Usa ka Masulub-ong Batan-on Nakakaplag ug Kahupayan

Sumala sa giasoy ni Eusebio Morcillo

Niadtong Septiyembre 1993, miduaw ako sa guwardiyado-kaayo nga prisohan. Panahon kadto sa pagbawtismo sa akong manghod nga si Mariví nga gipriso didto. Ang pipila ka piniriso ug mga opisyales sa prisohan hilom nga nagtan-aw samtang akong gihimo ang seremonyas sa bawtismo. Sa dili pa nako ipatin-aw kon sa unsang paagi ako ug ang akong igsoon nakaabot didto, paasoya una ako sa among kaagi sa bata pa kami.

NATAWO ako sa Espanya sa Mayo 5, 1954. Ako ang kinamagulangan sa walo ka magsoon ug si Mariví ang ikatulo. Gimatuto kami sa among lola nga usa ka debotadang Katoliko, ug makapahimuot ang paghandom nga sa bata pa ako diyosnon ako samtang anaa sa poder sa akong lola. Apan dili ingon niana ang kahimtang sa among balay. Kulatahon kanunay ni Papa si Mama, hasta sab kami. Hadlok kaayo mi kang Papa, ug daw hilapon ang akong kasingkasing nga magtan-aw kang Mama nga nag-antos.

Sa tunghaan, nakasinati usab ako ug mga pag-abuso. Kon masayop gani kami sa pagtubag sa pangutana sa among maestro nga pari, iya kaming iparok sa bungbong. Giamong-amongan sa laing pari ang mga estudyante samtang nagtabang siya kanila sa paghimo sa ilang homwork. Dugang pa niini, ang mga doktrina sa Katoliko sama sa impiyernong-kalayo nakapalibog ug nakapahadlok kanako. Sa ngadtongadto, nalawos ang akong gugma sa Diyos.

Walay Direksiyon ang Akong Kinabuhi

Kay walay naggiya kanako, nakighugoyhugoy ko sa imoral ug bugoy nga mga tawo sa diskohan. Sagad may karambola nga mahitabo, nga naggamit ug punyal, kadena, bildo, ug mga bangkito sa pagpakig-away. Dili ko moapil sa away, apan usa ka higayon niana ako naigo ug nakuyapan.

Sa kadugayan, gipul-an ko nianang kahimtanga busa nangita ko ug dili gubot nga diskohan. Apan bisan nianang mga dapita, kaylap kaayo ang paggamit sa droga. Ang droga wala makahatag kanakog tinuod nga kalipay ug kalinaw sa hunahuna. Gimata-mata hinuon ko ug dili mahimutang.

Bisag dili ko malipayon nianang kinabuhia, akong gihaylo si José Luis nga akong manghod, ug  si Miguel nga akong suod nga higala sa pagsunod sa akong estilo sa kinabuhi. Kami nahitumpawak sa daotang mga buhat sama sa ubang mga batan-on sa Espanya niadtong panahona. Akong buhaton ang tanan, aron lang makakuwarta ug makapalit ug droga. Giyatakan nako ang akong dignidad.

Si Jehova Mitabang Kanako

Niining tungora, nagpangutana ko sa akong mga higala bahin sa paglungtad sa Diyos ug sa katuyoan sa kinabuhi. Nangita kog tawo nga makasabot sa akong tinguha sa pagpangita sa Diyos. Akong naobserbahan nga si Francisco, nga kauban nako sa trabaho, lahi kay sa ubang empleyado. Morag malipayon siya, matinud-anon, ug buotan, busa nakahukom ko sa pagpakigsulti kaniya. Saksi ni Jehova diay siya, ug gihatagan niya akog magasin nga Bantayanang Torre nga naghisgot bahin sa droga.

Human kini mabasa, nag-ampo ako sa Diyos alang sa tabang: “Ginoo, nasayod ako nga ikaw buhing Diyos, ug gusto kong mahibalo bahin kanimo ug mobuhat sa imong kabubut-on. Tabangi intawon ako!” Gigamit ni Francisco ug sa ubang mga Saksi ang Bibliya sa pagdasig kanako ug gitagaan nila ako ug mga basahon nga gipasukad sa Bibliya aron akong mabasa. Akong naamgohan nga pinaagi sa ilang tabang gitubag sa Diyos ang akong hangyo Kaniya. Sa walay langan, akong gisulti sa akong mga higala ug ni José Luis ang mga butang nga akong nakat-onan.

