Magmaluluy-on​—Sa Unsang Paagi?

“Buhaton nato ang maayo ngadto sa tanan, apan ilabina kanila nga atong kabanay sa pagtuo.”—GALACIA 6:10.

1, 2. Unsay gitudlo kanato sa sambingay sa matinabangong Samarianhon bahin sa kaluoy?

 SAMTANG nakigsulti kang Jesus, ang usa ka tawo nga batid sa Balaod nangutana kaniya: “Kinsa ba gayod ang akong silingan?” Agig tubag, giasoy ni Jesus ang mosunod nga sambingay: “Dihay usa ka tawo nga naglugsong gikan sa Jerusalem paingon sa Jerico ug nahulog sa kamot sa mga tulisan, kinsa naghukas kaniya ug nagbun-og kaniya, ug namahawa, nga nagbiya kaniya nga himalatyon. Karon, naatol nga may usa ka saserdote nga naglugsong niana nga dalan, apan, sa iyang nakita siya, miagi siya sa pikas daplin. Sa susama, usa ka Levihanon usab, sa nakaabot siya sa maong dapit ug nakakita kaniya, miagi sa pikas daplin. Apan usa ka Samarianhon nga nagapanaw sa dalan nahiabot kaniya ug, sa pagkakita kaniya, siya giabot ug kaluoy. Busa iyang giduol siya ug gibugkosan ang iyang mga samad, nga gibuboan kini ug lana ug bino. Unya iyang gisakay siya sa iyang mananap ug gidala siya ngadto sa usa ka balay-abotanan ug giatiman siya. Ug sa sunod adlaw mikuha siyag duha ka denario, gihatag kini sa magbalantay sa balay-abotanan, ug miingon, ‘Atimana siya, ug bisan unsay imong magasto gawas pa niini, bayran ko sa akong pagbalik dinhi.’” Unya, si Jesus nangutana sa nagpatalinghog kaniya: “Sa imong hunahuna kinsa niining tulo ang naghimo sa iyang kaugalingon nga silingan sa tawo nga nahulog sa kamot sa mga tulisan?” Siya mitubag: “Ang usa nga milihok nga maluluy-on kaniya.”—Lucas 10:25, 29-37a.

² Ang pag-atiman sa Samarianhon sa nasamdan nga tawo tin-aw kaayong nagpasundayag kon unsay tinuod nga kaluoy! Kay giabot ug kaluoy o kahingawa, ang Samarianhon milihok sa paagi nga nahupayan ang nasamdang tawo. Dugang pa, ang tawong nanginahanglan ug tabang dili kaila sa Samarianhon. Ang nasyonalidad, relihiyon, o kultura dili angayng makababag sa pagpakitag kaluoy. Human iasoy ang sambingay bahin sa matinabangong Samarianhon, si Jesus mitambag sa nagpatalinghog kaniya: “Lakaw ug buhata ang ingon.” (Lucas 10:37b) Makasunod kita sa maong tambag ug maningkamot nga magmaluluy-on sa uban. Apan sa unsang mga paagi magmaluluy-on kita sa atong adlaw-adlaw nga pagkinabuhi?

“Kon ang Usa ka Igsoong Lalaki . . . Anaa sa Hubo nga Kahimtang”

3, 4. Nganong mahinungdanon gayod nga kita magpakitag kaluoy sulod sa Kristohanong kongregasyon?

³ Si apostol Pablo miingon: “Samtang kita may kahigayonan alang niini, buhaton nato ang maayo ngadto sa tanan, apan ilabina kanila nga  atong kabanay sa pagtuo.” (Galacia 6:10) Nan, ato unang hisgotan kon sa unsang paagi magmadagayaon ang atong maluluy-ong mga buhat ngadto sa atong mga kabanay sa pagtuo.

⁴ Sa pagtambag sa matuod nga mga Kristohanon nga magmaluluy-on sa usag usa, ang tinun-ang si Santiago misulat: “Ang tawong dili magpakitag kaluoy pagahukman nga walay kaluoy.” (Santiago 2:13) Ang konteksto niining inspiradong mga pulong nagpadayag kanato ug pipila ka paagi nga kita makapakitag kaluoy. Pananglitan, sa Santiago 1:27 atong mabasa: “Ang dagway sa pagsimba nga hinlo ug wala mahugawi sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang kasakitan, ug ang pag-amping sa kaugalingon nga dili mahugawan sa kalibotan.” Ang Santiago 2:15, 16 nag-ingon: “Kon ang usa ka igsoong lalaki o babaye anaa sa hubo nga kahimtang ug walay pagkaon nga igo alang sa maong adlaw, ug unya usa kaninyo moingon kanila: ‘Panglakaw kamo nga malinawon, painiti ug busga ang inyong kaugalingon,’ apan wala ninyo sila hatagi sa mga kinahanglanon alang sa ilang lawas, unsay kapuslanan niini?”

