Ang Bibliya Makabag-o sa Kinabuhi

UNSAY gihimo sa kanhing membro sa gang ug adik sa marijuana sa pagbuntog sa iyang bisyo? Nganong gipaputlan sa usa ka membro sa banda ang iyang taas nga buhok ug gisalikway ang paborito niyang musika? Unsay nagpalihok sa usa ka tawong dili motuog relihiyon ug dili moilag awtoridad sa gobyerno aron mahimong magwawali? Atong susihon kon unsay ilang giingon.

“Akong Nabuntog ang Akong Bisyo.”​—⁠PETER KAUSANGA

EDAD: 32

NASOD: NAMIBIA

KANIADTO: MEMBRO SA GANG UG ADIK SA MARIJUANA

KAAGI: Ako nagdako sa Kehemu, usa sa upat ka dagkong komunidad sa lungsod sa Rundu. Ang panginabuhi sa mga tawo didto mao ang pagpamaligyag dawa, kahoy, ug uling.

Sa nag-edad kog dos anyos, namatay ang akong mama mao nga ang akong lola ang nagpadako nako. Simple lang ang among kinabuhi. Dili ko rebelyoso, apan tungod sa barkada, kanunay kong mahitumpawak sa problema. Sa eskuylahan, namembro ko sa gang. Tungod niini, ako nalangkit sa mga rambol, pagpanghasi, pagpangawat, pagpayuhot ug diamante, paghuboghubog ug pag-abuso sa droga. Kaduha ko mapriso tungod sa pagpanglungkab ug pagpangilad.

Miundang kog eskuyla sa dihang hayskul ko ug sa ulahi mibiya ko sa among lungsod ug sa among gang. Gusto kong magbag-o. Apan adik gihapon ko sa marijuana. Usahay mobaktas pa gani kog pila ka kilometro aron lang makapalit niini.

GIBAG-O SA BIBLIYA ANG AKONG KINABUHI: Sa sayong bahin sa 1999, nahibalag nako ang mga Saksi ni Jehova nga nagtanyag sa ilang literatura sa mga tawo diha sa dalan. Ila kong gitratar uban ang pagtahod ug dignidad, ug natandog kaayo ko niini. Ang mensahe sa literatura nga akong nadawat nagkombinsir kanako nga akong nakaplagan ang tinuod nga relihiyon. Kugi nakong gitun-an ang Bibliya ug nakaamgo nga kinahanglang bag-ohon ko ang akong kinabuhi aron mapahimut-an si Jehova nga Diyos.

Nagtakda kog petsa sa paghunong sa pagpanigarilyo ug dayon gidispatsar ang tanan kong gamit nga nalangkit niini. Gihangyo sab nako ang akong mga higala nga dili na ko nila tagaag  sigarilyo ug nga dili na manigarilyo duol nako. Bisan pa niini, wala ko molampos. Kaduha ko natental sa pagpanigarilyo ug pag-marijuana. Apan wala ko mawad-ig paglaom. Gihinumdoman nako ang prinsipyo sa Proverbio 24:16: “Ang tawong matarong mahimong matumba sa makapito, ug siya mobangon gayod.” Sa ngadtongadto, akong nabuntog ang akong bisyo.

Samtang miuswag ang akong kahibalo kang Jehova, misamot ang akong tinguha nga mahimo siyang kinasuoran nakong higala. Usa ka teksto sa Bibliya nga nakatandog kanako mao ang Salmo 27:10: “Kon ugaling biyaan ako sa akong amahan ug sa akong inahan, si Jehova mismo magsagop kanako.” Samtang padayon kong nagtuon sa Bibliya, napamatud-an ko kanang mga pulonga. Si Jehova nahimong akong tinuod ug mapinanggaong Amahan.

Regular pod kong nakig-uban sa mga Saksi ni Jehova. Nakita ko kanila ang tinuod nga panaghigalaay ug gugma sa usag usa. Karon pa ko nakasinati niini.

MGA KAAYOHAN NGA AKONG NABATONAN: Sa tabang ni Jehova ug sa mga Saksi, maayo na ang akong hitsura, pamesti, panggawi, ug sinultihan. Sama kog bati nga hantatawo nga nahimong nindot nga alibangbang. Nalipay kaayo ang akong mga paryente sa akong kausaban ug misalig na sila kanako. Karon minyo na ko ug naningkamot nga mahimong mahigugmaong bana ug mapinanggaong amahan.

