Si Jesu-Kristo—Ang Kinalabwang Misyonaryo

“Ako hawas gikan kaniya, ug kana Siya nagpadala kanako.”—JUAN 7:29.

1, 2. Unsa ang usa ka misyonaryo, ug kinsa ang matawag nga kinalabwang Misyonaryo?

 UNSAY mosantop sa imong hunahuna kon imong madunggan ang pulong “misyonaryo”? Ang pipila makahunahuna sa mga misyonaryo sa Kakristiyanohan, nga kadaghanan kanila nalangkit sa politikanhon ug ekonomikanhong mga kalihokan sa mga nasod nga ilang gialagaran. Apan ingong usa sa mga Saksi ni Jehova, lagmit mosantop sa imong hunahuna ang mga misyonaryo nga gipadala sa Nagamandong Lawas ngadto sa daghang nasod sa tibuok yuta sa pagsangyaw sa maayong balita. (Mat. 24:14) Kini nga mga misyonaryo dili-mahakogong naggugol sa ilang panahon ug kusog sa pagtabang sa mga tawo nga masuod kang Jehova nga Diyos ug makapahimulos ug suod kaayong relasyon uban kaniya.—Sant. 4:8.

² Ang mga pulong “misyonaryo” ug “mga misyonaryo” dili mabasa diha sa Bag-ong Kalibotang Hubad sa Balaang Kasulatan. Apan ang nota sa Efeso 4:11 sa Reference Bible nag-ingon nga ang Gregong pulong nga gihubad ug “mga tig-ebanghelyo” mahimong hubaron usab ug “mga misyonaryo.” Si Jehova mao ang kinalabwang Ebanghelisador, apan dili siya matawag ug kinalabwang Misyonaryo, kay wala may nagpadala kaniya. Apan mahitungod sa iyang langitnong Amahan, si Jesu-Kristo miingon: “Ako hawas gikan kaniya, ug kana Siya nagpadala kanako.” (Juan 7:29) Sa pagpasundayag ug dakong gugma alang sa katawhan, gipadala ni Jehova ang iyang bugtong Anak nganhi sa yuta. (Juan 3:16) Si Jesus matawag nga kinalabwang Misyonaryo, ang kinamaayohang Misyonaryo, tungod kay ang usa ka rason kon nganong gipadala siya nganhi sa yuta mao ang ‘pagpamatuod sa kamatuoran.’ (Juan 18:37) Siya nagmalamposon gayod sa pagmantala sa maayong balita sa Gingharian, ug nakabenepisyo gihapon kita sa iyang ministeryo. Pananglitan, kita makapadapat sa iyang mga paagi sa pagpanudlo diha sa atong ministeryo, mga misyonaryo man kita o dili.

3. Unsang mga pangutana ang atong hisgotan?

³ Tungod sa papel ni Jesus ingong magmamantala sa Gingharian, makapangutana tingali kita: Unsay nasinatian ni Jesus dinhi sa yuta? Nganong epektibo ang iyang pagpanudlo? Ug unsay nakapahimo sa iyang ministeryo nga malamposon?

Andam nga Espiritu Diha sa Bag-ong Teritoryo

4-6. Unsang mga kausaban ang nasinatian ni Jesus sa dihang gipadala siya dinhi sa yuta?

⁴ Ang mga misyonaryo karong adlawa ug ang pipila ka Kristohanon nga namalhin ngadto sa mga dapit diin dako ang panginahanglan sa mga magmamantala sa Gingharian, kinahanglan tingaling magpasibo aron maanad sa pinobre nga pagkinabuhi. Apan dili gayod nato mahanduraw ang kadako sa kalainan tali sa kahimtang ni Jesus dinhi sa yuta kon itandi sa iyang kahimtang didto sa langit, diin siya nagkinabuhi uban sa iyang Amahan taliwala sa mga manulonda nga nag-alagad  kang Jehova nga may putling motibo. (Job 1:6; 2:1) Pagkadako sa kalainan nga magkinabuhi taliwala sa makasasalang katawhan diha sa daotang kalibotan! (Mar. 7:20-23) Kinahanglan pa ganing pailoban ni Jesus ang panagbangi tali sa labing suod niyang mga tinun-an. (Luc. 20:46; 22:24) Siyempre, nagmalamposon gayod siya sa pagsagubang sa tanan niyang nasinatian dinhi sa yuta.

