‘Si Jehova Nagpasidlak sa Iyang Nawong Nganha Kanila’

ANG nawong sa tawo adunay kapin sa 30 ka kaunoran (muscles). Kinahanglang molihok ang 14 ka kaunoran aron ka mopahiyom! Hunahunaa kon sama sa unsa ang inyong kabildohay kon wala kining maong kaunoran. Makalingaw kaha? Dili gayod. Apan alang sa mga amang, ang kaunoran sa nawong dili lamang maghimo sa kabildohay nga makalingaw. Kon duyogan sa mga senyas, kini maoy hinungdanong paagi sa pagpadayag sa ilang hunahuna. Daghan ang nahingangha sa paagi nga ang senyas makapadayag bisan sa komplikadong mga ideya apil sa gagmayng mga detalye niini.

Ning bag-o pa, ang mga amang sa tibuok kalibotan nakahimo sa pagkakita sa usa ka nawong nga mas daghag ekspresyon ug emosyon kay sa bisan unsang nawong sa tawo. Sa mahulagwayong pagkasulti, ilang nakita ang “nawong ni Jehova.” (Deut. 31:11) Kini dili sulagma lamang. Si Jehova dugay nang nagpakitag dakong gugma sa mga amang o bungol. Gipakita niya kana bisan sa karaang nasod sa Israel. (Lev. 19:14) Sa modernong panahon, tataw usab kaayo ang iyang gugma alang sa mga amang. “Kabubut-on [sa Diyos] nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Pinaagi sa pagbaton ug tukmang kahibalo sa kamatuoran bahin sa Diyos, daghan sa mga amang ang daw nakakita sa iyang nawong. Sa unsang paagi nahimo nila kini nga dili man sila makadungog? Sa dili pa nato tubagon kanang pangutanaha, hisgotan usa nato kon nganong ang pagsenyas hinungdanon kaayo sa mga amang.

Pagkadungog Pinaagi sa Mata

Adunay daghang sayop nga pagtuo bahin sa mga amang ug sa senyas. Atong tul-iron ang pipila niini. Ang mga amang makadrayb ug awto. Mahimong malisdan sila sa pagbasa ug mga ngabil. Ang senyas nga pinulongan dili yanong pag-aksiyon lamang. Adunay lainlaing matang sa pagsenyas. Nagdepende kini sa dapit diin sila nagpuyo.

Makabasa ba ang mga amang? Bisan tuod ang pipila maayong mobasa, ang tinuod mao nga ang kadaghanan kanila maglisod ug basa. Ngano? Tungod kay ang mga basahon gibase man sa gilitok nga pinulongan. Tagda kon sa unsang paagi makakat-on pagsulti ang usa ka bata nga makadungog. Sukad sa iyang pagkatawo, siya gilibotan sa mga tawo nga makasulti sa lokal nga pinulongan. Sa dili madugay, masumpay-sumpay niya ang tagsa-tagsa ka pulong ug makasulti na siyag mga tudling-pulong. Mahimo niya kini pinaagi lamang sa pagpamati sa pinulongan nga gisulti. Busa, sa dihang mosugod na siya pagbasa, iya na lang kining itakdo sa mga pulong nga iya nang nadunggan.

Karon handurawa nga tua ka sa laing nasod sulod sa usa ka lawak nga soundproof nga gama sa salamin. Wala ka pa makadungog sukad sa ilang lumad nga pinulongan. Kada adlaw, adtoon ka sa mga tawo didto ug makigsulti sila nimo. Dili nimo madungog ang ilang gisulti kay tua ra man sila sa gawas. Makita lang nimo ang ilang ngabil nga nagkibotkibot. Kay wala ka man makasabot sa ilang gisulti, ilang isulat ang  mao gihapong mga pulong diha sa papel ug ipakita nimo. Abi nilag makasabot ka niana. Makasabot ka ba gayod sa ilang gisulat? Imposibleng masabtan nimo kana. Ngano? Tungod kay wala ka pa sukad makadungog sa mga pulong nga ilang gisulat. Ingon niana ang kahimtang sa kadaghanang amang.

