May Hinungdan Ka sa Pagmaya

GIKAN sa kinagamyang buhing selula ngadto sa dagkong galaksiya, makita ang pagkaorganisado sa kalalangan ni Jehova. Dili kini ikatingala kay ang Maglalalang ‘dili Diyos sa kasamok.’ (1 Cor. 14:33) Ang kahikayan sa Diyos alang sa pagsimba kahibulongan usab. Tagda ang gihimo ni Jehova. Iyang giporma ang usa ka tibuok-kalibotang organisasyon sa gatosan ka milyong intelihenteng linalang—mga tawo ug manulonda—nga may kagawasan sa pagpili ug nagkahiusa sa putling pagsimba. Pagkakahibulongan!

Sa karaang Israel, ang yutan-ong bahin sa organisasyon sa Diyos mao ang Jerusalem, diin nahimutang ang templo ni Jehova ug nagpuyo ang iyang gitudlong hari. Usa ka Israelinhon nga nabihag sa Babilonya mipahayag sa iyang gibati bahin sa balaang siyudad: “Papilita ang akong dila sa akong alingagngag, kon ako dili mahinumdom kanimo, kon dili ko igapataas ang Jerusalem labaw sa pangunang hinungdan sa akong pagmaya.”—Sal. 137:6.

Kana bay imong gibati bahin sa organisasyon sa Diyos? Naghatag ba kanag labawng kalipay kanimo kay sa ubang butang? Nahibalo ba ang imong mga anak sa kasaysayan ug papel sa yutan-ong bahin sa organisasyon sa Diyos? Ila bang gipabilhan nga sila bahin sa tibuok-kalibotang panag-igsoonay sa mga Saksi ni Jehova? (1 Ped. 2:17) Mahimo ninyong ilakip sa inyong Pamilyahanong Pagsimba ang mosunod nga mga sugyot aron mas mapabilhan sa inyong pamilya ang organisasyon ni Jehova.

Isugilon ang “Kanhi Pang mga Adlaw”

Kada tuig, ang mga pamilya sa Israel magtigom sa pagsaulog sa Paskuwa. Sa dihang gisugdan ang pista, si Moises nagsugo sa katawhan: “Kon ang imong anak magpakisayod kanimo sa ulahi, nga mag-ingon, ‘Unsay kahulogan niini?’ nan ikaw magsulti kaniya, ‘Pinaagi sa kusog sa iyang kamot nga si Jehova nagpagawas kanamo gikan sa Ehipto, gikan sa balay sa mga ulipon.’” (Ex. 13:14) Ang pagpakiglabot ni Jehova sa mga Israelinhon dili angayng kalimtan. Daghang Israelinhong amahan ang nagsunod sa sugo ni Moises. Katuigan sa ulahi, usa ka Israelinhon miampo: “Oh Diyos, sa among igdulungog kami nakadungog, ang among mga katigulangan nagsugilon kanamo sa mga buhat nga imong gibuhat sa ilang mga adlaw, niadtong kanhi pang mga adlaw.”—Sal. 44:1.

Alang sa mga batan-on karon, ang kasaysayan sa mga Saksi ni Jehova sa milabay nga kapig 100 ka tuig mahimong sama usab sa “kanhi pang mga adlaw.” Sa unsang paagi ninyo kini isaysay sa inyong mga anak? Ang ubang ginikanan naggamit sa librong Mga Saksi ni Jehova—Mga Magmamantala sa Gingharian sa Diyos, Tinuig nga Basahon, mga pinatik nga asoy sa kinabuhi, ug ubang report sa teokratikanhong kasaysayan, lakip sa bag-ong DVD bahin sa katawhan sa Diyos sa modernong panahon. Ang mga video bahin sa paglutos nga nasinati sa mga igsoon sa kanhing Unyong Sobyet ug sa Nazi sa Germany magtudlo sa mga pamilya nga mosalig kang Jehova panahon sa mga pagsulay. Ilakip kana sa inyong Pamilyahanong Pagsimba. Kana maglig-on sa pagtuo sa inyong mga anak sa dihang mag-atubang ug mga pagsulay sa ilang integridad.

