Sugilanon sa Kinabuhi

Nakakaplag Kamig Dumalayong mga Bahandi

Sumala sa Giasoy ni Dorothea Smith ug Dora Ward

Unsang bahandia ang among gipangita? Duha mi ka batan-ong babaye nga may hugot nga tinguha sa pagtuman sa sugo ni Jesus: “Panglakaw kamo ug paghimog mga tinun-an sa katawhan sa tanang kanasoran.” (Mateo 28:19) Pasaysaya mi kon sa unsang paagi kini miresulta sa pagkakaplag ug dumalayong mga bahandi.

DOROTHEA: Sa 1915, wala madugay human magsugod ang Gubat sa Kalibotan I, ako natawo, ang ikatulong anak sa among pamilya. Nagpuyo mi duol sa Howell, Michigan, sa Tinipong Bansa. Dili relihiyoso ang akong amahan, apan mahinadlokon sa Diyos ang akong inahan. Naningkamot si Mama sa pagtudlo kanamo nga sundon ang Napulo ka Sugo, apan nabalaka siya kay ako ug ang akong mga magulang nga si Willis ug Viola wala man mabunyagi.

Sa nag-edad kog 12 anyos, nakahukom si Mama nga pabunyagan ko sa Relihiyong Presbiteryano. Di gyod nako makalimtan ang adlaw sa pagbunyag kanako. Duha ka masuso, nga gikugos sa ilang mga inahan, ang gibunyagan dungan nako. Puwerte nakong ulawa nga gibunyagan ko kauban sa mga batang gagmay. Giwisikan sa ministro ug tubig ang akong ulo ug nagyamyam siyag mga pulong nga wala nako masabti. Ang tinuod, parehas ra ko niadtong mga batang gagmay nga wala gayoy nasabtan kon unsay bunyag!

Usa ka adlaw niana sa 1932, may mihunong nga sakyanan sa atubangan sa among balay, ug si Mama maoy miabli sa pultahan. Dihay duha ka batan-ong mga lalaki nga nagtanyag ug mga libro bahin sa relihiyon. Ang usa kanila nagpailaila nga si Albert Schroeder. Gipakitaan niya si Mama ug pipila ka literatura nga gipatik sa mga Saksi ni Jehova.  Gikuha ni Mama ang maong mga basahon. Kadtong mga publikasyona maoy nakatabang kaniya sa pagdawat sa kamatuoran gikan sa Pulong sa Diyos.

Nagsugod ang Pagpangitag Bahandi

Sa ngadtongadto, mibalhin ko sa Detroit aron mopuyo kauban sa akong magulang nga babaye. Didto nakahimamat kog tigulang nga babaye nga miduaw kang Manang aron tun-an siya sa Bibliya. Ang ilang mga panaghisgot nakapahinumdom kanako sa senemanang programa sa radyo nga ginapaminawan namo ni Mama sa balay. Ang maong programa maoy 15-minutos nga pakigpulong base sa usa ka ulohan sa Bibliya nga gipahayag ni J. F. Rutherford, nga maoy nanguna sa mga Saksi ni Jehova niadtong panahona. Sa 1937 misugod mi sa pagpakig-uban sa unang kongregasyon sa mga Saksi ni Jehova sa Detroit. Pagkasunod tuig, ako nabawtismohan.

Sa sayong bahin sa katuigan sa 1940, gipahibalo nga magbukas ang mga Saksi ni Jehova ug usa ka tunghaan nga gitawag ug Gilead didto sa South Lansing, New York, aron magbansay ug mga misyonaryo. Pagkahibalo nako nga ang pipila ka graduwado sa maong tunghaan dapiton sa pag-alagad sa ubang nasod, naghunahuna ko, ‘Gusto ko ana!’ Gihimo nakong tumong nga makatungha sa Gilead. Dako gayong pribilehiyo ang pagpangita diha sa ubang kayutaan ug “mga bahandi”—buot ingnon, mga tawo nga nagtinguha nga mahimong mga tinun-an ni Kristo Jesus!—Haggeo 2:6, 7.

