Nahibalo Ka Ba?

Unsa kining pagpanghagdaw nga giingon sa Bibliya, ug kinsay nakabenepisyo niini?

▪ Gisugo sa Moisesnong Balaod nga dili hutdon pag-ani sa mga mag-uuma ang ilang mga abot sa yuta. Dili nila hutdon pag-ani ang mga lugas daplin sa ilang mga uma. Dili nila panguhaon ang nangatagak o balikan ang mga bunga nga linghod pa sa una nilang pag-ani. Ug kinahanglang ibilin niadtong manughit sa mga sanga sa kahoyng olibo ang mga bunga nga wala mangatagak. (Levitico 19:9, 10; Deuteronomio 24:19-21) Unya ang mga kabos, ilo, balo, ug langyawng mga pumoluyo makahagdaw o makapanguha niana.

Kini nga balaod sa pagpanghagdaw nakabenepisyo sa tanang Israelinhon. Ang mga tag-iya sa yuta maaghat nga magmanggihatagon, ug mosalig sa mga panalangin sa Diyos. Ang mga manghagdaw maaghat usab nga magmakugihon, kay hago man ang pagpanghagdaw. (Ruth 2:2-17) Maseguro niini nga kahikayan nga ang mga kabos dili magutman o makapabug-at sa katilingban. Sila usab dili mobating walay pulos tungod kay magpakilimos o magsalig na lang sa mga hinatag.

Nganong si Solomon nag-importar ug mga kahoy nga gikan pa sa Lebanon alang sa pagtukod sa templo sa Jerusalem?

▪ Ang asoy sa 1 Hari 5:1-10 naghubit bahin sa kasabotan nga gihimo ni Solomon ug Hiram nga hari sa Tiro. Sumala sa maong kasabotan, ang gakit sa mga troso nga sedro ug junipero dad-on ngadto sa Israel nga ipaganoy sa dagat gikan sa Lebanon aron gamiton sa pagtukod sa templo.

Kaniadto, ang sedro maoy pinangita nga baligya sa Tungang Sidlakan. Sa Ehipto ug Mesopotamia, kini nga kahoy kanunayng gigamit ingong sagbayan ug bungbong sa mga templo ug palasyo. Ang gitipigang harianong mga rekord, literaryong sinulat, ug mga inskripsiyon nagpamatuod nga kanunayng giimportar ang sedro ngadto sa lainlaing dapit sa mga siyudad nga estado sa habagatang Mesopotamia, usahay ingong mga inagaw o tributo. Sa Ehipto kini gigamit sa paghimog mga sakayan, lungon ug uban pang mga kasangkapan sa lubong sa hari.

Ang mga sedro sa Lebanon ilabinang nabantog tungod sa kadurable, kaanindot, ug kahumot sa kahoy niini, gawas pa sa pagkadili-daling madutlan niini sa mga insekto. Busa, gigamit ni Solomon ang labing dekalidad nga mga materyales alang sa templo. Karon, pipila na lang ang nahibilin sa mga kahoyng sedro nga kanhi milukop sa kabukiran sa Lebanon.

[Hulagway sa panid 15]

Gidalang mga sedro gikan sa Lebanon, Asiryanhong kinulit gikan sa palasyo ni Sargon

[Credit Line]

Erich Lessing/Art Resource, NY