Usa ka adlaw niana, sa pagpauli namo gikan sa usa ka rock concert, mipalain ko sa akong mga higala. Ako silang gipanid-an, ug didto akong nakita kon unsa ka ngil-ad ang among gawi tungod sa epekto sa droga. Dihadiha, nakahukom ko nga biyaan kanang matanga sa kinabuhi ug mahimong Saksi ni Jehova.

Nangayo kog Bibliya kang Francisco. Iya kong gitagaan niana ug giapilan pa gani niyag libro nga Ang Kamatuoran nga Motultol sa Kinabuhing Dayon. a Sa dihang akong nabasa ang saad sa Diyos nga iyang pahiran ang tanang luha ug wagtangon bisan ang kamatayon, ako nakaseguro nga ako nang nakaplagan ang kamatuoran nga makapahigawas sa katawhan. (Juan 8:32; Pinadayag 21:4) Dayon, mitambong ako sa tigom sa Kingdom Hall sa mga Saksi ni Jehova. Nakadayeg kaayo ako sa ilang mainitong pag-abiabi kanako.

Kay naghinamhinam nga isulti sa uban ang akong nasinatian sa Kingdom Hall, ako dayong gitapok sila si José Luis ug ang akong mga higala ug giestoryahan sila sa tanan. Paglabay sa pipila ka adlaw, mitambong ming tanan sa tigom. Sa unahan sa among gilingkoran, dihay usa ka dalagita nga milingi kanamo. Sa akong tan-aw, nakuratan gayod siya sa pagkakita kanamo tungod kay mga hippie kami nga tag-as ug buhok, ug wala na gayod siya molingi pag-usab. Pagbalik namo sa Kingdom Hall pagkasunod semana, nakuratan gyod seguro siya pagkakita kanamo nga nag-amerkana na.

Dili ra dugay human niini, mitambong usab kami ni Miguel sa duha ka adlaw nga asembliya sa mga Saksi ni Jehova. Wala pa gayod kami makasinati ug ingon niini sukad—usa ka tinuod nga panag-igsoonay sa mga tawo sa tanang pangedaron. Daw dili ako makatuo nga ang asembliya gipahigayon mismo didto sa teatro diin kami mitan-aw ug konsiyerto di pa dugay. Apan niining higayona, ang malinawong kahimtang ug ang musika nga among nadunggan nakatandog pag-ayo sa among galamhan.

 Kaming tanan sa grupo nagsugod pagtuon sa Bibliya. Mga walo ka bulan sa ulahi, pagka Hulyo 26, 1974, kami ni Miguel nabawtismohan. Bayente anyos kami niadtong tungora. Paglabay sa pipila ka bulan, upat pa sa among grupo ang nabawtismohan. Ang akong nakat-onan sa Bibliya nagpalihok kanako sa pagtabang sa akong mainantosong inahan sa mga buluhaton sa balay ug sa pagpaambit kaniya sa akong bag-ong pagtuo. Nasuod kami ni Mama. Migahin usab ako ug dakong panahon sa pagtabang sa akong mga manghod nga lalaki ug babaye.

Sa ngadtongadto, ang akong inahan ug mga igsoon nagtuon sa Bibliya ug nahimong mga Saksi ni Jehova gawas lang sa usa nako ka igsoong lalaki. Sa 1977, nagminyo kami ni Soledad. Siya kadtong dalagita nga nakuratan sa pagkakita kanamo sa una namong pagtambong sa Kingdom Hall. Sulod lang sa pipila ka bulan, kami nahimong mga payunir, nga maoy pagtawag sa mga Saksi ni Jehova sa bug-os-panahong magwawali sa maayong balita.