Apan, ang mga bata mahimong daling laayon kon estoryahan bahin sa kasaysayan. Busa ilangkit sila sa panaghisgot. Pananglitan, papilia ang inyong anak ug usa ka nasod, ipa-research ang teokratikanhong kasaysayan sa maong nasod, ug ipasaysay ang iyang nakat-onan. Tingali may mga karaang Saksi sa inyong kongregasyon nga  madapit sa inyong pamilyahanong pagsimba. Ang inyong anak mahimong mag-interbiyo kanila, nga magpaasoy sa ilang mga kasinatian. O mahimo ninyong ipadrowing sa inyong anak ang hinungdanong mga hitabo sa organisasyon—sama sa pagtukod sa usa ka sangang buhatan, internasyonal nga kombensiyon, o ang pagsangyaw gamit ang ponograpo.

Tun-i ang ‘Paglihok sa Tagsatagsa ka Bahin Niini’

Gitandi ni apostol Pablo ang Kristohanong kongregasyon sa ‘tibuok lawas nga gidugtong pinaagi sa tagsatagsa ka lutahan niini. Kon molihok ang tagsatagsa ka bahin sumala sa katungdanan niini, ang tibuok lawas motubo ug molig-on sa iyang kaugalingon pinaagi sa gugma.’ (Efe. 4:16, Ang Bag-ong Maayong Balita Biblia) Kon atong tun-an ang papel sa matag bahin sa lawas, mas mouswag ang atong apresasyon ug pagtahod sa atong Maglalalang. Sa susama, sa dihang atong susihon kon sa unsang paagi nagalihok ang organisasyon, kita makadayeg sa “nagkadaiya uyamot nga kaalam sa Diyos.”—Efe. 3:10.

Gihubit ni Jehova kon sa unsang paagi naglihok ang iyang organisasyon, lakip ang langitnong bahin niini. Pananglitan, siya nagtug-an kanato nga una niyang gihatag ang pagpadayag kang Jesu-Kristo, kinsa ‘nagpadala sa iyang manulonda ug pinaagi kaniya nagpadayag niini pinaagig mga ilhanan ngadto sa iyang ulipon nga si Juan, kinsa nagpamatuod.’ (Pin. 1:1, 2) Kon gipadayag sa Diyos ang paglihok sa langitnong bahin sa iyang organisasyon, nan gusto usab niya nga atong masabtan kon sa unsang paagi ‘ang tagsatagsa ka bahin niini naglihok’ sa yuta.

Pananglitan, kon hapit na ang duaw sa magtatan-aw sa sirkito, nganong dili ninyo hisgotan sa inyong pamilya ang mga responsabilidad ug pribilehiyo sa mga nagapanawng magtatan-aw? Sa unsang paagi sila nagtabang sa matag usa kanato? Ang ubang pangutana nga mahimong isukna mao: Nganong kinahanglang itaho ang oras nga gigugol sa ministeryo? Sa unsang paagi ang organisasyon gisuportahan sa pinansiyal? Sa unsang paagi giorganisar ang Nagamandong Lawas, ug sa unsang paagi nagtagana kinig espirituwal nga pagkaon?

Sa dihang atong masabtan kon sa unsang paagi giorganisar ang katawhan ni Jehova, kita makabenepisyo sa labing menos tulo ka paagi: Mas molalom ang atong apresasyon niadtong naghago alang kanato. (1 Tes. 5:12, 13) Kita matukmod sa pagsuportar sa teokratikanhong mga kahikayan. (Buh. 16:4, 5) Ug molig-on ang atong pagsalig sa mga nagapanguna samtang atong makita nga gibase nila sa Kasulatan ang mga desisyon ug kahikayan nga gihimo.—Heb. 13:7.

“Susiha ang mga Puloy-anang Torre Niini”

“Panglakaw kamo libot sa Zion, ug libota ninyo kini, ipha ang mga torre niini. Ipunting ang inyong mga kasingkasing sa kuta niini. Susiha ang mga puloy-anang torre niini, aron ikasugilon ninyo kini ngadto sa umaabot nga kaliwatan.” (Sal. 48:12, 13) Ang salmista nag-awhag sa mga Israelinhon nga moadto sa Jerusalem. Imong mahanduraw ang malipayong kasinatian sa Israelinhong mga pamilya nga miadto sa balaang siyudad alang sa tinuig nga mga pista ug nakakita sa matahom nga templo. Tino nga natukmod sila sa ‘pagsugilon niini sa umaabot nga kaliwatan.’

