Mga Igsoong Lalaki—Magpugas Alang sa Espiritu ug Kab-ota ang mga Pribilehiyo!

“Siya nga nagapugas alang sa espiritu moani ug kinabuhing walay kataposan.”​—⁠GAL. 6:8.

1, 2. Sa unsang paagi natuman ang Mateo 9:​37, 38, nga miresulta sa unsang panginahanglan diha sa mga kongregasyon?

IMONG nasaksihan karon ang mga panghitabo nga dili gayod makalimtan! Ang buluhaton nga gihisgotan ni Jesu-Kristo padayong nagauswag. “Dako ang alanihon, apan diyutay ra ang mga mamumuo,” miingon si Jesus. “Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mat. 9:​37, 38) Ginatubag ni Jehova nga Diyos ang maong mga pag-ampo sa talagsaong paagi. Sa 2009 nga tuig sa pag-alagad, ang gidaghanon sa kongregasyon sa mga Saksi ni Jehova sa tibuok kalibotan miuswag ug 2,031, nga miabot na ug 105,298. Sa aberids, 757 ka indibiduwal ang nabawtismohan kada adlaw!

² Tungod sa maong pag-uswag, gikinahanglan ang kuwalipikadong mga lalaki nga manguna sa pagtudlo ug pag-atiman sa mga kongregasyon. (Efe. 4:11) Latas sa katuigan, si Jehova nagtudlog kuwalipikadong mga lalaki aron moatiman sa panginahanglan sa iyang mga karnero, ug makasalig kita nga padayon niya kanang buhaton. Ang tagna sa Miqueas 5:5 nagpasalig kanato nga sa kataposang mga adlaw, ang katawhan ni Jehova makabatog “pito ka magbalantay” ug “walo ka duke,” nga nagpasabot nga daghang takos nga mga lalaki ang manguna kanila.

3. Ipatin-aw kon unsay gipasabot sa ‘pagpugas alang sa espiritu.’

³ Kon ikaw usa ka bawtismadong lalaki, unsay makatabang kanimo aron maugmad ang tinguha nga mokab-ot ug mga pribilehiyo? Ang usa ka hinungdanong butang mao nga ikaw ‘magpugas alang sa espiritu.’ (Gal. 6:8) Ang pagbuhat niana naglangkit sa pagkinabuhi sa paagi nga magtugot sa balaang espiritu sa Diyos sa pag-impluwensiya kanimo. Magmadeterminado nga dili ‘magpugas alang sa unod.’ Ayaw tugoti ang kaharuhay, kalingawan, ug uban pang mga butang nga makapugong sa imong tinguha nga buhaton ang imong maarangan sa pag-alagad sa Diyos. Ang tanang Kristohanon angayng ‘magpugas alang sa espiritu,’ ug sa ngadtongadto, ang mga lalaki nga nagbuhat niana mahimong kuwalipikado nga modawat ug mga pribilehiyo sa kongregasyon. Tungod kay dunay dakong panginahanglan alang sa ministeryal nga mga alagad ug mga ansiyano karon, kining artikuloha nagtumong ilabina sa mga lalaki. Busa, mga igsoong lalaki, giawhag namo kamo nga mainampoong palandongon kining artikuloha.

Kab-ota ang Maayong Buhat

4, 5. (a) Unsang mga pribilehiyo ang angayng kab-oton sa bawtismadong mga lalaki? (b) Sa unsang paagi nila kana makab-ot?

⁴ Ang usa ka Kristohanong lalaki dili awtomatikong mahimong magtatan-aw. Kinahanglan niyang kab-oton kining “maayong buhat.” (1 Tim. 3:1) Ang pagkab-ot naglakip sa pag-alagad sa mga isigkamagtutuo pinaagi sa kinasingkasing nga pag-atiman sa ilang panginahanglan. (Basaha ang Isaias 32:​1, 2.) Ang usa ka lalaki nga mokab-ot ug pribilehiyo uban ang hustong motibo dili ambisyoso. Hinunoa, aduna siyay dili-mahakogong tinguha nga moalagad sa uban.

