Pagkaplag ug Kasegurohan Taliwala sa Katawhan sa Diyos

“Pagadayegon ko ikaw diha sa dako nga kongregasyon.”—SAL. 35:18.

1-3. (a) Nganong ang pipila ka Kristohanon nahitumpawak sa espirituwal nga kadaot? (b) Asa makakaplag ug proteksiyon ang katawhan sa Diyos?

 SAMTANG nagbakasyon, si Joe ug ang iyang asawa nag-esnorkel diha sa katakotan nga puno sa mga isda nga lainlaig kolor ug gidak-on. Mipadayon pa sila paglangoy aron makita ang katakotan sa unahan. Sa dihang mikalit lag kalawom ang tubig, ang asawa ni Joe miingon, “Morag layo na kaayo ta da.” “Relaks lang,” matod ni Joe. “Nasayod ko sa akong gibuhat.” Nahinumdom si Joe nga nahibulong siya niadtong tungora, ‘Ngano kahang nangawala man ang mga isda?’ Nalisang siya sa pagkakita kon ngano. Duna diay iho nga nagpaingon sa iyang nahimutangan, ug wala na siyay kapaingnan. Apan, sa dihang mga usa ka metros na lang ang gilay-on niini, kini mitipas ug nagpalayo.

² Ang usa ka Kristohanon mahimong malinga pag-ayo sa mga panghaylo sa kalibotan ni Satanas—kalingawan, trabaho, kabtangan—nga dili siya makabantay nga nagpaingon na diay siya sa lawom ug peligrosong katubigan niining kalibotana. “Ang akong kasinatian nakapahunahuna kanako maylabot sa pagpilig mga kauban,” miingon si Joe nga usa ka ansiyano. “Diha ka lang maglangoylangoy, ingnon ta, sa dapit nga luwas ug makalingaw—sulod sa kongregasyon!” Ayawg adto sa ‘lawom,’ diin ikaw mahimulag sa mga igsoon ug mameligro sa espirituwal. Kon anaa ka na sa maong kahimtang, balik dayon sa ‘luwas nga katubigan.’ Kay kon dili, basin mameligro ang imong espirituwalidad.

³ Karong adlawa, ang kalibotan maoy usa ka peligrosong dapit alang sa mga Kristohanon. (2 Tim. 3:1-5) Nahibalo si Satanas nga mubo na lang ang iyang panahon, ug gusto niyang tukbon ang wala makabantay. (1 Ped. 5:8; Pin. 12:12, 17) Apan, aduna kitay proteksiyon. Gitagan-an ni Jehova ang iyang katawhan ug usa ka luwas nga espirituwal nga dalangpanan—ang Kristohanong kongregasyon.

4, 5. Unsay pagbati sa mga tawo sa ilang kaugmaon, ug ngano?

⁴ Limitado lamang ang kasegurohan nga ikahatag sa kalibotan—sa pisikal man o sa emosyonal. Daghan ang naghunahuna nga wala silay kasegurohan tungod sa krimen, kapintasan, kamahal sa palaliton, ug bisan sa suliran sa kalikopan. Ang tanan nag-atubang sa mga suliran sa pagkatigulang ug dili-maayong panglawas. Ug kadtong dunay trabaho, balay, salapi, ug maayong panglawas, dili makaseguro nga padayon nila kining mabatonan.

⁵ Alang sa daghan, lisod usab mabatonan ang emosyonal nga kasegurohan. Ikasubo, ang mga tawo nga naglaom nga makakaplag ug kalinaw ug katagbawan diha sa kaminyoon ug sa pamilya napakyas sa pagkab-ot niana. Maylabot sa espirituwal, daghang hinimba karon ang nagduhaduha kon mapuslanon ba ang giya nga ilang nadawat. Gibati nila kini ilabina tungod sa kuwestiyonableng panggawi ug dili-kasulatanhong mga pagtulon-an sa ilang mga lider sa relihiyon. Busa, daghan ang naghunahuna nga wala na silay laing mahimo gawas sa pagsalig sa siyensiya o sa pagkamaayo sa ilang isigkatawo. Nan, dili ikatingala nga daghan ang mibatig kawalay-kasegurohan o wala na kaayo maghunahuna sa ilang kaugmaon.

