Paningkamoti nga Mapalig-on ang Inyong Kaminyoon
Paningkamoti nga Mapalig-on ang Inyong Kaminyoon
“Hatagan ko ug mga instruksiyon ang mga minyo, hinuon dili ako kondili ang Ginoo.”—1 COR. 7:10.
MAKAPATIN-AW KA BA?
Nganong makaingon kita nga ang Diyos maoy naghiusa pagyugo sa mga magtiayon?
Sa unsang paagi ang mga ansiyano makatabang sa mga Kristohanon nga may problema sa kaminyoon?
Unsay angay natong panglantaw sa kaminyoon?
1. Unsay panglantaw sa mga Kristohanon bahin sa kaminyoon, ug ngano?
DIHANG magminyo ang mga Kristohanon, sila manumpa atubangan sa Diyos. Seryoso kini nga responsabilidad. (Eccl. 5:4-6) Kay si Jehova man ang Tagmugna sa kaminyoon, siya ang ‘naghiusa pagyugo’ sa mga magtiayon. (Mar. 10:9) Sa panglantaw sa Diyos, ang mga magtiayon nahiusa pagyugo bisag unsa pay balaod sa nasod bahin sa kaminyoon. Angay gayong tumanon sa mga alagad ni Jehova ang ilang panaad sa kaminyoon, Saksi man sila o dili sa dihang sila gikasal.
2. Unsang mga pangutana ang hisgotan niini nga artikulo?
2 Ang malamposong kaminyoon moresultag dakong kalipay. Apan unsay atong mahimo kon dili malipayon ang kaminyoon? Masalbar pa ba kini? Unsang tabang ang mabatonan sa mga magtiayon kansang kaminyoon nameligrong mabungkag?
MAGMALIPAYON KAHA KINI O DILI?
3, 4. Unsay lagmit mahitabo kon ang usa dili magmaalamon sa pagpilig kapikas?
3 Kon magmalamposon ang kaminyoon sa usa ka Kristohanon, kini makapalipay ug makapasidungog kang Jehova. Apan kon kini mapakyas, kini makapaguol gayod. Ang tagsaanong Kristohanon nga nagplanong magminyo mahimong magmalipayon kon sa sinugdanan pa lang siya nagpagiya na sa Diyos. Sa laing bahin, ang usa nga dili magmaalamon sa pagpilig kapikas mahimong makasinatig kahigawad ug kaguol. Pananglitan, may mga batan-on nga nakigdeyt na bisag dili pa andam magminyo. Ang uban nangitag kapikas diha sa Internet ug nagdalidalig minyo, apan sa ulahi wala magmalipayon. Ang uban usab nakahimog seryosong sala samtang trato pa ug nagpakasal sa ulahi, apan sila lagmit misulod sa kaminyoon nga wala na kaayoy pagtahod sa usag usa.
4 Ang pipila ka Kristohanon nagminyog dili magtutuo ug nag-antos kay dili alagad ni Jehova ang ilang kapikas. (1 Cor. 7:39) Kon kini ang imong kahimtang, pangayog pasaylo sa Diyos ug hangyoa ang iyang tabang pinaagi sa pag-ampo. Dili niya kuhaon ang mga epekto sa nangaging mga sala, apan siya motabang sa mga mahinulsolon sa pagsagubang niana. (Sal. 130:1-4) Paningkamoti gayod nga mapahimut-an ang Diyos, ug “ang kalipay ni Jehova” magpalig-on kanimo.—Neh. 8:10.
DIHANG MAMELIGRONG MABUNGKAG ANG KAMINYOON
5. Kon dili malipayon ang kaminyoon, unsang panghunahuna ang angayng likayan?
5 Kadtong dili malipayon sa ilang kaminyoon lagmit maghunahuna: ‘Angay pa ba nakong isalbar ang akong kaminyoon? Kon pwede lang ibalik ang panahon, magminyo kog lain!’ Basig naghunahuna silang bulagan ang ilang kapikas ug moingon: ‘Gusto kong makagawas niini nga kaminyoon! Makigdiborsiyo kaha ko? Bisag dili ko makakuhag Kasulatanhong diborsiyo, makigbulag gihapon ko ug mag-enjoy pag-usab sa kinabuhi.’ Imbes maghunahunag ingon niini, angayng himoon sa mga Kristohanon ang ilang maarangan sa pagpadapat sa giya sa Diyos sa presente nilang kahimtang.