Alang sa mga amang, ang pagsenyas maoy maayong paagi sa pagpakigkomunikar. Ang usa ka tawo mosenyas aron ipadayag kon unsay iyang gihunahuna. Ang iyang senyas ug ekspresyon sa nawong nagsubay sa mga lagda sa gramarya sa senyas nga pinulongan. Niining paagiha namugna ang usa ka makita nga pinulongan.

Sa pagkatinuod, halos tanang senyas nga himoon sa usa ka amang pinaagi sa iyang kamot, lawas, ug nawong dunay kahulogan. Ang pag-usab-usab sa ekspresyon sa nawong himoon dili aron pabilibon ang mga tawo. Kini maoy hinungdanong bahin sa gramarya sa senyas nga pinulongan. Sa pag-ilustrar: Ang pagsuknag pangutana uban ang pagtaas sa kilay magpaila nga ang pangutana dili kinahanglang tubagon o kini mahimong tubagon ug oo o dili. Kon mag-abot ang kilay, mahimong nagsukna kini ug kinsa, unsa, asa, kanus-a, ngano, o sa unsang paagi. Dunay mga lihok sa baba nga magpasabot ug gidak-on o gikusgon. Ang paagi sa paglihok sa ulo, pag-isa sa abaga, paglihok sa aping, ug pagkipat-kipat sa mata maghatag ug dugang detalye sa impormasyon.

Kini nga mga lihok motabang sa nagtan-aw sa pagsabot sa impormasyon sa makaiikag nga paagi. Sa paggamit niining lainlaing paagi sa pagkomunikar, ang mga amang nga batid sa senyas nga pinulongan makahimo sa pagpasa ug bisan unsang impormasyon—balaknon, teknikal, romantiko, kataw-anan, makita ug dili makita.

Makatabang ang mga Publikasyon sa Senyas nga Pinulongan

Sa dihang ang kahibalo ni Jehova gipadayag pinaagi sa senyas nga pinulongan, sama ra nga ang amang o bungol makadungog sa mensahe ug ‘makabatog pagtuo’ sa Tuboran sa mensahe. Busa, ang mga Saksi ni Jehova naningkamot pag-ayo sa pagsangyaw ngadto sa mga amang sa tibuok kalibotan ug sa pagtagana kanilag mga publikasyon. (Roma 10:14) Sa pagkakaron, adunay 58 ka tem sa tibuok kalibotan nga naghubad sa mga publikasyon ngadto sa senyas nga pinulongan, ug mabatonan na kana sa DVD diha sa 40 ka senyas nga pinulongan. Nagbunga ba kinig maayo?

Si Jeremy, kansang mga ginikanan parehong amang miingon: “Akong mahinumdoman ang akong amahan nga naggugol ug daghang oras diha sa iyang kuwarto nga nagtuon pag-ayo sa pipila lamang ka parapo sa artikulo sa Ang Bantayanang Torre, nga naningkamot sa pagsabot niana. Sa kalit lang mogawas siya ug malipayong mosenyas: ‘Nakasabot na ko!’ Dayon, iyang isaysay nako ang kahulogan sa iyang gibasa. Dose anyos pa lang ko niadtong panahona. Akong basahon sa daklit ang mga parapo ug  mosenyas: ‘Pa, morag dili man kanay gipasabot. Mao ni . . .’ Iya kong senyasan sa paghunong ug mobalik siya sa iyang kuwarto aron sabton ang iyang gibasa. Dili gyod nako makalimtan ang kahigawad nga makita sa iyang nawong ug ang pagdayeg nako kaniya samtang siya mobalik sa iyang kuwarto. Apan tungod sa mga publikasyon sa senyas nga pinulongan diha sa DVD, mas masabtan na niya ang mga impormasyon. Malipay kong magtan-aw niya nga malipayong magpahayag sa iyang pagbati kang Jehova.”