⁵ Aron mahimong ministeryal o ansiyano, kinahanglang kab-oton sa usa ang mga kuwalipikasyon  nga gilatid sa Kasulatan. (1 Tim. 3:1-10, 12, 13; Tito 1:5-9) Kon ikaw usa ka bawtismadong lalaki, pangutan-a ang imong kaugalingon: ‘Bug-os ba akong nakig-ambit sa buluhatong pagsangyaw ug nagatabang sa uban sa pagbuhat niana? Gipalig-on ba nako ang mga igsoon pinaagi sa pagpakitag tiunayng interes sa ilang kaayohan? Usa ba ako ka maayong estudyante sa Pulong sa Diyos? Naningkamot ba ako sa pagpauswag sa kalidad sa akong mga komento? Makugihon ba nakong giatiman ang mga buluhaton nga gipiyal kanako sa mga ansiyano?’ (2 Tim. 4:5) Angayng palandongon pag-ayo kanang mga pangutanaha.

6. Unsay gikinahanglan aron mahimong kuwalipikado sa mga responsibilidad sa kongregasyon?

⁶ Ang laing paagi nga mahimong kuwalipikado sa mga responsibilidad sa kongregasyon mao ang ‘pagkahimong kusganon diha sa pagkatawo sa sulod uban sa gahom pinaagi sa espiritu sa Diyos.’ (Efe. 3:16) Ang usa ka brader dili mahimong ministeryal o ansiyano pinaagig botasyon. Makab-ot lamang kini pinaagig pag-uswag sa espirituwal. Sa unsang paagi mouswag sa espirituwal? Ang usa ka paagi mao ang ‘padayong paglakaw pinaagi sa espiritu’ ug pag-ugmad sa bunga niini. (Gal. 5:​16, 22, 23) Samtang imong gipakita ang mga hiyas nga gikinahanglan sa pagtuman sa dugang mga responsibilidad ug gipadapat ang mga tambag labot niini, ang imong “pag-uswag madayag sa tanan nga mga tawo.”​—⁠1 Tim. 4:15.

Gikinahanglan ang Pagsakripisyo-sa-Kaugalingon

7. Unsay nalangkit sa pag-alagad sa uban?

⁷ Ang pag-alagad sa uban naglangkit ug paghago ug nagkinahanglag pagsakripisyo-sa-kaugalingon. Sanglit ang mga magtatan-aw maoy espirituwal nga mga magbalantay, mabalaka gayod sila kon dunay problema ang panon. Matikdi kon sa unsang paagi nakaapektar kang apostol Pablo ang mga responsibilidad labot sa pag-atiman sa kongregasyon. Iyang giingnan ang mga isigkamagtutuo sa Corinto: “Gikan sa daghang kasakitan ug tumang kaguol sa kasingkasing ako nagsulat kaninyo inubanan sa daghang luha,  dili aron kamo masubo, kondili aron kamo mahibalo sa gugma nga akong nabatonan ilabina gayod alang kaninyo.” (2 Cor. 2:4) Dayag nga gihimo ni Pablo ang tanan alang sa buluhaton.

8, 9. Paghatag ug mga pananglitan sa Bibliya nga nagpakita kon sa unsang paagi ang mga lalaki nag-atiman sa panginahanglan sa uban.

⁸ Ang pagsakripisyo-sa-kaugalingon maoy timailhan sa mga lalaki nga naghago alang sa mga alagad ni Jehova. Pananglitan, dili nato mahanduraw nga giingnan ni Noe ang iyang pamilya: ‘Unya na lang ko moanha kon mahuman na ninyo ang arka.’ Wala ingna ni Moises ang mga Israelinhon: ‘Magkita na lang ta sa Pulang Dagat. Paningkamot na lang mo nga makaabot didto.’ Wala gayod moingon si Josue: ‘Sultii lang ko kon matumpag na ang paril sa Jerico.’ Ug si Isaias wala moingon: ‘Anaa siya! Ipadala siya.’​—⁠Isa. 6:8.