6. Ipatin-aw ang giingon ni Jesus sa Mateo 19:9.
6 Kon makigdiborsiyo ang usa ka Kristohanon, siya mahimong aduna o walay Kasulatanhong kagawasan nga magminyo pag-usab. Si Jesus miingon: “Bisan kinsa nga makigdiborsiyo sa iyang asawa, gawas kon tungod sa pakighilawas, ug magminyog lain makapanapaw.” (Mat. 19:9) Ang “pakighilawas” naglakip sa pagpanapaw ug sa ubang seryosong sala bahin sa pagpakigsekso. Ang usa ka Kristohanon kinahanglang moampo sa Diyos alang sa giya kon siya naghunahunang makigdiborsiyo sa iyang kapikas nga nakapakighilawas.
7. Unsay lagmit hunahunaon sa mga tawo kon napakyas ang kaminyoon sa magtiayong Kristohanon?
7 Ang kaminyoon nga mosangko sa panagbulag o diborsiyo mahimong magpaila nga huyang ang espirituwalidad sa usa. Si apostol Pablo nangutana: “Kon si bisan kinsa dili makamao sa pagdumala sa iyang kaugalingong panimalay, unsaon man niya pag-atiman sa kongregasyon sa Diyos?” (1 Tim. 3:5) Kon ang magtiayon moingon nga sila mga Kristohanon apan napakyas ang ilang kaminyoon, lagmit hunahunaon sa mga tawo nga wala nila ipadapat ang ilang gitudlo.—Roma 2:21-24.
8. Unsa kahay problema kon ang magtiayong Kristohanon magbulag?
8 Kon ang magtiayong Kristohanon nagplanong magbulag o magdiborsiyo nga walay Kasulatanhong basehanan, lagmit may problema ang ilang espirituwalidad. Tingali ang usa nila o silang duha wala magpadapat sa mga prinsipyo sa Bibliya. Kon sila mosalig gayod kang Jehova sa bug-os nilang kasingkasing, masalbar pa nila ang ilang kaminyoon.—Basaha ang Proverbio 3:5, 6.
9. Sa unsang paagi napanalanginan ang pipila ka Kristohanon nga naningkamot sa pagsalbar sa ilang kaminyoon?
9 Daghang kaminyoon nga morag dili na masalbar ang nagmalamposon sa ulahi. Ang mga Kristohanon nga wala magdalidalig desisyon sa pagbulag sagad napanalanginan. Pananglitan, hunahunaa kon unsay posibleng mahitabo kon ang bana dili magtutuo. Si apostol Pablo misulat: “Kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.” (1 Ped. 3:1, 2) Oo, tungod sa maayong panggawi sa asawa, ang bana lagmit modawat sa kamatuoran. Ang nasalbar nga kaminyoon magpasidungog sa Diyos, ug dako kining panalangin sa tibuok pamilya.
10, 11. Unsang wala damhang mga problema ang lagmit motungha diha sa kaminyoon, ug unsang tabang ang malaoman sa usa ka Kristohanon?
10 Kadaghanan sa tagsaanong mga Kristohanon nakigminyog bawtismadong isigkamagtutuo kay gusto nilang mapahimut-an si Jehova. Apan usahay mahitabo ang wala damhang mga kahimtang. Basig ang usa ka kapikas makabatog grabeng emosyonal nga problema. O paglabay sa pipila ka panahon human sa kasal, ang usa mahimong dili na aktibong magmamantala. Susama niini ang nahitabo kang Linda, nga usa ka dasig nga magmamantala ug mahigugmaong inahan. * Hilabihan niyang guola dihang ang iyang bana nakahimog seryosong sala ug napalagpot. Unsay angayng himoon sa usa ka Kristohanon kon morag mabungkag na ang ilang kaminyoon tungod niini?
11 Tingali makahunahuna ka: ‘Kinahanglan ba gyod nakong isalbar ang akong kaminyoon bisag unsay mahitabo?’ Ikaw ray makadesisyon niana. Apan dunay maayong mga rason sa pagsalbar sa nagakahuyang nga kaminyoon. Ang usa ka Kristohanon nga moagwanta sa problemadong kaminyoon tungod sa ilang konsensiya maoy bililhon sa Diyos. (Basaha ang 1 Pedro 2:19, 20.) Pinaagi sa iyang Pulong ug espiritu, tabangan ni Jehova ang mga Kristohanon nga naningkamot pag-ayo sa pagsalbar sa ilang kaminyoon.