5, 6. Sa unsang paagi kita magmadagayaon sa maluluy-ong mga buhat diha sa atong pagpakig-uban sa mga igsoon sa lokal nga kongregasyon?

⁵ Ang pag-atiman sa uban ug pagtabang sa mga nanginahanglan maoy usa ka ilhanan sa matuod nga relihiyon. Tungod sa atong relihiyon, kita dili lamang manghinaot sa kaayohan sa uban. Hinunoa, ang atong pagkamabination magpalihok kanato sa pagtabang sa mga tawo nga adunay seryosong panginahanglan. (1 Juan 3:17, 18) Oo, ang pag-andam ug pagkaon alang sa usa ka masakiton, pagtabang sa usa ka tigulang sa mga buluhaton sa balay, pagpasakay kanila paingon sa Kristohanong mga tigom kon gikinahanglan, ug pagkamanggihatagon ngadto sa mga tawo nga angayng tabangan nahilakip sa dagayang maluluy-ong mga buhat nga angay natong himoon.—Deuteronomio 15:7-10.

⁶ Bisan pag hinungdanon ang materyal nga pagtabang sa mga membro sa nagdako nga Kristohanong kongregasyon, mas hinungdanon ang espirituwal nga pagtabang kanila. Kita giawhag nga “hupaya ang magul-anong mga kalag, buligi ang mga maluya.” (1 Tesalonica 5:14) “Ang tigulang nga mga babaye” gidasig nga mahimong “mga magtutudlo sa maayo.” (Tito 2:3) Mahitungod sa Kristohanong mga magtatan-aw, ang Bibliya nag-ingon: “Ang matag usa mahimong sama sa usa ka tagoanang dapit gikan sa hangin ug usa ka salipdanang dapit gikan sa bagyo.”—Isaias 32:2.

7. Unsay makat-onan nato bahin sa pagpakitag kaluoy gikan sa mga tinun-an sa Antioquia sa Sirya?

⁷ Gawas pa sa pag-atiman sa mga babayeng balo, mga ilo, ug kadtong nanginahanglag tabang ug pagdasig sa ilang kaugalingong dapit, may mga higayon nga ang mga kongregasyon sa unang siglo nagpadalag hinabang alang sa mga magtutuo sa ubang dapit. Pananglitan, sa dihang si Agabo mitagna nga “usa ka dakong gutom ang taliabot sa tibuok gipuy-ang yuta,” ang mga tinun-an sa Antioquia sa Sirya ‘naninguha nga ang matag usa kanila sumala sa iyang maarangan makahimog pag-alagad pinaagig pagpadala ug hinabang ngadto sa mga igsoon nga nagpuyo sa Judea.’ Gipadala kadto ngadto sa mga ansiyano didto “pinaagi sa kamot ni Bernabe ug Saulo.” (Buhat 11:28-30) Komosta karong adlawa? “Ang matinumanon ug maalamong ulipon” nag-organisar ug mga komite sa hinabang sa pag-atiman sa atong mga igsoon nga tingali naapektohan ug mga katalagman, sama sa mga bagyo, linog, o tsunami. (Mateo 24:45) Ang pagboluntaryo sa atong panahon, kahago, ug salapi sa maong kahikayan maoy usa ka maayong paagi nga kita magpakitag kaluoy.

 “Kon Kamo Magpadayon sa Pagpakitag Paboritismo”

8. Sa unsang paagi ang paboritismo makapugong sa pagpakitag kaluoy?

⁸ Sa pagpasidaan bahin sa usa ka kinaiya nga sukwahi sa kaluoy ug sa “harianong balaod” sa gugma, si Santiago misulat: “Kon kamo magpadayon sa pagpakitag paboritismo, kamo nakasala, kay kamo gihukman sa balaod ingong mga malinapason.” (Santiago 2:8, 9) Ang pagpalabi sa mga dato o mga inila maghimo kanatong dili na kaayo matinagdanon sa “pagtuaw sa timawa.” (Proverbio 21:13) Ang paboritismo makapugong sa maluluy-ong espiritu. Kita makapakitag kaluoy kon kita dili mapihigon sa atong pagtagad sa uban.