Inanay nga Pagkab-ot sa Akong Tumong

Sa Abril 1942, ako miundang sa akong trabaho ug misugod sa pag-alagad ingong payunir, o bug-os-panahong magwawali, sa Findlay, Ohio, duyog sa lima ka babaye nga mga igsoon sa pagtuo. Walay kongregasyon didto nga nagpahigayon ug regular nga mga tigom, apan among gidasig ang usag-usa pinaagi sa dungang pagbasa sa mga artikulo diha sa among Kristohanong mga publikasyon. Sa akong unang bulan sa pagpayunir, ako nakapahimutang ug 95 ka libro sa interesadong mga tawo! Mga usa ka tuig ug tunga sa ulahi, giasayn ako nga mag-alagad ingong espesyal payunir sa Chambersburg, Pennsylvania. Didto miduyog ko sa laing grupo sa lima pa ka payunir nga mga babaye, nga naglakip kang Dora Ward, usa ka sister nga taga-Iowa. Si Dora ug ako ang nagkauban sa pagpayunir. Nabawtismohan mi sa mao ra nga tuig, ug parehas ming nagtinguha sa pagtungha sa Gilead ug sa pag-alagad sa laing nasod ingong mga misyonaryo.

Sa sayong bahin sa 1944, miabot ang dugay na namong gihulat! Nakadawat ming duha ug imbitasyon nga motungha sa ikaupat nga klase sa Gilead. Nagpalista mi pagka-Agosto nianang tuiga. Apan sa di pa ko mopadayon, pasultiha una si Dora kon sa unsang paagi nagkauban mi sa pagpangitag bahandi sa taas na nga panahon.

 Naghinamhinam nga Makasugod sa Bug-os-Panahong Pagsangyaw

DORA: Si Mama nag-ampo nga makasabot unta siya sa Pulong sa Diyos. Usa niana ka Dominggo, kauban ming duha sa dihang nakadungog mi sa pakigpulong ni J. F. Rutherford diha sa radyo. Pagkahuman sa pakigpulong, nakaingon si Mama, “Mao ni ang kamatuoran!” Wala madugay human niana, kami nagtuon sa mga publikasyon sa mga Saksi ni Jehova. Sa 1935, sa dihang ako 12 anyos, mitambong ko sa usa ka pakigpulong sa bawtismo nga gipahayag sa usa sa mga Saksi ni Jehova, ug mibati kog hugot nga tinguha nga ipahinungod ang akong kinabuhi kang Jehova. Tulo ka tuig sa ulahi, ako nabawtismohan. Ang akong pahinungod ug bawtismo nakatabang kanako nga mahuptang buhi kanunay diha sa akong hunahuna ang akong mga tumong panahon sa nahibiling mga tuig sa akong pagtungha. Naghinamhinam ko nga mograduwar aron makasugod na ko sa pagpayunir.

Niadtong panahona, ang grupo sa mga Saksi nga among gipakig-ubanan nagtigom sa Fort Dodge, Iowa. Ang pagtambong sa mga tigom nagkinahanglag dakong paningkamot. Gawas pa, walay mga pangutana diha sa mga artikulo sa pagtuon sa Bantayanang Torre alang sa panaghisgot sa kongregasyon. Kami hangyoon sa paghatag ug inandam nga mga pangutana ngadto sa nagdumala sa Pagtuon sa Bantayanang Torre. Kada Lunes sa gabii, mag-andam mi ni Mama ug pangutana sa matag parapo, ug ihatag namo kini sa konduktor aron makapili siyag pangutana nga iyang gamiton.

