Mahimo Kang Magmalipayon sa Panimalay nga Magkalahig Relihiyon
Mahimo Kang Magmalipayon sa Panimalay nga Magkalahig Relihiyon
‘Unsaon nimo pagkahibalo nga maluwas mo ang imong kapikas?’—1 COR. 7:16.
UNSAY TUBAG NIINI?
Unsay mahimo sa mga Kristohanon aron maugmad ang kalinaw diha sa panimalay nga magkalahig relihiyon?
Sa unsang paagi matabangan sa Kristohanon ang iyang pamilya sa pagdawat sa kamatuoran?
Unsay mahimo sa uban aron matabangan ang mga igsoon nga may pamilyang dili Saksi?
1. Kon ang usa modawat sa kamatuoran, unsa kahay epekto niini sa iyang pamilya?
USA ka higayon niana, gisugo ni Jesus ang iyang mga apostoles: “Sa inyong pagpanglakaw, pagwali, nga magaingon, ‘Ang gingharian sa mga langit haduol na.’” (Mat. 10:1, 7) Kining maayong balita maghatag ug kalinaw ug kalipay niadtong mapabilhong modawat niini. Apan gipasidan-an sila ni Jesus nga daghan ang mosupak sa ilang pagsangyaw. (Mat. 10:16-23) Ilabinang lisod sagubangon kon ang mosupak mao ang mga membro sa pamilya.—Basaha ang Mateo 10:34-36.
2. Nganong mahimong magmalipayon ang mga Kristohanon diha sa panimalay nga magkalahig relihiyon?
2 Dili na ba diay kita magmalipayon diha sa panimalay nga magkalahig relihiyon? Dili man pod sa ingon. Usahay ang pipila grabeng gisupak sa ilang pamilya, apan ang uban wala ra. Gawas pa, ang pagsupak mahimong dili permanente. Nagdepende kana kon unsay atong reaksiyon sa pagsupak ug kawalay interes. Dugang pa, tabangan ni Jehova nga magmalipayon ang mga maunongon kaniya bisan pa sa kalisdanan. Ang mga Kristohanon mas magmalipayon kon sila (1) maningkamot nga maugmad ang kalinaw diha sa panimalay ug (2) sinserong motabang sa ilang pamilya sa pagdawat sa kamatuoran.
UGMARA ANG KALINAW DIHA SA PANIMALAY
3. Nganong angayng ugmaron sa usa ka Kristohanon ang kalinaw diha sa panimalay?
3 Ang pamilya mahimong modawat sa kamatuoran kon adunay kalinaw diha sa panimalay. (Basaha ang Santiago 3:18.) Bisag ang pamilya sa usa ka Kristohanon wala pa mosimba kang Jehova, siya angayng maningkamot nga maugmad ang kalinaw diha sa panimalay. Unsaon niya kana paghimo?
4. Sa unsang paagi mahuptan sa mga Kristohanon ang kalinaw sa hunahuna?
4 Angayng huptan sa mga Kristohanon ang kalinaw sa hunahuna. Kini nagkinahanglag tim-os nga pag-ampo alang sa “kalinaw sa Diyos nga labaw sa tanang panghunahuna.” (Filip. 4:6, 7) Kita magmalipayon ug magmalinawon kon kita makakat-on bahin kang Jehova ug magpadapat sa mga prinsipyo sa Bibliya. (Isa. 54:13) Kinahanglan usab kitang makigbahin sa mga tigom ug masibotong mosangyaw. Ang mga Kristohanon makahimo gihapon niini bisag ang panimalay magkalahig relihiyon. Pananglitan, tagda si Enza, * kansang bana supak kaayo sa kamatuoran. Siya mosangyaw kon mahuman na niya ang iyang buluhaton sa balay. Si Enza miingon, “Pirme kong panalanginan ni Jehova sa matag higayon nga maningkamot kong mosangyaw.” Ang maong mga panalangin naghatag gayod kaniyag kalinaw, katagbawan, ug kalipay.
5. Unsang hagit ang sagad atubangon sa mga Kristohanon diha sa panimalay nga magkalahig relihiyon, ug unsay makatabang kanila?
5 Kinahanglang maningkamot kita nga maugmad ang kalinaw uban sa dili-magtutuong mga membro sa pamilya. Usa kini ka hagit kay usahay may ipabuhat sila kanato nga supak sa mga prinsipyo sa Bibliya. Kon dili nato sila panuntan, basig masuko sila nato. Apan ang atong pagsunod sa mga prinsipyo sa Bibliya sa ngadtongadto mopatungha rag kalinaw. Siyempre, maningkamot tang mokooperar sa pamilya kon walay prinsipyong malapas aron malikayan ang tensiyon. (Basaha ang Proverbio 16:7.) Kon duna tay problema, kinahanglang manukiduki ta sa mga publikasyon sa matinumanon ug maalamong ulipon ug mangayog tambag sa mga ansiyano.—Prov. 11:14.