⁵ Si Jesus wala mosugod sa pagsulti sa tawhanong pinulongan sa milagrosong paagi; iya kining nakat-onan sugod sa pagkabata. Pagkalahi gayod niana gikan sa iyang kahimtang kanhi ingong tighatag ug instruksiyon sa mga manulonda didto sa langit! Dinhi sa yuta, si Jesus nagsulti ug labing menos usa sa “mga pinulongan sa mga tawo.” Lahi kaayo kini sa ‘mga pinulongan sa mga manulonda.’ (1 Cor. 13:1) Apan, kon bahin sa pagsulti ug madanihong mga pulong, walay ikatandi kang Jesus.—Luc. 4:22.

⁶ Tagda ang uban pang mga paagi diin dako kaayo ang kausaban nga nasinatian sa Anak sa Diyos dihang mianhi siya sa yuta. Bisan tuod wala makapanunod ug sala si Jesus gikan ni Adan, Siya nahimong tawo, sama niadtong nahimo niyang “mga igsoon” o dinihogang mga sumusunod sa ulahi. (Basaha ang Hebreohanon 2:17, 18.) Sa kataposang gabii sa iyang kinabuhi sa yuta, wala hangyoa ni Jesus ang iyang langitnong Amahan sa pagpadalag “kapin sa napulog-duha ka lehiyon sa mga manulonda.” Apan hunahunaa lang kon unsa ka daghang manulonda ang ubos sa iyang pagmando ingong si Miguel Arkanghel! (Mat. 26:53; Jud. 9) Oo, si Jesus naghimog mga milagro; apan ang iyang nahimo dinhi sa yuta wala ra sa kumingking kon itandi sa iyang mahimo didto sa langit.

7. Giunsa pagtagad sa mga Hudiyo ang Balaod?

⁷ Panahon sa iyang una-tawhanong paglungtad ingong “ang Pulong,” si Jesus lagmit mao ang Tigpamaba sa Diyos kinsa naggiya sa mga Israelinhon latas sa kamingawan. (Juan 1:1; Ex. 23:20-23) Apan, sila “nakadawat sa Balaod nga gihatag pinaagig mga manulonda apan wala magsunod niini.” (Buh. 7:53; Heb. 2:2, 3) Gani, ang Hudiyong relihiyoso nga mga lider sa unang siglo wala makasabot sa tinuod nga kahulogan sa Balaod. Pananglitan, tagda ang balaod sa Igpapahulay. (Basaha ang Marcos 3:4-6.) Ang mga eskriba ug mga Pariseo ‘wala magtagad sa mas bug-at nga mga butang sa Balaod, nga mao, ang hustisya ug ang kaluoy ug ang pagkamatinumanon.’ (Mat. 23:23) Bisan pa niana, si Jesus wala mobati nga sila dili na katabangan pa ug siya wala mohunong sa pagsangyaw sa kamatuoran.

8. Nganong si Jesus makatabang kanato?

⁸ Si Jesus adunay andam nga espiritu. Siya nadasig tungod sa gugma alang mga tawo ug gusto gayod niyang matabangan sila. Wala gayod mahanaw ang iyang kadasig sa pag-ebanghelyo. Ug tungod sa iyang pagkamatinumanon kang Jehova samtang dinhi sa yuta, si Jesus “nahimong may kaakohan alang sa walay kataposang kaluwasan sa tanan nga masinugtanon kaniya.” Dugang pa, “tungod kay siya nag-antos sa dihang gisulayan, siya makaarang sa pagtabang [kanato] nga ginasulayan.”—Heb. 2:18; 5:8, 9.

Maayong Pagkabansay Ingong Magtutudlo

9, 10. Unsang matanga sa pagbansay ang nadawat ni Jesus sa wala pa siya ipadala dinhi sa yuta?