6, 7. (a) Nganong managlahi ang panglantaw niadtong nag-alagad sa Diyos ug niadtong wala? (b) Unsay atong pagahisgotan?

 ⁶ Pagkalahi gayod sa panglantaw niadtong anaa sa Kristohanong kongregasyon ug niadtong wala! Bisan tuod kita ingong katawhan ni Jehova nag-atubang ug susamang mga suliran, lahi gayod ang atong reaksiyon niana. (Basaha ang Isaias 65:13, 14; Malaquias 3:18.) Ngano? Tungod kay atong nakaplagan diha sa Bibliya ang makapatagbawng katin-awan kon nganong naingon niini ang mga tawo. Gitabangan usab kita niini sa pagsagubang sa mga suliran sa kinabuhi. Tungod niana, dili kaayo kita mabalaka sa atong kaugmaon. Ingong mga magsisimba ni Jehova, napanalipdan kita batok sa dili-maayo ug dili-kasulatanhong mga pangatarongan, imoral nga mga buhat, ug sa mga sangpotanan niana. Busa, kadtong anaa sa kongregasyon nakabatog kalinaw nga wala sa uban.—Isa. 48:17, 18; Filip. 4:6, 7.

⁷ Ang pipila ka pananglitan mahimong motabang kanato sa pagpamalandong sa kasegurohan nga natagamtam lamang niadtong nag-alagad kang Jehova. Kini mahimong magtukmod kanato sa pagsusi sa atong mga hunahuna ug binuhatan ug sa pagpamalandong kon sa unsang paagi mas bug-os natong mapadapat ang tambag sa Diyos, nga gihimo aron sa pagpanalipod kanato.—Isa. 30:21.

“Hapit na Gayong Matipas ang Akong mga Tiil”

8. Unsay kanunayng gihimo sa mga alagad sa Jehova?

⁸ Sukad sa sinugdan sa kasaysayan sa tawo, kadtong mipili sa pag-alagad ug pagsugot kang Jehova wala makigsuod niadtong wala mag-alagad kaniya. Sa pagkatinuod, gipakita ni Jehova nga adunay panag-away tali sa iyang mga magsisimba ug sa mga sumusunod ni Satanas. (Gen. 3:15) Tungod sa ilang hugot nga pagsunod sa mga prinsipyo sa Bibliya, ang katawhan sa Diyos migawi nga lahi niadtong anaa sa ilang palibot. (Juan 17:15, 16; 1 Juan 2:15-17) Dili kanunayng sayon ang paghimo niana. Gani, ang pipila ka alagad ni Jehova nagduhaduha usahay kon maalamon ba ang pagsakripisyo sa kaugalingon.

9. Unsang suliran ang giatubang sa magsusulat sa Salmo 73?

 ⁹ Ang usa sa mga alagad ni Jehova nga nagduhaduha kon nahimo ba niya ang maalamong desisyon mao ang magsusulat sa Salmo 73, nga lagmit usa sa mga kaliwat ni Asap. Ang salmista nangutana kon nganong ang mga daotan daw nagmalamposon, nagmalipayon, ug nagmauswagon, samtang ang uban nga naningkamot sa pag-alagad sa Diyos nag-antos sa kalisdanan.—Basaha ang Salmo 73:1-13.

