Mga Pangutana Gikan sa mga Magbabasa

Si apostol Pablo miingon nga ang “tibuok Israel maluwas.” (Roma 11:26) Nagpasabot ba kini nga moabot ang panahon nga ang tanang Hudiyo mahimong Kristohanon?

Dili kana ang buot niyang ipasabot. Ingong usa ka nasod, ang kaliwat ni Abraham sa unod wala moila kang Jesus ingong Mesiyas. Ug sa mga tuig human mamatay si Jesus, nadayag nga dili tanang Hudiyo nahimong Kristohanon. Hinunoa, husto si Pablo sa pag-ingon nga ang “tibuok Israel maluwas.” Sa unsang paagi?

Giingnan ni Jesus ang Hudiyong mga lider sa relihiyon sa iyang adlaw: “Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magpatunghag mga bunga niini.” (Mat. 21:43) Tungod kay ang nasod sa Israel sa katibuk-an wala modawat kang Jesus, giliso ni Jehova ang iyang pagtagad ngadto sa usa ka bag-ong espirituwal nga nasod. Gitawag kini ni Pablo nga “Israel sa Diyos.”—Gal. 6:16.

Ang ubang teksto sa Kristohanon Gregong Kasulatan nagpamatuod nga ang “Israel sa Diyos” gilangkoban sa 144,000 nga dinihogan-sa-espiritung mga Kristohanon. (Roma 8:15-17; Pin. 7:4) Ang Pinadayag 5:9, 10 nag-ingon nga kining grupoha naglakip sa mga dili-Hudiyo, nga nagpakitang ang dinihogang mga Kristohanon gilangkoban sa mga tawo “gikan sa matag tribo ug pinulongan ug katawhan ug nasod.” Ang mga membro sa espirituwal nga Israel ilabinang gipili aron mahimong “usa ka gingharian ug mga saserdote . . . , ug sila magamando ingong mga hari ibabaw sa yuta.” Bisan pag gisalikway ni Jehova ang Israel ingong usa ka pinili nga nasod, ang mga indibiduwal makabaton gihapog maayong relasyon uban kaniya. Mao kini ang nasinatian sa mga apostoles ug sa daghang Kristohanon kaniadto. Siyempre, sama sa ubang mga tawo, ang maong mga Hudiyo kinahanglang malukat usab sa dugo ni Jesu-Kristo.—1 Tim. 2:5, 6; Heb. 2:9; 1 Ped. 1:17-19.

Bisan pag ang kadaghanan sa mga Hudiyo sa unang siglo nawad-ag kahigayonan nga mahimong magmamando uban ni Jesus, matuman gihapon ang katuyoan sa Diyos. Wala gayoy makapugong kang Jehova sa pagpatuman niana, kay siya miingon pinaagi sa iyang manalagna: “Maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”—Isa. 55:11.

Ang katuyoan sa Diyos nga tigomon ang 144,000 nga kaubang magmamando sa iyang Anak didto sa langit matuman gayod. Ang Bibliya nagpatin-aw nga pagadihogan sa Diyos ang kompletong gidaghanon nga 144,000, ug walay bisan usa kanila nga makulang!—Pin. 14:1-5.

Busa sa dihang si Pablo misulat nga ang “tibuok Israel maluwas,” wala siya magtagna nga ang tanang Hudiyo mahimong Kristohanon. Hinunoa, siya nagpasabot nga matuman gayod ang katuyoan sa Diyos nga ang 144,000 nga espirituwal nga mga Israelinhon magmando sa langit uban sa Iyang Anak. Sa gitakdang panahon sa Diyos, ang kompletong gidaghanon o ang “tibuok Israel,” maanaa sa luwas nga kahimtang, ug magmando ingong mga hari ug saserdote sa Mesiyanikong Gingharian.—Efe. 2:8.

[Mga hulagway sa panid 28]

Ang mga dinihogan maoy “gikan sa matag tribo ug pinulongan ug katawhan ug nasod”