⁹ Sa dili pa ipadala ang mga Kristohanon karon ingong mga misyonaryo, hikayon una sa Nagamandong Lawas nga sila mabansay. Gibansay ba si Jesu-Kristo? Oo, apan wala siya moeskuyla sa tunghaan sa mga rabbi sa wala pa siya dihogi ingong Mesiyas; wala usab siya tudloi sa iladong relihiyosong mga lider. (Juan 7:15; itandi ang Buhat 22:3.) Nan, nganong kuwalipikado man kaayo si Jesus nga manudlo?

¹⁰ Bisan unsa pay nakat-onan ni Jesus gikan sa iyang inahan nga si Maria ug sa iyang amaama nga si Jose, siya nabansay na pag-ayo ni Jehova alang sa ministeryo. Bahin niini, si Jesus miingon: “Wala ako magasulti pinasukad sa akong kaugalingong pagbuot, apan ang Amahan nga nagpadala kanako naghatag kanakog sugo kon unsay akong isugilon ug isulti.” (Juan 12:49) Matikdi nga ang Anak gihatagan ug detalyadong instruksiyon kon unsay angayng itudlo. Sa wala pa siya moanhi sa yuta, walay duhaduha nga si Jesus migugol ug taas nga panahon sa pagpamati sa instruksiyon sa iyang Amahan. Kini ang kinamaayohang pagbansay nga iyang nadawat.

11. Sa unsang sukod gipasundayag ni Jesus ang tinamdan sa iyang Amahan maylabot sa mga tawo?

 ¹¹ Sukad sa paglalang kaniya, ang Anak adunay suod kaayong relasyon uban sa iyang Amahan. Panahon sa iyang una-tawhanong paglungtad, nasabtan ni Jesus ang tinamdan sa Diyos maylabot sa mga tawo pinaagi sa pag-obserbar sa mga pakiglabot ni Jehova kanila. Gipasundayag gayod sa Anak ang samang matang sa gugma nga gipakita sa Diyos alang sa mga tawo nga ingong kaalam nga gipersonipikar, siya makaingon: “Ang mga butang nga akong gikahinangpan maoy uban sa mga anak sa mga tawo.”—Prov. 8:22, 31.

12, 13. (a) Unsay nakat-onan ni Jesus pinaagi sa pag-obserbar sa mga pakiglabot sa iyang Amahan uban sa mga Israelinhon? (b) Giunsa paggamit ni Jesus ang pagbansay nga iyang nadawat?

¹² Ang pagbansay nga nadawat sa Anak naglakip usab sa pag-obserbar kon giunsa pagdumala sa iyang Amahan ang malisod nga mga kahimtang. Pananglitan, tagda ang pagpakiglabot ni Jehova sa dili-masinugtanong mga Israelinhon. Ang Nehemias 9:28 nag-ingon: “Sa dihang sila makapahulay na, buhaton na usab nila ang daotan sa imong atubangan, ug ikaw magbiya kanila ngadto sa kamot sa ilang mga kaaway, nga magtamaktamak kanila. Unya sila mamalik ug motawag kanimo alang sa tabang, ug ikaw maminaw gikan sa mga langit ug magluwas kanila sumala sa imong dagayang kaluoy, nga sublisubli.” Pinaagi sa pagpakig-uban ug pag-obserbar kang Jehova, naugmad ni Jesus ang samang kamabination alang sa mga tawo nga iyang gisangyawan.—Juan 5:19.

¹³ Gigamit ni Jesus ang pagbansay nga iyang nadawat samtang siya mabinationg nakiglabot sa iyang mga tinun-an. Sa gabii antes sa iyang kamatayon, ang tanang apostoles nga iya gayong gihigugma “mibiya kaniya ug nangalagiw.” (Mat. 26:56; Juan 13:1) Gilimod pa gani ni apostol Pedro si Kristo sa tulo ka higayon! Bisan pa niana, andam gihapon si Jesus sa pagdawat sa iyang mga apostoles. Siya miingon kang Pedro: “Nangamuyo ako alang kanimo nga unta ang imong pagtuo dili moangka; ug ikaw, sa mahibalik ka na, palig-ona ang imong mga igsoon.” (Luc. 22:32) Ang espirituwal nga Israel malamposong natukod diha sa “mga apostoles ug mga manalagna,” ug ang patukoranang mga bato sa paril sa Bag-ong Jerusalem adunay mga ngalan sa 12 ka matinumanong mga apostoles sa Kordero, si Jesu-Kristo. Ang dinihogang mga Kristohanon karon uban sa ilang dedikadong mga kauban, ang “ubang mga karnero,” nagmauswagon sa ilang buluhatong pagsangyaw sa Gingharian ilalom sa gamhanang kamot sa Diyos ug sa pagpanguna sa iyang hinigugmang Anak.—Efe. 2:20; Juan 10:16; Pin. 21:14.