ANDAM SILANG MOTABANG
12. Unsay bation sa mga ansiyano kon mangayo kitag tabang kanila?
12 Kon may problema ang inyong kaminyoon, ayaw pagpanuko sa pagpangayog tabang sa hamtong nga mga Kristohanon. Ang mga ansiyano maoy mga magbalantay sa kongregasyon ug malipay silang mopakita kaninyo sa tambag sa Diyos diha sa Bibliya. (Buh. 20:28; Sant. 5:14, 15) Ayawg hunahunaa nga basig mawad-ag pagtahod ang mga ansiyano kaninyo kon inyong isulti kanila ang seryoso ninyong problema sa panagtiayon ug mangayog tabang kanila. Mosamot pa gani ang ilang gugma ug pagtahod kaninyo dihang ilang makita nga buot gayod ninyong pahimut-an ang Diyos.
13. Unsay gitambag diha sa 1 Corinto 7:10-16?
13 Kon ang usa ka Kristohanon kansang kapikas dili magtutuo magpatambag sa mga ansiyano, mahimong gamiton sa mga ansiyano ang tambag ni Pablo: “Hatagan ko ug mga instruksiyon ang mga minyo, hinuon dili ako kondili ang Ginoo, nga ang asawa dili gayod mobiya sa iyang bana; apan kon siya mobiya man gayod, magpabilin siyang dili-minyo o makig-uli ba hinuon sa iyang bana; ug ang bana dili gayod mobiya sa iyang asawa. . . . Kay, unsaon god nimo pagkahibalo, asawa, nga maluwas mo ang imong bana? O, unsaon god nimo pagkahibalo, bana, nga maluwas mo ang imong asawa?” (1 Cor. 7:10-16) Pagkadakong panalangin kon ang dili magtutuong kapikas mahimong alagad ni Jehova!
14, 15. Unsa nga mga kahimtang nga tingali modesisyon ang asawa sa pagbiya sa iyang bana? Nganong angay una kining hunahunaog maayo ug iampo sa Diyos?
14 Unsa nga mga kahimtang nga ang Kristohanong asawa mahimong ‘mobiya gayod’ sa iyang bana? Ang pipila ka Kristohanon midesisyon sa pagbiya kay ang ilang kapikas dili mosustento sa pamilya, grabeng managmal, o nagpameligro sa ilang espirituwalidad.
15 Makigbulag man o dili, personal kana nga desisyon. Apan angay una kining hunahunaog maayo ug iampo sa usa ka Kristohanon. Pananglitan, ang dili magtutuong kapikas lang ba gayod ang rason nga nameligro ang iyang espirituwalidad? O basig ang Kristohanon dili regular sa pagtuon sa Bibliya, pagtambong sa mga tigom, ug pagsangyaw?
16. Unsay magpugong kanato sa pagdalidalig desisyon sa pagpakigbulag o pagpakigdiborsiyo?
16 Ang atong pagpabili sa atong relasyon sa Diyos ug sa iyang gasa nga kaminyoon angayng magpugong kanato sa pagdalidalig desisyon sa pagpakigbulag o pagpakigdiborsiyo. Ingong mga alagad ni Jehova, hinungdanon kanato ang pagbalaan sa iyang ngalan. Busa dili gayod kita mohimog tusong mga paagi sa pagpakigbulag sa atong kapikas aron makaminyog lain.—Jer. 17:9; Mal. 2:13-16.
17. Sa unsang mga kahimtang nga ‘gitawag sa Diyos ngadto sa kalinaw’ ang minyong Kristohanon?
17 Ang Kristohanon nga may dili magtutuong kapikas kinahanglang maningkamot sa pagpalig-on sa ilang kaminyoon. Apan dili niya angayng basolon ang iyang kaugalingon kon ang iyang dili magtutuong kapikas makigbulag gihapon bisan pa sa tanan niyang paningkamot nga masalbar ang ilang kaminyoon. “Apan kon ang dili-magtutuo mobiya, pabiyaa siya,” matod ni Pablo. “Ang igsoon nga lalaki o babaye wala maulipon ilalom sa maong mga kahimtang, apan gitawag kamo sa Diyos ngadto sa kalinaw.”—1 Cor. 7:15. *