Tagda usab ang eksperyensiya sa usa ka magtiayong Saksi nga miduaw kang Jessenia, usa ka batan-ong amang sa Chile. Human motugot ang inahan nga ipakita kang Jessenia ang My Book of Bible Stories—On DVD sa Chilean Sign Language, sila mitaho: “Sa pagsugod ug tan-aw ni Jessenia sa sugilanon, siya mikatawa ug dayon mihilak. Sa dihang gipangutana siya sa iyang inahan kon ngano, siya miingon nga giganahan siya sa iyang gitan-aw. Naamgohan sa inahan nga nakasabot diay ang iyang anak sa iyang nakita sa DVD.”

Usa ka amang nga babaye nga nagpuyo sa banika sa Venezuela adunay usa ka anak, ug siya nagsabak sa ikaduha. Naghunahuna silang duha sa iyang bana nga maglisod sila kon madugangan pa ang ilang anak, busa nagplano sila nga ipakuha ang bata. Ang mga Saksi ni Jehova miduaw sa magtiayon, ug bisag wala sila mahibalo sa plano sa magtiayon, ilang gipatan-aw kanila ang leksiyon 12 sa video nga Unsay Gikinahanglan sa Diyos Kanato? sa Venezuelan Sign Language. Nagpatin-aw kana sa panglantaw sa Diyos bahin sa aborsiyon ug pagpatay. Sa ulahi, giingnan sa babaye ang mga Saksi nga mapasalamaton kaayo siya nga natun-an ang maong ulohan. Miingon siya nga dili na nila ipakuha ang bata. Naluwas ang usa ka kinabuhi sa tabang sa publikasyon sa senyas nga pinulongan diha sa DVD!

Si Lorraine nga usa ka amang nga Saksi nag-ingon: “Ang pagkakat-on sa Bibliya sama rag pagkompleto sa usa ka dakong puzzle. Dihay mga blangko o kulang sa akong pagsabot sa Bibliya. Apan, sa dihang mas daghan na ang mga publikasyon sa senyas nga pinulongan, nakompleto na ang akong pagsabot.” Si George nga usa ka amang ug 38 ka tuig nang Saksi, nag-ingon: “Sa walay duhaduha, makabaton kag pagtahod sa kaugalingon ug kompiyansa kon imong masabtan ang usa ka butang. Ang mga DVD sa senyas nga pinulongan nakatabang gayod sa akong pag-uswag sa espirituwal.”

“Usa ka Miting nga Gihimo sa Akong Pinulongan!”

Gawas pa sa mga publikasyon sa senyas nga pinulongan, ang mga Saksi ni Jehova nag-organisar ug mga kongregasyon diin gihimo ang mga miting sa senyas nga pinulongan. Sa pagkakaron, aduna nay kapin sa 1,100 ka kongregasyon sa tibuok kalibotan. Ang mga bahin himoon sa senyas nga pinulongan, ug ang kamatuoran sa Bibliya itudlo sa ila mismong pinulongan. Himoon kini sa paagi nga nagpakitag  pagtahod sa ilang kultura ug kasinatian sa kinabuhi.

Mapuslanon ba ang pagtukod ug mga kongregasyon sa senyas nga pinulongan? Tagda ang eksperyensiya ni Cyril, kinsa nahimong Saksi niadtong 1955. Sulod sa daghang katuigan, siya naningkamot sa pagtuon sa pinatik nga mga publikasyon ug regular nga nagtambong sa mga tigom. Usahay dunay interpreter, usahay wala. Kon walay interpreter, magsalig siya sa mga igsoon nga mahigugmaong naningkamot sa pagtabang kaniya pinaagi sa pagnota sa gihisgotan diha sa plataporma. Niadtong 1989 lang, sa dihang 34 ka tuig na siyang Saksi, nga ang unang kongregasyon sa senyas nga pinulongan sa United States natukod didto sa New York City. Ingong membro sa maong kongregasyon, unsay gibati ni Cyril? “Sama kog nakagawas gikan sa mabagang lasang, gikan sa ngitngit nga tunil ngadto sa kahayag. Usa ka miting nga gihimo sa akong pinulongan!”