Kon Giunsa Pagpanudlo ni Jesus

14, 15. Sa unsang mga paagi nga ang pagpanudlo ni Jesus lahi sa pagpanudlo sa mga eskriba ug mga Pariseo?

¹⁴ Giunsa paggamit ni Jesus ang iyang pagbansay diha sa pagtudlo sa iyang mga sumusunod? Kon atong itandi ang pagpanudlo ni Jesus sa Hudiyong relihiyoso nga mga lider, labaw gayod ang paagi sa pagpanudlo ni Jesus. Ang mga eskriba ug mga Pariseo ‘naghimo sa pulong sa Diyos nga walay pulos tungod sa ilang tradisyon.’ Sa kasukwahi, ang gisulti ni Jesus dili iyang kaugalingon; siya kanunayng nagtudlo sa pulong o mensahe sa Diyos. (Mat. 15:6; Juan 14:10) Kana usab ang kinahanglan natong buhaton.

¹⁵ Aduna pay laing butang nga nakapalahi pag-ayo kang Jesus gikan sa relihiyosong mga lider. Mahitungod sa mga eskriba ug mga Pariseo, siya miingon: “Ang tanang butang nga ilang isulti kaninyo, buhata ug sunda, apan ayaw ninyo pagbuhata ang sumala sa ilang mga buhat, kay sila mosulti apan dili mobuhat.” (Mat. 23:3) Gibuhat ni Jesus ang iyang gitudlo. Atong hisgotan ang usa ka pananglitan nga nagpamatuod niini.

16. Nganong makaingon ka nga si Jesus nagkinabuhi gayod sumala sa iyang giingon diha sa Mateo 6:19-21?

¹⁶ Giawhag ni Jesus ang iyang mga tinun-an sa ‘pagtigom ug mga bahandi sa langit.’ (Basaha ang  Mateo 6:19-21.) Nagkinabuhi ba gayod si Jesus sumala niana? Oo, tungod kay siya matinud-anong makasulti bahin sa iyang kaugalingon: “Ang mga irong ihalas may mga lungib ug ang mga langgam sa langit may mga batoganan, apan ang Anak sa tawo walay dapit nga kapahilunaan sa iyang ulo.” (Luc. 9:58) Yano lamang ang pagkinabuhi ni Jesus. Siya puliki gayod sa pagmantala sa maayong balita sa Gingharian, ug iyang gipasundayag kon unsay kahulogan sa pagkinabuhi nga nahigawas sa mga kabalaka gumikan sa pagtigom ug mga bahandi sa yuta. Gipakita ni Jesus nga mas maayo gayod ang pagtigom ug mga bahandi sa langit, “diin walay tangkob ni taya nga magakutkot, ug diin walay mga kawatan nga magalungkab ug magapangawat.” Imo bang gisunod ang tambag ni Jesus sa pagtigom ug mga bahandi sa langit?

Mga Hiyas ni Jesus nga Nakapadani sa mga Tawo

17. Unsang mga hiyasa ang nakapahimo kang Jesus nga usa ka talagsaong ebanghelisador?

¹⁷ Unsang mga hiyasa ang nakapahimo kang Jesus nga usa ka talagsaong ebanghelisador? Ang usa niana mao ang iyang tinamdan sa mga tawo nga iyang gitabangan. Lakip sa maayong mga hiyas ni Jehova nga gisundog ni Jesus mao ang pagkamapainubsanon, pagkamahigugmaon, ug pagkamabination. Matikdi kon sa unsang paagi kining mga hiyasa nakapadani sa mga tawo ngadto kang Jesus.