6, 7. (a) Nganong ang pipila mosupak sa mga membro sa pamilya nga nagtuon uban sa mga Saksi? (b) Unsay angayng himoon sa usa ka estudyante sa Bibliya o sa usa ka Saksi kon supakon siya sa pamilya?
6 Atong maugmad ang kalinaw sa panimalay kon kita mosalig kang Jehova ug maningkamot nga masabtan ang pagbati sa dili-magtutuong mga membro sa pamilya. (Prov. 16:20) Bisan ang bag-o pang nagtuon sa Bibliya makahimo niini. Ang ubang dili-magtutuong bana o asawa tingali dili ra mosupak kon ang ilang kapikas magtuon sa Bibliya. Gani, moingon pa sila nga makaayo kini sa pamilya. Apan ang pipila hugot nga mosupak. Si Esther, nga Saksi na karon, miingon nga nasuko kaayo siya dihang ang iyang bana nagtuon sa Bibliya uban sa mga Saksi. “Akong gilabay o gisunog ang iyang mga basahon,” matod niya. Si Howard supak kanhi sa pagtuon ug Bibliya sa iyang asawa. Siya miingon: “Daghang bana ang nahadlok nga basig nailad ang ilang asawa sa pag-anib ug usa ka sekta. Ang bana wala tingali masayod kon unsay himoon bahin niini ug lagmit masuko pag-ayo.”
7 Ang usa ka estudyante sa Bibliya nga gisupak sa iyang kapikas kinahanglang pasabton nga dili siya angayng moundang sa pagtuon. Sagad moarang-arang ang kahimtang kon pakitaan niyag kalumo ug pagtahod ang iyang dili-magtutuong kapikas. (1 Ped. 3:15) Si Howard miingon, “Maayo gani kay pirmeng kalmado ang akong asawa.” Matod sa iyang asawa: “Giingnan ko ni Howard nga moundang sa pagtuon ug Bibliya kay gi-brainwash lang kono ko. Inay makig-ergo, miingon ko nga basig sakto siya, apan ako sab siyang giingnan nga wala ko mobati niana. Busa akong gipabasa niya ang libro nga akong gitun-an. Iya kining gibasa ug siya nakauyon niini. Kini nakatandog gayod kaniya.” Hinumdomi nga ang dili-magtutuong kapikas lagmit mobating gipasagdan o mangabugho dihang ang ilang kapikas motambong ug tigom o mosangyaw. Apan kon pasaligan sa usa ang iyang dili-magtutuong kapikas sa iyang gugma, makatabang kini nga dili na mabalaka ang iyang kapikas.
TABANGI SILA SA PAGDAWAT SA KAMATUORAN
8. Unsay gitambag ni apostol Pablo niadtong may dili-magtutuong kapikas?
8 Gitambagan ni apostol Pablo ang mga Kristohanon nga dili bulagan ang ilang kapikas tungod lang kay kini dili magtutuo. * (Basaha ang 1 Corinto 7:12-16.) Kon hunahunaon sa Kristohanon nga basig ma-Saksi ra ang iyang kapikas, kini makatabang kaniya nga magmalipayon. Apan angay siyang magmataktikanhon dihang ipaambit ang kamatuoran ngadto sa iyang kapikas, ingon sa gipakita sa mosunod nga mga kasinatian.
9. Nganong magmataktikanhon dihang magpaambit sa kamatuoran ngadto sa dili-magtutuong mga membro sa pamilya?
9 Sa paghinumdom sa iyang reaksiyon niadtong bag-o pa siyang nakakat-on sa kamatuoran, si Jason miingon, “Gusto ko kining ipaambit sa tanan!” Dihang masabtan sa estudyante ang kamatuoran, malipay kaayo siyang mopaambit niini halos sa tanang panahon. Tingali magdahom siya nga dawaton dayon sa iyang dili-magtutuong pamilya ang mensahe sa Gingharian, apan basin dili kini ang mahitabo. Unsay reaksiyon sa asawa ni Jason sa iyang kadasig? “Alingugngog kaayo siya,” matod pa niya. Ang usa ka babaye nga midawat sa kamatuoran paglabayg 18 ka tuig human ma-Saksi ang iyang bana miingon: “Kinahanglang anam-anam ko kining makat-onan.” Kon may gidumalahan kag pagtuon sa Bibliya kansang kapikas dili interesado, tabangi siya kon unsaon pagpaambit ang kamatuoran sa iyang kapikas sa mataktikanhong paagi. Si Moises miingon: “Ang akong pagtulon-an magatulo ingon sa ulan, ang akong pulong modaligdig ingon sa yamog, ingon sa alindahaw diha sa balili.” (Deut. 32:2) Ang ginagmayng tulo sa kamatuoran nga gisulti sa hustong paagi ug panahon mas epektibo kay sa paulanan siyag mga pulong.