9. Nganong dili sayop ang pagpakitag espesyal nga pagtagad sa mga tawong takos?

⁹ Ang pagkadili-mapihigon nagpasabot ba nga dili na gayod kita magpakitag espesyal nga pagtagad kang bisan kinsa? Dili gayod. Mahitungod sa iyang isigkamagbubuhat nga si Epafrodito, si apostol Pablo misulat sa mga Kristohanon sa Filipos: “Mahala kanunay ang ingon nianang matanga sa mga tawo.” Ngano? “Tungod kay sa buluhaton sa Ginoo siya nag-ungaw sa kamatayon, nga nagladlad sa iyang kalag sa kapeligrohan, aron bug-os niyang mahulipan ang inyong pagkawala-diri sa pag-alagad kanako.” (Filipos 2:25, 29, 30) Ang matinumanong pag-alagad ni Epafrodito takos pagailhon. Dugang pa, sa 1 Timoteo 5:17, atong mabasa: “Ang mga ansiyano nga nagdumala sa maayong paagi kinahanglang isipon nga takos sa doble nga pasidungog, ilabina silang naghago sa pagpanulti ug sa pagpanudlo.” Angayng ilhon usab ang maayong espirituwal nga mga hiyas. Kanang matanga sa pagtagad maoy dili pagpakitag paboritismo.

“Ang Kaalam nga Gikan sa Itaas . . . Maoy Tugob sa Kaluoy”

10. Nganong angay natong pugngan ang atong dila?

¹⁰ Mahitungod sa dila, si Santiago miingon: “Usa ka dili-mapugngan makadaot nga butang, kini puno sa hilo nga makamatay. Pinaagi niini ginadayeg nato si Jehova, ang Amahan mismo, ug pinaagi niini ginatunglo nato ang mga tawo nga gibuhat ‘sa dagway sa Diyos.’ Gikan sa mao ra nga baba nagagula ang pagdayeg ug ang pagtunglo.” Niini nga konteksto, si Santiago midugang pag-ingon: “Kon ang inyong kasingkasing naghambin ug mapait nga pangabugho ug pagkamatigion, ayaw pagpanghambog ug pagpamakak batok sa kamatuoran. Dili kini ang kaalam nga gikan sa itaas, kondili kini yutan-on, mananapon, demonyohanon. Kay kon diin anaa ang pangabugho ug pagkamatigion, anaa ang kasamok ug ang tanang mangil-ad nga butang. Apan ang kaalam nga gikan sa itaas maoy una sa tanan putli, unya makigdaiton, makataronganon, andam mosunod, tugob sa kaluoy ug maayong mga bunga, dili mapihigpihigon, dili salingkapaw.”—Santiago 3:8-10a, 14-17.

11. Sa unsang paagi nga kita mahimong maluluy-on diha sa paggamit sa atong dila?

¹¹ Busa, ang atong sinultihan magpadayag kon nakabaton ba kita sa kaalam nga “tugob sa kaluoy.” Unsa may ibutyag bahin kanato kon kita manghambog, mamakak o magsabwag ug makadaot nga tabi tungod kay kita nasina o may pakiglalis kanila? Ang Salmo 94:4 nag-ingon: “Ang tanang mamumuhat sa butang nga makadaot nagapanghambog sa ilang kaugalingon.” Ug ang dungog sa tawong inosente dali ra kaayong madaot tungod sa makadaot nga tabi! (Salmo 64:2-4) Dugang pa, hunahunaa ang kadaot nga mahimo sa “usa ka bakakong saksi [nga] nagasabwag ug kabakakan.” (Proverbio 14:5; 1 Hari 21:7-13) Human sa paghisgot bahin sa sayop nga paggamit sa dila, si Santiago nag-ingon: “Mga igsoon ko, dili angay nga kining mga butanga magpadayon nga mahitabo nga ingon niini.” (Santiago 3:10b) Aron ikapakita ang tinuod nga kaluoy, ang atong sinultihan kinahanglang mahinlo, malinawon, ug makataronganon. Matod ni Jesus: “Sultihan ko kamo nga ang matag pulong nga walay pulos nga ginasulti sa mga tawo, sila manubag bahin niini sa Adlaw sa Paghukom.” (Mateo 12:36) Hinungdanon gayod nga kita mahimong maluluy-on diha sa paggamit sa atong dila!

“Kamo Magapasaylo sa mga Tawo sa Ilang mga Kalapasan”

12, 13. (a) Unsay makat-onan nato mahitungod sa kaluoy gikan sa sambingay bahin sa ulipon nga utangan sa iyang agalon ug dako kaayong kantidad sa salapi? (b) Unsay kahulogan nga kita magpasaylo sa atong igsoon ug “hangtod sa kapitoag-pito”?