Ang among kongregasyon regular nga ginaduaw sa usa ka nagapanawng magtatan-aw. Usa niining mga igsoona, si John Booth, maoy nagbansay kanako sa pagpamalaybalay sa nag-edad kog 12 anyos. Pag-edad nakog 17, gipangutana nako siya kon unsaon pagpil-ap ug aplikasyon sa payunir, ug gitabangan ko niya. Wala ko magdahom kaniadto nga pag-abot sa panahon magkita mi pag-usab ug mahimo nako siyang tibuok-kinabuhi nga higala!

Ingong payunir, kasagarang mag-uban mi ni Sister Dorothy Aronson, usa ka bug-os-panahong magwawali nga magulang nakog 15 ka tuig. Siya ang akong kaubang payunir hangtod nga gitawag siya sa unang klase sa Gilead sa 1943. Human niana, nagpadayon ko sa pagpayunir nga nag-inusara.

Ang Pagsupak Wala Makapahunong Kanamo

Ang katuigan sa 1940 maoy malisod nga panahon alang kanamo tungod kay ang mga tawo makinasodnon kaayo nga gisugnoran sa Gubat sa Kalibotan II. Sa dihang mamalaybalay mi, labayon mig itlog nga bugok, hinog nga kamatis, ug bato pa gani usahay! Among nasinati ang mas kuyaw nga pagsulay sa dihang nagtanyag mig Bantayanang Torre ug Consolation (karon Pagmata!) sa usa ka eskina. Ang mga polis, nga gisulsolan sa relihiyosong  mga magsusupak, miduol kanamo ug nanghulga nga dakpon mi kon makita mi nila nga mosangyaw pag-usab.

Siyempre, wala mi mohunong ug sangyaw, ug gidala mi ngadto sa estasyon sa polis aron sukitsukiton. Human buhii, namalik mi sa mao gihapong eskina ug nagtanyag na usab sa mao gihapong mga magasin. Among gisunod ang tambag sa may-katungdanan nga mga igsoong lalaki nga gamiton ang Isaias 61:1, 2 sa pagdepensa sa among baroganan. Kausa sa dihang giduol ko sa usa ka batan-ong polis, akong gilitok kaniya ang unod sa maong teksto nga gikulbaan. Katingalahan, mitalikod dayon siya ug milakaw! Para nako, gipanalipdan gyod mi sa mga manulonda.

Usa ka Adlaw nga Dili Makalimtan

Sa 1941, nalipay ko sa pagtambong sa lima-ka-adlaw nga kombensiyon sa mga Saksi ni Jehova sa St. Louis, Missouri. Nianang kombensiyona, gihangyo ni Brader Rutherford ang tanang bata nga nag-edad ug 5 ngadto sa 18 sa pag-adto sa pangunang seksiyon sa estadyum. Linibo ka bata ang nangadto. Gitimbaya kami ni Brader Rutherford pinaagi sa pagwarawara sa iyang panyo. Miwarawara usab kami. Human sa usa ka oras nga pakigpulong, siya miingon: “Ang mga bata nga mouyon sa pagbuhat sa kabubut-on sa Diyos ug modapig sa iyang teokratikanhong kagamhanan pinaagi kang Kristo Jesus ug mouyon sa pagsugot sa Diyos ug sa iyang Hari, palihog sa pagtindog.” Ang 15,000 ka bata dungang nanindog—usa ako kanila! Midugang ang mamumulong: “Kamong tanan nga gustong mohimo sa tanan ninyong maarangan sa pagsulti sa uban bahin sa Gingharian sa Diyos ug sa mga panalangin nga igahatag niini, palihog sultig Oo.” Misanong kami, ug dihay kusog kaayo nga pagpamakpak.

Dayon giluwatan ang librong Children, a ug milinya ang daghan kaayong bata diha sa plataporma, diin si Brader Rutherford naghatag sa matag usa kanamo ug kopya sa bag-ong libro. Makalilipay gayod kadto! Karon, daghan niadtong nakadawat ug libro nianang higayona masiboton pa gihapon sa pag-alagad kang Jehova sa tibuok kalibotan, nga nagsulti bahin sa Gingharian sa Diyos ug sa iyang pagkamatarong.—Salmo 148:12, 13.

