Mga Pangutana Gikan sa mga Magbabasa

Kanus-a matapos ang pagtawag sa mga Kristohanon alang sa langitnong paglaom?

Ang Bibliya wala magbutyag ug eksaktong tubag nianang pangutanaha. Nahibalo kita nga ang pagdihog sa mga tinun-an ni Jesus uban ang paglaom nga makadawat sa ilang langitnong panulondon nagsugod sa 33 K.P. (Buhat 2:1-4) Nahibalo usab kita nga human mamatay ang mga apostoles, ang matuod nga dinihogang Kristohanon nga “trigo” ‘nagdungan sa pagtubo’ uban sa mini nga mga Kristohanon, ang “bunglayon.” (Mateo 13:24-30) Dayon, sugod sa ulahing bahin sa katuigan sa 1800, ang dinihogang mga Kristohanon nahimong dayag ug aktibo na usab. Sa 1919, gisugdan pag-ani “ang alanihon sa yuta” lakip na ang pagpanigom sa nahibiling mga membro sa dinihogan.—Pinadayag 14:15, 16.

Sukad sa kataposang bahin sa katuigan sa 1800 hangtod sa 1931, ang pangunang katuyoan sa buluhatong pagsangyaw mao ang pagpanigom sa nahibiling mga membro sa lawas ni Kristo. Sa 1931, gisagop sa mga Estudyante sa Bibliya ang binase-sa-Bibliya nga ngalang mga Saksi ni Jehova, ug gihisgotan sa Nobyembre 15, 1933, nga gula sa The Watchtower, nga kining talagsaon nga ngalan mao ang “denario” nga gihisgotan ni Jesus diha sa iyang sambingay nga narekord sa Mateo 20:1-16. Nagtuo sila nga ang 12 ka oras nga gihisgotan diha sa sambingay mao ang 12 ka tuig sukad sa 1919 ngadto sa 1931. Sa daghang katuigan human niana, gituohan nga ang pagtawag alang sa langitnong Gingharian natapos na niadtong 1931 ug nga kadtong gitawag aron mahimong kaubang mga manunod ni Kristo sa 1930 ug 1931 mao na ang ‘kinaulahian’ nga gitawag. (Mateo 20:6-8) Apan sa 1966 gihatag ang bag-ong pagsabot niana nga sambingay, ug nahimong tin-aw nga wala kana magtumong sa kataposan sa pagpanawag sa mga dinihogan.

Sa 1935 nasabtan nga ang “dakong panon” sa Pinadayag 7:9-15 gilangkoban sa “ubang mga karnero,” mga Kristohanon nga may yutan-ong paglaom, nga pagatigomon panahon sa “kataposang mga adlaw” ug kinsa ingong usa ka grupo makalabang-buhi sa Armagedon. (Juan 10:16; 2 Timoteo 3:1; Pinadayag 21:3, 4) Human nianang tuiga, ang tumong sa buluhaton nga paghimog tinun-an mao na ang pagpanigom sa dakong panon. Busa, ilabina human sa 1966, gituohan nga ang langitnong pagtawag natapos sa 1935. Daw nakompirmar kini sa dihang ang tanan nga nabawtismohan human sa 1935 nagtuo nga  sila adunay yutan-ong paglaom. Human niana, gituohan nga si bisan kinsa nga gitawag alang sa langitnong paglaom maoy kapuli sa dinihogang mga Kristohanon nga wala magmatinumanon.

Walay duhaduha, kon ang usa sa mga dinihogan dili-mahinulsolong mobiya sa kamatuoran, si Jehova motawag ug lain aron ipuli kaniya. (Roman 11:17-22) Apan, lagmit nga pipila ra ang tinuod nga mga dinihogan nga wala magmatinumanon. Sa laing bahin, sa paglabay sa panahon, ang pipila sa mga Kristohanon nga nabawtismohan human sa 1935 nagbaton sa pamatuod sa balaang espiritu nga sila adunay langitnong paglaom. (Roma 8:16, 17) Busa, mopatim-aw nga dili matino ang eksaktong petsa kon kanus-a matapos ang pagtawag sa mga Kristohanon alang sa langitnong paglaom.

Sa unsang paagi angay lantawon ang usa ka tawo nga nakatino diha sa iyang kasingkasing nga siya karon usa na ka dinihogan ug nagsugod sa pag-ambit sa mga emblema panahon sa Memoryal? Dili siya angayng hukman. Kana nga butang maoy tali kaniya ug kang Jehova. (Roma 14:12) Apan, ang tinuod nga dinihogang mga Kristohanon dili mangayog linain nga pagtagad. Dili sila maghunahuna nga tungod sa ilang pagkadinihogan, sila nakabaton ug linain nga “pagsabot,” nga labaw pa nianang lagmit nabatonan sa pipila ka membro sa dakong panon nga taas nag kasinatian. Dili sila maghunahuna nga nakabaton silag mas daghan nga balaang espiritu kay sa ilang mga kauban sa ubang mga karnero; ni magdahom nga alagaran sila sa uban o mangangkon nga labaw sila sa tinudlong mga ansiyano sa kongregasyon tungod kay nakig-ambit sila sa mga emblema. Sila sa kamapaubsanon nahinumdom nga ang pipila ka dinihogang mga lalaki sa unang siglo wala mokuwalipikar sa pag-alagad ingong mga ansiyano ug ministeryal nga mga alagad. (1 Timoteo 3:1-10, 12, 13; Tito 1:5-9; Santiago 3:1) Ang pipila ka dinihogang mga Kristohanon luya pa gani sa espirituwal. (1 Tesalonica 5:14) Ug ang mga igsoong babaye, bisan tuod mga dinihogan, wala manudlo diha sa kongregasyon.—1 Timoteo 2:11, 12.

Busa, ang dinihogang mga Kristohanon ug ang ubang mga karnero naningkamot nga magpabiling lig-on sa espirituwal, nga nag-ugmad sa mga bunga sa espiritu ug nagpalambo sa kalinaw diha sa kongregasyon. Ang tanang Kristohanon, dinihogan man o sakop sa ubang mga karnero, naningkamot pag-ayo sa pagsangyaw sa maayong balita ug sa paghimog tinun-an ubos sa pagdumala sa Nagamandong Lawas. Ang dinihogang mga Kristohanon kontento sa pagbuhat niini samtang kabubut-on pa sa Diyos nga magpabilin sila sa yuta ingong mga alagad ni Jehova.