Unsang Matanga sa Pagkatawo ang Gusto Nimong Ugmaron?

ANG hepe sa kapolisan sa usa ka lungsod sa Pilipinas nangutana sa usa ka payunir, “Unsa may inyong gihimo nga nausab man nang tawhana?” Gitudlo sa hepe ang nagtipun-og nga papel sa iyang lamesa, ug midugang: “Nahibalo ka ba nga mga kaso kini nga gisang-at batok kaniya? Naibanan ang among labad sa ulo niining lungsora.” Ang lalaki nga ilang gihisgotan hilabihan ka palahubog kaniadto ug kanunayng mangitag samok. Unsay nagpalihok kaniya sa paghimog dagkong mga kausaban sa iyang kinabuhi? Ang mensahe sa Pulong sa Diyos, ang Bibliya.

Daghan na ang nagpadapat sa tambag ni apostol Pablo nga ‘hukason ang daan nga pagkatawo nga nahiuyon sa kanhi nilang paagi sa panggawi ug isul-ob ang bag-ong pagkatawo nga gilalang sumala sa kabubut-on sa Diyos.’ (Efe. 4:22-24) Dako man o gamay nga pagbag-o ang kinahanglan natong himoon, ang pagsul-ob sa bag-ong pagkatawo maoy bahin sa pagkahimong Kristohanon.

Apan, ang paghimo natog mga kausaban aron mahimong kuwalipikado sa bawtismo maoy sinugdanan lamang. Sa dihang kita magpabawtismo, sama kitag kahoy nga igo pa lang giporma sa magkukulit. Imo nang mahibaloan kon unsay gusto niyang kuliton, apan kini wala pa mahuman. Daghan pa siyag kinahanglang himoon aron monindot kini. Panahon sa bawtismo, aduna na kitay mga hiyas nga gikinahanglan aron mahimong alagad sa Diyos. Apan, kinahanglang ugmaron pa gihapon nato ang bag-ong pagkatawo. Angay nga padayon nato kanang himoon pinaagi sa paghimog mga pagpasibo.

Bisan si Pablo nahibalo nga gikinahanglan ang paghimog mga pagbag-o. Siya miangkon: “Sa dihang buot nakong buhaton ang maayo, ang daotan ania kanako.” (Roma 7:21) Nahibalo gayod si Pablo kon unsay iyang pagkatawo kaniadto ug kon unsang matanga sa pagkatawo ang gusto niyang ugmaron. Komosta sa atong bahin? Kinahanglang suknaon usab nato ang atong kaugalingon: ‘Unsang matanga ako sa pagkatawo? Ug unsang matanga sa pagkatawo ang gusto nakong ugmaron?’

Unsang Matanga Ako sa Pagkatawo?

Sa dihang ayohon nato ang usa ka karaan nga balay, dili pa igo ang pagpintal niana sa gawas  kon may gabok nga mga kahoy sa sulod niana. Kon dili nato ilisan ang gabok nga materyales, mosamot kaguba ang balay. Sa samang paagi, dili pa igo nga buotan tang tan-awon. Kinahanglang susihon nato ang atong sulod nga pagkatawo aron kita mahibalo kon unsay angay natong bag-ohon. Kon dili nato kana himoon, molutaw ra gihapon sa ulahi ang atong tinuod nga kinaiya. Busa, kinahanglan gayod nga susihon nato ang atong kaugalingon. (2 Cor. 13:5) Kon aduna kitay makita nga dili maayong kinaiya, angay nato kanang tul-iron. Aron mahimo kana, si Jehova nagtagana kanatog tabang.

Si Pablo misulat: “Ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” (Heb. 4:12) Ang mensahe sa Pulong sa Diyos, ang Bibliya, makapabag-o gayod sa atong kinabuhi. Modulot kini bisan sa uyok sa atong mga bukog, ingnon ta. Magbutyag kini sa atong mga hunahuna, motibo, ug kon unsa gayod ang atong tinuod nga pagkatawo. Makatabang gayod ang Pulong sa Diyos aron maila nato ang atong mga problema!

Sa dihang ayohon nato ang usa ka karaan nga balay, dili lang tingali igo ang pag-ilis sa gabok nga materyales. Makatabang kanato ang pagkahibalo sa hinungdan sa pagkagabok niini aron malikayan ang susamang mga problema sa umaabot. Sa samang paagi, kinahanglang mahibaloan usab nato ang hinungdan sa atong dili-maayong kinaiya tungod kay kini makatabang kanato sa pagpugong sa atong mga kahuyangan. Daghang butang ang makaapektar sa atong personalidad. Lakip niini ang atong kahimtang diha sa katilingban ug pagkabutang, palibot, kultura, ginikanan, mga kauban, ug relihiyon. Makaimpluwensiya usab kanato ang mga programa sa telebisyon ug mga pelikula nga atong ginatan-aw, maingon man ang lainlaing matang sa kalingawan. Kon atong mailhan ang mga butang nga makadaot sa atong kinaiya, kita matabangan nga dili kaayo maimpluwensiyahan niana.

Human masusi ang atong kaugalingon, tingali makaingon kita, ‘Ingon ani na gyod ko.’ Sayop kini nga pangatarongan. Sa paghisgot niadtong sakop sa kongregasyon sa Corinto nga kanhi mga makihilawason, homoseksuwal, palahubog, ug susama niana, si Pablo miingon: “Ingon niana ang pipila kaninyo kaniadto. Apan kamo nahugasan na . . . sa espiritu sa atong Diyos.” (1 Cor. 6:9-11) Pinaagi sa tabang sa balaang espiritu ni Jehova, kita usab mahimong molampos sa paghimog gikinahanglang mga kausaban.