Ang mga kongregasyon sa senyas nga pinulongan maoy mga dapit diin ang mga amang regular nga magkauban aron sa pagkat-on bahin sa Diyos ug sa pagsimba kaniya. Kini maoy mga dapit diin ang katawhan sa Diyos madasig ug masuod sa usag usa. Taliwala sa kalibotan diin ang mga amang malisdan tingali sa pagpakigkomunikar ug pagpakighugoyhugoy, ang maong mga kongregasyon makatabang kanila nianang bahina. Sa maong palibot, ang mga amang makakat-on, mouswag, ug makabatog mga pribilehiyo diha sa ilang pag-alagad kang Jehova. Daghang amang nga Saksi ang anaa sa bug-os-panahong pag-alagad. Ang uban mibalhin sa laing nasod aron motabang sa mga amang nga makaila kang Jehova. Ang amang nga Kristohanong mga lalaki nahimong epektibo nga mga magtutudlo, tig-organisar, ug magbalantay, ug daghan kanila ang nakabatog responsibilidad diha sa kongregasyon.

Sa United States, adunay kapin sa 100 ka kongregasyon sa senyas nga pinulongan ug mga 80 ka grupo. Sa Brazil, dunay duolan sa 300 ka kongregasyon ug kapin sa 400 ka grupo. Sa Mexico adunay duolan sa 300. Ang Rusya dunay kapin sa 30 ka kongregasyon ug 113 ka grupo. a Pipila lamang kini sa mga pananglitan sa pag-uswag nga nagakahitabo sa tibuok kalibotan.

Ang mga Saksi ni Jehova nagpahigayon usab ug mga asembliya ug kombensiyon diha sa senyas nga pinulongan. Sa miaging tuig, kapin sa 120 ka kombensiyon ang gipahigayon sa tibuok kalibotan diha sa lainlaing senyas nga pinulongan. Pinaagi niini nga mga asembliya ang mga amang makaamgo nga sila maoy bahin sa tibuok-kalibotang panag-igsoonay nga nakabenepisyo sa espirituwal nga pagkaon nga gitagana sa hustong panahon.

Si Leonard usa ka amang ug 25 ka tuig nang Saksi. Siya miasoy: “Dugay na kong nahibalo nga si Jehova mao ang matuod nga Diyos. Bisan pa niana, wala gyod nako masabti sa bug-os kon nganong gitugotan niya ang pag-antos. Usahay, masuko ko niya tungod niini. Apan diha sa usa ka pakigpulong sa distritong kombensiyon sa senyas nga pinulongan, nasabtan ra gyod nako ang mga isyu nga nalangkit. Pagkahuman sa pakigpulong, gipangutana ko sa akong asawa, ‘Kombinsido ka na ba?’ Kinasingkasing kong nakatubag niya ug oo! Human sa 25 ka tuig, ako mapasalamaton nga wala gyod ko mobiya kang Jehova. Ako siyang gihigugma, apan wala ko makasabot kaniya sa bug-os. Karon nakaila na gyod ko niya!”

Mapasalamaton

Unsang “ekspresyon” sa nawong ni Jehova ang nakita sa mga amang sa dihang sila nakaila kaniya? Ang gugma, kaluoy, hustisya, pagkamaunongon, mahigugmaong-kalulot—ug daghan pa.

Ang tibuok-kalibotang organisasyon sa amang nga mga Saksi nakakita sa nawong ni Jehova ug mas klaro pang makakita niana. Kay gihigugma niya ang mga amang, ‘si Jehova nagpasidlak sa iyang nawong nganha kanila.’ (Num. 6:25) Pagkamapasalamaton gayod nila nga sila nakaila kang Jehova!

[Footnote]

[Mga hulagway sa panid 25]

Adunay kapin sa 1,100 ka kongregasyon sa senyas nga pinulongan sa tibuok kalibotan

[Mga hulagway sa panid 26]

Si Jehova nagpasidlak sa iyang nawong nganha sa mga amang