¹² Ang sambingay ni Jesus bahin sa ulipon  nga utangan ug 60,000,000 ka denario sa iyang agalon nga hari nagpakita ug laing paagi nga magmaluluy-on. Tungod kay ang ulipon walay ikabayad sa iyang utang, siya nangaliyupo nga kaluy-an unta siya. “Kay natukmod sa kaluoy,” ang agalon nagpasaylo sa utang sa iyang ulipon. Apan ang ulipon milakaw ug nakasugat sa usa ka isigkaulipon nga utangan niyag usa lamang ka gatos ka denario ug sa kawalay-kaluoy nagpabalhog kaniya sa bilanggoan. Sa dihang nadunggan sa agalon kon unsay nahitabo, iyang gipatawag ang ulipon nga gipasaylo sa iyang utang ug miingon kaniya: “Daotan nga ulipon, gipapas ko ang tanan nimong utang sa nangaliyupo ka kanako. Dili ba, sa baylo, angay unta nga maluoy ka sa imong isigkaulipon, ingon nga ako naluoy usab kanimo?” Dayon gitugyan siya sa agalon ngadto sa mga magbalantay sa bilanggoan. Gitapos ni Jesus ang sambingay sa pag-ingon: “Sa samang paagi makiglabot usab kaninyo ang akong langitnong Amahan kon ang matag usa kaninyo dili magpasaylo sa iyang igsoon gikan sa inyong mga kasingkasing.”—Mateo 18:23-35.

¹³ Gipasiugda gayod sa maong sambingay nga ang kaluoy naglakip sa kaandam sa pagpasaylo! Gipasaylo ni Jehova ang dako kaayo natong utang. Dili ba usab angay kitang “magpasaylo sa mga tawo sa ilang mga kalapasan”? (Mateo 6:14, 15) Sa wala pa iasoy ni Jesus ang sambingay bahin sa walay-kaluoy nga ulipon, si Pedro nangutana kaniya: “Ginoo, pila ka higayon nga ang akong igsoon makasala batok kanako ug ako magpasaylo kaniya? Hangtod ba sa makapito?” Si Jesus mitubag: “Ako magaingon kanimo, dili, Hangtod sa makapito, kondili, Hangtod sa kapitoag-pito.” (Mateo 18:21, 22) Oo, ang usa ka tawong maluluy-on andam nga magpasaylo ug “hangtod sa kapitoag-pito,” nga sa ato pa, walay kinutoban.

14. Sumala sa Mateo 7:1-4, sa unsang paagi makapakita kitag kaluoy adlaw-adlaw?

¹⁴ Sa pagpakita ug lain pang paagi sa pagkamaluluy-on, si Jesus miingon diha sa Wali sa Bukid: “Hunong na sa pagpanghukom aron dili kamo pagahukman; kay sa hukom nga inyong ginahukom, kamo pagahukman . . . Nan, nganong tan-awon nimo ang uhot nga anaa sa mata sa imong igsoon, apan wala magtagad sa salagunting nga anaa sa imong kaugalingong mata? O unsaon nimo pag-ingon sa imong igsoon, ‘Tugoti ako sa pagkuha sa uhot gikan sa imong mata’; sa dihang, tan-awa! usa ka salagunting ang anaa sa imong kaugalingong mata?” (Mateo 7:1-4) Busa, makapakita kitag kaluoy adlaw-adlaw pinaagi sa pag-antos sa mga kahuyangan sa uban ug dili mahimong sobra ka hinawayon kanila.

“Buhaton Nato ang Maayo Ngadto sa Tanan”

15. Nganong angay kitang magmaluluy-on usab ngadto sa mga dili magtutuo?

¹⁵ Bisan pag kanunayng gihisgotan ang kaluoy taliwala sa mga magtutuo diha sa basahon ni Santiago sa Bibliya, wala kini magpasabot nga kita magmaluluy-on lamang sulod sa Kristohanong kongregasyon. “Si Jehova maayo sa tanan, ug ang iyang mga kaluoy anaa ibabaw sa tanan niyang mga buhat,” matod sa Salmo 145:9. Giawhag kita nga “mahimong mga tigsundog sa Diyos” ug “buhaton nato ang maayo ngadto sa tanan.” (Efeso 5:1; Galacia 6:10) Bisan pag wala kita mahigugma “sa kalibotan o sa mga butang sa kalibotan,” angay kitang magmatinagdanon usab sa mga panginahanglan sa mga tawo sa kalibotan.—1 Juan 2:15.