Human makapayunir ug tulo ka tuig, nalipay gayod ako sa dihang nakadawat kog asaynment ingong espesyal payunir sa Chambersburg! Didto akong nahimamat si Dorothea, ug wala madugay kami nahimong suod nga managhigala. Kami madasigon ug aktibo kaayo. Gusto gayod namong pauswagon ang among pagpakig-ambit sa buluhatong pagsangyaw. Gisugdan namong duha ang pagpangitag bahandi ug gigugol diha niana ang among tibuok kinabuhi.—Salmo 110:3.

Mga pipila ka bulan human kami magsugod sa pag-alagad ingong mga espesyal payunir, nahimamat namo ang usa ka graduwado sa unang klase sa Gilead, si Albert Mann. Niadtong tungora, molargahay na siya paingon sa iyang langyawng asaynment. Iya kaming gidasig sa pagdawat sa bisan unsang langyaw nga asaynment nga lagmit among madawat.

Magkauban sa Tunghaan

DORA UG DOROTHEA: Handurawa ang among kalipay sa dihang nagsugod ang among pagbansay ingong mga misyonaryo! Sa unang adlaw sa klase, si Albert Schroeder, ang igsoon nga nagpahimutang ug Studies in the Scriptures sa inahan ni Dorothea 12 ka tuig na ang milabay, naglista kanamo. Didto usab si John Booth. Siya kaniadto ang alagad sa uma sa Kingdom Farm, diin nahimutang ang tunghaan. Sa ulahi, nag-alagad silang duha ingong mga membro sa Nagamandong Lawas sa mga Saksi ni Jehova.

Sa Tunghaang Gilead, among gitun-an ang mas lawom nga mga kamatuoran sa Bibliya. Maayo gayod kadto nga pagbansay. Dihay 104 ka estudyante sa among klase, lakip na ang unang langyaw nga estudyante gikan sa Mexico. Naningkamot siya sa pagpauswag sa iyang Iningles samtang kami naningkamot usab sa pagtuon ug Kinatsila. Hilabihan namong lipaya sa adlaw nga si Brader Nathan H. Knorr nag-apod-apod sa langyawng mga asaynment kanamo nga mga estudyante! Ang kadaghanan giasayn sa Sentral Amerika ug Amerika del Sur; ang among asaynment maoy sa Chile.

 Pagpangitag Bahandi sa Chile

Aron makasulod mi sa Chile, kinahanglan ming mokuhag bisa, nga gidangtag taas-taas nga panahon. Busa, human makagraduwar sa Enero 1945, kami nag-alagad ingong mga payunir sa Washington, D.C., sulod sa usa ka tuig ug tunga. Sa dihang nadawat na namo ang among mga bisa, siyam kami ka misyonaryo nga mipanaw paingon sa Chile. Ang pito maoy gikan sa mas unang mga klase sa Gilead.

Gitagbo kami sa pipila ka Kristohanong mga igsoon pag-abot namo sa Santiago, ang kaulohan. Usa kanila mao si Albert Mann, ang graduwado sa Gilead nga nagdasig kanamo sa miaging pipila ka tuig. Miabot siya sa Chile usa ka tuig nga sayosayo pa, kauban ni Joseph Ferrari nga gikan sa ikaduhang klase sa Gilead. Sa among pag-abot didto, wala pay 100 ang magmamantala sa tibuok Chile. Mahinamon kaayo mi sa pagpangitag dugang mga bahandi—matinud-anog-kasingkasing nga mga tawo—diha sa among bag-ong asaynment.

