Kon sa Unsang Paagi Imong Masabtan ang Bibliya

2. Basaha Kini Uban ang Bukas nga Hunahuna

Nakasinati ka na ba nga ang imong higala nangdaot ug usa ka tawo nga wala nimo mailhi? Sa dihang nailaila nimo ang maong tawo, negatibo ba ang imong panglantaw kaniya tungod sa gisulti sa imong higala? Ingon usab niana ang posibleng mahitabo kon bahin sa Bibliya.

SI apostol Pablo nagpasidaan sa mahimong resulta kon dili bukas ang atong hunahuna sa dihang mobasa kitag Bibliya. Bahin sa pipila ka Hudiyo sa iyang panahon, siya misulat: “Ako nagpamatuod mahitungod kanila nga sila may kasibot sa Diyos; apan dili sumala sa tukmang kahibalo.”—Roma 10:2.

Dihay mga Hudiyo sa unang siglo nga dili modawat sa kamatuoran nga si Jesus mao ang  Mesiyas bisag klaro kanang gipadayag diha sa Hebreohanong Kasulatan. Ang tanang tagna sa Bibliya bahin sa Mesiyas natuman gayod kang Jesus nga taga-Nasaret. Apan, wala nila kana masabti tungod kay dili bukas ang ilang hunahuna.

Unsay atong makat-onan niana? Hinungdanon gayod nga atong buksan ang atong hunahuna sa dihang mobasa kitag Bibliya. Kon kita magpaimpluwensiya sa negatibong mga opinyon sa uban bahin sa Bibliya, dili gayod nato masabtan ang kamatuoran.

Pananglitan, ang usa ka propesor sa North Carolina, Amerika, nga nagtudlo bahin sa relihiyon naghubit sa Bibliya ingong “basahon nga naundan lamang sa opinyon sa tawo, ug kadaghanan sa maong mga opinyon nagkasumpaki ug wala magtaganag kasaligang giya sa hustong pagkinabuhi.” Kon ang usa maghunahuna nga ang Bibliya pulong sa tawo ug dili sa Diyos, lagmit nga dili gayod niya dawaton ang mga giya o prinsipyo diha niana nga wala niya maangayi.

Sa kasukwahi, ang Bibliya mismo nagdasig kanato nga tun-an kini pag-ayo. Bahin sa mga taga-Berea sa panahon ni Pablo, ang Kasulatan nag-ingon: ‘Ilang gidawat ang pulong uban ang tumang kaikag sa hunahuna, nga sa adlaw-adlaw maampingong nagsusi sa Kasulatan kon tinuod ba kining mga butanga.’ (Buhat 17:11) Sama kanila, kinahanglan nga imong wad-on ang bisan unsang negatibong panglantaw bahin sa Bibliya. Basaha ang Pulong sa Diyos uban ang bukas nga hunahuna, sa tuyo nga imong masabtan ang makapalipay nga mensahe sa Diyos.