Mga Magbabasa Nangutana . . .

Asa ang Paraiso nga Gihisgotan sa Bibliya?

▪ Gisaaran ni Jesus ang himalatyong tawo nga maisogong nagpahayag ug pagtuo kaniya: “Ikaw makauban nako sa Paraiso.” (Lucas 23:43) Asa moadto ang maong tawo? Ang Paraiso ba anaa sa langit, sa yuta, o sa laing dapit diin ang mga tawo maghulat ug paghukom?

Ang atong mga katigulangan nagpuyo kanhi sa Paraiso. Ang Bibliya nag-ingon kanato: “Si Jehova nga Diyos nagtanom ug usa ka tanaman sa Eden, sa dapit sa sidlakan, ug didto iyang gibutang ang tawo nga iyang giumol. . . . Ug si Jehova nga Diyos nagkuha sa tawo ug nagpahiluna kaniya sa tanaman sa Eden aron sa pagtikad niini ug sa pag-atiman niini.” (Genesis 2:8, 15) Sa dihang gihubad kini sa Grego, ang gigamit nga pulong alang sa “tanaman” maoy pa·raʹdei·sos, nga sa Cebuanong pulong “paraiso.”

Maingon nga ang magtiayon magpadako sa ilang pinuy-anan kon modaghan na ang mga anak, ang atong unang mga ginikanan gidahom usab nga magpasangkad sa Paraiso saylo pa sa mga utlanan sa Eden kon modaghan na ang ilang pamilya. Gisultihan sila sa Diyos: “Pun-a ang yuta ug gamhi kini.”—Genesis 1:28.

Busa katuyoan sa atong Maglalalang nga ang mga tawo magpuyo ug manganak sa Paraiso dinhi sa yuta. Sila mabuhi niini nga yutan-ong tanaman hangtod sa hangtod nga dili magkinahanglag sementeryo. Ang yuta mahimong permanenteng pinuy-anan sa tawo. Ang kinaiyanhong katahom sa atong planeta makahatag gayod kanatog dakong kalipay! Kita gilalang aron magpuyo sa usa ka matahom nga paraiso.

Nausab ba ang katuyoan sa Diyos? Wala. Kay si Jehova nagpasalig kanato: “Maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an.” (Isaias 55:11) Kapin sa 3,000 ka tuig human lalanga ang tawo, ang Bibliya nag-ingon bahin sa “Mag-uumol sa yuta ug ang Magbubuhat niini” nga siya “wala maglalang niini sa wala lamay kapuslanan,” apan siya “nag-umol niini aron pagapuy-an.” (Isaias 45:18) Ang kabubut-on sa Diyos wala mausab. Ang yuta mahimo gayong paraiso sa umaabot.

Makaiikag nga daghang teksto sa Bibliya bahin sa Paraiso ang naghubit sa kinabuhi sa yuta. Pananglitan, ang usa ka tagna ni Isaias nag-ingon: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga.” (Isaias 65:21) Asa man ang mga balay tukoron ug ang mga kaparasan itanom? Asa man ang mga prutas kaonon? Sa yuta. Ang Proverbio 2:21 tin-awng nag-ingon: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana.”

Gihisgotan usab ni Jesus ang yutan-ong paraiso. Tinuod, siya nagsaad usab ug langitnong paraiso, apan alang lamang kini sa mga pinili. (Lucas 12:32) Human mamatay, sila banhawon ngadto sa langitnong Paraiso ug moduyog kang Kristo aron mandoan ang yutan-ong Paraiso. (Pinadayag 5:10; 14:1-3) Tinoon niini nga langitnong mga magmamando nga ang Paraiso sa yuta madumala sa hustong paagi ug mamentinar sumala sa mga sukdanan sa Diyos.

Nasayod si Jesus nga mao kini ang kabubut-on sa Diyos alang sa yuta, sanglit siya didto man sa langit uban sa iyang Amahan sa dihang gilalang ang tanaman sa Eden. Ang kinabuhi sa umaabot nga yutan-ong paraiso mahimong mabatonan sa tanang tawo nga magpasundayag ug pagtuo karon. (Juan 3:16) Si Jesus nagsaad: “Ikaw makauban nako sa Paraiso.”—Lucas 23:43.

[Picture Credit Line sa panid 25]

© FORGET Patrick/SAGAPHOTO.COM/Alamy