10. Nganong hinungdanon kanimo ang mga pangutana sa salmista?

¹⁰ Nasukna mo na ba ang mga pangutana nga susama nianang sa salmista? Kon mao, dili ka angayng maghunahuna nga nakahimo ka nag grabeng sala o nawad-an ka nag pagtuo. Gani, daghang alagad ni Jehova, lakip na sa pipila nga iyang gigamit sa pagsulat sa Bibliya, ang nakapangutana usab niana. (Job 21:7-13; Sal. 37:1; Jer. 12:1; Hab. 1:1-4, 13) Sa pagkatinuod, ang tanan nga nagtinguha sa pag-alagad kang Jehova kinahanglang mamalandong pag-ayo ug mouyon sa tubag niining pangutanaha: Ang pag-alagad ug pagsugot sa Diyos mao ba ang labing maayong butang nga buhaton? Nalangkit kini sa isyu nga gipatungha ni Satanas sa tanaman sa Eden. Kini ang panguna sa unibersohanong isyu sa pagkasoberano sa Diyos. (Gen. 3:4, 5) Busa maayong tagdon natong tanan ang pangutana nga gipatungha sa salmista. Angay ba natong kasinahan ang mga daotan nga daw walay mga suliran? ‘Motipas’ ba kita gikan sa pag-alagad kang Jehova ug mosundog kanila? Siyempre, mao kanay gusto ni Satanas nga atong buhaton.

11, 12. (a) Sa unsang paagi nabuntog sa salmista ang iyang pagduhaduha, ug unsay atong makat-onan niini? (b) Unsay nakatabang kanimo sa paghimog hustong konklusyon sama sa salmista?

¹¹ Unsay nakatabang sa salmista sa pagbuntog sa iyang mga pagduhaduha? Bisan tuod giangkon niya nga hapit na siyang mahitipas gikan sa pagbuhat ug matarong, nausab ang iyang panglantaw sa dihang misulod siya sa “dakong sangtuwaryo sa Diyos”—sa ato pa, sa dihang nakig-uban siya sa katawhan sa Diyos diha sa tabernakulo o templo ug namalandong sa katuyoan sa Diyos. Naamgohan sa salmista nga dili niya gustong mahitabo kaniya ang dangatan sa mga mamumuhat ug daotan. Iyang nakita nga tungod sa ilang gibuhat ug sa mga desisyon nga ilang gihimo nahimutang sila sa “madanglog nga dapit.” Nasabtan sa salmista nga ang tanang mibiya kang Jehova, makaagom gayod sa ilang kataposan uban ang “kalit nga mga kalisang,” samtang ang nag-alagad kang Jehova makalaom sa iyang tabang. (Basaha ang Salmo 73:16-19, 27, 28.) Sa walay duhaduha imong nakita nga tinuod kana. Daghan tingali ang gustong magkinabuhi alang lamang sa kaugalingon nga walay pagtagad sa balaod sa Diyos, apan dili sila makaikyas sa daotang mga sangpotanan niana.—Gal. 6:7-9.

¹² Unsa pay atong makat-onan sa kasinatian sa salmista? Siya nakakaplag ug kasegurohan ug kaalam taliwala sa katawhan sa Diyos. Siya nakahimog tin-aw ug maayong mga pangatarongan sa dihang miadto siya sa dapit diin gisimba si Jehova. Sa susama, kita makakaplag ug maalamong mga magtatambag ug makatagamtam ug makapahimsog nga espirituwal nga pagkaon diha sa mga tigom sa kongregasyon. Nan, aduna gayoy maayong katarongan kon nganong gisugo ni Jehova ang iyang mga alagad sa pagtambong sa mga tigom. Diha niana, sila madasig ug matukmod sa paglihok nga maalamon.—Isa. 32:1, 2; Heb. 10:24, 25.

Piliag Maayo ang Imong mga Kauban

13-15. (a) Unsay nahitabo kang Dina, ug unsay atong makat-onan niana? (b) Nganong usa ka panalipod ang pagpakig-uban sa mga isigka-Kristohanon?

