Tingali may kaila kang usa ka diborsiyado—basin daghan pa gani. Tungod kana kay komon na kaayo ang diborsiyo. Pananglitan, gipakita sa usa ka panukiduki sa Poland nga ang mga magtiayong nag-edad ug 30, nga tulo hangtod sa unom ka tuig nang nag-ipon, posibleng magdiborsiyo; apan ang diborsiyo dili lang nianang mga edara nahitabo.

Sa pagkatinuod, “gipakita sa mga estadistika nga [sa Europe] katunga sa mga magtiayon ang nagdiborsiyo,” sumala sa Institute for Family Policy sa Spain. Sa ubang dato nga mga nasod, ingon usab niana ang nagakahitabo.

Nganong mobatig ingon niana ang mga diborsiyado? Ang usa ka eksperyensiyadong magtatambag sa kaminyoon sa Eastern Europe miingon: “Pinaagi sa diborsiyo, mahimong opisyal ang mga butang nga nahitabo na—ang pagkadaot sa relasyon ug panagbulag, ug sakit kaayo kini.” Siya midugang: “Sagad moresulta kinig grabeng emosyon—kasuko, pagmahay, kahigawad, kawalay paglaom, ug kaulaw.” Tungod niini, usahay ang usa makahunahunag hikog. “Kon giaprobahan na sa korte ang diborsiyo, magsugod na ang sunod nga yugto. Kay mibatig kahaw-ang ug pagkasinalikway, ang diborsiyado tingali maghunahuna: ‘Karon nga diborsiyado na ko, kinsa na man ko? Unsay akong buhaton sa akong kinabuhi?’”

Sa paghinumdom sa iyang gibati pipila ka tuig ang milabay, si Ewa miingon: “Naulaw kaayo ko kay, human maaprobahan ang diborsiyo, gianggaan kog ‘diborsiyada’ sa akong mga silingan ug kaubanan sa trabaho. Nasuko kaayo ko. Kay naa kanako ang among duha ka gagmay pang anak, kinahanglan kong mahimong inahan ug amahan nila.” * Si Adam, nga usa ka tinahod nga ansiyano sulod sa 12 ka tuig, miingon: “Halos nawad-an kog pagtahod sa kaugalingon nga usahay mapuno ko sa kasuko, ug gusto kong magpalayo sa uban.”

Kay nabalaka pag-ayo sa ilang kaugmaon, ang uban wala gihapon maulii sa panimbang—bisag daghang tuig na ang milabay human sa diborsiyo. Lagmit mohinapos sila nga ang uban dili interesado kanila. Dugang pa, ang usa ka kolumnista miingon nga human sa diborsiyo, kinahanglan nilang “usbon ang ilang mga naandan ug atubangon ang problema nga silasila ra.”

Si Stanisław nahinumdom: “Dihang nagdiborsiyo mi, gidid-an ko sa akong kanhing asawa sa pagpakigkita sa among duha ka gagmayng anak nga babaye. Mao nga mibati ko nga wala nay nagmahal nako ug nga bisan si Jehova nagsalikway na nako. Gusto na kong mamatay. Sa ulahi, akong  naamgohan nga sayop gayod ang akong gihunahuna.” Si Wanda, nga gidiborsiyohan, nabalaka usab sa iyang kaugmaon: “Mibati ko nga sa di madugay, ang mga tawo—lakip ang mga isigkamagtutuo—dili na mahingawa nako ug sa akong mga anak. Pero nakita nako nga giatiman mi pag-ayo sa mga igsoon ug ila kong gitabangan samtang gimatuto nako ang akong mga anak aron mahimong magsisimba ni Jehova.”

Makita nimo sa maong mga kasinatian nga human sa diborsiyo, ang pipila nalumsan sa negatibong mga emosyon. Mahimong moubos ang ilang pagtan-aw sa kaugalingon, nga maghunahunang walay pulos ug dili angayng hatagag pagtagad. Lagmit mahimo usab silang hinawayon sa uban. Tungod niana, basin maghunahuna silang ang kongregasyon walay pagpakabana ug simpatiya kanila. Pero, ang mga kasinatian nga sama kang Stanisław ug Wanda nagpakita nga ang mga diborsiyado makaamgo ra nga ang ilang mga igsoon nagmahal kanila. Gani, ang mga isigka-Kristohanon nagtaganag talagsaong pagmahal, bisag dili dayon mamatikdan ang ilang gihimo.

Hinumdomi nga bisan pa sa atong mga paningkamot, ang diborsiyadong mga isigkamagtutuo mahimong mobatig kamingaw sa popanahon. Ang diborsiyadang mga sister, ilabina, mobati tingali nga pipila lang ang interesado kanila. Si Alicja miangkon: “Walo ka tuig na kong diborsiyada. Apan, usahay ubos gihapon ang akong pagtan-aw sa kaugalingon. Nianang mga tungora, gusto nakong mag-inusara ug mohilak, ug mobati kog kaluoy sa kaugalingon.”

Bisag ang mga emosyon nga gihisgotan dinhi maoy sagad bation sa mga diborsiyado, ang Bibliya nagtambag nga dili ilain ang kaugalingon. Kon dili sundon ang maong tambag, mahimong motultol kini sa pagsalikway sa “tanang praktikal nga kaalam.” (Prov. 18:1) Apan angayng likayan niadtong mibatig kamingaw ang pagsigeg pangayog tambag o paghupay gikan sa kaatbang nga sekso. Kana maoy pagpakitag praktikal nga kaalam. Pinaagi niana, malikayan nga maugmad ang sayop nga romantikong pagbati.

Ang atong diborsiyadong mga igsoon mobati tingalig kabalaka sa kaugmaon, kamingaw, o pagkasinalikway pa gani. Sanglit nakita nato nga ang maong mga pagbati komon ug lisod sagubangon, angay natong sundogon si Jehova pinaagi sa maunongong pagtabang kanila. (Sal. 55:22; 1 Ped. 5:6, 7) Makasalig kita nga ilang pabilhan ang bisan unsang tabang nga atong ihatag. Sa pagkatinuod, diha sa kongregasyon sila makakaplag ug tinuod nga mga higala nga andam motabang kanila!—Prov. 17:17; 18:24.