Mga Pangunang Punto Gikan sa Basahon sa Mga Buhat
Ang Pulong ni Jehova Buhi
Mga Pangunang Punto Gikan sa Basahon sa Mga Buhat
ANG basahon sa Mga Buhat nagtaganag detalyadong kasaysayan sa pagtukod sa Kristohanong kongregasyon ug sa paglambo niini sa ulahi. Gisulat kini sa usa ka doktor nga si Lucas ug gipakita niini ang makapahinam nga rekord sa kalihokan sa mga Kristohanon sulod sa mga 28 ka tuig—sukad sa 33 K.P. hangtod sa 61 K.P.
Ang unang bahin niini sa panguna, naghisgot sa kalihokan ni apostol Pedro, ug ang ulahing bahin, kang apostol Pablo. Pinaagi sa paggamit sa mga terminong “kami” ug “kanamo,” gipakita ni Lucas nga siya presente sa dihang nahitabo ang pipila niini. Ang pagtagad sa mensahe sa basahon sa Mga Buhat makapalig-on sa atong pagpabili sa gahom sa sinulat nga Pulong sa Diyos ug sa iyang balaang espiritu. (Heb. 4:12) Magpalihok usab kini kanato sa pagsakripisyo sa kaugalingon ug magpalig-on sa atong pagtuo sa paglaom sa Gingharian.
GIGAMIT NI PEDRO ANG “MGA YAWI SA GINGHARIAN”
Human madawat ang balaang espiritu, ang mga apostoles maisogong nagsangyaw. Gigamit ni Pedro ang una sa “mga yawi sa gingharian sa mga langit” aron mabuksan ang kahibalo ug kahigayonan alang sa mga Hudiyo ug sa mga proselita nga “misagop sa iyang pulong” aron sila makasulod sa Gingharian. (Mat. 16:19; Buh. 2:5, 41) Ang nagkagrabeng paglutos nagpatibulaag sa mga disipulo, apan mikaylap hinuon ang pagsangyaw.
Sa ilang pagkadungog nga ang Samaria midawat sa pulong sa Diyos, ang mga apostoles sa Jerusalem nagpadala kang Pedro ug Juan ngadto kanila. Gigamit ni Pedro ang ikaduhang yawi pinaagi sa pagbukas sa kahigayonan aron ang mga Samarianhon makasulod sa Gingharian. (Buh. 8:14-17) Lagmit sulod sa usa ka tuig human mabanhaw si Jesus, si Saulo sa Tarso nahimong Kristohanon. Niadtong 36 K.P., gigamit ni Pedro ang ikatulong yawi, ug ang walay bayad nga gasa sa balaang espiritu gibubo ngadto sa dili tinuli nga katawhan sa kanasoran.—Buh. 10:45.
Tubag sa mga Pangutana Bahin sa Kasulatan:
2:44-47; 4:34, 35—Nganong gibaligya sa mga magtutuo ang ilang kabtangan ug giapod-apod ang halin niini? Daghan sa nahimong mga magtutuo naggikan sa lagyong mga dapit ug walay igong magamit sa ilang dugang pag-estar sa Jerusalem. Apan, buot silang magpabilin aron makakat-on pag dugang sa ilang bag-ong pagtuo ug makapamatuod ngadto sa uban. Aron sila matabangan, ang pipila ka Kristohanon nagbaligya sa ilang kabtangan, ug ang halin giapod-apod ngadto sa mga nanginahanglan.
4:13—Edukado ba si Pedro ug Juan? Oo, apan gitawag silag “dili edukado ug ordinaryo” kay wala sila motungha sa mga tunghaan sa mga rabbi alang sa relihiyosong pagbansay.
5:34-39—Giunsa man pagkahibalo ni Lucas sa gisulti ni Gamaliel, nga mga membro ra man unta sa Sanhedrin ang nagtigom? Adunay labing menos tulo ka posibilidad: (1) Si Pablo nga estudyante kanhi ni Gamaliel ang nagsulti niana kang Lucas; (2) Nakig-estorya si Lucas sa usa ka membro sa Sanhedrin nga may simpatiya kanila, sama kang Nicodemo; (3) Nadawat ni Lucas kining impormasyona pinaagi sa balaang espiritu.
