Amahan nga Walay Sama
Pakigsuod sa Diyos
Amahan nga Walay Sama
“AMAHAN.” Pipila lang ka pulong ang sama niini nga makapukaw sa pagbati sa tawo. Ang amahan nga tinuod nga nahigugma sa iyang mga anak mag-atiman gayod kanila. Busa, adunay maayong katarongan nga ang Bibliya nagtawag kang Jehova nga Diyos ingong “Amahan.” (Mateo 6:9) Unsang matanga sa Amahan si Jehova? Sa pagtubag niana, atong susihon ang gisulti ni Jehova kang Jesus sa dihang siya gibawtismohan. Ang tinuod, madayag diha sa sinultihan sa usa ka amahan ngadto sa iyang mga anak kon unsang matanga siya sa pagkaginikanan.
Mga Oktubre 29 K.P. kadto, sa dihang miadto si Jesus sa Suba sa Jordan aron magpabawtismo. Ang Bibliya nagtaho sa nahitabo: “Human mabawtismohi, si Jesus mihaw-as gilayon sa tubig; ug, tan-awa! ang mga langit nabuksan, ug iyang nakita nga mikunsad diha kaniya ang espiritu sa Diyos ingon sa usa ka salampati. Tan-awa! Dihay tingog usab gikan sa mga langit nga nag-ingon: ‘Kini mao ang akong Anak, ang hinigugma, nga akong giuyonan.’” a (Mateo 3:16, 17) Ang maong mabinationg mga pulong nga gisulti mismo ni Jehova nagpakita kon unsang matanga siya sa Amahan. Matikdi ang tulo ka butang nga gipahayag ni Jehova ngadto sa iyang Anak.
Una, sa pagsulti ni Jehova ug “kini mao ang akong Anak,” sama rag misulti siya, ‘Mapasigarbohon ako ingong imong Amahan.’ Ang usa ka masinabotong amahan magpakitag pagpabili ug pagtagad sa iyang mga anak. Ang mga anak kinahanglang pasaligan nga ang tagsatagsa kanila gipabilhan. Hunahunaa lang kon unsa kahay gibati ni Jesus—bisag dako na siya—sa dihang gipahayag ni Jehova ang Iyang pagpabili kaniya!
Ikaduha, sa dihang iyang gitawag ang iyang Anak nga “hinigugma,” si Jehova nagpahayag sa dayag sa iyang gugma kang Jesus. Mora bag miingon ang Amahan nga, ‘Gimahal ko ikaw.’ Ang usa ka maayong amahan mosulti sa iyang mga anak nga siya nahigugma pag-ayo kanila. Kanang mga pulonga—nga inubanan ug tinuod nga pagmahal—adunay positibong epekto sa mga anak. Lagmit natandog gayod si Jesus sa dihang iyang nadungog ang tingog sa iyang Amahan nga nagpahayag ug gugma kaniya!
Ikatulo, ang pagsulti ni Jehova sa mga pulong “akong giuyonan,” maoy pagpahayag sa iyang pag-uyon sa iyang Anak. Sama rag misulti si Jehova, ‘Anak, nalipay ko sa imong gibuhat.’ Ang mahigugmaong amahan mangitag kahigayonan sa pagsulti ngadto sa iyang mga anak nga siya nalipay sa maayong mga butang nga ilang gibuhat o gisulti. Ang pagpahayag ug pag-uyon ngadto sa mga anak makatabang kanila nga magmalig-on ug magmaisogon. Lagmit nadasig gayod si Jesus sa pagkadungog nga ang iyang Amahan adunay pag-uyon kaniya!
Sa pagkatinuod, si Jehova usa gayod ka Amahan nga walay sama. Nangandoy ka ba ug amahan nga sama kaniya? Kon mao, madasig ka gayod sa pagkahibalo nga mahimong makabaton ka ug maayong relasyon kang Jehova. Kon inubanan sa pagtuo ikaw mokat-on bahin kaniya ug kinasingkasing nga mobuhat sa iyang kabubut-on, siya mosanong gayod. Ang Bibliya nag-ingon: “Duol sa Diyos, ug siya moduol [kanimo].” (Santiago 4:8) Duna pa bay laing butang nga makahatag kanimog labaw nga kasegurohan kay sa pagbaton ug suod nga relasyon kang Jehova, ang kinamaayohang Amahan?
[Footnote]
a Sumala sa mao ra nga asoy diha sa Ebanghelyo ni Lucas, si Jehova naggamit sa pulong “ikaw,” nga nag-ingon: “Ikaw mao ang akong Anak, ang hinigugma; giuyonan ko ikaw.”—Lucas 3:22.