Sunda si Kristo, ang Hingpit nga Pangulo

KADTONG nagsunod sa tawhanong mga pangulo sagad masagmuyo. Apan kadtong nagpasakop sa pagpangulo ni Kristo dili mobati niana. Si Jesus miingon: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag.” (Mat. 11:28, 29) Makapatagbaw ug makapalipay ang pagpangulo ni Jesus. Siya interesado kaayo sa timawa ug dinaogdaog, nga nagdapit kanila nga magpailalom sa iyang gaan nga yugo. Apan, unsay nalangkit sa pagsunod sa pagpangulo ni Jesus?

“Si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob,” misulat si apostol Pedro. (1 Ped. 2:21) Importante ba gayong mosunod kita sa mga tunob ni Jesus? Handurawa nga ikaw kauban sa usa ka grupo nga kinahanglang molatas sa dapit nga daghag mina ug usa ra ninyo ang nahibalo kon asa luwas nga moagi. Dili ba sundon nimo pag-ayo ang iyang mga tunob, nga tingali tumban pa gani ang iyang agi? Sa susama, ang atong umaabot nga kasegurohan nagdepende sa atong pagsunod pag-ayo sa panig-ingnan ni Jesus diha sa atong pagkinabuhi. Kana naglakip sa pagpamati ug pagsunod kaniya ug pagkooperar niadtong naghawas kaniya.

Pamati ug Sunda

Sa talitapos na ang iyang Wali sa Bukid, si Jesus miingon: “Ang matag usa nga magapatalinghog niining akong mga pulong ug magabuhat niini mahisama sa usa ka tawong maalamon, nga nagtukod sa iyang balay ibabaw sa dakong-bato. Ug mibundak ang ulan ug mibul-og ang baha ug mihuros ang hangin ug mihapak nianang balaya, apan kini wala mahugno, kay kini gitukod man ibabaw sa dakong-bato.”—Mat. 7:24, 25.

Gitawag ni Jesus nga “maalamon” ang tawo nga nagapatalinghog ug nagasunod sa iyang mga pulong. Kita ba nagpasundayag ug pagtahod ug pagpabili sa panig-ingnan ni Kristo pinaagi sa kinasingkasing nga pagsunod kaniya, o lagmit ba natong pilion ang mga sugo lamang ni Jesus nga sayon o kombenyenteng tumanon? Si Jesus miingon: “Ginabuhat ko kanunay ang mga butang nga makapahimuot [sa Diyos].” (Juan 8:29) Angay kitang maningkamot sa pagsundog sa maong panig-ingnan.

Sa unang siglo, ang mga apostoles nagpakitag maayong panig-ingnan sa pagpasakop sa pagpangulo ni Kristo. Sa usa ka higayon, si Pedro miingon kang Jesus: “Tan-awa! Gibiyaan namo ang tanang butang ug nagsunod kanimo.” (Mar. 10:28) Sa pagkatinuod, giisip sa mga apostoles nga bililhon kaayo ang pagpangulo ni Jesus mao nga kinabubut-on nilang gibiyaan ang ubang butang aron mosunod kaniya.—Mat. 4:18-22.

Pakigkooperar sa mga Hawas ni Kristo

Sa hapit nang mamatay si Jesus, iyang gihisgotan ang laing paagi diin atong masunod ang iyang pagpangulo. Siya miingon: “Siya nga magadawat kanako, magadawat usab kaniya nga nagpadala kanako.” (Juan 13:20) Gani, gitawag ni Jesus ang iyang dinihogang mga hawas ingong “mga igsoon.” (Mat. 25:40) Human sa pagkabanhaw ug pagsaka ni Jesus sa langit, ang iyang “mga igsoon” gitudlo sa paghawas kaniya, nga “kapuli ni Kristo” ingong mga embahador nga nag-awhag sa uban nga magpasig-uli kang Jehova nga Diyos. (2 Cor. 5:18-20) Kon atong giila ang pagkapangulo ni Kristo, kita angayng magpasakop sa iyang “mga igsoon.”

 Maayong susihon nato ang atong sanong sa nunot-sa-panahon nga Kasulatanhong tambag diha sa atong binase-sa-Bibliya nga mga basahon. Pinaagi sa atong pagtuon sa Kasulatan ug pagtambong sa mga tigom sa kongregasyon, mapahinumdoman kita sa mga pulong ni Kristo. (2 Ped. 3:1, 2) Atong gipakita ang kinasingkasing nga pagpabili niining suplay sa espirituwal nga pagkaon pinaagi sa regular nga pagpahimulos niini. Apan, unsay angay natong reaksiyon kon usahay masubli ang tambag? Pananglitan, ang Pulong sa Diyos nagtambag sa mga Kristohanon nga magminyo ‘diha lamang sa Ginoo.’ (1 Cor. 7:39) Kining ulohana balikbalik nang gihisgotan sa Bantayanang Torre sa kapig usa ka siglo. Gipasundayag gayod sa mga igsoon ni Kristo nga sila mahigugmaong naghunahuna sa atong espirituwal nga kaayohan pinaagi sa pagpatik ug mga artikulo bahin niini ug sa ubang inspiradong tambag. Ang pagpatalinghog sa maong mga pahinumdom maoy usa ka paagi sa pagpakita nga kita nagsunod sa atong hingpit nga Pangulo, si Jesu-Kristo.

“Ang dalan sa mga matarong ingon sa masanag nga kahayag nga nagaanam kadan-ag hangtod sa pagkahingpit sa adlaw,” nag-ingon ang Proverbio 4:18. Oo, ang pagpangulo ni Jesus maoy mauswagon, dili magpondo. Ang laing paagi sa pagkooperar sa “mga igsoon” ni Kristo mao ang pagbatog positibong tinamdan bahin sa dugang katin-awan sa mga kamatuoran sa Kasulatan nga gipatik sa “matinumanon ug maalamong ulipon.”—Mat. 24:45.

Gipasundayag usab nato ang atong pagpasakop sa “mga igsoon” ni Kristo pinaagi sa pagkooperar sa tinudlong mga magtatan-aw sa kongregasyon. Si apostol Pablo miingon: “Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag.” (Heb. 13:17) Pananglitan, ang usa ka ansiyano magdasig tingali kanato maylabot sa pagbatog regular nga Pamilyahanong Pagsimba o maghatag ug mga sugyot bahin sa atong ministeryo sa kanataran. Ang usa ka nagapanawng magtatan-aw mohatag tingali ug Kasulatanhong tambag bahin sa Kristohanong pagkinabuhi. Ang atong kaandam sa pagpadapat sa maong tambag magpakita nga kita nagsunod kang Jesus ingong atong Pangulo.

Ikasubo nga dili epektibo ang pagpangulo niining kalibotana. Apan makalilipay ang pagsunod sa mahigugmaong pagpangulo ni Kristo! Busa, sundon gayod nato ang atong Pangulo ug mokooperar sa mga hawas nga gigamit niya karon.

[Mga hulagway sa panid 27]

Sundon ba nimo ang Kasulatanhong tambag nga dili makigyugo uban sa dili-magtutuo?