7:59—Si Jesus ba ang giampoan ni Esteban? Dili gayod. Ang pagsimba ug mga pag-ampo sa usa ka tawo kinahanglang itumong lamang kang Jehova. (Luc. 4:8; 6:12) Nabatasan na ni Esteban ang pag-ampo kang Jehova sa ngalan ni Jesus. (Juan 15:16) Apan nianang tungora, nakita ni Esteban sa panan-awon ang “Anak sa tawo nga nagabarog diha sa tuong kamot sa Diyos.” (Buh. 7:56) Nahibalo gayod siya nga si Jesus gihatagag gahom sa pagbanhaw sa mga patay. Busa si Esteban direktang nakigsulti, apan wala moampo, kang Jesus, ug mihangyo Kaniya nga bantayan ang iyang espiritu.—Juan 5:27-29.
Mga Leksiyon Alang Kanato:
1:8. Ang tibuok kalibotang pagsangyaw nga gihimo sa mga magsisimba ni Jehova dili molampos kon wala ang tabang sa balaang espiritu.
4:36–5:11. Si Jose nga taga-Cipro gianggaan ug Bernabe, nga nagkahulogang “Anak sa Paghupay.” Lagmit ginganlan siyag Bernabe sa mga apostoles kay siya mabination, maluloton, ug matinabangon sa uban. Kinahanglan kitang mahisama kaniya, ug dili kang Ananias ug Sapira nga nagpakaaron-ingon, salingkapaw, ug malimbongon.
9:23-25. Dili tinalawan kon kita moikyas sa atong mga kaaway aron makapadayon sa pagsangyaw.
9:28-30. Kon ang pagsangyaw sa pipila ka lugar o mga tawo magpameligro kanato sa pisikal, moral, o espirituwal, angay kitang magmaalamon ug magmapilion kon asa ug kon kanus-a kita mosangyaw.
9:31. Sa panahon nga medyo malinawon, maningkamot gayod kita sa pagpalig-on sa atong pagtuo pinaagi sa pagtuon ug pagpamalandong. Makatabang kini kanato sa paglakaw nga mahinadlokon kang Jehova pinaagi sa pagpadapat sa atong makat-onan ug pagkamasiboton sa ministeryo.
MASIBOTONG MINISTERYO NI PABLO
Niadtong 44 K.P., si Agabo miabot sa Antioquia, diin si Bernabe ug Saulo nanudlo na didto “sa tibuok tuig.” Si Agabo nagtagna nga dunay “dakong gutom,” ug kini nahitabo duha ka tuig sa ulahi. (Buh. 11:26-28) “Human matuman sa bug-os ang pag-alagad pinaagig pagdalag hinabang didto sa Jerusalem,” si Bernabe ug Saulo namalik sa Antioquia. (Buh. 12:25) Niadtong 47 K.P., mga 12 ka tuig human makabig si Saulo, si Bernabe ug Saulo gipadala sa balaang espiritu isip mga misyonaryo. (Buh. 13:1-4) Niadtong 48 K.P., namalik sila sa Antioquia, “diin sila gipiyal ngadto sa dili-takos nga kalulot sa Diyos.”—Buh. 14:26.
Mga siyam ka bulan sa ulahi, si Pablo (nga nailhan usab nga Saulo) mipili kang Silas aron iyang ikauban sa iyang ikaduhang panaw. (Buh. 15:40) Mikuyog usab kaniya si Timoteo ug si Lucas. Si Lucas mipabilin sa Filipos samtang si Pablo mipadayon ngadto sa Atenas ug dayon sa Corinto, diin iyang nahimamat si Aquila ug Priscila ug siya migugol didto ug usa ka tuig ug unom ka bulan. (Buh. 18:11) Dayon iyang gibilin si Timoteo ug Silas sa Corinto, ug gikuyog ni Pablo si Aquila ug Priscila ug milawig sila ngadto sa Sirya sayo sa 52 K.P. (Buh. 18:18) Gikuyogan siya ni Aquila ug Priscila hangtod sa Efeso, ug sila nagpabilin didto.
Human makagugol ug pipila ka panahon sa Antioquia sa Sirya, si Pablo mipanaw sa ikatulong higayon niadtong 52 K.P. (Buh. 18:23) Sa Efeso, “ang pulong ni Jehova padayong mikaylap ug nagmadaogon.” (Buh. 19:20) Didto si Pablo migugol ug mga tulo ka tuig. (Buh. 20:31) Sa Pentekostes 56 K.P., si Pablo didto na sa Jerusalem. Human dakpa, siya maisogong nagpamatuod atubangan sa mga awtoridad. Sa Roma, siya gibilanggo diha sa iyang balay sulod sa duha ka tuig (mga 59-61 K.P.), ug siya nangitag mga paagi sa pagsangyaw bahin sa Gingharian ug sa pagtudlo “sa mga butang mahitungod sa Ginoong Jesu-Kristo.”—Buh. 28:30, 31.