Hinumdomi ang rayna sa Sheba, kinsa sa sinugdan nagduhaduha sa mga taho bahin sa talagsaong pagmando ug kaalam ni Solomon. Unsay nakapakombinsir niya nga tinuod ang iyang nadungog? “Wala ako magbutang ug pagtuo sa ilang mga pulong,” siya miingon, “hangtod nga ako mianhi aron ang akong kaugalingong mga mata makakita.” (2 Cron. 9:6) Oo, makaapektar gayod kanato kon unsay makita sa atong “mata.”

Sa unsang paagi matabangan ninyo ang inyong mga anak nga makita nila mismo ang pagkatalagsaon sa organisasyon ni Jehova? Kon may sangang buhatan nga duol sa inyo, paningkamoti nga makaduaw niini. Pananglitan, si Mandy ug Bethany nagpuyo mga 1,500 kilometros gikan sa Bethel. Bisan pa niana, samtang  bata pa sila, daghang beses silang gidala sa ilang ginikanan sa Bethel aron mag-tour. “Abi namog ang Bethel estrikto kaayo ug para lang sa mga edaran,” sila miingon. “Pero nakahimamat mi didto ug mga batan-on nga kugihang nagtrabaho para kang Jehova ug malipayon kaayo sila! Among nakita nga dako gyod ang organisasyon ni Jehova, ug kami nadasig sa matag duaw namo sa Bethel.” Ang pagkakita nila mismo sa organisasyon sa Diyos nagtukmod kang Mandy ug Bethany sa pagpayunir, ug gani sila gidapit nga temporaryong mag-alagad sa Bethel.

May lain pang paagi nga atong ‘makita’ ang organisasyon ni Jehova, nga wala mahimo sa karaang Israel. Niining bag-o pa, ang katawhan sa Diyos nakadawat ug mga video ug DVD nga nagpakita sa lainlaing bahin sa organisasyon, sama sa: Jehovah’s Witnesses—Organized to Share the Good News, Our Whole Association of Brothers, To the Ends of the Earth, ug United by Divine Teaching. Sa dihang makita nimo ug sa imong pamilya ang paghago sa mga Bethelite, relief worker, misyonaryo, mga igsoon nga nangandam ug nag-organisar sa mga kombensiyon, molalom gayod ang imong apresasyon sa tibuok kalibotang panag-igsoonay.

Ang matag kongregasyon adunay importanteng papel sa pagsangyaw sa maayong balita ug sa pagsuportar sa mga igsoon sa ilang dapit. Apan, gahinig panahon uban sa inyong pamilya ang paghinumdom “sa tibuok kapunongan sa inyong mga igsoon dinhi sa kalibotan.” Kini makatabang kanimo ug sa imong mga anak nga magpabiling ‘lig-on sa pagtuo,’ kay nasabtan nimo nga may hinungdan ka sa pagmaya.—1 Ped. 5:9.

 [Kahon/Hulagway sa panid 18]

Organisasyon sa Diyos Angayng Ilakip sa Pagtuon

Daghan kitag makuhaag impormasyon aron makakat-on ug dugang bahin sa kasaysayan ug kalihokan sa organisasyon ni Jehova. Makatabang ang mosunod nga mga pangutana:

☞ Sa unsang paagi nagsugod ang buluhaton sa mga nagapanawng magtatan-aw sa atong adlaw?—Mga Saksi ni Jehova—Mga Magmamantala sa Gingharian sa Diyos, panid 222-227.

☞ Unsay nakapatalagsaon sa “Adlaw sa mga Bata” panahon sa 1941 nga Teokratikanhong Asembliya?—Mga Saksi ni Jehova—Mga Magmamantala sa Gingharian sa Diyos, panid 86, 88.

☞ Sa unsang paagi ang Nagamandong Lawas naghimog mga desisyon?—“Bug-os nga Pagpamatuod” sa Gingharian sa Diyos, panid 108-114.