10-12. (a) Unsay gitambag ni apostol Pedro sa mga Kristohanon nga may dili-magtutuong kapikas? (b) Giunsa pagpadapat sa usa ka estudyante sa Bibliya ang tambag sa 1 Pedro 3:1, 2?
10 Gitambagan ni apostol Pedro ang mga asawa nga may dili-magtutuong bana: “Magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.” (1 Ped. 3:1, 2) Matabangan sa asawa ang iyang bana sa pagdawat sa kamatuoran kon siya magpasakop ug may lawom nga pagtahod kaniya, bisag dili maayong motratar ang iyang bana. Sa susama, ang magtutuong bana angayng mogawi sa diyosnong paagi ug magmahigugmaon ingong ulo sa pamilya bisag supakon siya sa iyang dili-magtutuong asawa.—1 Ped. 3:7-9.
11 Daghang Kristohanon karon ang nakabenepisyo sa pagsunod sa tambag ni Pedro. Usa niana si Selma. Dihang nagtuon siya uban sa mga Saksi, wala malipay ang iyang bana nga si Steve. “Ako nasuko, nangabugho, ug nabalaka,” matod ni Steve. Si Selma miingon: “Pirme kong magkinto kang Steve kay init siyag ulo. Ug misamot pa kini dihang nagtuon ko sa Bibliya.” Unsay nakapausab sa kahimtang?
12 Nahinumdoman ni Selma ang leksiyon nga iyang nakat-onan gikan sa Saksi nga nagtudlo kaniya. Siya miingon: “Usa ka adlaw niana, dili ko gustong magtuon ug Bibliya kay sa miaging gabii gidapatan ko ni Steve dihang naglalis mi, ug naguol ko sa nahitabo. Human nako suginli ang sister bahin niini ug sa akong gibati, gipabasa niya nako ang 1 Corinto 13:4-7. Nangatarongan ko, ‘Walay bisan usa niining mga aspekto sa gugma ang gipakita ni Steve kanako.’ Apan gipangutana ko sa sister, ‘Hain niini ang imong gipakita sa imong bana?’ Mitubag ko, ‘Wala, kay lisod man siyang ikauban.’ Ang sister malumong misukna, ‘Sel, kinsa may nagtuon ug Bibliya, ikaw o si Steve?’ Kay nakaamgo nga kinahanglan kong magbag-o, miampo ko kang Jehova nga tabangan kong mas magmahigugmaon kang Steve. Sa inanay nausab ra ang kahimtang.” Paglabayg 17 ka tuig, si Steve midawat sa kamatuoran.
KON UNSAY IKATABANG SA UBAN
13, 14. Unsay atong mahimo aron makatabang niadtong anaa sa panimalay nga magkalahig relihiyon?
13 Sama sa taligsik nga motumog sa yuta ug magpatubo sa tanom, daghang igsoon sa kongregasyon ang makatabang nga magmalipayon ang mga Kristohanon diha sa panimalay nga magkalahig relihiyon. “Ang gipakitang gugma sa mga igsoon kanako maoy nakatabang aron makabarog kong malig-on sa kamatuoran,” matod ni Elvina nga taga-Brazil.
14 Ang kalulot ug interes nga gipakita sa mga igsoon mahimong makatandog sa kasingkasing sa dili-magtutuong membro sa pamilya. Sa Nigeria, ang usa ka bana nga midawat sa kamatuoran 13 ka tuig human ma-Saksi ang iyang asawa miingon: “Samtang nagbiyahe ko kauban sa usa ka Saksi, nadaot ang iyang sakyanan. Nangita siyag mga Saksi sa sikbit nga baryo, ug ila ming gihatagag kasak-an sa pagpalabay sa kagabhion. Ila ming giatiman nga morag dugay na kaayo ming kaila. Dihadiha, nakita ko ang Kristohanong gugma nga kanunayng gihisgotan sa akong asawa.” Sa England, usa ka asawa nga na-Saksi 18 ka tuig human ma-Saksi ang iyang bana ang nahinumdom: “Kaming duha sa akong bana ginaimbitar sa mga Saksi sa pagpangaon. Wala ko nila isipa nga laing tawo.” * Usa ka bana nga na-Saksi sa ulahi sa mao gihapon nga dapit ang miingon: “Ang mga igsoon moduaw kanamo, o imbitahon mi nila sa ilang balay, ug maayo kaayo sila kanako. Ilabina nako ning nakita niadtong naospital ko ug daghan ang miduaw.” Ikapakita ba usab nimo ang samang interes ngadto sa pamilya sa nag-inusarang Saksi?
