4 Ayaw Padaog sa Pagduhaduha

“Ikaw nga diyutay ug pagtuo, nganong gidaog ka man sa pagduhaduha?”—Mateo 14:31.

UNSAY BABAG? Dihay panahon nga bisan ang mga tinun-an ni Jesus nagduhaduha. (Mateo 14:30; Lucas 24:36-39; Juan 20:24, 25) Sa pagkatinuod, ang Bibliya naghubit sa kakulang ug pagtuo ingong “sala nga daling makasabod kanato.” (Hebreohanon 12:1) Si apostol Pablo misulat: “Ang pagtuo wala mabatoni sa tanang tawo.” (2 Tesalonica 3:2) Wala kini magpasabot nga ang pipila walay katakos sa pagbaton ug pagtuo. Hinunoa, daghan ang wala maningkamot sa pagbaton niini. Ang Diyos magapanalangin sa mga paningkamot niadtong nagtinguha nga makabatog pagtuo.

UNSAON NIMO PAGBUNTOG ANG BABAG? Ilha kon unsay hinungdan sa imong pagduhaduha. Pananglitan, ang tinun-an nga si Tomas nagduhaduha nga nabanhaw si Jesus, bisan pag ang ubang mga tinun-an miingon nga sila nakakita kaniya. Si Tomas  gustog pamatuod. Unsay resulta? Si Jesus naghatag kaniya sa pamatuod nga iyang gikinahanglan aron iyang mabatonan ang lig-ong pagtuo.—Juan 20:24-29.

Pinaagi sa Bibliya, si Jehova nga Diyos nagtaganag mga tubag nga atong gikinahanglan aron mawagtang ang atong mga pagduhaduha. Pananglitan, daghan ang nawad-ag pagtuo sa Diyos tungod kay sila, sa direkta o dili-direktang paagi, nagbasol kaniya tungod sa mga gubat, kapintasan, ug mga kasakit nga naagoman sa tawo. Unsay giingon sa Bibliya bahin niini?

Ang Diyos wala magmando pinaagi sa mga gobyerno sa tawo. Si Jesus nagtawag sa dili-makitang espiritu nga si Satanas ingong “magmamando niining kalibotana.” (Juan 14:30) Gitanyagan ni Satanas si Jesus ug awtoridad ibabaw sa tanang gingharian sa yuta ilis sa usa ka buhat sa pagsimba, nga nag-ingon: “Ihatag ko kanimo kining tanan nga awtoridad ug ang ilang himaya, tungod kay gitugyan na kini kanako, ug ngadto kang bisan kinsa nga buot ko ihatag ko kini.” Si Jesus wala mag-ingon nga wala mabatoni ni Satanas ang maong awtoridad. Hinunoa, Siya miingon: “Kini nahisulat, ‘Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.’” (Lucas 4:5-8) Busa si Satanas ug ang gobyerno sa tawo ang mabasol sa mga pag-antos nga naagoman sa kalibotan, dili ang Diyos.—Pinadayag 12:9, 12.

Sa dili madugay si Jehova nga Diyos magwagtang sa tanang hinungdan sa pag-antos. Siya naghimo nag kahikayan nga ang usa ka Gingharian, o gobyerno, ubos sa iyang Anak, si Kristo Jesus, magmando sa katawhan. (Mateo 6:9, 10; 1 Corinto 15:20-28) Isip katumanan sa tagna sa Bibliya, ang maayong balita bahin niining maong Gingharian gisangyaw na karon sa tibuok yuta. (Mateo 24:14) Hapit nang wagtangon niining maong Gingharian ang tanang magsusupak ug ang hinungdan sa pag-antos sa tawo.—Daniel 2:44; Mateo 25:31-33, 46; Pinadayag 21:3, 4.

UNSAY KAAYOHAN? Ang mga maduhaduhaon nahisama sa mga balod nga gituyatuya sa “matag hangin sa pagtulon-an pinaagi sa paglingla sa mga tawo.” (Efeso 4:14; 2 Pedro 2:1) Sa kasukwahi, kadtong nakakaplag ug makapatagbawng tubag sa ilang mga pangutana ‘makabarog nga malig-on sa pagtuo.’—1 Corinto 16:13.

Ang mga Saksi ni Jehova, nga mao ang nagpatik niining magasina, gustong motabang kanimo sa pagkaplag ug tubag sa mga pangutana nga lagmit makapahuyang sa imong pagtuo. Sila nagdapit kanimo sa pagpakig-uban kanila ug sa pagsusi sa ilang mga pagtulon-an. Kon imo kining buhaton, molig-on gayod ang imong pagtuo sa Diyos.

Alang sa dugang impormasyon, tan-awa ang kapitulo 8, “Unsa ang Gingharian sa Diyos?,” ug ang kapitulo 11, “Nganong Gitugotan sa Diyos ang Pag-antos?,” sa librong Unsay Tinuod nga Gitudlo sa Bibliya? a

[Footnote]

[Hulagway sa panid 9]

Kadtong nakakaplag ug makapatagbawng tubag sa ilang mga pangutana adunay lig-ong pasukaranan sa ilang pagtuo