Tubag sa mga Pangutana Bahin sa Kasulatan:
14:8-13—Nganong ang mga tawo sa Listra nagtawag kang ‘Bernabe nga Zeus, ug kang Pablo nga Hermes’? Si Zeus mao ang magmamando sa mga diyos sumala sa Gregong mitolohiya, ug ang iyang anak lalaking si Hermes ilado nga maayong manulti. Sanglit si Pablo man ang nanguna sa pagsulti, ang mga tawo sa Listra nagtawag kaniyang Hermes ug kang Bernabe nga Zeus.
16:6, 7—Nganong ang balaang espiritu nagdili kang Pablo ug sa iyang mga kauban sa pagsangyaw sa distrito sa Asia ug Bitinia? Pipila lamang ang magsasangyaw niadto, busa ang balaang espiritu nagtultol kanila ngadto sa mas mabungahong teritoryo.
18:12-17—Nganong ang Prokonsul nga si Galio wala mangilabot sa dihang ang mga tawo nagbun-og kang Sostenes? Lagmit nagtuo si Galio nga ang lalaki nga morag maoy lider sa mga tawong nakigbatok kang Pablo angay usab nga bun-ogon. Apan dayag nga maayo ang gisangpotan niadto kay si Sostenes nahimong Kristohanon. Sa ulahi, si Pablo nagtawag kang Sostenes nga “atong igsoon.”—1 Cor. 1:1.
18:18—Unsang panaad ang gihimo ni Pablo? Ang pipila ka eskolar nag-ingon nga si Pablo nanaad isip Nasareo. (Num. 6:1-21) Apan ang Bibliya wala magsulti kon unsay panaad ni Pablo. Dugang pa, ang Kasulatan walay gisulti kon ang maong panaad gihimo ni Pablo sa wala pa o human sa iyang pagkakabig, o kon mao pay iyang paghimo o pagtapos sa maong panaad. Bisan unsa pay kahimtang, dili sala ang paghimo sa maong panaad.
Mga Leksiyon Alang Kanato:
12:5-11. Kita makaampo alang sa atong mga igsoon ug angay natong himoon kana.
12:21-23; 14:14-18. Gidawat dayon ni Herodes ang himaya nga angayng ihatag lamang ngadto sa Diyos. Pagkalahi gayod niana sa dihadiha ug puwersadong pagdumili ni Pablo ug Bernabe sa dili angayng pagdayeg ug pasidungog! Dili gayod kita magtinguhang himayaon tungod sa bisan unsang mga kalamposan nga atong mabatonan sa pag-alagad kang Jehova.
14:5-7. Ang pagkamabinantayon motabang kanato nga magpabiling aktibo sa pag-alagad.—Mat. 10:23.
14:22. Ang mga Kristohanon magdahom ug mga kalisdanan. Dili sila mosulay sa paglikay niana pinaagi sa pagkompromiso sa ilang pagtuo.—2 Tim. 3:12.
16:1, 2. Ang Kristohanong mga batan-on angayng maningkamot sa pag-alagad sa Diyos ug mangayo sa tabang ni Jehova aron mabatonan nila ang usa ka maayong dungog.
16:3. Angay kitang maningkamot sa pagsunod sa mga prinsipyo sa Kasulatan aron ang maayong balita dawaton sa uban.—1 Cor. 9:19-23.
20:20, 21. Ang pagbalaybalay maoy hinungdanong bahin sa atong ministeryo.
20:24; 21:13. Ang pagmentinar sa atong integridad sa Diyos mas hinungdanon pa kay sa paghupot sa atong kinabuhi.
21:21-26. Kita kinahanglang mahinam nga modawat ug maayong tambag.
25:8-12. Angayng gamiton sa mga Kristohanon karon ang mga probisyon sa balaod “sa pagdepensa ug sa pagtukod sa legal nga paagi sa maayong balita.”—Filip. 1:7.
26:24, 25. Angay natong ipahayag ang “mga pulong nga tinuod ug sa maayo nga panghunahuna” bisan pag kini kabuangan sa “tawong pisikal.”—1 Cor. 2:14.
[Hulagway sa panid 30]
Kanus-a gigamit ni Pedro ang “mga yawi sa gingharian”?
[Hulagway sa panid 31]
Ang pagsangyaw sa tibuok kalibotan dili molampos kon wala ang tabang sa balaang espiritu