Mga Bahandi nga Gikan sa Diyos

KON ikaw magmatinumanon sa Diyos, panalanginan ka ba niyag mga bahandi? Posible kana, apan lagmit dili sama sa bahandi nga imong gidahom. Tagda si Maria nga inahan ni Jesus. Ang manulondang si Gabriel nagpakita kaniya ug miingon nga siya “pinaboran kaayo” sa Diyos ug iyang ipahimugso ang Anak sa Diyos. (Lucas 1:28, 30-32) Apan si Maria dili bahandianon. Human matawo si Jesus, si Maria naghalad ug “usa ka paris nga tukmo o duha ka piso nga salampati,” nga maoy sagad ihalad sa mga kabos ngadto kang Jehova.—Lucas 2:24; Levitico 12:8.

Ang kakabos ba ni Maria nagpasabot nga siya wala panalangini sa Diyos? Wala gayod, kay gani sa dihang miduaw siya kang Elisabet nga iyang paryente, “si Elisabet napuno sa balaang espiritu, ug siya mipatugbaw sa makusog nga tingog ug miingon: ‘Bulahan ikaw [Maria] sa mga kababayen-an, ug bulahan ang bunga sa imong tagoangkan!’” (Lucas 1:41, 42) Si Maria nakapribilehiyo nga mahimong inahan sa pinalanggang Anak sa Diyos dinhi sa yuta.

Si Jesus mismo dili dato. Gawas nga siya natawo diha sa makaluluoy nga dapit ug gipadako sa kabos nga ginikanan, siya nagpabiling kabos sa tibuok niyang kinabuhi dinhi sa yuta. Kas-a iyang giingnan ang usa ka tawo nga gustong mahimong iyang disipulo: “Ang mga irong ihalas may mga lungib ug ang mga langgam sa langit may mga batoganan, apan ang Anak sa tawo walay dapit nga kapahilunaan sa iyang ulo.” (Lucas 9:57, 58) Bisan pa niana, ang gihimo ni Jesu-Kristo sa dihang siya dinhi sa yuta naghatag ug kahigayonan sa iyang mga disipulo sa pagbaton ug dagayang bahandi. Si apostol Pablo misulat: “Siya nahimong kabos tungod kaninyo, aron kamo mahimong dato pinaagi sa iyang kakabos.” (2 Corinto 8:9) Unsang matanga sa bahandi ang gihatag ni Jesus sa iyang mga disipulo? Ug unsa nga bahandi ang mahimo natong mabatonan karon?

Unsa nga Matang sa mga Bahandi?

Ang materyal nga mga bahandi sagad maoy babag sa pagbaton ug pagtuo sa Diyos tungod kay ang usa ka tawong dato mahimong mosalig sa iyang bahandi inay sa Diyos. Si Jesus miingon: “Pagkalisod gayod alang sa mga sapian ang pagsulod sa gingharian!” (Marcos 10:23)  Busa, dayag nga dili materyal nga mga butang ang bahandi nga gitanyag ni Jesus sa iyang mga disipulo.

Sa pagkatinuod, kabos ang kadaghanan sa mga Kristohanon sa unang siglo. Sa dihang ang usa ka tawo nga bakol sukad sa iyang pagkahimugso nangayog gasa sa kaluoy, si Pedro miingon: “Ako walay plata ug bulawan, apan unsay ania kanako maoy akong ihatag kanimo: Sa ngalan ni Jesu-Kristo nga Nasaretnon, lakaw!”—Buhat 3:6.

Ang mga pulong sa disipulong si Santiago nagpakita usab nga kadaghanan sa mga membro sa Kristohanong kongregasyon maoy mga kabos. Siya misulat: “Pamati, hinigugma ko nga mga igsoon. Gipili sa Diyos ang mga kabos maylabot sa kalibotan aron mahimong dato sa pagtuo ug mga manununod sa gingharian, nga iyang gisaad niadtong nahigugma kaniya, dili ba?” (Santiago 2:5) Dugang pa, si apostol Pablo usab miingon nga kadaghanan sa gipanawag aron mahimong bahin sa Kristohanong kongregasyon maoy dili mga “maalamon sa unodnong paagi” o “gamhanan” o “hamili.”—1 Corinto 1:26.

