Pagkat-on Gikan sa Pulong sa Diyos

Nganong Angayng Mokat-on sa Diyos?

Kini nga artikulo may mga pangutana nga lagmit imong gikalibgan ug magpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Nganong angayng mokat-on sa Diyos?

Ang Diyos dunay mas maayong balita alang sa tawo. Iyang gisulti kini diha sa Bibliya. Ang Bibliya maoy samag sulat alang kanato gikan sa atong mahigugmaong Amahan sa langit.—Basaha ang Jeremias 29:11.

2. Unsa ang maayong balita?

Ang tawo nagkinahanglag maayong gobyerno. Walay tawhanong magmamando nga nakahanaw sa kapintasan, inhustisya, sakit, o kamatayon. Apan dunay maayong balita. Ang Diyos maghatag sa tawo ug maayong gobyerno nga maghaw-as kanato gikan sa tanang pag-antos.—Basaha ang Daniel 2:44.

3. Nganong hinungdanon gayod nga mokat-on sa Diyos?

Sa di madugay hanawon sa Diyos ang mga tawo nga nagpahinabog pag-antos. Siya karon nagatudlo sa minilyong maaghop nga mga tawo sa pagpahimulos ug mas maayong kinabuhi, nga gipasukad sa gugma. Pinaagi sa Pulong sa Diyos sila nakakat-on kon unsaon sa pagsagubang ang mga problema, sa pagkaplag ug tinuod nga kalipay, ug sa pagpahimuot sa Diyos.—Basaha ang Sofonias 2:3.

 4. Kinsa ang Awtor sa Bibliya?

Ang Bibliya gilangkoban ug 66 ka gagmayng mga basahon. Mga 40 ka tawo ang nagsulat niini. Ang unang lima ka basahon gisulat ni Moises mga 3,500 ka tuig na ang milabay. Ang kataposang basahon gisulat ni apostol Juan kapin sa 1,900 ka tuig kanhi. Apan gisulat sa mga magsusulat sa Bibliya ang hunahuna sa Diyos ug dili ang ilaha. Busa ang Diyos maoy Awtor sa Bibliya.—Basaha ang 2 Timoteo 3:16; 2 Pedro 1:21.

Kita nasayod nga ang Bibliya gikan sa Diyos kay kini tukmang nagtagna sa umaabot sa detalyadong paagi. Walay tawo nga makahimo niana. (Isaias 46:9, 10) Ang Bibliya tin-awng nagbutyag sa mahigugmaong mga hiyas sa Diyos. Kini makapabag-o sa kinabuhi sa mga tawo. Tungod niini minilyon ang nakombinsir nga kini Pulong sa Diyos.—Basaha ang Josue 23:14; 1 Tesalonica 2:13.

5. Sa unsang paagi ikaw makasabot sa Bibliya?

Si Jesus maoy iladong magtutudlo sa Pulong sa Diyos. Bisag ang kadaghanan sa iyang naestorya sinati na sa Bibliya, kinahanglan silang tabangan aron masabtan kini. Busa, gigamit ni Jesus ang lainlaing mga teksto ug gipatin-aw “ang kahulogan sa mga Kasulatan.” Kini nga artikulo nga “Pagkat-on Gikan sa Pulong sa Diyos” mogamit ug samang paagi sa pagtabang kanimo.—Basaha ang Lucas 24:27, 45.

Ang pagkat-on gikan sa Diyos bahin sa katuyoan sa kinabuhi maoy usa ka butang nga makahatag gayod ug kalipay. Apan ang uban tingali dili mahimuot nga ikaw nagbasa sa Bibliya. Ayawg kaluya. Ang imong paglaom sa kinabuhing walay kataposan nagdepende sa imong pagbatog kahibalo bahin sa Diyos.—Basaha ang Mateo 5:10-12; Juan 17:3.

Alang sa dugang impormasyon, tan-awa ang kapitulo 2 niini nga libro, nga gipatik sa mga Saksi ni Jehova.