Dili pa Ulahi nga Mag-alagad sa Diyos

Sa Málaga, habagatang Espanya, usa ka inahan ug anak nga babaye, nga parehong ginganlag Ana, nabawtismohan niadtong Disyembre 19, 2009. Lakip sila sa 2,352 nga nagpabawtismo sa Espanya niadtong tuiga. Apan, may talagsaon bahin kanila—ang ilang edad. Ang inahan 107 ug ang anak 83 anyos!

Unsay nagtukmod kanila nga magpabawtismo agig simbolo sa ilang dedikasyon kang Jehova? Sa sayong bahin sa katuigan sa 1970, ang anak nga si Ana kanunayng dapiton sa usa ka silingang Saksi sa pagtambong sa Pagtuon sa Libro sa Kongregasyon diha sa ilang balay. Usahay, motambong si Ana. Apan, tungod sa iyang trabaho, si Ana wala na makapadayon sa pagtuon.

Paglabay sa mga napulo ka tuig, ang pipila sa mga anak ni Ana misugod sa pagtuon sa Bibliya ug ngadtongadto nahimong mga alagad ni Jehova. Ang usa kanila, si Mari Carmen, nakapukaw pag-usab sa interes sa iyang inahan sa kamatuoran sa Bibliya ug nagtabang kaniya nga modawat ug pagtuon sa Bibliya. Dayon, ang lola ni Mari Carmen, ang mas tigulang nga Ana, nagpakita usab ug interes sa Bibliya. Ngadtongadto, napulo ka membro sa maong pamilya ang nagpabawtismo.

Sa adlaw sa ilang bawtismo, malipayon kaayo ang panagway sa duha ka Ana, ang inahan ug anak. “Si Jehova maayo kaayo kanako kay gitugotan ko niya nga mailhan siya,” miingon ang 107-anyos nga si Ana. “Sa dili pa moabot ang Paraiso,” misumpay ang anak, “gusto kong moalagad kang Jehova, nga magbuhat sa iyang kabubut-on ug magsangyaw sa maayong balita kutob sa akong mahimo.”

Ang pagtambong sa mga tigom ilabinang nakapalipay niining duha ka biyuda. “Dili gyod sila mopalta sa tigom,” nag-ingon ang usa ka ansiyano sa ilang kongregasyon. “Kanunay silang mokomento sa Pagtuon sa Bantayanang Torre.”

Ang ilang pagkamatinumanon magpahinumdom kanato sa biyudang si Ana “nga wala gayod mopalta sa templo, nga nagahatag ug sagradong pag-alagad adlaw ug gabii uban ang mga pagpuasa ug mga pangamuyo.” Tungod niadto nakapribilehiyo siya nga makakita sa batang si Jesus. (Luc. 2:36-38) Sa edad 84, si Ana dili pa tigulang kaayo nga mag-alagad kang Jehova, maingon man ang duha ka Ana nga gihisgotan dinhi.

Duna ka bay mga paryente nga gustong mamati sa mensahe sa Bibliya? O nakahibalag ka bag tigulang nga interesadong maminaw sa imong pagsangyaw? Ang maong mga tawo mahimong sama sa duha ka Ana nga gihisgotan dinhi, sanglit dili pa gayod ulahi aron sila mag-alagad sa matuod nga Diyos, si Jehova.

[Blurb sa panid 25]

“Si Jehova maayo kaayo kanako”

[Blurb sa panid 25]

“Sa dili pa moabot ang Paraiso, gusto kong moalagad kang Jehova”