Gipapuyo kami diha sa puy-anan sa misyonaryo sa Santiago. Usa ka bag-ong kasinatian alang kanamo ang pagpuyo kauban sa dakong pamilya sa mga misyonaryo. Gawas sa paggugol ug gitakda nga gidaghanon sa oras diha sa buluhatong pagsangyaw, ang tanang misyonaryo giasayn sa pagdegamo alang sa tibuok pamilya kausa sa usa ka semana. Diha kamiy makauulawng mga kasinatian. Kas-a, nagluto mig init nga biskuwit nga maoy ipamahaw sa among gigutom nga pamilya, apan sa dihang gihaon namo ang mga biskuwit gikan sa hurno, mialisngaw ang dili maayong baho. Bantog ra, kay baking soda diay ang among gigamit imbes baking powder! Dihay nagbutang ug baking soda sa basiyo nga lata sa baking powder.

Apan mas makauulaw ang among mga sayop samtang nagtuon mig Kinatsila. Ang usa ka dakong pamilya nga among gitun-an sa Bibliya hapit moundang sa pagtuon kay dili nila masabtan ang among gipanulti. Apan pinaagi sa pagbasa sa mga teksto diha mismo sa ilang Bibliya, nakakat-on gihapon sila sa kamatuoran, ug lima kanila ang na-Saksi. Niadtong mga tuiga, walay kurso sa pinulongan alang sa bag-ong mga misyonaryo. Nagsugod dayon mi sa pagsangyaw ug naningkamot mi sa pagkat-on sa pinulongan gikan sa mga tawo nga among gisangyawan.

Daghan mig gidumala nga pagtuon sa Bibliya, ug kusog ang pag-uswag sa pipila sa among ginatun-an. Ang uban nagkinahanglag dakong pailob. Si Teresa Tello, nga usa ka batan-ong babaye, namati sa mensahe sa kamatuoran ug miingon, “Palihog pamalik mo ug sultihi pa kog dugang.” Kadose mi namalik apan wala gyod namo siya maabti. Milabay ang tulo ka tuig. Dayon mitambong mig asembliya nga gipahigayon sa usa ka teatro sa Santiago. Pagbiya namo sa asembliya pagka-Dominggo, dihay nanawag, “Senorita Dora, Senorita Dora!” Milingi mi, si Teresa diay ang nanawag. Iyang giduaw ang iyang magulang nga babaye nga nagpuyo tabok sa karsada ug miadto siya sa teatro aron susihon kon unsay nagakahitabo. Nalipay gayod mi nga nakita siya pag-usab! Naghimo mig kahikayan sa pagtuon sa Bibliya, ug wala madugay human niana siya nabawtismohan. Sa ulahi, nahimo siyang espesyal payunir. Karon, paglabay sa mga 45 ka tuig, si Teresa anaa gihapon sa espesyal nga bug-os-panahong pag-alagad.—Ecclesiastes 11:1.

 Pagkakaplag ug mga Bahandi Diha sa “Kabalasan”

Sa 1959 giasayn kami sa Punta Arenas—nga nagkahulogang “Dapit sa Kabalasan”—sa tumoy sa habagatang bahin sa 4,300 kilometros nga baybayon sa Chile. Talagsaon nga teritoryo ang Punta Arenas. Sa mga bulan sa ting-init, dugay mosalop ang adlaw—kini mosalop sa alas 11:30 sa gabii. Nakahimo kami sa paggugol ug daghang adlaw diha sa ministeryo bisag dihay mga kababagan, tungod kay sa ting-init mohuros ang kusog kaayong hangin gikan sa Antartika. Ang mga bulan sa tingtugnaw bugnaw, ug dali rang mogabii.

Bisan pa niini nga mga kalisdanan, ang Punta Arenas maoy nindot nga dapit. Sa ting-init, ang kalangitan magdag-om kanunay. Usahay, mabasa ka kay kalit lang nga mobunok ang ulan, apan mauga ra pod ka kay hangin man. Dayon motungha ang balangaw iniglapos sa kahayag sa adlaw sa mga panganod. Usahay magdugay ug pipila ka oras ang mga balangaw, mawala ug dayon magpakita na pod, iniglapos sa sidlak sa adlaw diha sa mga panganod.—Job 37:14.