⁹ Ang atong pangunang ehemplo sa usa nga nagtugot sa espiritu sa Diyos nga magpalihok kaniya mao si Jesu-Kristo. Kinabubut-on niyang gidawat ang asaynment nga mag-alagad ingong Manunubos sa katawhan. (Juan 3:16) Dili ba nga ang nagsakripisyo-sa-kaugalingon nga gugma ni Jesus angayng magtukmod usab kanato nga sundogon siya? Sa paghubit sa iyang pagbati alang sa panon, ang usa ka dugay nang ansiyano miingon: “Natandog kaayo ko sa giingon ni Jesus kang Pedro​—⁠bantayi ang akong gagmayng mga karnero. Latas sa katuigan, akong nakita nga bisan ang pipila lang ka mahigugmaong pulong o ang usa ka simpleng buhat sa kalulot igo nang makadasig sa usa. Gikalipay gyod nako ang pagduaw sa mga igsoon isip magbalantay.”​—⁠Juan 21:16.

10. Unsay mahimong magtukmod sa mga lalaki sa pagsundog sa ehemplo ni Jesus sa pag-alagad sa uban?

¹⁰ Maylabot sa panon sa Diyos, buot gayod sa bawtismadong mga lalaki nga sundogon ang tinamdan ni Jesus, kinsa miingon: “Ako magapalagsik kaninyo.” (Mat. 11:28) Ang pagtuo sa Diyos ug gugma alang sa kongregasyon maoy nagtukmod sa mga lalaki sa pagkab-ot niining maayong buhat, nga wala magsapayan sa sakripisyo o kahago nga nalangkit niini. Apan, komosta kon ang usa wala magtinguha sa pagkab-ot niana? Maugmad ba niya ang tinguha nga moalagad sa kongregasyon?

Ugmara ang Tinguha nga Moalagad

11. Sa unsang paagi maugmad sa usa ang tinguha nga moalagad sa uban?

¹¹ Kon wala ka mangab-ot tungod kay gibati nimo nga dili ka takos, haom lamang nga moampo ka alang sa balaang espiritu. (Luc. 11:13) Tabangan ka sa espiritu ni Jehova nga mawagtang ang imong pagduhaduha. Ang tinguha nga moalagad naggikan sa Diyos, tungod kay ang espiritu ni Jehova mao ang magpalihok sa usa ka brader sa pagkab-ot ug mga pribilehiyo ug magpalig-on kaniya sa paghimog sagradong pag-alagad. (Filip. 2:13; 4:13) Busa, haom lamang nga hangyoon nimo si Jehova nga tabangan ka nga maugmad ang tinguha sa pagdawat ug mga pribilehiyo.​—⁠Basaha ang Salmo 25:​4, 5.

12. Sa unsang paagi ang usa makabatog kaalam sa pag-atiman sa mga responsibilidad nga gipiyal kaniya?

¹² Ang usa ka Kristohanon dili tingali mokab-ot ug pribilehiyo kay gihunahuna niya nga hago ug lisod ang pag-atiman sa panon. O basin gibati niya nga kulang siyag kaalam sa pagtuman niini nga mga responsibilidad. Kon mao, makabaton siyag kaalam pinaagi sa makugihong pagtuon sa Pulong sa Diyos ug sa mga publikasyon nga binase sa Bibliya. Maayong pangutan-on niya ang iyang kaugalingon, ‘Naggahin ba akog panahon sa pagtuon sa Pulong sa Diyos, ug nag-ampo ba ako alang sa kaalam?’ Si disipulong Santiago misulat: “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya.” (Sant. 1:5) Motuo ka ba niana? Agig tubag sa pag-ampo ni Solomon, ang Diyos naghatag kaniyag “usa ka maalamon ug masinaboton nga kasingkasing” nga nakatabang kaniya sa pag-ila kon unsay maayo ug daotan sa dihang naghukom sa katawhan. (1 Hari 3:7-14) Tinuod, talagsaon ang kahimtang ni Solomon. Apan, makasalig kita nga hatagan sa Diyos ug kaalam ang mga lalaki nga dunay responsibilidad sa kongregasyon aron maatiman nila pag-ayo ang panon.​—⁠Prov. 2:6.