“Nakaplagan na Nako ang Tinuod nga Katuyoan sa Kinabuhi.”​—⁠MARCOS PAULO DE SOUSA

EDAD: 29

NASOD: BRAZIL

KANIADTO: MEMBRO SA THRASH METAL NGA BANDA

KAAGI: Ang among pamilya nagpuyo sa lungsod sa Jaguariuna, sa São Paulo. Ang akong ginikanan sirado Katoliko, ug usa ko ka sakristan sa batan-on pa. Tungod niini, gianggaan kog Padre sa akong mga klasmet sa elementarya. Apan pag-edad nakog 15, nahilig ko sa musika nga heavy metal rock. Nakig-uban ko sa mga rakista ug nagpataas kog buhok. Ug niadtong 1996, gitabangan ko sa akong papa nga makapalit sa akong unang drum kit.

Niadtong 1998, namembro ko sa usa ka thrash metal rock nga banda. Ang among musika sataniko ug law-ay. Kini nagtuboy sa kapintasan. Naapektohan niini ang akong panghunahuna, panggawi, ug kinaiya. Negatibo na kaayo ko ug agresibo.

GIBAG-O SA BIBLIYA ANG AKONG KINABUHI: Una nakong nahibalag ang mga Saksi ni Jehova niadtong 1999. Ila kong gitanyagan nga magtuon sa Bibliya ug ako kining gidawat bisan pag dili kaayo ko interesado. Ang akong nakat-onan sa Bibliya nakapausab sa akong panglantaw sa kinabuhi.

Nailhan ko sa mga tawo nga taas ug buhok ug gianggaan sab ko nila nga “the rock star” o “the drummer.” Apan ang pag-apil sa banda naghimo kanakong makikaugalingon ug  maindigon, ug dili ko malipayon bisan pa sa akong kasikat. Nakita nako nga walay direksiyon ang kinabuhi sa mga rakista nga akong giidolo. Sa ngadtongadto akong nasabtan nga aron mapahimut-an si Jehova nga Diyos, angay kong biyaan ang heavy metal nga musika ug ang imoral nga pagkinabuhi ug idolatriya nga nalangkit niini.

Hilig kaayo kog heavy metal ug ganahan sab kog taas nga buhok. Naghunahuna ko kon kaya ba nako nga wala kini. Grabe usab kong masuko ug kinahanglang tun-an nako ang pagkontrol niini. Apan pinaagi sa akong pagtuon sa Bibliya, milawom ang akong gugma kang Jehova. Sanglit ako nakakat-onan bahin sa gugma, pailob, ug kaluoy sa Diyos, ako nasuod kaniya. Ako miampo kang Jehova nga tabangan ko nga magbag-o, ug gitubag niya kana. Akong napamatud-an nga tinuod ang giingon sa Hebreohanon 4:12: “Ang pulong sa Diyos buhi ug gamhanan.”

Sa dihang nakig-uban ko sa mga Saksi ni Jehova, akong nakita nga lahi sila. Karon pa ko makakita ug gugma nga tinud-anay. Kini nga gugma makita ilabina panahon sa dagkong panagkatigom sa mga Saksi. Nakadayeg kaayo ko sa mga boluntaryo nga nagkugi aron mahimong komportable ang mga tumatambong.

MGA KAAYOHAN NGA AKONG NABATONAN: Sa tabang ni Jehova, ako nang mapugngan ang akong kasuko. Dili na ko makikaugalingon ug garboso.

Tinuod, dihay panahon nga mingawon ko sa akong kanhing estilo sa kinabuhi​—⁠apan karon dili na. Nakaplagan na nako ang tinuod nga katuyoan sa kinabuhi. Nalipay ko nga ako nakakat-on nga mahimong interesado sa ubang tawo ug sa ilang kaayohan.

