Sa Dihang ang mga Kristohanon Ayagon Ingon sa Trigo

SA HAPIT nang mamatay si Jesus, gipasidan-an niya ang iyang mga tinun-an: “Tan-awa! mapugsanong gipangayo ni Satanas nga maangkon kamo aron sa pag-ayag kaninyo ingon sa trigo.” (Luc. 22:31) Unsay iyang gipasabot?

Sa adlaw ni Jesus, ang pagpangani ug trigo nagkinahanglag dakong panahon ug kusog. Una, tapokon sa mga mag-aani ang mga trigo gikan sa uma. Dayon, ila kining ilambos diha sa gahi nga luna o paagiag balsang panggiok nga giguyod ug mananap aron madugmok. Pinaagi niini mabulag ang lugas gikan sa uhot. Unya, ilang gamiton ang usa ka pala nga pangtahop sa pagpalid niini. Ang lugas mahulog ug balik sa giokanan, samtang ang uhot ug tahop mapalid sa layo. Pagkahuman, ang mga lugas ayagon pag-ayo aron makuha ang mga nasagol nga wala kinahanglana.

Sumala sa giingon ni Jesus, way-hunong nga giatake ni Satanas ang mga tinun-an ni Jesus kaniadto, ug siya nagaatake kanato karon. (Efe. 6:11) Hinuon, dili si Satanas ang hinungdan sa tanan natong kalisdanan. (Eccl. 9:11) Bisan pa niana, gamiton gayod ni Satanas ang tanang paagi aron mabungkag ang atong integridad. Pananglitan, tentalon tingali niya kita nga mahimong materyalistiko, mopilig kuwestiyonableng mga kalingawan, o mohimog seksuwal nga imoralidad. Mahimong gamiton usab niya ang atong mga kauban sa eskuylahan o trabaho ug dili-magtutuong mga paryente sa pagpit-os kanato sa pagpahimulos pag-ayo sa tanang ikahatag niining kalibotana maylabot sa edukasyon ug trabaho. Dugang pa, mahimong gamiton ni Satanas ang direktang paglutos aron mabungkag ang atong integridad sa Diyos. Siyempre, aduna pay daghang pamaagi nga gigamit si Satanas sa pag-ayag kanato sa mahulagwayong paagi.

Sa unsang paagi makabarog kita batok niining gamhanang kaaway? Dili kita makabarog sa kaugalingon natong kusog. Si Satanas mas kusgan kay kanato; apan nahibalo kita nga si Jehova mas kusgan pa kaayo kay kang Satanas. Kon kita bug-os nga mosalig kang Jehova, tim-os nga moampo alang sa kaalam ug kaisog aron makalahutay, ug mosalig gayod sa iyang giya, siya mopalig-on kanato aron makasukol kita sa mga pag-atake ni Satanas.—Sal. 25:4, 5.

Sa dihang sulayan, kita kinahanglang adunay katakos sa “pag-ila sa maayo ug sa daotan” aron dili kita malimbongan sa mga laraw ni Satanas. (Heb. 5:13, 14) Makatabang kanato si Jehova sa pag-ugmad sa maong katakos. Kinahanglang dili gayod kita motipas gikan sa hustong dalan, bisag unsa pay mahitabo. Kon atong sundon ang giya ni Jehova, iya gayong paluyohan ang atong maisogong determinasyon sa pagbuhat kon unsay matarong.—Efe. 6:10.

Ayagon tingali kita ni Satanas ingon sa trigo. Apan sa tabang ni Jehova, kita makabarog batok kaniya, nga malig-on sa pagtuo. (1 Ped. 5:9) Oo, ang Pulong ni Jehova nagpasalig kanato: “Sukli ang Yawa, ug siya mokalagiw gikan kaninyo.”—Sant. 4:7.