Kaniadto, pipila ra ang mga magmamantala sa Punta Arenas. Kami nga mga sister ang nagdumala sa mga tigom diha sa gamay nga lokal nga kongregasyon. Gipanalanginan ni Jehova ang among mga paningkamot. Paglabay sa 37 ka tuig, mibalik kami aron duawon kining dapita. Unsay among nakaplagan? Unom ka mauswagong mga kongregasyon ug tulo ka nindot nga mga Kingdom Hall. Dako gyod namong kalipay kay gitugtan mi ni Jehova sa pagkaplag ug espirituwal nga mga bahandi diha sa kabalasan sa habagatan!—Zacarias 4:10.

Mas Daghang Bahandi sa “Halapad nga Baybayon”

Human makaalagad ug tulo ka tuig ug tunga sa Punta Arenas, kami giasayn nga mag-alagad sa siyudad sa Valparaiso nga dunggoanan sa mga barko. Ang siyudad adunay 41 ka bungtod nga naglibot sa usa ka luok nga nag-umbaw sa Dagat Pasipiko. Ang among teritoryo maoy diha sa usa niining mga bungtora, ang Playa Ancha, nga nagkahulogang “Halapad nga Baybayon.” Sulod sa among 16-anyos nga pagpuyo didto, among nasaksihan ang grupo sa batan-on nga Kristohanong mga igsoong lalaki nga mihamtong sa espirituwal hangtod sa punto nga karon sila nag-alagad na ingong nagapanawng mga magtatan-aw ug ingong Kristohanong mga ansiyano sa mga kongregasyon sa tibuok nasod sa Chile.

Ang sunod namo nga misyonaryong asaynment mao ang Viña del Mar. Nag-alagad kami didto sulod sa tulo ka tuig ug tunga hangtod nga gidaot sa linog ang among gipuy-an. Namalik mi sa Santiago, diin kami unang nag-alagad ingong mga misyonaryo 40 ka tuig na ang milabay. Ang kahimtang didto nausab na. Diha nay natukod nga bag-ong mga pasilidad sa sanga, ug ang kanhing bilding sa sanga gipapuy-an sa tanang misyonaryo nga nabilin sa nasod. Sa ulahi, kanang bildinga gigamit alang sa Tunghaan sa Ministeryal nga Pagbansay. Nianang panahona, gipakita na usab ni Jehova ang iyang mahigugmaong-kalulot kanamo. Lima kanamo nga edaran na nga mga misyonaryo ang gidapit sa pagpuyo sa Bethel. Sulod sa panahon nga kami nag-alagad sa Chile, kami nakabatog 15 ka lainlaing asaynment. Nakita namo ang buluhaton nga miuswag gikan sa kubos pa sa 100 ka magmamantala ngadto sa mga 70,000! Dako gayod namong kalipay ang pagpangitag mga bahandi sa Chile sulod sa 57 ka tuig!

Bulahan kaayo mi kay gitugtan mi ni Jehova nga makakaplag ug daghan kaayong tawo—sa pagkatinuod, mga bahandi—kinsa padayon nga gigamit ni Jehova diha sa iyang organisasyon. Sulod sa kapin sa 60 ka tuig nga pag-alagad namo kang Jehova nga magkauban, kami kinasingkasing nga mouyon sa pagbati ni Haring David, kinsa misulat: “Pagkadagaya sa imong pagkamaayo, nga imong gitipigan alang niadtong nangahadlok kanimo!”—Salmo 31:19.

[Footnote]

[Mga hulagway sa panid 9]

Si Dorothea sa 2002 ug sa buluhatong pagsangyaw sa 1943

[Hulagway sa panid 10]

Nagsangyaw diha sa kadalanan sa Fort Dodge, Iowa, sa 1942

[Hulagway sa panid 10]

Si Dora, 2002

[Hulagway sa panid 12]

Si Dorothea ug Dora sa gawas sa ilang unang puy-anan sa misyonaryo sa Chile, 1946