababagan na kini sa kamatayon. Mapulihan nag kahaw-ang ang dapit nga giokupar kaniadto sa ilang anak diha sa ilang kasingkasing. Sakit kaayo kini alang sa mga ginikanan.

Ang Bibliya nagpamatuod nga ang mga ginikanan nga namatyag anak nag-antos sa grabeng kaguol nga dili daling mawala. Sa pagbatbat kon unsay nahitabo sa dihang nabalitaan sa patriarkang si Jacob nga namatay ang iyang anak nga si Jose, ang Bibliya nag-ingon: “Gigisi ni Jacob ang iyang kupo ug nagbutang ug sakong panapton diha sa iyang balat-ang ug nagbangotan sa iyang anak sulod sa daghang adlaw. Ug ang tanan niyang mga anak nga lalaki ug ang tanan niyang mga anak nga babaye nanindog sa paghupay kaniya, apan nagpadayon siya sa pagdumili nga mahupay ug nag-ingon: ‘Kay ako manaog nga magbangotan sa akong anak ngadto sa Sheol [o lubnganan]!’” Katuigan sa ulahi, nagbangotan pa gihapon si Jacob tungod sa iyang anak, nga gituohan niyang patay na. (Genesis 37:34, 35; 42:36-38) Ang laing pananglitan sa Bibliya mao ang usa ka matinumanong babaye nga ginganlag Noemi nga namatyan ug duha ka anak nga lalaki. Kay naguol pag-ayo, buot niya nga ang iyang ngalang Noemi, nga nagkahulogang “Akong Kahimut-anan,” ilisan ug Mara, nga nagkahulogang “Mapait.”—Ruth 1:3-5, 20, 21.

Apan, ang Bibliya wala lamang mag-ila sa kaguol nga bation sa mga ginikanan. Nagpadayag usab kini kon sa unsang paagi si Jehova naghatag ug kusog ngadto sa nagbangotan. Sa sunod nga artikulo, atong hisgotan ang pipila ka paagi nga ang Diyos naghupay niadtong nagbangotan.

[Footnote]