Nabasa ba nimog maayo ang bag-ong mga gula sa Ang Bantayanang Torre? Sulayi kon makatubag ka sa mosunod nga mga pangutana:

Ang cremation ba haom alang sa mga Kristohanon?

Kon i-cremate man o dili ang usa, kana maoy personal nga desisyon. Bisag walay espesipikong gisulti ang Bibliya bahin niini, makatabang kon atong hinumdoman nga ang patayng lawas ni Haring Saul ug sa iyang anak nga si Jonatan gisunog ug dayon gilubong. (1 Sam. 31:2, 8-13)—6/15, panid 7.

Nganong makaseguro kita nga ang Diyos dili maoy hinungdan sa pagkadaotan?

Ang Diyos matarong sa tanan niyang paagi. Siya makiangayon, matinumanon, ug matul-id. Si Jehova usab malumo sa pagmahal ug maluluy-on. (Deut. 32:4; Sal. 145:17; Sant. 5:11)—7/1, panid 4.

Unsang mga hagit ang mahimong atubangon sa usa nga moalagad sa langyawng nasod diin mas dako ang panginahanglan?

Ang tulo ka hagit mao: (1) pagsagop sa lahi nga paagi sa pagkinabuhi, (2) pagsagubang sa kamingaw, ug (3) pagpasibo sa mga igsoon sa kongregasyon. Daghan ang nakabaton ug dagayang panalangin kay ilang nabuntog ang maong mga hagit.—7/15, panid 4-5.

Nganong giatake si Jose sa iyang mga igsoon?

Gipalabi ni Jacob si Jose ug gihatagan pa gani niya kini ug espesyal nga besti. Ang mga igsoon ni Jose nasina ug nagbaligya kaniya ingong ulipon.—8/1, panid 11-13.

Nganong ang bag-ong mga tract epektibo kaayo ug daling gamiton?

Ang tanang bag-ong tract usa ray pormat. Ang matag tract magdasig kanato sa pagbasa sa teksto ug dunay mga pangutana alang sa tagbalay. Bisag unsa may iyang itubag, mahimo natong paklion ang sunod nga panid ug ipakita kaniya kon unsay giingon sa Bibliya. Duna usab kini pangutana alang sa pagbalikduaw.—8/15, panid 13-14.

Unsa ang Syriac Peshitta?

Ang Syriac, usa ka Aramaikong diyalekto, kaylap nga gigamit sa ika-2 ug ika-3ng siglo C.E. Mopatim-aw nga ang pipila ka bahin sa Kristohanon Gregong Kasulatan unang gihubad ngadto sa Syriac. Ang Syriac nga Bibliya gitawag sab ug Peshitta.—9/1, panid 13-14.

Unsay himoon sa Kristohanong mga ginikanan aron mabantayan nila ang ilang mga anak?

Hinungdanong pamation ang mga anak aron mailhan sila. Pakan-a sila sa espirituwal. Giyahi sila sa mahigugmaong paagi, pananglitan, dihang sila nagduhaduha sa ilang pagtuo.—9/15, panid 18-21.

Ilalom sa Gingharian sa Diyos, unsay mawala na?

Mawala na ang sakit, kamatayon, pagkawalay-trabaho, gubat, kakulang sa pagkaon, ug kakabos.—10/1, panid 6-7.

Unsa nga pakigsaad diha sa Bibliya ang magtugot sa uban sa pagmando uban kang Kristo?

Human sa kataposang panihapon sa Paskuwa uban sa mga apostoles, si Jesus mihimog pakigsaad uban sa iyang matinumanong mga tinun-an nga gitawag ug pakigsaad sa Gingharian. (Luc. 22:28-30) Kini nagpasalig kanila nga sila makauban ni Jesus sa langit ingong mga magmamando.—10/15, panid 16-17.

Paghatag ug duha ka pananglitan nga magpamatuod nga tinuod gayod si Satanas.

Ang Kasulatan nag-ingon nga si Satanas nakig-estorya kang Jesus aron sa pagtental kaniya. Sa panahon ni Job, si Satanas nakig-estorya usab sa Diyos. Kini nga mga asoy nagpamatuod nga si Satanas maoy tinuod nga persona.—11/1, panid 4-5.

Kinsa ang “usa ka katawhan alang sa iyang ngalan” nga gitumong ni Santiago diha sa Buhat 15:14?

Sila mao ang Hudiyo ug dili Hudiyong mga magtutuo nga gipili sa Diyos nga mahimong usa ka piniling rasa nga ‘kaylap nga mopahayag sa kahamili’ sa Usa nga nagtawag kanila. (1 Ped. 2:9, 10)—11/15, panid 24-25.

Asa nahimutang ang Timgad, ug unsay tinamdan sa pipila didto?

Ang Timgad maoy usa ka dakong siyudad nga gitukod sa mga Romano sa North Africa (karon Algeria). Gipakita sa nakalotang kinulit kon unsay gituohan sa pipila didto: “Pagpangayam, Pagligoligo, Pagduladula, Pagkatawa—Kanay Kinabuhi!” Susama kana sa tinamdan nga gihisgotan sa 1 Corinto 15:32.—12/1, panid 8-10.