18. Nganong ikaingon nga si Jesus mapainubsanon?

¹⁸ Sa pagdawat ni Jesus sa iyang asaynment sa pag-anhi sa yuta, iyang “gihaw-asan ang iyang kaugalingon ug gihuptan ang dagway sa usa ka ulipon ug nahisama sa mga tawo.” (Filip. 2:7) Kana maoy pagkamapainubsanon. Dugang pa, wala tamaya ni Jesus ang mga tawo. Wala siyay tinamdan nga ‘Kinahanglan ko ninyong paminawon kay gikan ko sa langit.’ Dili sama sa nagpatuo nga mga mesiyas, wala ibandilyo ni Jesus ang iyang papel ingong tinuod nga Mesiyas. Usahay iyang gipahimangnoan ang mga tawo nga dili ipanulti kon kinsa siya o kon unsay iyang nahimo. (Mat. 12:15-21) Gusto ni Jesus nga ang mga tawo modesisyon sa pagsunod kaniya pinasukad sa ilang nakita mismo. Nalipay gayod ang iyang mga tinun-an nga ang ilang Ginoo wala magdahom kanila nga mahisama sa hingpit nga mga manulonda nga iyang gikauban sa langit!

19, 20. Sa unsang paagi ang gugma ug pagkamabination nagdasig kang Jesus sa pagtabang sa mga tawo?

¹⁹ Nagpasundayag usab si  Jesu-Kristo ug gugma—ang kinalabwang hiyas sa iyang langitnong Amahan. (1 Juan 4:8) Gitudloan ni Jesus ang mga tawo pinasukad sa gugma. Pananglitan, tagda ang iyang pagbati sa usa ka batan-ong magmamando. (Basaha ang Marcos 10:17-22.) Si Jesus “mibatig gugma alang kaniya” ug buot motabang kaniya, apan wala isakripisyo sa batan-ong magmamando ang iyang mga kabtangan aron mahimong sumusunod ni Kristo.

²⁰ Ang usa sa dalayegong mga hiyas ni Jesus mao ang iyang pagkamabination. Sama sa tanang dili-hingpit nga mga tawo, kadtong misanong sa iyang pagtulon-an adunay mga problemang gisagubang. Kay nahibalo niini, gitudloan sila ni Jesus sa mabination ug maluluy-ong paagi. Pananglitan: Usa ka higayon niana, si Jesus ug ang iyang mga apostoles puliki kaayo nga wala na gani silay panahon sa pagpangaon. Apan unsay reaksiyon ni Jesus sa dihang iyang nakita ang panon sa katawhan? “Siya giabot ug kaluoy kanila, tungod kay sila nahisama sa mga karnero nga walay magbalantay. Ug siya misugod sa pagtudlo kanila ug daghang butang.” (Mar. 6:34) Namatikdan ni Jesus ang makaluluoy nga kahimtang sa mga tawo sa iyang teritoryo ug gigamit niya ang iyang kusog sa pagtudlo kanila ug paghimog mga milagro alang sa ilang kaayohan. Ang uban nadani sa iyang maayong mga hiyas, napalig-on sa iyang mga pulong, ug nahimong iyang mga tinun-an.

21. Unsay atong hisgotan sa sunod nga artikulo?

²¹ Aduna pa kitay daghang makat-onan bahin sa ministeryo ni Jesus dinhi sa yuta, ingon sa hisgotan sa sunod nga artikulo. Sa unsang paagi atong masundog si Jesu-Kristo, ang kinalabwang Misyonaryo?

Unsay Imong Tubag?

• Unsang pagbansay ang nadawat ni Jesus sa wala pa siya moanhi sa yuta?

• Sa unsang paagi ang pagpanudlo ni Jesus mas labaw kay sa pagpanudlo sa mga eskriba ug mga Pariseo?

• Unsang mga hiyas ni Jesus ang nakapadani sa mga tawo kaniya?

[Mga Pangutana sa Pagtuon]

[Hulagway sa panid 15]

Sa unsang paagi gitudloan ni Jesus ang mga tawo?