16. Unsang mga butanga ang mag-impluwensiya sa atong pagpakitag kaluoy sa uban?

¹⁶ Ingong mga Kristohanon, andam kanunay kitang motabang kutob sa atong maarangan sa mga nabiktima sa “wala damhang panghitabo” o kadtong anaa sa kalisdanan. (Ecclesiastes 9:11) Hinuon, ang gidak-on sa atong ikatabang  mag-agad sa atong mga kahimtang. (Proverbio 3:27) Sa dihang motabang sa uban sa materyal nga paagi, mag-amping kita nga ang morag usa ka maayong buhat dili makadasig sa pagkatapolan. (Proverbio 20:1, 4; 2 Tesalonica 3:10-12) Busa, ang usa ka tawong tinuod nga maluluy-on mosanong nga may pagkamabination inubanan sa pagkamakataronganon.

17. Unsa ang labing maayong paagi sa pagpakitag kaluoy ngadto sa mga dili sakop sa Kristohanong kongregasyon?

¹⁷ Ang labing maayong paagi sa pagpakitag kaluoy ngadto sa mga dili sakop sa Kristohanong kongregasyon mao ang pagsangyaw sa kamatuoran sa Bibliya kanila. Ngano? Tungod kay ang kadaghanang tawo karon samag nagsukarap sa espirituwal nga kangitngit. Ang kadaghanan, kay wala makakaplag ug kasulbaran sa ilang mga suliran o sa tinuod nga paglaom alang sa umaabot, maoy “pinanitan ug nagkatibuagsa sama sa mga karnero nga walay magbalantay.” (Mateo 9:36) Ang mensahe sa Pulong sa Diyos mahimong ‘lampara sa ilang tiil,’ nga makatabang kanila sa pagsulbad sa mga suliran sa kinabuhi. Kini usab mahimong ‘kahayag sa ilang alagianan’ sa pagkaagi nga gitagna sa Bibliya ang katuyoan sa Diyos sa umaabot, nga naghatag kanilag pasikaranan aron aduna silay sanag nga paglaom. (Salmo 119:105) Talagsaon gayong pribilehiyo ang pagmantala sa kahibulongang mensahe sa kamatuoran ngadto sa mga nagkinahanglan gayod niini! Tungod kay nagsingabot ang “dakong kasakitan,” karon na ang panahon sa masibotong pagpakig-ambit sa pagsangyaw sa Gingharian ug paghimog mga tinun-an. (Mateo 24:3-8, 21, 22, 36-41; 28:19, 20) Kini ang labing hinungdanong paagi sa pagpakitag kaluoy.

Ihatag “ang mga Butang nga Anaa sa Sulod”

18, 19. Nganong paningkamotan gayod nato nga dugang ipakita ang kaluoy diha sa atong kinabuhi?

¹⁸ “Ihatag ingong mga gasa sa kaluoy ang mga butang nga anaa sa sulod,” matod ni Jesus. (Lucas 11:41) Aron ang usa ka maayong buhat maisip nga tinuod nga kaluoy, kinahanglang himoon kini nga kinasingkasing ug kinabubut-on. (2 Corinto 9:7) Sa atong kalibotan karon diin kasagaran na kaayo ang pagkamapintason, pagkahakog, ug pagkadili-matinagdanon sa pag-antos ug sa mga suliran sa uban, makapahupay gayod ang maong pagkamaluluy-on!

¹⁹ Busa, atong paningkamotan nga dugang ipakita ang kaluoy diha sa atong kinabuhi. Kon mas magmaluluy-on kita, mas mahisama kita sa Diyos. Makatabang kini kanato aron mapahimuslan ang makahuloganon ug matagbawong kinabuhi.—Mateo 5:7.

Unsay Imong Nakat-onan?

• Nganong ilabinang hinungdanon nga magmaluluy-on sa mga isigkamagtutuo?

• Sa unsang paagi makapakita kitag kaluoy sulod sa Kristohanong kongregasyon?

• Sa unsang paagi makabuhat kitag maayo ngadto sa mga dili sakop sa kongregasyon?

[Mga Pangutana sa Pagtuon]

[Hulagway sa panid 26]

Ang Samarianhon nagpakitag kaluoy

[Mga hulagway sa panid 27]

Dagaya ang maluluy-ong mga buhat sa mga Kristohanon

[Hulagway sa panid 30]

Ang pagsangyaw sa kamatuoran sa Bibliya mao ang labing maayong paagi sa pagpakitag kaluoy ngadto sa mga dili sakop sa kongregasyon