Among mga Magbabasa Nangutana

Silot ba Gikan sa Diyos ang Kinaiyanhong mga Katalagman?

Ang Diyos dili mogamit ug kinaiyanhong mga katalagman sa pagsilot sa inosenteng mga tawo. Wala siya mogamit niana sukad, ug dili gayod siya mogamit niana. Ngano man? Tungod kay “ang Diyos gugma,” nag-ingon ang Bibliya sa 1 Juan 4:8.

Gugma ang nagpalihok sa Diyos sa tanan niyang mga buhat. Ang gugma dili magpahinabog kadaot sa mga inosente, kay ang Bibliya nagpahayag nga “ang gugma dili magabuhat ug daotan ngadto sa silingan.” (Roma 13:10) Ang Bibliya nag-ingon sa Job 34:12: “Sa pagkatinuod, ang Diyos dili mobuhat sa pagkadaotan.”

Tinuod, ang Bibliya nagtagna nga adunay mahitabong mga katalagman sa atong adlaw, sama sa “dagkong mga linog.” (Lucas 21:11) Apan si Jehova dili maoy responsable sa kadaot nga gipahinabo niana sama ra nga ang tigbalita sa kahimtang sa panahon dili mabasol sa kadaot nga gipahinabo sa bagyo. Aw, kon dili pagbuot sa Diyos ang pag-antos sa mga tawo nga gipahinabo sa kinaiyanhong katalagman, kinsa man diay ang mabasol?

Ang Bibliya nagbutyag nga “ang tibuok kalibotan nailalom sa gahom sa usa nga daotan,” si Satanas nga Yawa. (1 Juan 5:19) Siya usa ka mamumuno sukad pa sa iyang pagrebelde didto sa Eden hangtod sa atong adlaw. (Juan 8:44) Para kang Satanas, ang kinabuhi sa tawo walay bili ug dili hinungdanon. Siya gipalihok sa iyang hakog nga ambisyon, mao nga dili ikatingala nga kaylap kaayo ang kahakog sa kalibotan nga iyang gigamhan. Tungod sa kahakog niining sistema sa kalibotan karon, daghang inosenteng tawo ang napugos sa pagpuyo sa mga dapit nga peligroso tungod sa mga katalagman nga mahimong ipahinabo sa kinaiyahan o sa tawo. (Efeso 2:2; 1 Juan 2:16) Busa, ang hakog nga mga tawo maoy mabasol sa ubang mga kalamidad nga nahitabo karon. (Ecclesiastes 8:9) Ngano man?

Usa ang tawo sa hinungdan sa daghang katalagman nga nahitabo. Tagda pananglitan ang gidangatan sa mga molupyo sa New Orleans, U.S.A. sa dihang kini gibahaan tungod sa bagyo, o ang mga balay nga natabonan sa pagdahili sa lapok gikan sa mga bukid duol sa baybay sa Venezuela. Nianang hitaboa ug sa uban pang mga kalamidad, ang puwersa sa kinaiyahan, sama sa hangin ug ulan nahimong malaglagon tungod sa kawalay pagtagad sa mga tawo sa kalikopan, dili maayong paagi sa pagpanukod, sayop nga pagplano, kawalay pagtagad sa mga pasidaan, ug sa dili maayong pagdumala.

Tagda ang usa ka katalagman sa panahon sa Bibliya. Sa adlaw ni Jesus, ang kalit nga pagkahugno sa usa ka torre nakakalas ug 18 ka kinabuhi. (Lucas 13:4) Lagmit resulta kini sa tawhanong sayop, o kaha sa “wala damhang panghitabo,” o nianang duha—apan segurado nga kini dili resulta sa paghukom sa Diyos.—Ecclesiastes 9:11.

Aduna bay mga katalagman nga pagbuot sa Diyos? Aduna, apan dili sama sa katalagman nga gipahinabo sa kinaiyahan o sa tawo, kini maglaglag lamang sa mga kaaway sa Diyos, kini adunay katuyoan, ug kini talagsa ra kaayong mahitabo. Ang tibuok-kalibotang Lunop sa adlaw sa patriarkang si Noe ug ang kalaglagan sa mga siyudad sa Sodoma ug Gomora sa adlaw ni Lot maoy duha ka pananglitan niini. (Genesis 6:7-9, 13; 18:20-32; 19:24) Niana nga mga paghukom sa Diyos, nalaglag ang dili mahinulsolong mga tawo, apan naluwas ang mga tawo nga giisip sa Diyos nga matarong.

Sa pagkatinuod, si Jehova nga Diyos adunay katakos, tinguha, ug gahom sa pagtapos sa tanang pag-antos ug sa paghatag ug kahupayan gikan sa mga epekto sa kinaiyanhong mga katalagman. Mahitungod sa tinudlo-sa-Diyos nga Hari, si Jesu-Kristo, ang Salmo 72:12 nagtagna: “Pagaluwason niya ang kabos nga nagatuaw alang sa tabang, ingon man ang sinakit ug si bisan kinsa nga walay magtatabang.”