“Akong Nasinati ang Kalipay nga Mahalon ang Uban.”​—⁠GEOFFREY NOBLE

EDAD: 59

NASOD: AMERICA

KANIADTO: NAGSALIKWAY SA AWTORIDAD SA RELIHIYON UG SA GOBYERNO

KAAGI: Ako nagdako sa Ipswich, Massachusetts, usa ka lungsod duol sa baybayon nga ang molupyo mga trabahante. Sa hamtong na ko, ako mipuyo sa hilit nga lugar sa Vermont. Kon ibase sa estilo sa kinabuhi sa mga taga-North America, kami sa akong puyopuyo simple kaayo. Wala miy koryente, busa mangahoy mi sa lasang aron gamiton sa pagpainit sa balay ug pagluto. Ang among kasilyas anaa sa gawas ug wala miy tubig sa gripo sa halos tibuok tuig. Among gisalikway ang establisadong katilingban, ug mabanaag kana sa among hitsura. Kas-a gipanghambog pa gani nako nga wala  nako sudlaya ang akong buhok sulod sa unom ka bulan.

Niadtong tungora, ang America nakiggubat sa Vietnam. Kini nakaapektar sa akong tinamdan sa awtoridad. Akong nakita ang kasalingkapaw sa gobyerno ug sa relihiyon. Para nako dili kasaligan ang maong mga institusyon ug kita ang angayng modesisyon kon unsay husto o sayop. Busa wala ko maghunahuna nga sayop ang pagkawat sa mga butang nga akong gikinahanglan.

GIBAG-O SA BIBLIYA ANG AKONG KINABUHI: Kami sa akong puyopuyo misulay sa pagbasa sa Bibliya apan wala mi makasabot niini. Gusto na kong moundang sa pagdroga. Gusto usab sa akong puyopuyo nga magpakasal na mi ug manganak. Nianang higayona, dihay Saksi ni Jehova nga miduaw kanamo ug iya ming gitun-an sa Bibliya.

Wala madugay akong nahunong ang akong mga bisyo; apan nalisdan ko sa pagbag-o sa akong tinamdan bahin sa awtoridad. Naanad ko nga kuwestiyonon ang tanang butang. Nagdako ko nga walay gisunod nga balaod, busa nalisdan ko sa pagdawat nga kinahanglan kong magpasakop sa uban.

Motuo ko nga dunay Maglalalang, apan kulang kog kahibalo bahin kaniya. Hinuon, sa dihang nagtuon ko sa Bibliya, nailhan nako si Jehova nga Diyos. Tin-aw nakong nakat-onan kon unsay buot niyang ipabuhat kanako. Nakat-onan usab nako nga himoon niyang paraiso ang yuta. (2 Pedro 3:13) Kini ang nagtukmod kanako nga magbag-o aron takos nga makaalagad kaniya.

Ako ilabinang nakadayeg sa mga Saksi ni Jehova tungod kay sila dili moapil sa gubat. Wala koy laing nahibaloang internasyonal nga relihiyon nga nagsunod niana nga sukdanan sa Bibliya.

Nahibalo ko nga kon moalagad ko kang Jehova, angay nga hapsay ang akong panagway. Sa sinugdan, nalisdan ko sa pagsunod sa sukdanan sa pamesti sa mga Saksi. Ako ug ang akong mga higala walay desenteng sinina, pantalon, o sapatos. Ug ilabinang wala koy korbata! Apan nagpatupi ko ug gihapsay ang akong panagway. Gani, akong nahinumdoman ang unang higayon nga ako misangyaw. Akong nakita ang akong bag-ong hitsura diha sa bildo sa pultahan. Nakaingon ko sa akong kaugalingon, ‘Naunsa man ko?’ Sa ngadtongadto, nagustohan ra nako ang akong bag-ong hitsura.

MGA KAAYOHAN NGA AKONG NABATONAN: Akong gipakaslan ang akong puyopuyo ug hangtod karon malipayon ming nag-uban. Among namatuto ang among tulo ka anak sa paghigugma ug sa pag-alagad kang Jehova. Nalipay usab ko nga nakatabang sa uban nga makakat-on sa kamatuoran sa Bibliya nga maoy nakatabang nako sa pagbag-o sa akong kinabuhi.

Kaniadto dili importante kanako kon unsay hunahunaon sa uban. Karon akong nasinati ang kalipay nga mahalon ang uban ug mahalon usab sa uban.

[Blurb sa panid 26]

‘Mobaktas kog pila ka kilometro aron lang makapalit ug marijuana’

[Blurb sa panid 28]

“Ang akong nakat-onan sa Bibliya nakapausab sa akong panglantaw sa kinabuhi”

[Blurb sa panid 29]

“Nalisdan ko sa pagsunod sa sukdanan sa pamesti sa mga Saksi”