¹³ Ang anak ni Jacob nga si Dina maoy pananglitan sa usa nga natumpawak sa kadaot tungod sa pagpakig-uban sa mga dili magsisimba ni Jehova. Sumala sa asoy sa Genesis, naandan niya ang pagpakighugoyhugoy sa mga batan-ong Canaanita diha sa dapit nga gipuy-an sa ilang pamilya. Dili sama sa mga magsisimba ni Jehova, ang mga Canaanhon walay hataas nga sukdanan sa moral. Gani, gipakita sa nakaplagan sa mga arkeologo nga tungod sa paagi sa pagkinabuhi sa mga Canaanhon, ang ilang yuta napuno sa idolatriya, imoralidad, mahilayong  pagsimba sa sekso, ug kapintasan. (Ex. 23:23; Lev. 18:2-25; Deut. 18:9-12) Hinumdomi ang nahitabo kang Dina tungod sa pagpakig-uban niining mga tawhana.

¹⁴ Usa ka tawo sa maong dapit, si Sekem, nga gihubit ingong “ang labing dungganon sa tibuok balay sa iyang amahan,” nakakita kang Dina ug “nagkuha kaniya ug mihigda uban kaniya ug miamong-among kaniya.” (Gen. 34:1, 2, 19) Pagkamakapasubo niadto! Sa imong pagtuo, naghunahuna kaha si Dina nga mahitabo kadto kaniya? Tingali gusto lang niyang makighigala sa mga batan-on didto, nga giisip niyang buotan. Apan, nalimbongan gayod si Dina.

¹⁵ Unsay atong makat-onan niini nga asoy? Atong makat-onan nga kon kita makighugoyhugoy sa mga dili-magtutuo mahiagom gayod kita sa kadaot. Ang Kasulatan nag-ingon nga “ang daotang pakig-uban makadaot sa mapuslanong pamatasan.” (1 Cor. 15:33) Sa laing bahin, ang pagpakig-uban sa mga tawo nga sama nimog pagtuo ug moral nga sukdanan, ug nahigugma usab kang Jehova maoy usa ka panalipod. Ang maong maayong pakig-uban magdasig kanimo sa paglihok nga maalamon.—Prov. 13:20.

“Kamo Nahugasan Na”

16. Unsay giingon ni apostol Pablo bahin sa pipila ka Kristohanon sa kongregasyon sa Corinto?

¹⁶ Ang kongregasyon nakatabang sa daghang indibiduwal sa paghinlo sa ilang kaugalingon gikan sa mahugawng mga binuhatan. Sa unang sulat ni apostol Pablo sa kongregasyon sa Corinto, iyang gihisgotan ang kausaban nga gihimo sa mga Kristohanon didto aron magkinabuhi uyon sa mga sukdanan sa Diyos. Ang pipila kaniadto maoy mga makihilawason, tigsimbag idolo, mananapaw, homoseksuwal, kawatan, palahubog, ug uban pa. “Apan kamo nahugasan na,” miingon si Pablo kanila.—Basaha ang 1 Corinto 6:9-11.

17. Sa unsang paagi ang pagkinabuhi sumala sa mga sukdanan sa Bibliya nag-usab sa kinabuhi sa daghan?

¹⁷ Ang mga tawo nga walay pagtuo walay maayong prinsipyo nga mogiya kanila. Sila mobuhat kon unsay ilang gusto o mopasignunot sa imoral nga panggawi sa mga tawo sa ilang palibot, sama sa pipila ka taga-Corinto sa wala pa sila mahimong magtutuo. (Efe. 4:14) Apan, ang tukmang kahibalo sa Pulong sa Diyos ug sa iyang mga katuyoan adunay gahom sa pag-usab sa kinabuhi niadtong nagpadapat sa Kasulatan. (Col. 3:5-10; Heb. 4:12) Daghan diha sa kongregasyon karon makasugilon kanimo nga sa wala pa sila makakat-on ug magpadapat sa matarong nga mga sukdanan ni Jehova, sila nagkinabuhi nga mapatuyangon. Hinunoa, sila walay katagbawan ug kalipay. Nakaplagan lamang nila ang kalinaw sa dihang sila nakig-uban sa katawhan sa Diyos ug nagkinabuhi uyon sa mga prinsipyo sa Bibliya.