Kon ang bahandi nga gihatag ni Jesus sa iyang mga disipulo dili materyal nga mga butang, nan unsa kana? Diha sa sulat nga gipadala ni Jesus sa kongregasyon sa Smirna, siya miingon: “Nahibalo ako sa imong kasakitan ug kakabos—apan ikaw dato.” (Pinadayag 2:8, 9) Bisag kabos ang mga Kristohanon sa Smirna, sila nakabaton ug bahandi nga labaw pag bili sa plata o bulawan. Sila dato tungod sa ilang pagtuo ug sa ilang pagkamaunongon sa Diyos. Ang pagtuo bililhon tungod kay kini “wala mabatoni sa tanang tawo.” (2 Tesalonica 3:2) Sa pagkatinuod, kadtong walay pagtuo kabos sa panan-aw sa Diyos.—Pinadayag 3:17, 18.

Mga Bahanding Mabatonan Gumikan sa Pagtuo

Sa unsang paagi ang pagtuo bililhon? Ang mga tawo nga adunay pagtuo sa Diyos makapahimulos sa ‘bahandi sa kalulot sa Diyos ug  sa iyang pagkamainantoson ug hataas-nga-pailob.’ (Roma 2:4) Sila makabaton usab ug “kapasayloan sa [ilang] kalapasan” tungod sa ilang pagtuo sa halad-lukat ni Jesus. (Efeso 1:7) Dugang pa, sila makabaton ug kaalam nga itagana sa “pulong ni Kristo.” (Colosas 3:16) Samtang sila mag-ampo sa Diyos uban ang pagtuo, “ang kalinaw sa Diyos nga labaw sa tanang panghunahuna” magabantay sa ilang mga kasingkasing ug mga hunahuna, nga maghatag kanilag katagbawan ug kalipay.—Filipos 4:7.

Gawas niini nga mga kaayohan, kadtong magpasundayag ug pagtuo sa Diyos pinaagi sa iyang Anak nga si Jesu-Kristo makabaton sa kahibulongang paglaom nga mabuhi sa walay kataposan. Daghang tawo ang sinati sa pulong ni Jesu-Kristo nga nag-ingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.” (Juan 3:16) Ang maong paglaom molig-on kon ang usa makabaton ug tukmang kahibalo bahin sa Amahan ug sa Anak, tungod kay si Jesus usab miingon: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Sagad, ang mga panalangin sa Diyos maoy espirituwal nga mga butang, apan kini aduna usay emosyonal ug pisikal nga mga benepisyo. Tagda pananglitan si Dalídio nga taga-Brazil. Sa wala pa siya makabaton ug tukmang kahibalo bahin sa katuyoan sa Diyos, siya palahubog. Kini nakadaot sa iyang relasyon sa iyang pamilya. Dugang pa, siya nagkaproblema usab sa pinansiyal. Dayon siya misugod sa pagtuon sa Bibliya uban sa mga Saksi ni Jehova ug mihimog dakong kausaban.

Tungod sa iyang mga nakat-onan, nabiyaan ni Dalídio ang iyang bisyo. Siya nakahimog dakong pag-uswag sa espirituwal, nga siya miingon, “Kaniadto magsige kog adto sa mga bar; karon magsige na kog sangyaw sa mga kabalayan.” Siya nahimong bug-os panahong ministro sa Pulong sa Diyos. Tungod sa maong mga kausaban, miarang-arang ang iyang panglawas ug ang iyang kahimtang sa pinansiyal. Si Dalídio miingon, “Ang kuwarta nga para unta sa akong bisyo, karon ako nang gigamit sa pagtabang sa mga nanginahanglan o sa pagpalit sa akong mga kinahanglanon.” Siya nakabaton usab ug tinuod nga mga higala tungod sa iyang pagpakig-uban sa mga tawo nga sama kaniya nga nagpabili sa espirituwal nga mga butang. Si Dalídio karon nakasinatig kalinaw sa hunahuna ug katagbawan nga wala niya dahomang iyang mabatonan sa wala pa siya makakat-on bahin sa Diyos.

