Unsa ang Pagtuo?

UNSAON nimo paghubit ang pulong pagtuo? Ang pipila nag-ingon nga kini nagpasabot ug pagdawat dayon sa gisulti sa uban bisag walay igong basehanan niana. Ang iladong Amerikano nga magsusulat nga si H. L. Mencken kas-a miingon nga ang pagtuo maoy “dili-makataronganong pagdawat sa usa ka butang nga imposibleng mahitabo.”

Sa kasukwahi, ang Bibliya nag-ingon nga ang pagtuo gipasukad sa ebidensiya ug nga kini makataronganon. Ang Pulong sa Diyos nag-ingon: “Ang pagtuo mao ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita.”—Hebreohanon 11:1.

Sanglit lainlain ang opinyon sa mga tawo bahin sa pagtuo, atong tagdon ang tubag sa mosunod nga mga pangutana:

• Unsay kalainan tali sa paghubit sa Bibliya sa pagtuo ug nianang sa mga tawo?

• Nganong hinungdanon nga atong batonan ang matang sa pagtuo nga gihubit sa Bibliya?

• Sa unsang paagi imong mabatonan ang lig-ong pagtuo?

Usa ka Garantiya ug Lig-ong Ebidensiya

Sa panahon nga gisulat ang basahon sa Bibliya nga Hebreohanon, kanunayng gigamit ang Gregong pulong nga gihubad ug “masaligan nga pagpaabot.” Kini kasagarang gigamit diha sa mga dokumento sa negosyo, ug kini nagtumong sa garantiya sa pagpanag-iyag usa ka butang. Busa, dunay reperensiyang nag-ingon nga ang Hebreohanon 11:1 mahimong hubaron ingong: “Ang pagtuo maoy usa ka garantiya sa mga butang nga gilaoman.”

Kon nakasulay ka nag palit ug butang gikan sa usa ka kasaligang kompaniya ug nagpaabot nga kini ihatod, imong gipasundayag kanang matanga sa pagtuo. Ang resibo nga imong gikuptan maoy garantiya gikan sa maong kompaniya. Sa diwa, ang resibo mao ang imong garantiya nga imong madawat ang imong gipalit. Kon kini nawala o nalabay, mawala usab ang imong garantiya sa maong butang. Sa samang paagi, kadtong adunay pagtuo nga ang Diyos motuman sa iyang mga saad makasalig nga ilang madawat ang mga butang nga ilang gilaoman. Apan, kadtong walay pagtuo, o nawad-an niini, dili makadawat sa mga butang nga gisaad sa Diyos.—Santiago 1:5-8.

Ang ikaduhang ekspresyon diha sa Hebreohanon 11:1, nga gihubad ug “dayag nga pagpasundayag,” nagpasiugda sa ideya sa pagpatunghag ebidensiya nga sukwahi sa gituohan sa kadaghanan. Pananglitan, ang adlaw kon tan-awon morag nagbiyo sa yuta—nga mosubang sa silangan, motadlas sa kalangitan, ug mosalop sa kasadpan. Apan, ang ebidensiya sa astronomiya ug matematika nagpadayag nga ang yuta dili mao ang sentro sa solar system. Sa dihang imong masayran ang maong ebidensiya ug dawaton kana, ikaw motuo nga ang yuta mao ang nagbiyo sa adlaw—bisan pag sukwahi kana sa nakita sa imong mga mata. Kana nga pagtuo adunay basehanan. Sa pagkatinuod, kana naghatag kanimog katakos sa pagkahibalo kon unsa gayoy tinuod.

Unsa ka Hinungdanon ang Lig-ong Pagtuo?

Kini ang matang sa pagtuo nga giawhag sa Bibliya nga batonan—usa ka lig-ong pagtuo nga gipasukad sa lig-ong ebidensiya, bisan pag kini nagkinahanglan nga atong usbon ang atong pagsabot. Kana nga matang sa pagtuo hinungdanon gayod. Si apostol Pablo misulat: “Kon walay pagtuo walay makapahimuot sa Diyos. Ang matag usa nga moduol sa Diyos angayng motuo nga siya tinuod ug nga siya nagahatag ug ganti niadtong tinuod nga nangita kaniya.”—Hebreohanon 11:6, New Century Version.

Adunay daghang butang nga makababag sa pagbaton ug lig-ong pagtuo. Apan kon imong ipadapat ang upat ka paagi nga hisgotan sa sunod nga mga panid, ikaw makabaton niana.