15, 16. Unsay makatabang niadtong nag-inusara sa kamatuoran nga mahuptan ang kalipay?
15 Siyempre, dili tanang membro sa atong pamilya ang modawat sa kamatuoran bisag dugay na kitang nagpakitag maayong panggawi ug nagmataktikanhon sa pagsangyaw kanila. Ang uban nagpabilin gihapong dili interesado o magsusupak. (Mat. 10:35-37) Apan kon ang mga Kristohanon magpasundayag ug diyosnong panggawi, mahimong maayo kaayo ang epekto niini. Usa ka bana nga kanhi dili magtutuo ang miingon: “Kon ang magtutuong kapikas magpakitag maayong mga hiyas, basig kini ang makapabag-o sa hunahuna ug kasingkasing sa dili-magtutuong kapikas. Busa ayawg hunong sa pagtabang sa imong dili-magtutuong kapikas.”
16 Bisag wala modawat sa kamatuoran ang mga membro sa pamilya, mahimo gihapong magmalipayon ang usa ka Kristohanon. Bisan pag wala ma-Saksi ang iyang bana human sa 21 ka tuig nga paningkamot sa usa ka sister, siya miingon: “Nagmalipayon gihapon ko pinaagi sa akong pagpaningkamot nga mapahimut-an si Jehova, sa pagpabiling maunongon kaniya, ug sa pagpalig-on sa akong espirituwalidad. Tungod sa akong regular nga personal nga pagtuon, pagtambong sa mga tigom, pagsangyaw, ug pagtabang sa uban sa kongregasyon, mas nasuod ko kang Jehova ug naampingan ang akong kasingkasing.”—Prov. 4:23.
AYAWG KALUYA!
17, 18. Unsay makatabang sa usa ka Kristohanon diha sa panimalay nga magkalahig relihiyon nga dili mawad-ag paglaom?
17 Kon ikaw usa ka maunongong Kristohanon nga nagpuyo sa panimalay nga magkalahig relihiyon, ayawg kaluya. Hinumdomi nga “si Jehova dili motalikod sa iyang katawhan tungod sa iyang dakong ngalan.” (1 Sam.12:22) Siya magauban kanimo basta ikaw magmaunongon kaniya. (Basaha ang 2 Cronicas 15:2.) Busa ‘pagbaton ug tumang kalipay diha kang Jehova,’ ug ‘itugyan kaniya ang imong dalan, ug salig kaniya.’ (Sal. 37:4, 5) “Lahutay sa pag-ampo,” ug magmasaligon nga ang atong mahigugmaon nga langitnong Amahan motabang kanimo sa paglahutay sa tanang matang sa kalisdanan.—Roma 12:12.
18 Pangamuyo alang sa balaang espiritu ni Jehova aron tabangan kang magmakigdaiton diha sa panimalay. (Heb. 12:14) Pinaagi niini, basin matandog ra ang kasingkasing sa dili-magtutuong mga membro sa pamilya. Mabatonan nimo ang kalipay ug kalinaw sa kasingkasing ug hunahuna samtang imong ‘buhaton ang tanang butang alang sa kahimayaan sa Diyos.’ (1 Cor. 10:31) Duyog niining tanan, makapalipay ang pagkasayod nga ikaw mahigugmaong gipaluyohan sa imong mga igsoon sa pagtuo!
[Mga footnote]
^ par. 4 Ang mga ngalan giilisan.
^ par. 8 Ang tambag ni Pablo wala magdili sa legal nga panagbulag ubos sa grabeng mga kahimtang. Kini maoy seryosong personal nga desisyon. Tan-awa ang librong Magpabilin Kamo sa Gugma sa Diyos, panid 220-221.
^ par. 14 Ang pagpangaon uban sa mga dili magtutuo wala idili sa Kasulatan.—1 Cor. 10:27.
[Mga Pangutana sa Pagtuon]
[Hulagway sa panid 28]
Pangitag maayong higayon sa pagpatin-aw sa imong pagtuo
[Hulagway sa panid 29]
Ipakita ang interes sa dili-magtutuong mga kapikas