Natabangan ang Akong Minahal nga Igsoon

Si Mariví nga akong manghod giamong-amongan sa bata pa siya, ug ang maong ngil-ad nga kagahapon nakadaot gayod kaniya. Pagtin-edyer niya, nagkinabuhi siyang imoral nga nagdroga, nangawat, ug namampam. Sa edad nga 23, nabilanggo siya, ug didto nagpadayon gihapon siya sa iyang hiwi nga binuhatan.

Nianang panahona, ako nag-alagad na ingong magtatan-aw sa sirkito, nga usa ka nagapanawng ministro sa mga Saksi ni Jehova. Sa 1989, gipadala kami ni Soledad sa dapit diin didto usab gibilanggo si Mariví. Ang mga awtoridad di pa dugayng nagkuha sa iyang anak nga lalaki; siya nahugno tungod niini ug dili na gustong mabuhi pa. Usa ka adlaw niana, ako siyang giduaw ug gidasig nga magtuon kaming duha sa Bibliya. Tuod man, iyang gidawat ang akong tanyag. Human sa usa ka bulan nga pagtuon, siya mihunong sa paggamit ug droga ug sa pagtabako. Nalipay ko nga si Jehova naghatag kaniyag kusog sa pagtul-id sa iyang kinabuhi.—Hebreohanon 4:12.

Gipaambit dayon ni Mariví ang mga kamatuoran sa Bibliya ngadto sa kaubang mga piniriso ug sa mga opisyales sa prisohan. Bisan pag gibalhin siya sa lainlaing prisohan, nagpadayon gihapon siya sa pagsangyaw. Nagsangyaw pa gani siya sa mga selda sa prisohan. Paglabay sa mga tuig, si Mariví nakadumala ug mga panagtuon sa Bibliya sa daghang piniriso sa lainlaing prisohan.

Usa ka adlaw niana, giingnan ako ni Mariví nga gusto na niyang magpahinungod sa iyang kinabuhi kang Jehova ug magpabawtismo. Apan wala siya tugoti sa paggawas sa prisohan, ug wala usab tugoti si bisan kinsa sa pagsulod aron bawtismohan siya. Upat pa ka tuig siyang naghulat ug nag-antos sa daotang kahimtang sa prisohan. Unsay nakatabang kaniya aron mahuptang lig-on ang iyang pagtuo? Diha sa selda, iyang sundan ang programa sa tigom nga sa samang panahon gitun-an diha sa lokal nga kongregasyon. Diha usab siyay regular nga eskedyul sa personal nga pagtuon sa Bibliya ug pag-ampo.

Sa kadugayan, gibalhin si Mariví ngadto sa guwardiyado-kaayo nga prisohan nga may swimming pool. Siya nagtuo nga mahinayon na gayod ang pagbawtismo kaniya. Natinuod kadto kay sa kataposan gihatagan ra gyod ug permiso si Mariví. Mao kanay hinungdan nga nahiadto ako didto aron himoon ang seremonyas sa bawtismo. Kauban niya ako sa labing hinungdanong yugto sa iyang kinabuhi.

Ingong bunga sa iyang kanhing pagkinabuhi, si Mariví nataptan ug AIDS. Bisan pa niana, pagka Marso 1994, siya gipagawas sa prisohan tungod sa iyang maayong panggawi. Siya mipuyo uban ni Mama ug aktibo sa Kristohanong buluhaton hangtod sa iyang kamatayon mga duha ka tuig sa ulahi.

Pagbuntog sa Negatibong Pagbati

Nag-antos usab ako sa dili maayong epekto sa akong kanhing pagkinabuhi. Ang pagmaltratar kanako sa akong amahan ug ang akong estilo sa  kinabuhi sa tin-edyer pa ako nakaapekto gayod sa akong personalidad. Sa nahamtong na ako, kanunay kong hasolon sa akong tanlag ug mobating walay-pulos. Dihay panahon nga masulub-on kaayo ako. Apan, nakatabang kanakog dako ang Pulong sa Diyos sa pagbuntog niining makapatugaw nga pagbati. Mapuslanon ang balikbalik nga pagpalandong sa mga teksto sa Bibliya sama sa Isaias 1:18 ug Salmo 103:8-13. Nakatabang kini kanako nga dili na kaayo tulisokon sa akong tanlag.

