Mga Pangutana Gikan sa mga Magbabasa

Angay bang motambong ang usa ka Saksi ni Jehova sa kasal sa usa ka paryente o higala nga dili Saksi?

Ang mga kasal maoy malipayong mga okasyon, mao nga makasabot kita nga ang usa ka Kristohanon gustong moduyog niana nga kalipay. Siyempre, ang mga bata nga dapiton sa pagtambong kinahanglang mosunod sa pagbuot sa ilang mga ginikanan o sa ilang mga tigbantay. (Efeso 6:1-3) Apan unsa man kon paubanon sa dili-magtutuo nga bana ang iyang asawa nga Saksi ni Jehova ngadto sa usa ka kasal sa simbahan? Ang iyang tanlag mahimong motugot kaniya sa pagtambong ingong maniniid lamang nga determinadong dili makigbahin sa bisan unsang relihiyosong mga tulumanon panahon sa kasal.

Busa, ang pagtambong o dili sa usa ka kasal maoy personal nga pagadesisyonan. Ugaling lang, angayng hinumdoman sa matag Kristohanon nga siya may tulubagon kang Jehova ug angay niyang tagdon ang Kasulatanhong mga prinsipyo sa dihang mohimog mga desisyon bahin sa pagtambong sa kasal sa dili Saksi.

Ang labing hinungdanon nga butang nga hunahunaon sa usa ka Kristohanon mao ang pag-uyon sa Diyos. Si Jesus miingon: “Ang Diyos maoy Espiritu, ug silang magasimba kaniya kinahanglan nga magasimba uban sa espiritu ug sa kamatuoran.” (Juan 4:24) Busa, ang mga Saksi ni Jehova dili makigbahin sa mga tulumanon sa ubang relihiyon, sama sa pagpangadye, mga rituwal, o mga seremonyas nga sukwahi sa kamatuoran sa Bibliya.—2 Corinto 6:14-17.

Nahibalo ang usa ka Kristohanon nga ang iyang desisyon makaapektar usab sa uban. Kon modesidir kang motambong, masilo ba ang imong mga paryente kon dili ka bug-os makigbahin sa ilang masadyaong mga kalihokan? Kinahanglang tagdon usab ang posibleng epekto niini nganha sa mga isigkamagtutuo. (Roma 14:13) Bisan pag mohinapos ka o ang ubang membro sa imong pamilya nga dili sayop ang pagtambong sa kasal sa usa ka dili Saksi, apan dili ba unya kini makapandol sa imong mga isigkamagtutuo? Dili ba kaha matugaw ang tanlag sa pipila?

Mahimong motungha ang lisod nga mga kahimtang panahon sa seremonyas sa kasal sa dili-Saksing mga paryente. Unsa man kon hangyoon ka nga mahimong abay sa kasal? O unsa man kon ang imong dili-Saksi nga kapikas gustong makigbahin sa tanang kalihokan? Kon kasal lang hinuon sa huwes o sa laing opisyal sa gobyerno, ang imong pagtambong niana maoy pagsaksi lang sa usa ka legal nga proseso.

Apan kon ang kasal himoon sa simbahan o sa usa ka klerigo, adunay dugang nga mga butang nga angayng tagdon. Aron sundon ang imong nabansay-sa-Bibliya nga tanlag ug malikayan ang pagkompromiso sa imong relihiyosong mga pagtuo o pagbuhat ug butang nga makapakaulaw sa gikasal o sa ilang pamilya, mahimong modesisyon ka nga dili motambong. (Proverbio 22:3) Kon abante nimong ipatin-aw ang imong pinasukad-sa-Bibliyang mga pagtuo ug ipasabot kanila kon unsay imong mahimong apilan o mosugyot ka nga lain na lang ang imong buhaton, malikayan nimo ug sa imong pamilya ang kahigwaos ug kaulaw.

Human matimbangtimbang pag-ayo ang tanang butang, modesisyon tingali ang pipila ka Kristohanon nga ang pagtambong sa kasal sa usa ka dili Saksi ingon nga maniniid dili sayop. Apan kon gihunahuna sa usa ka Kristohanon nga kon sa iyang pagtambong siya matental sa paglapas sa mga prinsipyo sa Bibliya, basin siya mohinapos nga labaw ang posibleng kadaotan kay sa posibleng mga kaayohan. Kon modesisyon siya nga dili motambong sa kasal sa simbahan apan mangombira na lang pagkahuman niana, kinahanglang determinado siya nga ‘himoon ang tanang butang alang sa kahimayaan sa Diyos.’ (1 Corinto 10:31) Sa paghimo sa maong mga desisyon, “ang matag usa magpas-an sa iyang kaugalingong luwan” sa kaakohan. (Galacia 6:5) Busa, bisan kon unsa ang imong desisyon, hinumdomi nga hinungdanon gayod ang paghupot ug maayong tanlag atubangan kang Jehova nga Diyos.