Ang Kingdom Hall maoy usa ka dapit sa pagsimba nga gigamit sa mga Saksi ni Jehova alang sa ilang relihiyosong mga kalihokan. Libo-­libong Kingdom Hall ang gigamit sa tibuok kalibotan. Matag semana, kapin sa 105,000 ka kongregasyon sa mga Saksi ni Jehova ang magtigom diha niana.

Sa Kingdom Hall ipahigayon ang mga programa sa pagtuon sa Bibliya ug mga pakigpulong. Ang kadaghanan niini adunay plataporma diin gidumala ang panagkatigom. Kasagaran, kini adunay mga lingkoranan alang sa mga 100 ngadto sa 300 ka tawo. Ang ubang Kingdom Hall adunay usa o kapin pang mga lawak, opisina, ug usa ka gamayng librarya nga may binase-sa-Bibliya nga mga basahon ug uban pang reperensiya nga mahimong gamiton sa mga membro sa kongregasyon.

Apan ang Kingdom Hall walay altar, imahen, o mga krus nga kasagarang makita diha sa mga simbahan sa Kakristiyanohan. Ngano? Ang mga Saksi ni Jehova nagtuo nga ang paggamit niana supak sa sugo sa Bibliya nga ‘mokalagiw gikan sa idolatriya.’ (1 Corinto 10:14; Juan 4:24) Daghang simbahan ug templo komplikado kaayog disenyo ug luho kaayog dekorasyon. Apan ang mga Kingdom Hall simple lang ug praktikal ang disenyo. Ang gihatagag pagtagad dili ang bilding kondili ang pagtudlo sa Bibliya nga gipahigayon diha niana.

Nganong gitawag kinig Kingdom Hall? Ang mga tigom sa Kingdom Hall pangunang nasentro sa mga pagtulon-an sa Bibliya ug sa tema sa pagwali ni Jesus​—⁠ang “gingharian sa Diyos” o kingdom of God. (Lucas 4:43) Busa ang ngalang Kingdom Hall, nga namugna sa katuigang 1930, haom nga naghubit sa katuyoan sa tinukod​—⁠ang pagpalambo sa matuod nga pagsimba ug nagsilbing sentro sa pagsangyaw sa “maayong balita sa gingharian.” (Mateo 24:14) Tungod niana, ang mga Kingdom Hall dili gamiton alang sa negosyo, parti, o kalingawan. Ang pagtukod, pagmentinar, ug uban pang galastohan gisuportaran sa boluntaryong mga amot. Walay pagpangolekta panahon sa tigom. Adunay kahon nga permanenteng gipuwesto sa usa ka dapit alang niadtong gustong moamot.

Adunay samang katuyoan ang mga Kingdom Hall sa tibuok kalibotan, apan ang gidak-on ug estilo niini lainlain. Kana nagdepende sa mabatonang materyales, klima, ug sa kahimtang sa panalapi sa mga Saksi ni Jehova sa usa ka dapit. Ang pipila ka tinukod gama sa haloblak, kahoy, ug bato. Ang uban tingali gitukod nga bukas ang mga kilid, nga may mga bungbong nga kawayan ug atop nga pawod.

Ang tanan mahimong motambong sa mga tigom sa Kingdom Hall. (Hebreohanon 10:25) Sa pagkatinuod, kada semana adunay binase-sa-Bibliya nga pakigpulong alang sa publiko nga makapainteres sa mga membro sa kongregasyon ug sa mga bisita. Gidapit ka namo sa pagtambong sa Kingdom Hall sa inyong lugar?