18. Unsay naagoman sa usa ka batan-on, ug unsay gipamatud-an niana?

¹⁸ Sa kasukwahi, ang pipila nga mibiya kaniadto sa ‘luwas nga katubigan’ sa Kristohanong kongregasyon nagbasol gayod sa ilang nahimo. Usa ka sister, nga atong tawgon ug Tanya, miasoy nga siya “aduna nay kahibalo sa kamatuoran,” apan sa nag-edad siyag 16, mibiya siya sa organisasyon aron sa “pagpangagpas sa mga panghaylo sa kalibotan.” Lakip sa mga resulta sa iyang nahimo mao ang dili-angay nga pagmabdos ug aborsiyon. Karon siya miingon: “Ang tulo ka tuig nga wala ako sa organisasyon naghatag nakog kagul-anan nga ako gihapong giantos. Hangtod karon dili nako makalimtan nga akong gipatay ang akong gisabak. . . . Mao ni akong ikasulti sa mga batan-on nga nangandoy sa ‘pagtilaw’ sa kalibotan bisan sa makadiyot lang: ‘Ayaw kanag buhata!’ Tinuod lami kini sa  sinugdan, apan mapait kaayo kini sa kapulihay. Lunlon kagul-anan ray ikahatag sa kalibotan. Nahibalo ko kay nasulayan na nako kini. Pabilin sa organisasyon ni Jehova! Kana lamang ang paagi sa kinabuhi nga makahatag ug kalipay.”

19, 20. Unsang proteksiyon ang ikahatag sa Kristohanong kongregasyon, ug sa unsang paagi?

¹⁹ Hunahunaa lang ang mahitabo kanimo kon mobiya ka sa Kristohanong kongregasyon nga maoy nanalipod kanimo. Daghan, nga nahinumdom sa ilang kawang nga paagi sa kinabuhi sa wala pa sila makadangat sa kamatuoran, ang dili gani gustong maghunahuna niana. (Juan 6:68, 69) Padayon nimong mabatonan ang kasegurohan ug proteksiyon batok sa mga kaalaotan ug kagul-anan nga kaylap kaayo sa kalibotan ni Satanas pinaagi sa pagpakigsuod sa imong mga igsoon sa pagtuo. Ang pagpakig-uban kanila ug ang regular nga pagtambong sa mga tigom kanunayng magpahinumdom kanimo nga maalamon ang pagsunod sa matarong nga mga sukdanan ni Jehova ug magdasig kanimo sa pagkinabuhi sumala niana. May katarongan ka gayod nga ‘dayegon si Jehova diha sa dako nga kongregasyon,’ sama sa gibuhat sa salmista.—Sal. 35:18.

²⁰ Siyempre, tungod sa lainlaing katarongan, may mga panahon nga morag malisdan ang usa sa paghupot sa iyang integridad. Tingali nagkinahanglan lang siyag mogiya kaniya. Sa unsang paagi ikaw—ug ang uban sa kongregasyon—makatabang sa mga isigkamagtutuo nianang mga panahona? Ang sunod nga artikulo maghisgot kon sa unsang paagi imong ‘mahupay ug mapalig-on’ ang imong mga igsoon sa pagtuo.—1 Tes. 5:11.

Unsay Imong Tubag?

• Unsay imong makat-onan sa kasinatian sa magsusulat sa Salmo 73?

• Unsay atong makat-onan sa nahitabo kang Dina?

• Nganong makakaplag ka ug kasegurohan diha sa Kristohanong kongregasyon?

[Mga Pangutana sa Pagtuon]

[Mga hulagway sa panid 7]

Diha ka lang maglangoylangoy sa luwas nga dapit; magpabilin diha sa kongregasyon!