Ang laing espirituwal nga hinagiban nga gihatag ni Jehova aron akong madaog kining pagbati sa pagkawalay-pulos mao ang pag-ampo. Sagad moduol ako kang Jehova nga maghilak. Bisan pa niana, ang mga pulong sa 1 Juan 3:19, 20 nakapalig-on kanako: “Pinaagi niini kita mahibalo nga kita nagagikan sa kamatuoran, ug makapasalig kita sa atong mga kasingkasing sa iyang atubangan bahin sa bisan unsa nga ihukom kanato sa atong mga kasingkasing, tungod kay ang Diyos mas labaw kay sa atong mga kasingkasing ug nahibalo sa tanang butang.”

Tungod kay mangamuyo man ako sa Diyos uban ang “gun-ob ug dugmok” nga kasingkasing, ako nakaamgo nga dili diay ako sama kadaotan sa akong paghunahuna kaniadto. Ang Bibliya nagpasalig sa tanang nangita kang Jehova nga dili niya tamayon kadtong mahinulsolong nagbasol sa ilang kanhing mga binuhatan ug nagbuhat na karon sa iyang kabubut-on.—Salmo 51:17.

Kon motumaw gani kining negatibong pagbatia, ako dayong pun-on ang akong hunahuna ug positibong mga butang—mga butang nga magpalig-on sa akong relasyon sa Diyos sama sa gihisgotan sa Filipos 4:8. Akong nasag-ulo ang Salmo 23 ug ang Wali ni Jesus sa Bukid. Kon mosantop gani sa akong kaisipan ang negatibong mga hunahuna, ako dayong litokon kini nga mga teksto sa Kasulatan. Kining paagiha nakatabang gayod kanako ilabina sa mga gabii nga maglisod ko sa pagkatulog.

Nakatabang usab kanako ang mga komendasyon nga akong nadawat gikan sa akong asawa ug sa ubang hamtong nga mga Kristohanon. Sa sinugdan, maglisod ko pagdawat sa ilang mga pagdasig, apan akong nasabtan gikan sa Bibliya nga ang gugma “motuo sa tanang butang.” (1 Corinto 13:7) Aw, sa kadugayan, ako rang nadawat nga ako may mga kahuyangan ug mga limitasyon usab.

Hinuon, adunay maayong epekto ang akong pagpakigbisog batok sa negatibong pagbati. Kini nakatabang kanako nga mahimong mabination. Kami sa akong asawa nakagugol na ug halos 30 ka tuig sa bug-os panahong pagsangyaw sa maayong balita. Ang kalipay nga akong natagamtam tungod sa among pag-alagad sa uban nakatabang kanako nga dili na kaayo hasolon sa negatibong pagbati ug sa akong ngil-ad nga kagahapon.

Karon, sa dihang mamalandong ako sa akong kasinatian ug maghunahuna kon sa unsang paagi si Jehova nagapanalangin kanako, matandog gayod ako sa pagsulti sama sa giingon sa salmista: “Dayega si Jehova, . . . siya nga nagapasaylo sa tanan mong kasaypanan, nga nagaayo sa tanan mong balatian, nga nagabawi sa imong kinabuhi gikan sa gahong, nga nagapurongpurong kanimo sa mahigugmaong-kalulot ug sa mga kaluoy.”—Salmo 103:1-4.

[Footnote]

[Blurb sa panid 30]

Kanunay kong hasolon sa akong tanlag ug mobating walay-pulos. Apan, nakatabang kanakog dako ang Pulong sa Diyos sa pagbuntog niining makapatugaw nga pagbati

[Mga hulagway sa panid 27]

Si José Luis nga akong manghod ug si Miguel nga akong higala misundog sa akong daotang gawi ug sa akong maayong panig-ingnan

[Hulagway sa panid 28, 29]

Ang pamilyang Morcillo sa 1973

[Hulagway sa panid 29]

Sa dihang napriso si Mariví

[Hulagway sa panid 30]

Uban sa akong asawa nga si Soledad