SALIG KANG JEHOVA
18. Bisag dili na masalbar ang kaminyoon, unsa tingali maayong resulta kon maningkamot ta sa pagsalbar niini?
18 Kon may problema ang kaminyoon, pag-ampo kang Jehova nga hatagan kag kaisog ug salig kanunay kaniya. (Basaha ang Salmo 27:14.) Tagda si Linda, nga gihisgotan ganina. Daghang tuig siyang naningkamot sa pagsalbar sa ilang kaminyoon apan misangko gihapon kini sa diborsiyo. Mibati ba siyang nausik lang ang iyang paningkamot? “Wala gayod,” siya miingon. “Nakahatag kinig maayong pamatuod sa uban. Hinlo sab ang akong konsensiya. Labaw sa tanan, kadtong mga tuiga nakatabang sa among anak nga magpabiling lig-on sa kamatuoran. Siya nagdako nga masiboton ug dedikadong Saksi ni Jehova.”
19. Unsa tingali resulta kon paningkamotang masalbar ang kaminyoon?
19 Ang usa ka Kristohanon nga ginganlag Marilyn nalipay nga siya misalig sa Diyos ug naningkamot pag-ayo sa pagsalbar sa iyang kaminyoon. “Gusto na unta nakong bulagan ang akong bana kay wala na siya mosustento nako ug nameligro ang akong espirituwalidad,” matod niya. “Ansiyano siya kaniadto, apan nalangkit siya sa dili maayong mga palakaw sa negosyo. Dili na siya regular sa pagtambong sa mga tigom, ug wala na mi mag-estoryahay. Dihang giatake sa mga terorista ang among siyudad, hilabihan nakong hadloka mao nga wala na ko makig-uban sa mga igsoon. Apan akong naamgohan nga may sayop pod ko. Nagkaestoryahay na pod mi sa akong bana, napasig-uli ang among pagtuon sa pamilya, ug regular na sa mga tigom. Buotan ug matinabangon kaayo ang mga ansiyano. Mas maayo na ang among panagtiayon. Sa ngadtongadto, nakadawat na usab ug mga pribilehiyo sa kongregasyon ang akong bana. Dili lalim ang among nasinatian, apan duna kini maayong mga resulta.”
20, 21. Bahin sa kaminyoon, unsay determinado natong buhaton?
20 Minyo man kita o dili, magmalig-on kita ug mosalig kanunay kang Jehova. Kon may problema ang atong kaminyoon, maningkamot kita sa pagsulbad niini ug hinumdoman nato nga ang mga magtiayon ‘dili na duha, kondili usa ka unod.’ (Mat. 19:6) Ug hinumdomi nga kon kita mounong sa atong dili magtutuong kapikas bisan pa sa mga problema, posible natong masinatian ang kalipay dihang siya mahimong alagad ni Jehova.
21 Bisag unsa pay atong kahimtang, determinado unta kitang mogawi sa paagi nga makahatag ug maayong pamatuod sa mga dili magtutuo. Kon nameligro ang atong kaminyoon, kinasingkasing kitang moampo, matinud-anong susihon ang atong mga motibo, mamalandong sa Kasulatan, ug mangayog tabang sa mga ansiyano. Labaw sa tanan, pahimut-an nato si Jehova sa tanan natong buhaton ug pabilhan ang iyang kahibulongang gasa nga kaminyoon.
[Mga footnote]
^ par. 10 Ang mga ngalan giilisan.
^ par. 17 Tan-awa ang librong Magpabilin Kamo sa Gugma sa Diyos, panid 219-221; Ang Bantayanang Torre, Nobyembre 1, 1988, panid 26-27; Septiyembre 15, 1975, panid 575 [sa Iningles].
[Mga Pangutana sa Pagtuon]
[Blurb sa panid 10]
Ang mga Kristohanon nga wala magdalidalig desisyon sa pagbulag sagad napanalanginan
[Blurb sa panid 12]
Salig kanunay kang Jehova ug pag-ampo kaniya alang sa kalig-on
[Hulagway sa panid 9]
Panalanginan ni Jehova ang mga Kristohanon nga naningkamot sa pagpalig-on sa ilang problemadong kaminyoon
[Hulagway sa panid 11]
Ang Kristohanong kongregasyon maoy tinubdan sa paghupay ug espirituwal nga tabang
