Pakigsuod sa Diyos

Ang Maghuhukom nga Kanunayng Nagbuhat ug Maayo

Genesis 18:22-32

HUSTISYA. Pagkamakiangayon. Pagkadili-mapihigon. Makapadani ang maong mga hiyas, dili ba? Kinaiyanhon nga ang mga tawo gustong trataron sa maayong paagi. Ikasubo, kaylap kaayo ang inhustisya sa kalibotan karon. Apan, kita adunay kasaligang Maghuhukom—si Jehova nga Diyos. Siya kanunayng nagbuhat ug maayo. Kini makita diha sa panag-estoryahay ni Jehova ug ni Abraham nga narekord sa Genesis 18:22-32. a

Sa dihang gisulti ni Jehova kang Abraham nga iyang susihon ang kahimtang sa Sodoma ug Gomora, nabalaka si Abraham sa kaluwasan sa mga matarong nga nagpuyo didto, lakip na sa iyang pag-umangkon nga si Lot. Si Abraham mihangyo kang Jehova: “Paphaon mo ba gayod ang mga matarong uban sa mga daotan? Pananglit adunay kalim-an ka tawong matarong taliwala sa siyudad. Nan, . . . dili [mo ba] pasayloon ang dapit tungod sa kalim-an ka matarong nga anaa sa sulod niini?” (Bersikulo 23, 24) Ang Diyos miingon nga dili niya laglagon ang maong mga siyudad kon dunay bisan 50 ka tawong matarong nga nagpuyo niini. Si Abraham mihangyo kang Jehova sa lima pa ka higayon, hangtod nga mikubos ang gidaghanon ngadto sa napulo ka tawo. Sa matag higayon, ang Diyos miingon nga dili niya laglagon ang maong mga siyudad kon dunay matarong nga tawo didto sumala sa gidaghanon nga gisulti ni Abraham.

Nakiglalis ba si Abraham sa Diyos? Wala gayod! Ang pagpakiglalis sa Diyos maoy usa ka mapangahasong buhat. Si Abraham matinahoron ug mapainubsanon, ug makita kana diha sa paagi sa iyang pagpakig-estorya sa Diyos. Gipakasama niya ang iyang kaugalingon sa “abog ug abo.” Upat ka beses usab siyang migamit sa pulong “palihog.” (Bersikulo 27, 30-32) Dugang pa, ang mga pulong ni Abraham nagpakita nga siya misalig sa pagkamaayo ni Jehova. Gilitok niya ang pamulong nga “halayo ra”—dili lang kausa kondili kaduha—nga nagpasabot nga dili gayod laglagon sa Diyos ang mga matarong uban sa mga daotan. Ang matinumanong tawo nagpahayag sa iyang lig-ong pagsalig nga “ang Maghuhukom sa tibuok yuta” mobuhat “sa kon unsay matarong.”—Bersikulo 25.

Husto ba si Abraham sa iyang gipanulti? Ang uban husto apan ang uban dili. Siya nasayop sa dihang siya miingon nga dunay labing menos napulo ka matarong nga tawo sa Sodoma ug Gomora. Apan husto gayod siya sa iyang giingon nga ang Diyos dili ‘magpapha sa mga matarong uban sa mga daotan.’ Sa ulahi, sa dihang gilaglag sa Diyos ang maong daotang mga siyudad, ang matarong nga si Lot uban ang iyang duha ka anak nga babaye naluwas sa tabang sa mga anghel.—2 Pedro 2:7-9.

Unsay gitudlo niini kanato bahin kang Jehova? Ang pagpahibalo ni Jehova kang Abraham nga Iyang susihon ang maong mga siyudad nagpaila nga Iyang gidapit si Abraham sa pagpakig-estorya Kaniya. Dayon, Siya naminaw pag-ayo samtang gipahayag ni Abraham ang iyang pagbati. (Isaias 41:8) Kini nagtudlo kanatog maayong pagtulon-an nga si Jehova usa ka Diyos nga mapainubsanon, nga nagpabili ug nagpasidungog sa iyang mga alagad. Busa, bug-os gayod kitang makasalig kang Jehova, ang Maghuhukom nga kanunayng nagbuhat ug maayo.

[Footnote]

[Hulagway sa panid 24]

Si Abraham mihangyo kang Jehova bahin sa Sodoma ug Gomora