Nahibalo Ka Ba?

Kanus-a giduaw sa mga astrologo si Jesus?

Ang Ebanghelyo ni Mateo nagtug-an kanato nga ‘ang mga astrologo gikan sa sidlakan’ miduaw kang Jesus nga nagdalag mga gasa. (Mateo 2:1-12) Ang asoy sa Bibliya wala magsulti kon pila ka astrologo, o mago, ang miduaw sa batang si Jesus, ug walay pamatuod nga tulo sila ka buok sumala sa gituohan sa kadaghanan; wala usab hisgoti niini ang ilang ngalan.

Ang New International Version Study Bible nagkomento maylabot sa Mateo 2:11: “Sukwahi sa gituohan sa kadaghanan, ang mga Mago wala moduaw kang Jesus sa pasungan sa gabii nga siya natawo, dili sama sa mga magbalantay sa karnero. Ilang giduaw ang ‘bata’ diha sa ‘balay’ mga pipila ka bulan sa ulahi.” Ingong pamatuod niana, sa tinguha ni Herodes nga mapatay si Jesus, siya nagsugo nga pamatyon ang tanang batang lalaki sa Betlehem ug sa mga distrito niini nga nag-edad ug duha ka tuig paubos. Gipili niya kanang pangedarona pinaagi sa pagbanabana “sumala sa panahon nga natino niya pag-ayo gikan sa mga astrologo.”—Mateo 2:16.

Kon ang mga astrologo miduaw pa kang Jesus sa gabii nga siya natawo ug nagdalag bulawan ug ubang mahalong mga gasa, dili lang unta duha ka langgam ang gihalad ni Maria sa dihang iyang gipresentar si Jesus sa templo sa Jerusalem 40 ka adlaw sa ulahi. (Lucas 2:22-24) Kana maoy probisyon sa Balaod alang sa kabos nga mga tawo nga dili makaarang sa paghalad ug nating karnero. (Levitico 12:6-8) Apan, kining mahalong mga gasa lagmit nakasapar sa galastohan sa pamilya ni Jesus sa ilang pag-estar sa Ehipto.—Mateo 2:13-15.

Nganong gidangtan ug upat ka adlaw una nakaabot si Jesus sa lubnganan ni Lazaro?

Morag gituyo kana ni Jesus. Nganong makaingon man kita niana? Tagda ang asoy nga nasulat sa Juan kapitulo 11.

Sa dihang si Lazaro nga taga-Betania ug higala ni Jesus grabeng nasakit, ang iyang mga igsoong babaye nagsugo ug tawo sa pagpahibalo niini kang Jesus. (Bersikulo 1-3) Nianang panahona, ang nahimutangan ni Jesus dangtan ug mga duha ka adlaw nga panaw gikan sa Betania. (Juan 10:40) Si Lazaro lagmit patay na sa dihang nakaabot ang balita kang Jesus. Unsa may iyang gibuhat? Siya ‘nagpabilin pa ug duha ka adlaw sa dapit diin didto siya,’ ayha pa miadto sa Betania. (Bersikulo 6, 7) Kay nagpabilin ug duha ka adlaw didto ug duha sab ka adlaw ang iyang panaw, siya miabot sa lubnganan upat ka adlaw human mamatay si Lazaro.—Bersikulo 17.

Una pa niana, duha na ka patay ang gibanhaw ni Jesus—ang usa mao pay pagkamatay ug ang lain pipila na ka oras nga patay. (Lucas 7:11-17; 8:49-55) Makabanhaw kaha siya sa tawo nga upat ka adlaw nang patay ug nagsugod na pagkadugta? (Bersikulo 39) Makaiikag ang gisulti sa usa ka reperensiya sa Bibliya. Kini nag-ingon nga dihay mga Hudiyo nga nagtuo nga wala nay paglaom nga “mabanhaw pa ang usa ka tawo nga upat ka adlaw nang patay; nianang panahona, ang lawas magsugod na pagkadugta ug ang kalag, nga gituohang naglutaw-lutaw ibabaw niana, mibiya na.”

Kon dihay mga tawo didto nga nagduhaduha nga mabanhaw pa si Lazaro, ilang masaksihan nga si Jesus makahimo gayod niana. Samtang nagtindog atubangan sa bukas nga lubnganan, si Jesus misinggit: “Lazaro, gula ngari!” Dayon, “ang tawo nga namatay migula.” (Bersikulo 43, 44) Ang pagkabanhaw mao ang tinuod nga paglaom sa usa nga namatay, dili ang sayop nga pagtuo nga ang kalag magpabiling buhi human mamatay ang tawo.—Ezequiel 18:4; Juan 11:25.