13, 14. (a) Ipatin-aw kon unsay epekto kang Pablo sa ‘gugma ni Kristo.’ (b) Unsay angayng epekto kanato sa ‘gugma ni Kristo’?

 ¹³ Ang laing tabang aron maugmad ang tinguha nga moalagad sa uban mao ang pagpamalandong sa nahimo ni Jehova ug sa iyang Anak alang kanato. Pananglitan, tagda ang 2 Corinto 5:​14, 15. (Basaha.) Sa unsang paagi nga ‘ang gugma ni Kristo nagatukmod kanato’? Ang gugma nga gipakita ni Kristo pinaagi sa paghalad sa iyang kinabuhi alang kanato talagsaon kaayo nga samtang magkadako ang atong apresasyon niana, mas matandog ang atong kasingkasing. Ang gugma ni Kristo maoy naggiya kang Pablo. Gipugngan siya niana sa paglihok nga mahakogon ug gitabangan siya nga mahimong panguna sa iyang kinabuhi ang pag-alagad sa Diyos ug sa iyang isigkatawo sa sulod ug gawas sa kongregasyon.

¹⁴ Ang pagpamalandong sa gugma ni Kristo sa katawhan magpalihok kanato sa pagpasalamat kaniya. Ingong resulta, atong maamgohan nga dili gayod kita angayng ‘magpugas alang sa unod’ pinaagi sa pagpangagpas ug mahakogong mga tumong ug pagkinabuhi aron lamang sa pagtagbaw sa kaugalingon. Hinunoa, atong ipasibo ang atong mga kalihokan aron mahimong panguna sa atong kinabuhi ang buluhaton nga gihatag sa Diyos kanato. Matukmod kita sa ‘pagpaulipon’ sa atong mga igsoon tungod sa gugma. (Basaha ang Galacia 5:13.) Kon isipon nato ang atong kaugalingon ingong mga ulipon nga mapainubsanong nag-alagad sa katawhan ni Jehova, ato silang pakitaag dignidad ug pagtahod. Dili gayod nato sundogon ang tinamdan nga gipakaylap ni Satanas​—⁠ang pagkahinawayon.​—⁠Pin. 12:10.

Papel sa Pamilya

15, 16. Unsay buhaton sa mga membro sa pamilya aron ang ilang ulo mahimong ministeryal o ansiyano?

¹⁵ Kon pamilyado ang usa ka brader, tagdon usab ang espirituwalidad ug reputasyon sa iyang pamilya aron matino kon kuwalipikado ba siya nga mahimong ministeryal o ansiyano. Gipasiugda niini ang kahinungdanon sa papel sa pamilya sa pagpaluyo kaniya samtang nagtinguha siya sa pag-alagad sa kongregasyon ingong ministeryal o ansiyano.​—⁠Basaha ang 1 Timoteo 3:​4, 5, 12.

¹⁶ Malipay si Jehova sa dihang magtinabangay ang mga membro sa pamilya. (Efe. 3:​14, 15) Kinahanglang timbang ang ulo sa pamilya sa pag-atiman sa mga responsibilidad sa kongregasyon ug sa pagdumala sa iyang panimalay “sa maayong paagi.” Busa, hinungdanon nga ang usa ka ansiyano o ministeryal magtuon sa Bibliya uban sa iyang asawa ug mga anak aron makabenepisyo ang tanan sa Pamilyahanong Pagsimba kada semana. Kinahanglan nga regular siyang mosangyaw uban nila. Sa mao gihapong rason, hinungdanon nga ang mga membro sa pamilya mopaluyo sa ilang ulo.

