Pakigsuod sa Diyos

Siya Naghatag Kanatog Kagawasan sa Pagpili

2 HARI 18:1-7

ANG mga ginikanan angayng maghatag ug maayong panig-ingnan sa ilang mga anak. Kini motabang sa mga anak sa pag-ugmad ug maayong mga hiyas ug paghimog maayong mga desisyon sa ilang kinabuhi. Ikasubo, daghang ginikanan ang dili maayog panig-ingnan. Nagpasabot ba kini nga ang ilang mga anak dili na gayod magmalamposon sa kinabuhi? Matubag kana pinaagi sa pagkonsiderar sa makapadasig kaayo nga kamatuoran—si Jehova naghatag kanatog kagawasan sa pagpili. Tagda ang asoy bahin kang Ezequias, nga atong mabasa sa 2 Hari 18:1-7.

Si Ezequias maoy “anak nga lalaki ni Ahaz nga hari sa Juda.” (Bersikulo 1) Gidaldal ni Ahaz ang iyang mga sakop sa pagbiya kang Jehova. Gipasiugda niining daotang hari ang pagsimba kang Baal, nga naglangkit sa paghalad ug tawo. Iyang gihalad ang usa o pipila sa mga igsoon ni Ezequias. Gipasira ni Ahaz ang templo ug “naghimo ug mga halaran alang sa iyang kaugalingon sa matag suok sa Jerusalem.” Iyang ‘gipasuko si Jehova.’ (2 Cronicas 28:3, 24, 25) Daotan kaayo ang amahan ni Ezequias. Apan wala na bay mahimo si Ezequias aron dili masundog ang panig-ingnan sa iyang amahan?

Sa dihang si Ezequias na ang hari, gipakita niya nga lahi siya sa iyang amahan. “Siya nagpadayon pagbuhat kon unsay matarong sa mga mata ni Jehova.” (Bersikulo 3) Si Ezequias misalig kang Jehova, ug “walay usa nga sama kaniya taliwala sa tanang hari sa Juda.” (Bersikulo 5) Sa unang tuig sa iyang pagmando, gisugdan sa batan-ong hari ang kampanya dapig sa matuod nga pagsimba nga tungod niana sa ulahi nawala ang hatag-as nga mga dapit, diin gisimba ang paganong mga diyos. Gibuksan niya ang templo, ug napasig-uli ang putling pagsimba. (Bersikulo 4; 2 Cronicas 29:1-3, 27-31) Si Ezequias “nagpadayon sa pag-unong kang Jehova . . . , ug si Jehova nag-uban kaniya.”—Bersikulo 6, 7.

Unsay nakatabang kang Ezequias nga dili masundog ang daotang panig-ingnan sa iyang amahan? Posible kaha nga ang iyang inahan nga si Abias nagpakitag maayong panig-ingnan kaniya? O tungod kaha sa maayong impluwensiya ni Isaias, kinsa nag-alagad na ingong propeta sa wala pa matawo si Ezequias? a Ang Bibliya walay gisulti. Bisan pa niana, usa ka butang ang tino: Si Ezequias mipili sa pagsubay sa dalan nga sukwahi nianang sa iyang amahan.

Ang asoy ni Ezequias makadasig sa mga tawo nga sa bata pa wala pakitaig maayong panig-ingnan sa ilang ginikanan. Dili na nato mausab ang atong kagahapon, apan wala kana magpasabot nga kita dili na molampos. Kita makahimog maayong mga desisyon nga maghatag kanatog malipayong kaugmaon. Sama ni Ezequias, kita makahimo sa paghigugma ug pagsimba sa matuod nga Diyos, si Jehova. Pinaagi niana imong mabatonan ang makapatagbawng kinabuhi karon ug ang kinabuhing walay kataposan sa bag-ong kalibotan sa Diyos. (2 Pedro 3:13; Pinadayag 21:3, 4) Mapasalamaton gayod kita sa atong mahigugmaong Diyos nga naghatag sa matag usa kanato ug nindot kaayo nga gasa—ang kagawasan sa pagpili!

[Footnote]