Tagda ang pananglitan sa usa ka lalaki nga ginganlag Marcos, a nga taga-Pilipinas. Sa paghisgot sa iyang kaagi, si Marcos miingon: “Kanunayng maglalis ang akong ginikanan. Mao nga mirebelde ako sa edad nga 19.” Si Marcos nahimong sugarol, kawatan, ug tulisan. Nagplano pa man gani unta sila sa iyang mga kauban nga mang-hijack ug ayroplano. Bisag minyo na, nagpadayon gihapon ang daotang mga buhat ni Marcos. Sa ngadtongadto naut-ot ra gyod siya tungod sa pagpanugal. Wala madugay human niana, si Marcos miduyog sa iyang asawa sa pagtuon sa Bibliya kauban sa mga Saksi ni Jehova. Sa sinugdan, iyang gibati nga dili siya takos mahimong Saksi. Apan, ang pagpadapat sa iyang nakat-onan ug ang pagtambong sa mga tigom nakatabang kaniya sa pagsalikway sa kanhi niyang pagkinabuhi. Usa na siya karon ka bawtismadong Kristohanon nga regular nga nagsangyaw ug nagtabang sa uban aron sila magbag-o usab.

 Unsang Pagbag-o ang Gusto Nimong Himoon?

Unsang mga pagbag-o ang kinahanglan natong himoon aron atong maugmad ang Kristohanong mga hiyas? Si Pablo nagtambag sa mga Kristohanon: “Isalikway gayod kining tanan gikan kaninyo, kapungot, kasuko, pagkadaotan, mapasipalahong sinultihan, ug malaw-ayng pulong gikan sa inyong baba. Ayaw pagbinakakay sa usag usa. Hukasa ang daang pagkatawo uban ang mga buhat niini.” Ang apostol mipadayon: “Isul-ob ang bag-ong pagkatawo, nga pinaagi sa tukmang kahibalo gibag-o sumala sa larawan sa Usa nga naglalang niini.”—Col. 3:8-10.

Nan, ang atong tumong mao gayod ang pagsalikway sa daang pagkatawo ug ang pagsul-ob sa bag-o. Unsang mga hiyasa ang angay natong ugmaron aron molampos kita sa paghimo niana? Si Pablo miingon: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.” (Col. 3:12-14) Ang pagpaningkamot sa pag-ugmad niining mga hiyasa motabang kanato nga mahimong “labaw pang gikahimut-an sa panglantaw ni Jehova ug sa mga tawo.” (1 Sam. 2:26) Sa dinhi pa si Jesus sa yuta, iyang gipakita ang diyosnong mga hiyas sa talagsaong paagi. Kon atong tun-an ug sundogon ang iyang panig-ingnan, mas mahisama kita kang Kristo ingong “mga tigsundog sa Diyos.”—Efe. 5:1, 2.

Ang lain pang paagi aron atong mahibaloan kon unsang pagbag-o ang angay natong himoon mao ang pagtuon bahin sa maayo ug dili maayong mga kinaiya sa mga karakter sa Bibliya. Tagda pananglitan si Jose, ang anak sa patriarkang si Jacob. Bisan pag nakaagom si Jose ug inhustisya, gihuptan niya ang positibong tinamdan ug ang pangsulod nga katahom. (Gen. 45:1-15) Sa laing bahin, ang anak ni Haring David nga si Absalom nagpakaaron-ingnong nahingawa sa mga tawo ug gidayeg tungod sa iyang panggawas nga katahom. Apan sa pagkatinuod, siya traydor ug mamumuno. (2 Sam. 13:28, 29; 14:25; 15:1-12) Ang pagpakaaron-ingnong maayo ug ang pisikal nga katahom dili maghimo sa usa nga tinuod nga maayo.

Mahimo Kitang Molampos

Aron mabag-o ang atong personalidad ug mahimong matahom sa panan-aw sa Diyos, kinahanglang hatagan natog pagtagad ang atong sulod nga pagkatawo. (1 Ped. 3:3, 4) Angayng mahibaloan nato ang atong dili-maayong mga kinaiya ug ang mga hinungdan niini, ug kinahanglang ugmaron nato ang diyosnong mga hiyas aron atong mabag-o ang atong pagkatawo. Makasalig ba kita nga dili gayod makawang ang atong paningkamot sa paghimo niana?

Oo, pinaagi sa tabang ni Jehova kita makahimog mga kausaban. Sama sa salmista, kita makaampo: “Buhati ako ug putli nga kasingkasing, Oh Diyos, ug ibutang sa akong kahiladman ang usa ka bag-ong espiritu, usa nga malig-on.” (Sal. 51:10) Makahangyo kita sa Diyos nga molihok unta ang iyang espiritu diha kanato aron mahimo kitang mas determinado nga ipahiuyon ang atong kinabuhi sa iyang kabubut-on. Sa pagkatinuod, posible gayod nga kita mahimong mas matahom sa panan-aw ni Jehova!

[Footnote]

[Hulagway sa panid 4]

Igo na ba ang pagpintal lang sa usa ka balay nga gilampornas sa bagyo?

[Hulagway sa panid 5]

Ang imo bang personalidad sama sa iya ni Kristo?