Mahimo Ka Bang Mokab-ot Pag-usab?

17, 18. (a) Kon ang usa matangtang sa pagka-ministeryal o pagkaansiyano, unsay kinahanglan niyang buhaton? (b) Unsay angayng tinamdan sa usa ka brader nga ansiyano o ministeryal kaniadto?

¹⁷ Lagmit ikaw usa ka ansiyano o ministeryal kaniadto. Ikaw nahigugma kang Jehova ug nakaseguro nga nahingawa gihapon siya kanimo. (1 Ped. 5:​6, 7) Gitambagan ka ba nga kinahanglan kang mohimog mga kausaban? Magmaandam sa pagdawat sa imong sayop ug paningkamoti nga mabuntog kana uban sa tabang sa Diyos. Pagbantay nga dili mayugot. Magmaalamon, ug ipakita ang positibong tinamdan. Usa ka dugay nang ansiyano nga nawad-an sa iyang pribilehiyo miingon: “Determinado ko  nga mahimo gihapong regular sa pagtambong sa mga tigom, pagsangyaw sa kanataran, ug pagbasa sa Bibliya​—⁠usa ka tumong nga akong nakab-ot. Nakakat-on ko sa pagpailob kay abi nakog makabalik ko sulod sa usa o duha ka tuig, apan miabot ug halos pito ka tuig una ko maansiyano pag-usab. Nianang panahona, nakatabang gayod kanako ang pagdasig nga dili mohunong sa pagkab-ot ug mga pribilehiyo.”

¹⁸ Kon sama niana ang imong kahimtang, ayawg kahigawad. Palandonga kon sa unsang paagi gipanalanginan ni Jehova ang imong ministeryo ug imong pamilya. Palig-ona ang espirituwalidad sa imong pamilya, duawa ang mga masakiton, ug dasiga ang mga maluya. Labaw sa tanan, pabilhi ang imong pribilehiyo nga magdayeg sa Diyos ug magmantala sa maayong balita sa Gingharian ingong Saksi ni Jehova.⁠ *​—⁠Sal. 145:​1, 2; Isa. 43:10-12.

Susiha Pag-usab ang Imong Kahimtang

19, 20. (a) Unsay angayng buhaton sa tanang bawtismadong mga lalaki? (b) Unsay hisgotan sa sunod nga artikulo?

¹⁹ Mas dako ang panginahanglan karon alang sa mga ansiyano ug ministeryal. Busa, giawhag namo ang tanang bawtismadong mga lalaki nga susihon pag-usab ang ilang kahimtang ug suknaon ang ilang kaugalingon, ‘Kon dili ko ministeryal o ansiyano, nganong wala man ko maningkamot sa pagkab-ot niana?’ Tugoti ang espiritu sa Diyos nga motabang kanimo sa pagbaton ug hustong tinamdan niining hinungdanong butang.

²⁰ Ang tanang membro sa kongregasyon makabenepisyo sa pagsakripisyo sa ilang mga isigkamagtutuo. Kon kita nagabuhat nga maluloton ug dili-mahakogon, atong matagamtam ang kalipay gumikan sa pag-alagad sa uban ug sa pagpugas alang sa espiritu. Apan, hisgotan sa sunod nga artikulo nga angay gayod natong likayan nga maguol ang balaang espiritu. Sa unsang paagi?

[Footnote]

Unsay Imong Tubag?

• Unsay gipasalig kanato sa Miqueas 5:5?

• Ipatin-aw kon unsay nalangkit sa pagsakripisyo-sa-kaugalingon.

• Sa unsang paagi maugmad sa usa ang tinguha nga moalagad sa uban?

• Nganong hinungdanon ang papel sa pamilya diha sa pagkahimong ministeryal o ansiyano sa usa?

[Mga Pangutana sa Pagtuon]

[Mga hulagway sa panid 25]

Unsay imong himoon aron maugmad ang tinguha nga mokab-ot ug mga pribilehiyo?