Ang usa pa ka pananglitan nga nahimong matagbawon ang kinabuhi tungod sa pag-ugmad ug pagtuo kang Jehova nga Diyos, mao ang kasinatian ni Renato. Kon imong makita ang iyang malipayon ug mapahiyomong panagway karon, dili ka gayod makaingon nga siya adunay pait nga kasinatian. Mao pa gyoy pagkahimugso niya sa dihang siya giabandonar sa iyang inahan. Siya gisulod sa bag ug gibilin ilalom sa lingkoranan. Siya dunay mga bun-og ug samad-samad, ug gani wala pa maputol ang iyang pusod. Dihay duha ka babaye nga milabay ug ilang nakita nga naglihok ang bag ilalom sa lingkoranan. Sa sinugdan abi nilag iring ang sulod sa maong bag. Sa dihang ilang nakita nga bata diay ang sulod niini, ila dayon siyang gidala sa ospital aron matambalan.

Ang usa sa maong mga babaye maoy Saksi ni Jehova, ug iyang giestoryahan ang laing Saksi, nga si Rita, bahin sa bata nga ilang nakaplagan. Si Rita makapila na makuhai sa iyang gisabak, ug aduna lamang siyay usa ka anak nga babaye. Gusto kaayo siyang makabaton ug anak nga lalaki, busa iyang gisagop si Renato.

 Sa bata pa lang si Renato, siya nahibalo na nga dili si Rita ang iyang tinuod nga inahan. Apan siya giatiman ug gipangga pag-ayo ni Rita ug siya gitudloan sa mga prinsipyo sa Bibliya. Samtang siya nagdako, siya nainteres sa espirituwal nga mga butang. Siya mapasalamaton usab kaayo nga siya giluwas niadtong siya masuso pa. Motulo ang iyang mga luha sa matag higayon nga iyang mabasa ang mga pulong ni salmistang David: “Kon ugaling biyaan ako sa akong amahan ug sa akong inahan, si Jehova mismo magsagop kanako.”—Salmo 27:10.

Isip pagpakitag apresasyon sa tanang gibuhat ni Jehova kaniya, si Renato nagpabawtismo niadtong 2002 ug nahimong bug-os panahong ministro pagkasunod tuig. Wala pa gihapon niya mailhi ang tinuod niyang ginikanan ug lagmit dili na gayod niya mailhan pa. Bisan pa niana, si Renato mibati nga ang usa sa labing bililhong gasa nga iyang nadawat mao ang pagkaila ug pagkabatog pagtuo kang Jehova ingong iyang mahigugmaon ug mapinanggaong Amahan.

Lagmit ikaw nagtinguha nga makabaton ug suod nga relasyon sa Diyos, nga maoy makahatag ug katagbawan sa imong kinabuhi. Ang kahigayonan nga masuod kang Jehova ug sa iyang Anak nga si Jesu-Kristo bukas sa tanan—dato man o kabos. Lagmit dili ka mahimong bahandianon tungod niana, apan makabaton kag kalinaw sa hunahuna ug katagbawan nga dili kabayran ug salapi. Tinuod gayod ang mga pulong nga mabasa sa Proverbio 10:22: “Ang panalangin ni Jehova—mao kana ang makapadato, ug dili niya kana dugangan ug kasakit.”

Si Jehova nga Diyos interesado kaayo sa mga tawo nga gustong makigsuod kaniya: “Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.” (Isaias 48:18) Siya nagsaad usab nga kadtong moduol kaniya uban ang hustong motibo ug tinamdan dagayang pagapanalanginan: “Ang sangpotanan sa pagpaubos ug pagkahadlok kang Jehova maoy bahandi ug himaya ug kinabuhi.”—Proverbio 22:4.

[Blurb sa panid 5]

Bisag kabos sa materyal ang pamilya ni Jesus, sila dagayang gipanalanginan sa Diyos

[Hulagway sa panid 6]

Ang pagtuo sa Diyos moresultag kalinaw, katagbawan, ug kalipay